Nufule anɔ́
Sáak
ŋɔ yɔɔ́ŋɔ́kɔ́
Bitéŋíti
1
1 Yaŋɔ́ Sáak awɔ́ ɛ ŋa mɛ́ nyíɔnɔ na *Bandɔ́mɛsɛ́ ne Otéŋí a Waáŋá *Yésus *Kilís buólí,
ɛ ŋa mɛ́ banɔ́ téŋi,
banɔ́ baacɔ bekime bá *tɔnyɛ́nɔ́ túɔ́hátá ne túfendí tú *Islayɛ́l a tɔ́ ŋaá sáásíaka ɔ ɔmɛsɛ́ okime.
A asana yɛ́ na muɔ́kɛ́tánana ne muuyé
2 Baláamɛ,
ekúlú ekime ayɛ́ nu ŋa nɔ́ ɔ́ɔ́ndɛ́mánána anamánamá cé muuyé,
nu tɛ nana ohónyí,
ánɔ bámɔ́kɔ́na háyɛ nyitíne nyí bilúŋe,
3 anyía ekúlú ayɛ́ úúnú olumitinine ŋɔ́ yɔ́ɔ́ndɛ́mánána anamánamá cá muɔ́kɛ́tánana,
ú meéme eéhíkínyínyi,
bú káá kɛ́la anyía nuánɔ́ bámɔ́kɔ́na na bɛɔ́nɛ́nánɔ́ bɛ́ ɛtɛ́má.
4 Ánɔ kɛlaka anyía ɔwɔɔ́nɛ́na ú cíínú ɛtɛ́má ó tóŋínyi nyɛkɛla bɛsana a nyɛmbányɛ anyía nuánɔ́ bɛ́cáŋáka taaká taaká cɛ́ baacɔ tɛ́ka na tɔkɔma,
ta bɔkɔ a búmɔtɛ́ tɛ́ banɔ́ bɛ́ámbɛ́na.
5 Ta híáná,
mbɔ́kɔ ɔɔcɔ tɛ á bá ne injiŋé,
ª wá batá ná Bandɔ́mɛsɛ́.
U kéé wuúci íínjie.
Bandɔ́mɛsɛ́ naŋa wó bóosiki baacɔ bekime,
u tɛ táfána.
6 Mbá,
wé wuúci batá na mɔŋɔlɛ́ mekime,
tɛ́ka ne isuŋí,
anyía ɔɔcɔ ewú u ŋe súŋunyi ŋaá hɔ́á yaahɔ́ yɛ́ nuɔmɔ́ a yɛ́mɔtɛ́ eyí ehúne naŋa yé búŋúléke bɛháŋá bikime.
7 Nyɛnamá nyɛ́ ɔɔcɔ eényí tɛ́ bɛ́táá anyía Otéŋí a Waáŋá kéé wuúci íínjie bɔkɔ a bɔ́mɔtɛ́,
8 anyía wáŋa na ɛbɛ́táá ciéŋí,
u bítúmbítíkínyi a bɛsana bikime bí úúye olíhe.
Na ɔsɔ́kásɔ́ka na ɛnɔ́mɛ cɛ ɔɔcɔ
9 Ɔsɔ́kásɔ́ka okime awɔ́ u ŋa látɛ́na Yésus *Kilís ŋá nyɛmána wu obílénéke anyía Bandɔ́mɛsɛ́ áŋa o wuúci iínjíénú bɔɔcɔ.
10 Híáná tɔ́na ɛnɔ́mɛ cɛ ɔɔcɔ a cɛ ŋa látɛ́na Yésus Kilís á nyɛ́maná ci obílénéke anyía Bandɔ́mɛsɛ́ áŋa o ciíci loosínyi ɔ ɔmɛsɛ́.
Cíé menyi anyía ci ké tényí a cáŋia háyɛ bɛsama bí bihuti.
11 Ɔɔ́cɔ́ naŋa wá nɔ́máka,
ú báláka,
ª bihuti wéékúne,
bíábɔ́ bɛsama kuakɔna ;
bá tɛ́ háná lɛ́ca núábɔ́ nɔhɛka.
ª Híáná tɔ́na ɛnɔ́mɛ cɛ ɔɔcɔ káá lɔ́sálɔ́sa ɛ ɛkatɛ́katɛ́ cɛ búáyɛ́ buólí.
A asana na muɔ́kɛ́tánana amɔ́ tu ŋa sɔ́ ɔ́ɔ́ndɛ́mánána
12 Bɔmbányɛ ná ɔɔcɔ awɔ́ u ŋɔ yɔ́ɔ́ndɛ́mánána muɔ́kɛ́tánana,
u muúmu eéhíkínyínyi na yɔɔ́nɛ́nánɔ́ yɛ́ ɔtɛ́má.
Ekúlú ayɛ́ mɔ́ ma mána,
Bandɔ́mɛsɛ́ kéé wuúci nama yɔɔ́sɔɔ́sɔ yí olíhe.
U ŋaá bɛ́tánɛ́na olíhe oócí ná baacɔ e bé ŋe bú wuúci léne.
13 Ekúlú ayɛ́ ɔɔcɔ ŋɔ yɔ́ɔ́ndɛ́mánána muɔ́kɛ́tánana,
u tɛ kɔɔ́na anyía Bandɔ́mɛsɛ́ u ŋé wuúci ɔɔ́kɛ́tɛ́na,
anyía Bandɔ́mɛsɛ́ tɛ ŋɔ́ yɔ́ɔ́kɛ́tɛ́na ɔɔcɔ.
Ta ɔɔcɔ tɔ́na u tɛ á bá wu ɔkɛlaka anyía Bandɔ́mɛsɛ́ á kɛlá bɔɔbɛ́.
14 Yááŋa anyía ɛbɛ́táá a cɛɛbɛ́ a cɛ́ ŋa hámɛ́na ɔɔcɔ ɔ ɔtɛ́má cí ŋeé wuúci nyɛkɛtɛna ɔ ɔkɛla bɔɔbɛ́.
15 Nyɛlɔ́kɔ́mɛ́na anyɛ́ ɔɔcɔ ŋá lɔ́kɔ́mɛ́na ɛbɛ́táá a cɛɛbɛ́ eécí ŋa kɛ́la anyía waá kɛláka bɔɔbɛ́.
Ekúlú ayɛ́ u ŋa cɔ́ba ne buúse ɔ ɔkɛla bɔɔbɛ́,
u ŋeé wé.
16 Benyíinyí bá ɔtɛ́má,
nuti bínéŋéke banɔ́ bɛ́muátá.
17 Bɛmbányɛ bɛ́ bɛnyɛ́ma bikime a bɛ́ tɛ á bá na tɔkɔma ŋeé húle ɔ Ɔmuaná ná ciasɔ́ Síkíne Bandɔ́mɛsɛ́ a wáŋa eese.
ª Bandɔ́mɛsɛ́ naŋa u tɛ a hɛ́ŋɛ́na,
u tɛ basɔ́ túme elime,
u tɛ basɔ́ nyɛána i ibíne noómi.
18 Bú ŋeé wuúci bílénékíne anyía wá hɔlɛ́na aáyá a taaká ci buhúnyi anyía túásɔ́ bá ne olíhe,
tuɔ́ bámɔ́kɔ́nɛ́na nyiínjie nyí buúsebuúse a bɛnyɛ́ma bikime ebí u ŋe kétíki.
Na nyɛlɔ́kɔ́ma na nyɛkɛla nyɛ́ bɛsana
19 Benyíinyí bá ɔtɛ́má,
nu ŋe nú ményi anyíaª ɔɔcɔ okime aá banɔ́ ŋá nyɛmána wu ɔbá fiaŋɔ o tényí lɔ́kɔ́máka bɔsɔ́ɔ́kɔ́,
u ti tényí táŋɛ́ta,
u ti tényí lɔ́kɔ́ma hilóbi.
20 Yááŋa anyía ekúlú ayɛ́ ɔɔcɔ ŋá lɔ́kɔ́ma hilóbi,
u tɛ ŋáá kɛ́la bɛsana e bí ŋé bíléníne Bandɔ́mɛsɛ́.
21 A yaátɛ́ asana,
ánɔ nyɛanáka ɔkɛla na bɛsana bɛ́ mɔnyɔ́kɔ́lɔ́ na anamánamá cá bɛsana cá nyɛŋána.
Énu bílóósíki eé buúse bɔ́ Bandɔ́mɛsɛ́,
núó lumitinine bíáyɛ́ bɛsana abɛ́ u ŋa háya e cíínú ɛtɛ́má noómi ;
biíbi bɛ́áŋa bɛ́ ɔ banɔ́ nóhiki.
22 Nuti bínéŋéke banɔ́ bɛ́muátá ɔ ɔlɔ́kɔ́máka bɔ lɔ́kɔ́máka Bɛsana bɛ́ Bandɔ́mɛsɛ́,
mbá énu biíbi látákɛ́na.
23 Yááŋa anyía ɔɔcɔ awɔ́ u ŋa lɔ́kɔ́ma bɔ lɔ́kɔ́ma Bɛsana bɛ́ Bandɔ́mɛsɛ́,
u ti biíbi látɛ́na,
ŋaá hɔ́á ɔɔcɔ awɔ́ u ŋa bɛ́lɛ́ca buúse o oólí háyɛ búáŋa.
24 Ekúlú ayɛ́ ú ma bɛ́lɛ́cáka buúse aáná,
u ŋá hɔ́la,
yɔ́ bɛ́hɔ́ya ɔ ɔbɛ́hɔ́ya háyɛ búáyɛ́ buúse áŋa.
25 Mbá ɔɔcɔ awɔ́ u ŋa yáakɔ́nɛ́na *bikotí bɛ́ Bandɔ́mɛsɛ́,
u biíbi óónyísíkínyi ɔlátɛ́na,
tɛ́ cáŋa hú bɔ́ lɔ́kɔ́máka,
mbá u bɛ́hɔ́ya e elime,
Bandɔ́mɛsɛ́ kéé wuúci sayabakɛna a bɛsana bikime abɛ́ u ŋa kɛ́la.
Yááŋa anyía bikotí eébí áŋa tɛ́ka na hɛkɔma,
bɛ́áŋa bɛ́ ɔ basɔ́ kátɔ́náka a bɔɔbɛ́.
26 Mbɔ́kɔ ɔɔcɔ ŋa bɛ́táá anyía wáŋa mulumitinine mbá u ti tétényi nyíáyɛ́ nyuúté ɔ ɔtáŋa bɛɛbɛ́ bɛ́ bɛsana,
u ŋe bínéŋe.
Yááŋa anyía u ŋa kɔ́ɔna ɔsɛ u ŋaá látɛ́na bikotí bí olumitinine,
mbá bɛ́ tɛ ŋɔ́ yɔ́ɔ́lɔ ta bɔkɔ.
27 Taaká ci efúúménénú yí olumitinine eé buúse bɔ́ Bandɔ́mɛsɛ́ awɔ́ ú tɛ á bá ne ehíŋe,
ícíoci wáŋa anyía :
Na ɔwaamba ohónyí ú otétényíki ne cuuné cɛ́ banásɛ́ ne bisíké bí beénjú e muuyé,
ne obíkíilie bɛɛbɛ́ bɛ́ bɛsana bɛ́ ɔmɛsɛ́ ooci o otibítífíle.