Nufule enú Bóol ŋɔ yɔɔ́ŋɔ́kɛ́ná
Tite
Bóol ŋeé téŋi Tite
1
1 Yaŋɔ́ Bóol,
munyiɔnɔ mɔ *Bandɔ́mɛsɛ́,
ɛ ŋɔ mɛ́ ɔ wɔɔ́ŋɛ́na nufule eenu.
Ya mɛ́ŋa *ɔɔcɔ u ɛndɔ́ma u *Yésus *Kilís.
Ɛ ŋaá mɛ ɔ́ɔ́lɔ baacɔ abá Bandɔ́mɛsɛ́ ŋɔɔ lɔ́tɔ́kɔ́,
anyía bé lumítékíníne mbá bé menyi taaká cɛ́ bɛsana.
Bɛsana eébí ŋo tóŋínyi anyána bébú líhéke háyɛ bú ŋe bíléníne Bandɔ́mɛsɛ́,
2 bɔ́ hákɛ́na mɔŋɔlɛ́ ɔɔ́ yɔɔ́sɔɔ́sɔ yí olíhe yí ekúlú ekime.
Bandɔ́mɛsɛ́ ŋaá basɔ́ bɛ́tánɛ́ná olíhe oócí ɛ́cɛ u ti ŋe kéti na ɔmuaná na ɔmɛsɛ́,
u naŋa u ti é néŋéne.
3 Ɛ́makɛ́la ekúlú á nyɛmána,
nyɛnambɔnɛna baacɔ eényí yááyɛ́ Ambányɛ yɛ́ Ɛsɔ́ma ;
yiíyi eéyé ú ŋe mí cuméke ;
i ŋe mí yiíyi hulinyi baacɔ anyía Bandɔ́mɛsɛ́,
muasɔ́ Munohi,
u ŋaá mɛ tɔ́má.
4 Yaŋɔ́,
ɛ ŋa mɛ́ ɔ wɔɔ́ŋɛ́na nufule eenu,
kuɔŋɔ́ Tite,
taaká ci uumi ɔɔ́nɔ́ anyía basɔ́ bekime béfendí tu ŋa sɔ́ háyá mɔŋɔlɛ́ né Yésus Kilís.
Na ciasɔ́ Síkíne Bandɔ́mɛsɛ́ na muasɔ́ Munohi Yésus Kilís bá ɔ sayábákɛ́na,
bé o wiínjíékíne mbuumu ɔ ɔtɛ́má noómi.
Buólí ebú Tite á nyɛmána wu ɔkɛlaka aá Kɛlɛtɛ
5 Ɛ ŋa cáŋa emí o síke aá Kɛlɛtɛ anyía óo cikílíékíne bɛsana a bɛ́ tɛ ɔ́mɔ́ bá bicikílíékínénú,
óo húle otélímíkínyi tɔ́na bekendisi tuɔ́bɔ tú belumitinine a bálɛ́ka hú ikime a cɛ́áŋa ne tuútu,
háyɛ i ŋe mí o weékúnyíki.
6 Mukendisi belumitinine ŋá nyɛmána mu olíhéke tɛ́ka na hɛkɔma na ɔɔcɔ ;
muúmu mɔbátɛ́nánɔ́ oónjú hú ɔmɔtɛ́,
ª baáná hákɛ́na mɔŋɔlɛ́ né Yésus,
bé líhéke háyɛ Bandɔ́mɛsɛ́ ŋé léne ;
baacɔ bekime menyukune anyía bá tɛ ŋá bɔ́ kɛla bɛɛbɛ́ bɛ́ bɛsana,
bé muúmu kékéke.
7 Yááŋa anyía *mukendisi belumitinine áŋa munyiɔnɔ Bandɔ́mɛsɛ́ ;
yaátɛ́ asana muá nyɛmána mu ɔbá tɛ́ka na hɛkɔma,
muúmu tɛ́ka ne enyite,
te ne tuliŋéliŋe,
muúmu tɛ́ka ta amúána meluku,
ta anua bitule ;
mu tɛ nyíáná ɔɔcɔ e menjiŋé tɔ́na.
8 Mbá mu ŋá nyɛmána mu ɔkáháka bɔmbányɛ baacɔ e uúyé ooki,
mu lénéke ɔkɛla bɛmbányɛ bɛ́ bɛsana ;
muúmu ne injiŋé a aatɔ́,
muúmu atálɛ́mánánɔ́ yɛ́ ɔɔcɔ,
muúmu mufúúménénú eé buúse bɔ́ Bandɔ́mɛsɛ́,
ne oweéhínyínyi ɔ ɔtɛ́má,
mu bítétényíki bɛsana.
9 Mu ŋá nyɛmána mu obíínjie na makɛ́nda ɔ ɔlátɛ́na ambányɛ yí nyiékúnyi eyí bé ŋeé muúmu eékúnyíki,
aáná muáŋa mu ɔbá tɔ́na na makɛ́nda me okíndísíki bɔsɔ́ɔ́kɔ́ ne nyiínyi,
mu tóŋgínyi bɔmbányɛ bɔmbányɛ anyía baacɔ e bé ŋe bú núusi nyiékúnyi eényí á bɔ́ŋa a nyɛnana.
10 Yááŋa anyía baacɔ beéŋí á bɔ́ŋa na aatɔ́ ɔnata,
bé ŋe bú néŋe baacɔ tɔ́na na bɛsana bɛ́ buála a bɛ́ tɛ ŋɔ́ yɔɔ́lɔ.
Bá bɔ́ŋa hɔlákáhɔ́láka ɛ ɛkatɛ́katɛ́ ci belumitinine Yésus a bá ŋa bɔ́ aamba anyía belumitinine bekime ŋá bɔ́ nyɛmána bá ɔbɛ́ácáka.
11 Bá ŋá nyɛmána bé o beébe kuéyíki eété anyía bé ŋe bú túŋulinyi baacɔ bekime bé meébe ma baacɔ a mɔ́mɔtɛ́,
bé ŋe bú eékúnyi bɛsana a bɛ́ tɛ ŋá nyɛmána anyía bábɔ́ nyíákɛ́na baacɔ e menjiŋé.
12 Aáná ɔɔcɔ a wɔmɔtɛ́ u Kɛlɛtɛ awɔ́ u ŋaá bá muabɔ́ *muhémúnyi bɛsana ŋa kɔ́ɔ́náka ɔsɛ :
« Baacɔ bá Kɛlɛtɛ á báka ne munéŋéne ekúlú ekime,
bá ŋa bɔ́ sáama háyɛ ɛnyama cí biciké,
beébe ne butise,
bá bɛ́tááka hú ɔnyíá. »ª
13 Asana ayɛ́ ú ŋaá kɔ́ɔ́náka áŋa taaká ;
buátɛ́ bɔkɔ,
búle beébe oókísíki ne esise ekime anyía bá látákɛ́na bɔmbányɛ bɛsana bí olumitinine.
14 Bá tɛ háná bíínjie na ɔ ɔlɔ́kɔ́ma na ɔ ɔlátɛ́na tuhélúméke tɔ́ buáyá tú *Besuif,
bá tɛ háná látɛ́na esúŋe cá baacɔ e bé ŋe bú kínéke ɔlátɛ́na taaká.
15 Bɔkɔ bukime áŋa bufúúménénú a baacɔ a bá bɔ́ŋa befúúménénú.
ª Ta bɔkɔ a búmɔtɛ́ tɛ á bá bufúúménénú a baacɔ a bá tɛ abɔ́ bá befúúménénú ;
na ciabɔ́ injiŋé ne hííbú hɛcɔɔ́cɔ́ hɛ́ ɔtɛ́má ŋeé beébe nyɛkɛtɛna hú ɔ ɔkɛla bɛɛbɛ́ bɛ́ bɛsana,
bá tɛ lɔ́kɔ́ma aatɔ́ ɔlama.
16 Bé ŋe húlé ábɔ́ bɛ́kɔɔna anyía bé ŋe bú menyi Bandɔ́mɛsɛ́,
yiíyi anyía bɛɛbɛ́ bɛ́ bɛsana abɛ́ bá ŋa bɔ́ kɛla ŋo tóŋínyi anyía bé ti ŋé bú wuúci menyi buúse bukime.
Bá bɔ́ŋa na aatɔ́ ɔnata,
bá kɛ́laka bɛsana e bí ti ŋé bíléníne Bandɔ́mɛsɛ́,
beébe tɛ́ka na makɛ́nda ma ɔkɛlaka ta hú asana a yambányɛ ɔ́mɔtɛ́.