Melikisɛtɛk, otéŋí a waáŋá, mululi nyiínjie
7
1 Waáta Melikisɛtɛk oócí ú ŋaá bá otéŋí u bálɛ́ka cɛ Salɛm,
wuúci tɔ́na *mululi nyiínjie mɔ Bandɔ́mɛsɛ́ awɔ́ u ŋa hɔ́la bɔkɔ bukime.
U ŋaá cɔba ɔ ɔkɔwɔɔ́ndɛ́mánána na *Abɛ́laham awɔ́ ú ŋaá bá ú kaá hálɔ́mɔ́kɔ́na e biité abɛ́ ú ŋa yákáká betéŋí a bɔ́mɔtɛ́,
u ŋé beébe ɔ́ɔ́nɔ́kɔ.
Melikisɛtɛk ŋaá sáyábɛ́na Abɛ́laham.
2 Abɛ́laham ŋé wuúci iínjíé nuafa númɔtɛ́ nɔ́ tuafa túɔ́hátá tɔ́ bɛnyɛ́ma bikime abɛ́ u ŋaá hɔ́máká eé biité.
ª
Yááŋa anyía,
bú buúse nyiínyi nyí Melikisɛtɛk áŋa anyía otéŋí a wɔtálɛ́mánánɔ́,
bú ɔláta wáŋa otéŋí u Salɛm ɛ́cɛ anyía otéŋí ewú u ŋe léne bumbénú. Nyiínyi nyɛ́ Salɛm ŋe bíhémbúle anyía « bumbénú ».
3 Ta ɔɔcɔ u ti ŋéé ményi te iinyí te síkíne ci Melikisɛtɛk,
ta haála ehé ú ŋeé bíbíéné,
te ekúlú eyí u ŋeé wé.
Híáná wáŋa háyɛ Ɔɔ́nɔ́ u Bandɔ́mɛsɛ́,
anyía búáyɛ́ buólí bú mululi nyiínjie áŋa bikúlú bikime,
bú tɛ ŋáá mána.
4 Ánɔ lɛcá nyɛnamá nyɛ́ buáŋá ebú Melikisɛtɛk áŋa ne buúbu !
Ánɔ lɛcá anyána Abɛ́laham,
mɔbɔ́ta *Islayɛ́l,
ŋeé wuúci iínjíé nuafa númɔtɛ́ a tuafa túɔ́hátá tɔ́ bɛmbányɛ bɛ́ bɛnyɛ́ma bikime abɛ́ ú ŋaá hɔ́máká eé biité.
5 Bɔ́mɔtɛ́ baacɔ bá hɛnyɛ́nɔ́ hí Léfi a bá bɔ́ŋa *beluli nyiínjie á bɔ́ŋa ne okotí a yááŋa anyía bábɔ́ káháka nyiínjie nyɛ́ nuafa númɔtɛ́ nɔ́ tuafa túɔ́hátá ná baacɔ bekime bé Islayɛ́l.
ª Bá ŋa bɔ́ káha nyiínjie eényí ná báábɔ́ benyíinyí bá bɛ́muátá bá bunɔŋɔ,
ta yɛ́ cáŋa á bá anyía beébe bekime bá ŋa bɔ́ bá tɔ́na baacɔ bá hɛnyɛ́nɔ́ hɛ́ Abɛ́laham.
6 Mbá Melikisɛtɛk tɛ ɔ́mɔ bá ɔɔcɔ u hɛnyɛ́nɔ́ hí Léfi ;
ta híáná,
Abɛ́laham ŋeé wuúci iínjíé nuafa númɔtɛ́ a tuafa túɔ́hátá tɔ́ bíáyɛ́ bɛnyɛ́ma ;
wuúci awɔ́ Bandɔ́mɛsɛ́ ŋaá bɛ́tánɛ́ná bɛnyɛ́ma bí o wuúci iínjíékíne,
wuúci Melikisɛtɛk maá sáyábɛ́na.
7 Yááŋa taaká anyía ɔɔcɔ awɔ́ á hɔ́la sɔ́ɔ́kɔ́ a buáŋá,
wuúci u ŋá sáyábɛ́na sɔ́ɔ́kɔ́.
8 A asana ne beluli nyiínjie a bá ŋa bɔ́ káha nyiínjie nyɛ́ báábɔ́ benyíinyí,
bá náŋa bébú wéékúne ;
a asana ne Melikisɛtɛk,
wáŋa wɔɔ́sɔ ekúlú ekime háyɛ Ciɔɔ́ŋɛ́ cɛ́ Bandɔ́mɛsɛ́ ŋo tóŋínyi.
9 Tua sɔ́ŋa tú ɔkɔɔna anyía háyɛ Léfi ŋa káha nuafa númɔtɛ́ a tuafa túɔ́hátá atɔ́ bɔsɔ́ɔ́kɔ́ ŋe bú iínjie,
u ŋe yíinjie tɔ́na Melikisɛtɛk nuafa númɔtɛ́ a tuafa túɔ́hátá,
ananyía ciayɛ́ sɔ́kɔ́nɔ́ Abɛ́laham ŋeé nuúnu iínjíé.
10 Aáná Léfi,
ɔɔcɔ u hɛnyɛ́nɔ́ hɛ́ Abɛ́laham,
ŋaá bá ɛ́cɛ u ti ŋé bíbíéne,
mbá ú ŋe yiínjíé nuafa a tuafa túɔ́hátá ɛ́cɛ wá yánáŋa a manɔ́ŋɔ́ ma Abɛ́laham.
Buátɛ́ bɔkɔ,
Melikisɛtɛk ŋa hɔ́la Léfi.
11 Indíné cí buólí bú beluli nyiínjie bá *bɔnyɛ Léfi áŋa *bikotí abɛ́ Bandɔ́mɛsɛ́ ŋe yiínjíékíne.
Mbɔ́kɔ buólí bú beluli nyiínjie eébé á bá na makɛ́nda ma ɔkɛla anyía baacɔ ábɔ́ bámɔ́kɔ́na bɛtálɛ́mánánɔ́ eé buúse bɔ́ Bandɔ́mɛsɛ́,
keyé Bandɔ́mɛsɛ́ tɛ ɔ́mɔ háná táfa mululi nyiínjie mu etémbí a muáŋa háyɛ Melikisɛtɛk ;
wuúci u tɛ ɔ́mɔ bá mululi nyiínjie mu bɔnyɛ Léfi háyɛ *Aálɔn ŋaá bá.
12 Yááŋa anyía mbɔ́kɔ bá ŋa hɛ́ŋɛ́na ɔɔcɔ awɔ́ u ŋɔɔ́ nyiɔ buólí bú mululi nyiínjie,
bá ŋá nyɛmána tɔ́na bá ɔhɛŋɛna bikotí bí buólí.
13 Uusú Otéŋí a Waáŋá Yésus awɔ́ tu ŋa sɔ́ táŋa yááyɛ́ asana aaha tɛ a bá ɔɔcɔ u hɛnyɛ́nɔ́ hí Léfi.
Hííyé hɛnyɛ́nɔ́ áŋa náányia ;
ta ɔɔcɔ ta ɔmɔtɛ́ u hííyé hɛnyɛ́nɔ́ tɛ ŋɔ́ɔ nyiɔ buólí aá haála hé nyiluli nyiínjie.
14 Bú ŋa lɛ́cana o motóndóló anyía Yésus ŋeé húle a hɛnyɛ́nɔ́ hɛ́ Yúta.
*Moyís tɛ ɔ́mɔ kɔ́ɔna ta bɔkɔ a asana na hɛnyɛ́nɔ́ eéhí,
ekúlú ayɛ́ ú ŋaá táŋáká asana yí beluli nyiínjie.
Mululi nyiínjie mu etémbí a mɔ́ ŋa hɔ́á Melikisɛtɛk
15 Bɔkɔ a búmɔtɛ́ a bú ŋaá basɔ́ tóŋínyi asana eeye áŋa anyía mumɔtɛ́ *mululi nyiínjie mu etémbí amɔ́ tɛ á bá ɔ hɛnyɛ́nɔ́ hí Léfi áŋa ɔhámánɔ́ ;
muáŋa bɔkɔ búmɔtɛ́ háyɛ Melikisɛtɛk.
16 Ɔɔcɔ oócí tɛ a bá mululi nyiínjie a muáŋá háyɛ *bikotí bɛ́ baacɔ áŋa,
mbá wáŋa mululi nyiínjie a muáŋá ananyía wáŋa na makɛ́nda me olíhe ú ekúlú ekime.
17 Híáná Ciɔɔ́ŋɛ́ cɛ́ Bandɔ́mɛsɛ́ ŋaá kɔɔna cɛ́sɛ :
« Ɔ ɔ́ŋa mululi nyiínjie a muáŋá mu bikúlú bikime,
bɔkɔ búmɔtɛ́ háyɛ Melikisɛtɛk. »*
18 Asana ɔ́mɔtɛ́ áŋa anyía Bandɔ́mɛsɛ́ ŋa yaáŋíáka esúŋe cá buáyá anyía cá ŋaá bá ɔcɔ́ɔ́cɔ́,
cá tɛ ɔɔ́lɔ baacɔ.
19 Esúŋe eécé tɛ ɔ́mɔ bá cá ɔkɛla anyía baacɔ ábɔ́ bámɔ́kɔ́na bɛtálɛ́mánánɔ́ eé buúse bɔ́ Bandɔ́mɛsɛ́.
A yɛ́mɔtɛ́ asana áŋa anyía Yésus wáŋa ɔɔcɔ awɔ́ tú ma sɔ́ háya mɔŋɔlɛ́ nááyá ;
wuúci ú ŋa basɔ́ tóŋínyi ohónyí wú obíkósíti ná Bandɔ́mɛsɛ́.
20 Bandɔ́mɛsɛ́ ŋaá súátɛ́ná ekúlú ayɛ́ ú ŋaá táfa Yésus mululi nyiínjie a muáŋá.
Mbá,
ekúlú ayɛ́ ú ŋaá táfáká baacɔ bá *bɔnyɛ Léfi *beluli nyiínjie,
ú tɛ ɔ́mɔ súátɛ́na.
21 A aháŋá ne Yésus,
Bandɔ́mɛsɛ́ ŋaá súátɛ́ná ekúlú ayɛ́ ú ŋaá kɔɔna ɔsɛ :
« Yaŋɔ́,
Otéŋí Bandɔ́mɛsɛ́,
ɛ tɛ ká mɛ hɛŋɛna búámɛ buhúnyi ;
ɔ ɔ́ŋa mululi nyiínjie a muáŋá mu bikúlú bikime. »*
22 Híáná Yésus áŋa tɔ́na ooci ewú ú meé tímbe Ambányɛ́kɛ́ yɛ́ nyɛlatana nyí bumbénú anyɛ́ Bandɔ́mɛsɛ́ ŋaá lata na basɔ́.
23 Yááŋa tɔ́na anyía beluli nyiínjie ŋa bɔ́ bá beéŋí,
anyía bá ŋa bɔ́ bá bébú weékúne ;
ɔmɔtɛ́ eé wé,
sɔ́ɔ́kɔ́ ŋeé hiíte nyíáyɛ́ nyilimíné.
24 Mbá a aháŋá ne Yésus,
wuúci ú ti ŋée wé,
u ŋeé líhe ekúlú ekime.
Buátɛ́ bɔkɔ ta ɔɔcɔ tɛ á bá wu ohiite búáyɛ́ buólí bú mululi nyiínjie.
25 Híáná tɔ́na,
wáŋa na makɛ́nda me onohi baacɔ ekúlú ɔ́mɔtɛ́ e bikúlú bikime,
beébe bé ŋe bú bíkósíti ná Bandɔ́mɛsɛ́ a ciayɛ́ elime ;
ananyía wáŋa wɔɔ́sɔ ekúlú ekime,
u naŋa wá bɛ́cɔ́kɔ́lɔ́kɛ́na Bandɔ́mɛsɛ́ eebú eé buúse.
26 Nyɛnamá nyí *mutéŋínyi beluli nyiínjie a muáŋá eényí á nyɛmána na basɔ́.
Muáŋa mufúúménénú,
mu tɛ kɛ́la bɔɔbɛ́,
muúmu tɛ́ka na hɛkɔma.
Mu tɛ á bá háyɛ bakɛla maabɛ́,
Bandɔ́mɛsɛ́ ŋeé muúmu béétí aáyá a maabána ɔ Ɔmuaná noómi.
27 Yésus tɛ á bá háyɛ betéŋínyi beluli nyiínjie a *baáŋá bé etémbí,
beébe bá ŋa bɔ́ bá bébú lúlíkínyi Bandɔ́mɛsɛ́ nyiínjie mɔɔ́sɛ́ mekime.
Bá ŋa bɔ́ bá bábɔ́ caŋacaŋa oluli nyiínjie a asana na maabɔ́ maabɛ́ ma bɛ́muátá ;
e elime bó lúlíki a asana na maabɛ́ ma baacɔ bé etémbí.
Mbá wuúci ú tɛ á bá aáná,
u ŋe lúlíki nyiínjie hú ekúlú ɔ́mɔtɛ́ e bikúlú bikime,
ekúlú eyí ú ŋeé bíínjíé wuúci bɛ́muátá,
yó wé.
28 Betéŋínyi beluli nyiínjie a baáŋá ebé bikotí bí *Moyís ŋaá táfáká ŋa bɔ́ bá baacɔ a bá bɔ́ŋa na cɛɛ́tɔ,
bá ŋa bɔ́ bá bábɔ́ kɛlaka maabɛ́,
mbá buɔ́sɛ́ abɔ́ Bandɔ́mɛsɛ́ ŋaá báka bikotí a maabána,
yɔ́ súátɛ́na,
buúbu ú ŋaá lɔtɔ́ uuyé Ɔɔ́nɔ́ Mutéŋínyi beluli nyiínjie a muáŋá mu ekúlú ekime e mú ŋo nyióyísínyi bɔmbányɛ bɔmbányɛ buólí.