Efúúménénú yí olíhe yí belumitinine
3
1 Bítéésíki belumitinine bekime anyía bá lɔ́kɔ́mákɛ́na ne betéŋínyi bunɔŋɔ na kɔ́mɛ́na áyá,
bá kɛláka bɛsana ebí bé ŋe bú beébe laana,
bé lénéke o búle ɔkɛla bɛmbányɛ bɛ́ bɛsana bikime.
2 Bé ti óóto ɔɔcɔ,
bá tɛ aamba ɛsáká,
beébe mbuumu cɛ́ baacɔ na ambányɛ yɛ́ ɔtɛ́má,
bé líhéke e mbuumu na bɔsɔ́ɔ́kɔ́.
3 Yááŋa anyía ta basɔ́ tɔ́na,
tu ŋa sɔ́ bá buáyá tɛ́ka ne injiŋé,
basɔ́ na bɛɛtɔ́ ɔnata,
basɔ́ benyíménú taaká ci ohónyí ;
tu ŋa sɔ́ bá bɛɔ́lɛ́ bɛ́ bɛɛbɛ́ bɛ́ bɛsana a bɛ́ ŋaá basɔ́ hámɛ́na ɛ ɛtɛ́má,
tu líhéke a nyɛŋána noómi,
basɔ́ na yaáká yí eése,
tu bébékíne baacɔ,
tu liŋekenene basɔ́ na basɔ́.
4 Mbá ekúlú ayɛ́ Bandɔ́mɛsɛ́,
muasɔ́ Munohi,
ŋeé tóŋínyi na yááyɛ́ ambányɛ yɛ́ ɔtɛ́má,
ne nyiléne enyí u ŋeé léne baacɔ buéŋí,
5 u ŋaá basɔ́ nóhíki etémbí ne etémbí ;
tɛ́ cáŋa anyía tu ŋa sɔ́ kɛ́láka bɛmbányɛ bɛ́ bɛsana,
mbá u ŋaá basɔ́ nóhíki anyía u ŋaá basɔ́ bɛ́cáma mahana,
a nyɛsua anyɛ́ u ŋaá súáka maasɔ́ maabɛ́,
yó fúúmíkínyi cíísú ɛtɛ́má ne menyífé a makɛ́nda me *Efúúménénú yí Elilé,
anyía túésú bíbíénútúne yɔɔ́sɔɔ́sɔ yí nyibíbíéne,
túɔ́ bá na yɔɔ́sɔɔ́sɔ yí olíhe.
6 Bandɔ́mɛsɛ́ ŋaá basɔ́ iínjíé Efúúménénú yí Elilé,
yó yiíyi nyíóyísi e cíísú ɛtɛ́má hú mbiɔ́kɛ e elime cɛ muasɔ́ Munohi Yésus *Kilís,
7 anyía mbá túásɔ́ bá na mɔŋɔlɛ́ ma ɔbɔ́ŋɔ yɔɔ́sɔɔ́sɔ yí olíhe yí ekúlú ekime ;
u ŋaá basɔ́ bóósíki,
yɔ́ kɛ́la anyía túásɔ́ bámɔ́kɔ́na bɛtálɛ́mánánɔ́ bɛ́ baacɔ eéyé eé buúse.
8 Mehúnyi eémé áŋa taaká cí mehúnyi.
Bú ŋeé mi bíléníne anyía óo woónyísíkínyi ɔ ɔlaana baacɔ a bá ŋa bɔ́ háya mɔŋɔlɛ́ ná Bandɔ́mɛsɛ́ anyía bé búle kɛ́la bɛmbányɛ bɛ́ bɛsana.
Yááŋa anyía ɔkɛla bɛmbányɛ bɛ́ bɛsana áŋa ɔmbányɛ,
ú ŋɔ yɔɔ́lɔ baacɔ bekime.
9 Ta híáná,
sámbáka isuŋí cí etémbí ne etémbí a cɛ́ ŋa lɛca ɔfana eénye cá baacɔ bá tɔnyɛ́nɔ́,
sámbáka tɔ́na isuŋí a cɛ́ ŋa lɛca *bikotí bí *Moyís ;
atɛ sááka na baacɔ i isuŋí ikime eécí.
Bɛsana eébí áŋa etémbí,
bɛ́ tɛ ŋɔ́ɔ́ yɔɔ́lɔ baacɔ.
10 Ɔɔcɔ éé héléne etuŋulinyi a yɛ́ ŋa kɛla anyía belumitinine aálɔ́nákána,
wuúci óókísi bikúlú bífendí,
e elime eécí wuúci baká.
11 Kuɔŋɔ́ bɛ́muátá,
o ŋoó menyi anyía nyɛnamá nyɛ́ ɔɔcɔ eényí a yáaŋa nyɛbɛ́áhɛ́nánɔ́ e eciké noómi,
nyɛ́ ŋa cɔ́ba ne buúse ɔ ɔkɛla bɔɔbɛ́,
bɛsana abɛ́ u ŋa kɛla tóŋgínyi anyía wáŋa a nyɛkua noómi.
Mehúnyi ma nyɛmana
12 Isíʼo Tite,
ɛkákɛ́la yámɛ́ ɔ tɔ́mɛ́na Aatɛ́mas ta anyía Tisíke,
mbá a bɛ́kɛ́ndɛ́na ɔfaaya,
á ka mɛ́ kuana a Nikobolis;
ª ɛ ŋaá mɛ bɛ́táá anyía hɔ́á i ké ké mi limine ekúlú yí buume.
13 Aambáka ohónyí wú ɔwɔɔ́lɛ́ta na Sɛ́nas *muékúnyi bikotí na Abólos a asana ne úúbú ɔkanda,
anyía bɔkɔ ti beébe bɛ́ámbɛ́na.
14 Belumitinine bá Kɛlɛtɛ ŋá bɔ́ nyɛmána tɔ́na bá ɔbɛ́hákɛ́na ɛ ɛtɛ́má noómi anyána bá bɔ́ŋa bé o búle kɛla bɛmbányɛ bɛ́ bɛsana ɔ ɔwɔɔ́lɔ́kɔ baacɔ abá bɛnyɛ́ma ŋeé beébe bɛ́ámbɛ́na.
Aáná nyíábɔ́ nyɛbɛ́kɛ́lɛ́na káá bá na nyiɔ́lɔ nyiéŋí.
15 Baacɔ bekime a bá bɔ́ŋa aaha na yaŋɔ́ ŋe bú o téŋí.
Téŋíki báásɔ́ benyíinyí bé olumitinine bekime.
Bandɔ́mɛsɛ́ á banɔ́ sayábákɛ́naʼo.