Daud nwahniara pa na'uli-nawedia Uplerlawna onnila Enal Daud arwalli re la' yawa
18
Hadi de Daud ya'ulli-yawedni la wniatunnu-wniahniarni mak ha rala la mak khi' o'tani la mak kwatunu-kwahniara.
Daud di,
mak khima-kre' Itmatromlawanni.
E nwahniara nhiar di la' ler maka Itmatromlawanni Nanawar doinia e la'a Saul nor wutga Daud arwalli re honona:
2 Daud lirni:
A ralmu nod rer lia O'a Matroma,
a ru'ru-la'yu de eneknek O'a.
3 Matro'mu emeknekama wo'or watu niutni mak ka'ara yaro'wa genni (benteng) mak nhi'inde a'uyade'ela.
Uplerlawnu emeknekama wo'or wat muaka nhi'inde a'uyaheu lia,
me emekwalima keliau-halwa'an mak kaheu reri a'u,
yoma uro'wa targ a lia nayanni.
E' de Naruri-nalai pede Namori-nalewn a'u.
4 Ya'uli-yawedi nden rer lia Itmatromlawanni.
Yoma apuol lia dewade Nolin doin a lia'a a' arwa'lu letgarni.
5-6 A arwa'lu re rtokal rtarg oleka tniokla la a ga'yu ralamni
totpa hota rwutu-rkohog a' pua rodia a lia matmiati ralamni.
Alier tar olek la matmiati-molmuolu ralamni yoma emeknekama gera wawuau liawna nma nwau dioin a'u
pa alier olek la kowlora-pah'a meti.
7 Pede la'pa tah'i lola tieru dewade apuol lia.
Agiwra:
“Matromlawnu ne!
O' de a Uplerlawnu O'a,
pa ma Mtiulan mai a'u!”
Itmatromlawanni Nden nek la E romni nayanni pa Nlin reri-nmat reri a'u.
Nta'wa taru tlinni la a sniumbainu.
8 Pede noh marna mana ndiwra-nda'ala
me la' wo'ora tutulu nayanni la'a noha wikni-ray gerni mana rkahyoi gergera,
yoma la Uplerlawna hankeranni.
9 Orgahi Nwaran aranni,
de mokla-mahu nlergot lola irannu,
me ai mormiori
nor wutga ai kwiari rlergot la wawni ralamni.
10 E Nhi' pa lyanti nahniarit wa,
dewade Nhapar reria kakam metam lawna id pa Nodiernia la yawa.
11 Nha'at la hamormiori mak kamehi-kayona ida (Kerub)
pa Nnem nohora yoma anni nodia.
12 Nnem nohora hamormiori dea
E Nayahew lia wowta-kakma mak kpupun nana.
13 La' gaini ralamni kakam lawna ida nwahita-nwatlen nohora otna-anni
mak kwal lia es nor wut nieka ai.
14 Orgahi-Orha'a Uplerlawna-Mempulwatnu Makdella Tutullu-Lolo'oni Nhar lirni
emeknekama kukru-gauru.
Pede riy honona ratlin nana E lirni mak kwatiaga darat tutulu.
15 E' nekpa Npok doinia ra'pani rella' malwiru-malganan
pa na nreye'era arwalli rella' genni.
Nala kukru-gauru,
hita-tlena pa pro'a-prahka lol walli-walli
dewade arwalli re mana ema wlari tipru-wlari warta lol etnu-liolli.
16 La' noha wikni mak kden la hletan lawna mana ema rkok doinia,
me la'a tani kierna wawannu ho'mana nadwiera.
Yoma Orgahi-Orha'a hankeranni-ralmha'arni ntuin meman la' nohmarna.
17 Nden nek la' heyanan pa Netar doinia limni,
na'nama Nhedga a lia'a gera tlinni.
18 E' ed mak kolin doinia a lia' a arwa'lu maka ha riwra metam keranni,
la'a riy mak kahankeran rer lia mai a'u.
Yoma ir rurni rehi a'u.
19 La' ler maka alier la tututu-wawuau de rma rlewri a'u.
Mere a Matromlawnu Makdenrer die,
edonna Nolin limni mai a'u.
20 E' ed mak kolin doin a lia'a kropna-krieutu ralamni.
E Namori-nalewn a'u yoma a'g ed mak khi' amikria E ralamni.
21 Itmatromni Makdenrer die,
ed mak kwahla a nhio'lu-lie'tu mak kaplola.
Enara'a-napalga a'u yoma a'g edonna ghala.
22 Yoma adien rer lia E deullu-tatarni,
me a'g edonna ghoitio'or tar lia'a Uplerlawna maka akola tieru-gawur nehla.
23 La'a hya' maka E Ne'er taru-ntatar taru,
aliernohora,
me la'pa ha Nakotkota re de a'g edonna uwlari tiar lia.
24 E Natga de agho'a-ghaiya olek a li'mu la yatyata-halala honona,
me uplinu wuakrian tiar lia mak ha riwra do'a-hala.
25 Pede E orgahani mak kwahla a nhio'lu-lie'tu mak kaplola.
Yoma Natga de adiel la'a plola wawannu.
26 Matroma!
Makdenreri O'a!
Omtiulla-msiayn reri riy mak klernohor reri O'a,
me Omhi' kalwiedwed la riy mak khi' kalwiedweda.
27 La riy mak kakleha do'a-hala,
demade Orgahamu Mtiutga de O' nek de edonna Mhi' do'a-hala.
Mere la'pa rlernana riy yatyata-halala,
de Omlia'a ir arwalli.b
28 La'pa rlernana riy maka khu'ru-khelma lol yawa,
de Omrieiya la mormiori-lewlewna,
mere la'pa riy mak katulu-kapetna de,
Omutowra la yawa.
29 O' ed mak ktutnia a wa'du lipli'pu.
Matroma Uplerlawnu ne!
O' ed mak khedga a lia melmelli pa kodia lelerni mai a'u.
30 Yoma o' ed mak kal ruri-lai mai a'u,
totpena awualerna a arwa'lu harahu re.
O' ed mak ktulan mai a'u pede arieiye'er targa lutru yaro'wa genni.
31 Uplerlawna hihi'ini-yapyapni honona re raplollol momuou.
E nnio'oni de tpesiaya.
Itmatromlawanni Makdenrer die,
emeknekama keliau-halwa'an maka ha ra rkaduw reria
riy mak nayahew lia.
32 Yoma Uplerlawna ida Nmeh'a to'a,
Itmatromlawanni inhatta.
E' nanpena emeknekama wo'or wat muaka nhi'inde a'uyaheu lia pa Nruwun reri-na'ahla reri a'u.
33 A Uplerlawnu inhatti,
E' ed mak kala ruri-lai lia a'u,
ne Nhi' loi-talan mak aliola de namtemteman memna.
34 Nhi' aruria a la'ku de emeknekama rusa mak karuri-kalai,
ne Natiaka aliolola la'a wo'or tutulu.
35 E' ed mak kwatutu-kwaye' a' pua u'ara.
Pede agatu we'el targa rapra'pac pa ga wuei arwali.
36 Matroma!
O' ed mak kruwun rer a lia ar ralma,
me O' wal pia ed mak kamori-kalewn a'u.
O' ed mak klin reri-kmat reria a' pua Mtiutu-mhana a lia' ar ralma.
Onnila ralam kalwiedmu mai a'u,
riy rwetwet rer lia a na'nu.
37 Agatga de O' ed mak katiak rer a'u totpena yana a' arwa'lu rhopan pa arian a li'mu.
Pede hota a'g edonna tiuini-diai taru.
38 Aghokra-liai a arwa'lu.
Aghapartiklia re pa agala ir la yawa.
39 Awuakloli-waklallia re,
pa ghelkiai-ghakpera re.
40 Matroma!
O' ed mak kala ruri-lai mai a'u
pa nhi'nande u'unut nan momuoga re.
41 Omhi' nana a' arwa'lu re wlari tipru-wlari wiarta,
pede awunu-wuenna mak ralamni edonna ral momuog a'u re.
42 Arwali re polpuolu-hawaunia re mere riy id mana edonna rma rtulan la ira.
Polpuol inni-wakwak amni la Orgahi-Orha'a
mere E' edonna Nkil matni la.
43 Aghi' ir pa ramkoha-ramnana pa rwal lia en liu'wu-tan miakmu maka anni nod lia'a-nodi miaiya.
Aghoplial ira pede ir emeknekama loka-da'la la loi-talla ralamni.
44 Matroma!
Omulewn a lia riy mak khi' kokokna-rariarni yoma riwra rmalawan mai a'u.
Ne Mhi' a' pua agodi plolli la mak kden la noha-rai piatatra.
Lodna-hairi maka ululu uplin niohora re mana,
la' dodo'ondi de agodi plolli la.
45 Mak kwatiaga hairi-hairi ratlin tut nian a' die,
honona re rhu'ru-rhelam la hya' mak a'ukota.
Ramta'at nande rwaltior la a gai'yu ralamni pa ruh' idma-rrama lia'ara.
46 Honona re wuhurni-tekalli,
me preheni-mkaini re ema rmakuk tiarga,
ne la'a mak karo'wa tar mua'ta la lutur watu la' ar ralma mana rlergot pa rran limni,
de rdiwdiwra-rdada'ala.
47 Matroma,
Omdien reria pa nodi liarni!
Uplerlawnu emeknekama wo'or wat muaka nhi'inde a'uyaheu lia.
U'uli-uwedi O'a.
Mriarni!
Uplerlawna Nmemeh'a ed maka inponni.
E' ed mak kalewan nan a'u.
48 E' ed mak kwahla nan a arwa'lu hihi'ini-yapyapni pa Nal a' pua u'unut nana re.
Lodna-hairi nor wutga luwnu-a'nani re E' ed mak karu'u-katowra la a ga'yu ralamni.
49 Enalewna a lia'a arwa'lu.
Matroma!
O' ed mak kala unut lawna mai a'u,
pede ariehi-tialu niana arwa'lu re.
O' ed mak kolin doin a lia la' arwa'lu mak maklekla-makdiaini re limni ralamni.
50 La' hade pede u'uli-uwedi rer O la'a lodna-hairi me la'a mak kden la noha-rai piatatra mai lyanti nayanni.
Awuatunu-wuahniara de wuet rer lia O nanmu.
51 Uplerlawna ed maka Nal unut lawna la'a a'u,
Daud,
de E rayni maka ha Nwalir niana.
Ne E' ed mak ktutga E sniayn lawanni mak kodi liarni la'a agor wutga durtu-waitu,
la'pa di'na-lohoru pa nodi liarni.