Nufule anɔ́ bɔ́ ŋɔ yɔɔ́ŋɔ́kɛ́ná belumitinine, bibíényi bí
Ebélé
Bandɔ́mɛsɛ́ maá táŋáka e nyuúté nyí uuyé Ɔɔ́nɔ́
1
1 Buáyá,
*Bandɔ́mɛsɛ́ ŋaa láakɛna cíísú sɔ́kɔ́nɔ́ bɛsana anamánamá bikúlú biéŋí.
Bááyɛ́ *behémúnyi bɛsana abá u ŋaá tɔ́mɔ́kɔ́ná ŋa bɔ́ táŋa a yááyɛ́ aháŋá.
2 U ŋaá táŋáká aáná ɔ ɔkɔɔ́háma ɔ mɔɔ́sɛ́ eeme me elime.
ª Aámbáya ú ma táŋáka e nyuúté nyí uuyé Ɔɔ́nɔ́.
Na Ɔɔ́nɔ́ oócí Bandɔ́mɛsɛ́ ŋeé kétiki na ɔmɛsɛ́ na ɔmuaná ;
u ŋeé wuúci táfá o otéŋgínyi bɛnyɛ́ma bikime.
3 Wáŋa ihúényínyí ci nuúmi nɔ́ Bandɔ́mɛsɛ́,
wáŋa ɔmanánɔ́ Bandɔ́mɛsɛ́ hú táákɔ.
Úúye ɔtáŋa áŋa ne butéŋí a bɛnyɛ́ma bikime na bɛ́ ɔmɛsɛ́ na bɛ́ ɔmuaná.
Ɛŋakɛlá wé fúúmínyi baacɔ a máábɔ́ maabɛ́,
nyíáyɛ́ nyikelímine eényí ɔ Ɔmuaná a aháŋá yɛ́ ɔɔbɔ́ ú manɔ́mɛ ú Bandɔ́mɛsɛ́,
Alámakɛ́nda.
Ɔɔ́nɔ́ ŋa hɔ́la bililé bɛ́ masɔ́ma bɛ́ Bandɔ́mɛsɛ́
4 Buátɛ́ bɔkɔ wáŋa oliménénú aáhá anyía wáŋa ɔhɔlánɔ́ *bililé bɛ́ masɔ́ma bɛ́ Bandɔ́mɛsɛ́ bikime ;
Bandɔ́mɛsɛ́ yó wuúci iinjíe nyiínyi nyí nuúmi anyɛ́ a hɔ́la nyíábɔ́.
5 Bandɔ́mɛsɛ́ ŋaá laána *Yésus ɔsɛ :
« Ɔ ɔ́ŋa uumi Ɔɔ́nɔ́,
hɛ́nánɔ í me mí o tóŋínyi ná baacɔ bekime.
»* U ŋa háná é wuúci laana ɔsɛ :
« Ya mɛ́ŋa ɔɔtɛ́,
ɔ ɔ́ŋa uumi Ɔɔ́nɔ́.
»*
Mbá a bɛsana eébí bikime, Bandɔ́mɛsɛ́ tɛ ŋá láana yááyɛ́ elilé yɛ́ bɔsɔ́ma a yɛ́mɔtɛ́ aáná ta buɔ́sɛ́.
6 Ekúlú ayɛ́ Bandɔ́mɛsɛ́ ŋaá tɔ́má uuyé Ɔɔ́nɔ́,
Mutéŋínyi bɛnyɛ́ma bikime na bɛ́ ɔmɛsɛ́ na bɛ́ ɔmuaná,
u ŋaá kɔ́ɔ́na ɔsɛª :
« Bililé bɛ́ masɔ́ma bɛ́ Bandɔ́mɛsɛ́ ŋaá nyɛmána bí onyemi Ɔɔ́nɔ́. »ª
7 Asana ayɛ́ Bandɔ́mɛsɛ́ ŋaá kɔ́ɔ́na a aháŋá na bíáyɛ́ bililé bɛ́ masɔ́ma áŋa anyía :
« Bililé bɛ́ masɔ́ma bɛ́ Bandɔ́mɛsɛ́ áŋa háyɛ mehúne,
biíbi tɔ́na háyɛ tɔbɛ́mbɛ tú oocó. »*
8 Mbá a asana ne uuyé Ɔɔ́nɔ́,
Bandɔ́mɛsɛ́ ŋaá kɔ́ɔ́na ɔsɛ :
« Kuɔŋɔ́ ɔ ɔ́ŋa Bandɔ́mɛsɛ́,
o kóó téŋgínyi bikúlú bikime ;
búɔ́wɔ Butéŋíª áŋa butálɛ́mánánɔ́.
9 O ŋoó léne ɔkɛla bɛsana a bɛtálɛ́mánánɔ́,
mbá e líŋíkíne a bɛɛbɛ́.
Yaátɛ́ asana,
yaŋɔ́ ciɔwɔ Bandɔ́mɛsɛ́,
ɛ ŋá mɛ ɔ lɔtɔ́,
míɔ kuɔŋɔ́ bééti e nyilimíné a nyɛáŋá anyɛ́ a hɔ́la nyɛ́ bɔlɔ́ɔwɔ,
ɛ́ɛhɛ́ úúwe ɔtɛ́má ŋee bíléne buéŋí. »*
10 Bandɔ́mɛsɛ́ ŋaá kɔ́ɔ́na tɔ́na ɔsɛ :
« Kuɔŋɔ́,
ɔ ɔ́ŋa Otéŋí a Waáŋá.
E nyitúme nyɛ́ bɛnyɛ́ma bikime,
kuɔŋɔ́ o ŋoó ketíki ɔmɛsɛ́ ;
kuɔŋɔ́ bɛ́muátá tɔ́na,
ɔ ŋɔɔ́ kɛlá anyía ɔmuaná á bámɔ́kɔ́na.
11 Bɛnyɛ́ma eébí bikime káá mánɔkɔna,
mbá kuɔŋɔ́,
o kóó líhéke bikúlú bikime.
Bí kéé lúneke bikime háyɛ bɛlaŋa ŋe lúne.
12 O kóó biíbi nyikeke háyɛ bé ŋe nyike bɔlaka bú nyiike,
bɔ́ háya e nyihíkíli.
Bɛnyɛ́ma eébí bikime káá cáŋiaka háyɛ bɛlaŋa ŋá cáŋia ;
mbá kuɔŋɔ́,
ɔ ɔ́ŋa bɔkɔ búmɔtɛ́,
o ti kóó lune ta buɔ́sɛ́. »*
13 Mbá Bandɔ́mɛsɛ́ tɛ ŋáa láana yááyɛ́ *elilé yɛ́ bɔsɔ́ma a yɛ́mɔtɛ́ ta buɔ́sɛ́ ɔsɛ :
« Ké limíne aaha aámɛ aháŋá yɛ́ ɔɔbɔ́ ú manɔ́mɛ ekúlú ekime ayɛ́ ɛ ká mɛ́ kɛ́la anyía óo límékíníne bɔ́ɔ́wɔ beliŋine a bɛɛtɔ́. »*
14 Bililé bɛ́ masɔ́ma bɛ́ Bandɔ́mɛsɛ́ áŋa aátɛ́ e ?
Bɛ́áŋa hú bililé a bɛ́ ŋɔ nyiɔnɔ Bandɔ́mɛsɛ́ buólí,
biíbi eébí Bandɔ́mɛsɛ́ ŋa tɔ́má ɔ ɔkɔwɔ́ɔ́lɔ baacɔ ebé u kéé nóhiki.