Pompakita
nipopakita i Yesus Kristus ka i Yohanes
Vamba nu Tesa
Isi buku hitu notesaki pompakita nipopakita i Yesus Kristus ka anaguruNa i Yohanes. NipopakitaNa anu majadi ri karoNa mboto bo nte manusia ri dunia. Jadi i Yesusmo Topompopakita, bo Ia muni tona nipopakita riara panggita hitu. Pamulana, Ia nipopakita mpo Ana nu Manusia anu nolipa ri olo kada-kada mpoindo (pasal 1:9-20). Naupu haitu Ia nipopakita mpo Ana Bimba neangga ri sinjori Gadera Kamagaua nu Alatala ri suruga (pasal 5:6-14). Naupu sia, Ia nipopakita mpo Tadulako nesavi jara bula (Pasal 19:11-16). Bo kaupuna, Ia nipopakita mpo Ana Bimba anu nomparenta nosanggani-nggani nte Alatala ri ngata nu Alatala, haitumo Yerusalem nabaru (pasal 21:22-23, 22:1-5).
Buku hitu nitulisi tempo topomparasaya mpuu-mpuu nipandasa sabana pomparasayara i Yesus. Tempo haitu pura-pura todea Roma niparenta mombasomba Magau Mbaso Roma anu niuli Kaisar. Naria sanu topomparasaya nipatesi sabana ira ledo nadota nombasomba Magau haitu, niulira aga i Yesusmo Tupura, ledo Magau Kaisar. Tapi naria muni sanu noura nomparasaya sabana naeka rarana. Jadi, patuju nu tesa riara buku hitu ala mompakaroso rara ntopomparasaya ala ledo moura momparasaya i Yesus nau rapandasa.
Isi buku hitu nipasimbayu ka i Yohanes ante bara sako-ngaya pompakita. Nadea bunga nu tesa, jalili, bo porapa nipake ri pompakita hitu. Nakaja nombapaha batuana pura-pura, tapi pepatuduki nopoko bo nalanto, ivei: Nau damo rapandasa topomparasaya i Yesus, nee kita moura momparasaya. Sabana, i Yesus nipakakuasa nu Alatala bo kaupuna radagiNa Magau nu Seta bo pura-pura baliNa ntanina bo momparenta sampe ri kasae-saena. Bo kita anu bate-batena nangoseaka Ia manggava belo ri dunia nabaru bo momparenta mosanggani-nggani nte Ia.
Riara buku hitu bara sako-mpapitu nipakatantu, evamo:
Pitu-ngaya belo nijanji (1:3, 14:13, 16:15, 19:9, 20:6, 22:7,14)
Pitu-ngaya potoiya Alatala (5:14, 7:12)
Pitu-ngata bo papitu nosa nu Alatala (1:4,11)
Pitu-nggada poindo (1:12) pitu-angu betue (1:16)
Pitu-mpopulu sura (5:1)
Pitu-angu tandu bo pitu-angu mata (5:6)
Pitu-angu tabue (8:21)
Pitu-angu songgo magau (12:3)
Pitu-ngaya pepandasa niisi riara pitu-ntonga tubu (15:6-7)
Papitu balengga bo papitu magau (17:9-10)
Bo naria muni ntanina. Lamoro papitu haitu nirapaka anu nagana bo ledo nakura nuapa-nuapa.
Isi nu Buku
Pantepuuna bo petabe (1:1-8)
Pompakita Pamulana: (1:9-3:22)
I Yesus nipopakita mpo Ana nu Manusia anu nolipa ri olo pitu-nggada poindo (1:9-20)
Petevai-petevai ka topangoseaka i Yesus ri pitu-ngata (Pasal 2-3)
Pompakita Karanduana: (4:1-16:21)
I Yesus nipopakita mpo Ana Bimba anu neangga ri sinjori Gadera Kamagaua nu Alatala ri suruga (Pasal 4-5)
Ana Bimba nombabuka pitu-mpopulu sura nibaluu (6:1-8:5)
Pitu-angu tabue nipopomoni (8:6-11:19)
Papitu tanda nirapaka anu majadi ngena (Pasal 12-16)
Pompakita Katataluna: (17:1-20:15)
I Yohanes nanggita mombine bajinga nosanga Babel (17:1-19:10)
I Yesus nipopakita mpo Tadulako nesavi jara bula nombadagi baliNa (19:11-21:8)
Pompakita Kaampana: I Yohanes nanggita boti mombine nasadia rapoberei nu Ana Bimba, sangana Yerusalem Nabaru (21:9-22:5)
Petevai-petevai kaupuna (22:6-21)