Baacɔ e bé ŋe bú léne bɛsana bɛ́ ɔmɛsɛ́
4
1 Aátɛ́ yí ŋe héléne na ɛcálɛ na ɛsáká aanɔ́ ɛ ɛkatɛ́katɛ́ e ?
Ɔ́kɔ,
tɛ́ka ɛbɛ́táá a cɛɛbɛ́ a cɛ́ ŋá nua ciíci ne ciíci aanɔ́ ɛ ɛtɛ́má e ?
2 Bɛnyɛ́ma a bɛ́mɔtɛ́ ŋaá banɔ́ hámɛ́na ɛ ɛtɛ́má mbá nu ti ŋé nu biíbi bɔ́ŋɔ :
Yaátɛ́ asana nua nɔ́ŋa hoóhi na ɔwɔɔ́nɔ́kɔ́nɔ́nɔ.
Nua nɔ́ŋa na ɛcaná ɛ ɛtɛ́má a bɛnyɛ́ma a bɛ́mɔtɛ́,
mbá nu tɛ anɔ́ bá na makɛ́nda me o biíbi bɔ́ŋgɔ́na ;
yaátɛ́ asana nu ŋa nɔ́ sáá ɛsáká,
nu nuaka macálɛ.
Nu tɛ anɔ́ bá nu ɔbɔ́ŋɔ bɔkɔ,
anyía nu tɛ ŋá nɔ́ báta ná Bandɔ́mɛsɛ́.
3 Mbɔ́kɔ nu ŋa nɔ́ báta,
ɔ tɛ banɔ́ iínjie ;
yááŋa anyía nu ŋa nɔ́ báta bɔɔbɛ́,
anyía nu ŋa nɔ́ aamba ɔbɛ́kɛ́lɛ́na bɛnyɛ́ma eébí bikime háyɛ bú ŋaá banɔ́ bíléníne e cíínú ɛtɛ́má.
4 Banɔ́ bakanda tusɔmɔ eebe !
ª Nu ŋe nú ményi bɔmbányɛ anyía ɔɔcɔ awɔ́ á táka bukendinyi na bɛsana bɛ́ ɔmɛsɛ́ áŋa muliŋine mɔ Bandɔ́mɛsɛ́.
Aáná ɔɔcɔ okime awɔ́ u ŋa látɛ́na bɛsana bɛ́ ɔmɛsɛ́ a yáaŋa oliŋine Bandɔ́mɛsɛ́.
5 Tɛ́ cáŋa etémbí yááŋa yɔɔ́ŋɔ́kɔ́nɔ́ anyía :
« Bandɔ́mɛsɛ́ ŋeé léne buéŋí Elilé ayɛ́ u ŋaá basɔ́ iínjie,
u yiíyi kɛlakɛna yɔɔtɛ. »ª
6 Mbá ta híáná,
Bandɔ́mɛsɛ́ ŋaá basɔ́ bóósi buéŋí ɔ ɔhɔla ;
yááŋa yɔ́ɔ́ŋɔ́kɔ́nɔ́ tɔ́na anyía « Bandɔ́mɛsɛ́ ŋeé núusi baacɔ e bé ŋe bú bíbééti,
mbá u ŋo bóósi eebe e bé ŋe bú bílóosi ɔ ɔmɛsɛ́. »*
7 Yaátɛ́ asana ánɔ lɔ́kɔ́mákɛ́na Bandɔ́mɛsɛ́.
Énu nuusiki Musɔ́mɛ́na,
aáná mu káá banɔ́ cábakɛna haaca.
8 Énu bíkósíki ná Bandɔ́mɛsɛ́,
aáná u kéé bíkósíti tɔ́na náánɔ́.
Banɔ́ bakɛla maabɛ́ abá nua nɔ́ŋa ne ibíkéti ífendí,
ánɔ bɛ́súáka aabá,
cí é fúúméne ;
ánɔ aáŋíáka maabɛ́ e ciínú ɛtɛ́má noómi.
9 Ánɔ lɔ́kɔ́máka ɛtɛ́má ɔnua,
núe limékíne a bɛcala,
nɔ lɛlaka tɔ́na.
Nɔtɛ háná cɛ́ca,
mbá ánɔ lɛláka.
Nɔtɛ háná bíléne mbá ánɔ lɔ́kɔ́máka ɛtɛ́má ɔnua.
10 Énu bílóósíki eé buúse bú Otéŋí a Waáŋá,
aáná u káá banɔ́ béétíki.
11 Banɔ́ báámɛ benyíinyí,
nuti ótókónóno banɔ́ na banɔ́.
Ɔɔcɔ okime ewú u ŋo yóoto sɔ́ɔ́kɔ́ ta anyía u ŋe wuúci bábɛ́na,
hú *bikotí ú ŋo yoóto,
u biíbi bábákɛ́na tɔ́na.
Yááŋa anyía,
mbɔ́kɔ ɔ ŋɔɔ́ bábɛ́na bikotí,
ɛ́cɛ o ti ŋóo biíbi látɛ́na ;
o ŋoó biíbi bábɛ́na bɔ́ bábɛ́na.
12 Hú Bandɔ́mɛsɛ́ bímuócí u ŋe télímínyi bikotí,
wuúci bímuócí tɔ́na wáŋa wu okélísíki baacɔ,
wuúci bímuócí wáŋa na makɛ́nda me o beébe nohiki,
te me o beébe ɔ́ɔ́nɔ́kɔ.
Mbá kuɔŋɔ́ anáʼo,
ɔ ŋɔɔ́ bɛ́táá anyía ɔ ɔ́ŋa aányɛ́ awɔ́ ɔ ŋɔɔ́ bábɛ́na sɔ́ɔ́kɔ́ e ?
Baacɔ e bé ŋe bú bíbééti
13 Ɛ́náʼo,
aá banɔ́ baacɔ abá nú ŋa nɔ́ kɔ́ɔna anyía ta hɛ́nánɔ,
ta nɔɔyá nu ká nɔ́ cɔ́baka o okolímekine a bálɛ́ka a cɛ́mɔtɛ́ hiɔŋɔ hikimekime ɔ ɔkɔkɛla onduné,
nɔ́ hɔ́máka mɔɔnyɛ́ meéŋí ;
14 mbá aá banɔ́,
aányɛ́ u ŋe ményi nɔɔyá e ?
Uúnú olíhe áŋa aátɛ́ e ?
Uúnú olíhe áŋa háyɛ olúkúlúku a wáŋa wáá hámɔ́kɔ́na hikúlúkúlú,
yɔ́ mána.
15 Yaátɛ́ asana nu ŋá nɔ́ nyɛ́mána nú ɔkɔɔnaka anyía mbɔ́kɔ Bandɔ́mɛsɛ́ ŋeé lénéke,
yɔ́ banɔ́ iínjie olíhe ɔcaha,
nu ká nɔ́ kɛlaka bɔkɔ eebu,
ta anyía ebunyíé.
16 Aá taaká nu ŋe nú bíbééti,
nɔ táŋáka na bumálá bukime ;
nyɛkɛlaka eényí áŋa nyɛɛbɛ́.
17 Yááŋa anyíaʼo,
mbɔ́kɔ ɔɔcɔ ŋe ményi bɔmbányɛ abɔ́ wá nyɛmána wu ɔkɛlaka mbá u ti buúbu kɛlá,
u ŋaa kɛla bɔɔbɛ́.