KAJADIA
Alatala nompajadi langi bo dunia ante pura-pura isina
1
1 Tempo pamulana Alatala nompajadi langi bo dunia. 2 Dunia dopa nolenje, dopa naria isina. Landa mpirika nombatutui uve oge. Bo Nosa nu Alatala nantaya-ntaya ri bavo nu uve.
3 Alatala nanguli: “Kajadimo reme!” Bo najadi mpuumo reme. 4 Alatala nanggita reme haitu nabelo. NigaarakaNa reme haitu lako ri kalandana. 5 Alatala nompoposanga reme haitu "eona", bo kalandana haitu nipoposangaNa "bongina". Nariamo eona bo nariamo bongina, haitumo eo pamulana.
6 Pade nanguli Alatala, “Kajadimo pobagina ri olo nu uve, rabagi randua uve haitu.” 7 Jadi Alatala nompajadi pobagina bo nigaarakaNa uve ri tambe pobagina lako ri uve ri bavona. Bo najadi mpuumo. 8 Pobagina nipoposangaNa "langi". Nariamo eona, nariamo bongina. Haitumo eo karanduana.
9 Naupu sia Alatala nanguli, “Kasiromu mompakasalibo pura-pura uve ri tambe nu langi bo kajadimo kabaina!” Najadi mpuumo. 10 Alatala nompoposanga kabaina "kabatana" bo kasiromu nu uve nipoposangaNa "tasi". NikitaNa anu nipoviaNa nabelo pura.
11-12 Pade nanguli Alatala, “Kajadimo pura-pura anu natuvu ri tana, mpengaya kayu novua, kavoko, bunga, bo anu nituda. Pura-pura maria vuana ala ledo matuna.” Bo najadi mpuumo. Lako ri tana natuvu pura isi ntana. Alatala nanggita anu nipoviaNa nabelo pura. 13 Nariamo eona, nariamo bongina, haitumo eo katataluna.
14 Pade nanguli Alatala, “Kajadimo mpengaya anu mpevangga ri langi ala rapotandai eona bo bongina. Anu mpevangga haitu majadi tanda, ala rasani ntona moreke eona, mpaena, bo eo mposusa. 15 Anu mpevangga ri langi haitu mompakareme dunia.” Bo najadi mpuumo. 16 Alatala nompajadimo randua anu mpevangga, mata nu eo raporeme ri eona, bo bula raporeme ri bongina. Bo nipajadiNa muni betue. 17 Pura-pura anu nevangga ri langi nipataka nu Alatala ri sia, ala mareme dunia, 18 ala rapotandai eona bo bongina, rabagi tempo nareme lako ri tempo nalanda. Alatala nanggita anu nipoviaNa nabelo pura. 19 Nariamo eona, nariamo bongina, haitumo eo kaampana.
20 Pade nanguli Alatala, “Kajadimo pura-pura bau mpengaya riara nu uve bo kajadimo tonji rapopevoro ri laerava.” 21 Jadi Alatala nompajadi puramo binata mbaso riara ntasi, bo mpengaya bau riara nu uve bo mpengaya tonji. Alatala nanggita anu nipoviaNa nabelo pura. 22 Pade Alatala nombadekei rasi ka pura-pura binata haitu bo nanguli, “Poanamo komiu bo momuli madea, ala komiu majadi isi nu uve.” Ivesia muni nitesaNa ka tonji ala moana sampe madea. 23 Nariamo eona, nariamo bongina, haitumo eo kaalimana.
24 Pade nanguli Alatala, “Kajadimo pura-pura binata mpengaya, evamo binata nipatuvu, binata nggakayu, binata mbaso bo binata kodi.” Najadi mpuumo ivesia. 25 Alatala nompajadi puramo binata-binata natuvu ri kabatana. NikitaNa anu nipoviaNa nabelo pura.
26 aNaupu sia nanguli Alatala, “Anumo, RapajadiTamo manusia eva polenjeTa mboto ala ira manjava kita. Ala ira mombabalenggai dunia ante pura-pura bau riara ntasi, bo tonji ri laerava, bo pura-pura binata ri kabatana.”
27 Ivesiamo Alatala nompajadi manusia eva polenjeNa mboto. NipajadiNamo manusia langgai bo mombine. 28 Pade Alatala nanguli ka manusia haitu, “Naoge rasimiu. Poanamo komiu, sampe madea manusia, ala mulimiu monturo ri njumangu dunia. Yaku nombadekei pura-pura bau riara ntasi, bo tonji ri laerava, bo binata natuvu ri tana ka komiu, ala komiu mombabalenggai pura-pura isi dunia.”
29 Pade niuliNa vai ka manusia haitu, “Peintamo, pura-pura kavoko mpovua anu noangu, bo pura-pura vua kayu anu naria batuna, Kudekei rakandemiu. 30 Tapi ka binata bo tonji, Kudekeika kavoko bo anu notava rakandera.” Bo najadi mpuumo.
31 Alatala nompeinta pura-pura anu nipoviaNa haitu nabelo mpuu. Nariamo eona, nariamo bongina. Haitumo eo kaaonona.