Mɔɔ́sɛ́ me elime ma ɔmɛsɛ́ ooci
3
1 Menyi anyía bikúlú a bɛɛbɛ́ káá bá ɔ ɔmɛsɛ́ ɔ mɔɔ́sɛ́ me elime ;
2 yááŋa anyía baacɔ ká bɔ́ bá ne buhibé,
bé lénéke mɔɔnyɛ́ buéŋí,
bá kɛ́láka bumálá,
bé bíbéétíki,
bé fénékíne Bandɔ́mɛsɛ́,
bá kɛ́lákɛ́na bíábɔ́ bibíényi aatɔ́ ɔnata ;
bá ká bɔ́ bá na tɔŋákɔ,
bé ti kéké bɔkɔ bú okotí.
3 Bá ká bɔ́ bá na bɛnatákánɔ́ bɛ́ ɛtɛ́má,
bá tɛ bɛ́cáma ɔɔcɔ mahana,
bé oótóko bɔsɔ́ɔ́kɔ́ ;
bá ká bɔ́ bá na nyɛŋána,
bé tékeseke baacɔ,
bé líŋekine baacɔ a bá ŋa bɔ́ kɛla bɛmbányɛ bɛ́ bɛsana.
4 Bé ké búle ebú túé bɔsɔ́ɔ́kɔ́,
beébe hú tulóbi ne tulóbi,
ɛtɛ́má inyíóyókónú na bumálá hú mbiɔ́kɛ,
bé lénéke osoomo ú ɔmɛsɛ́ ooci ɔ ɔhɔla Bandɔ́mɛsɛ́.
5 Bé ké búle abɔ́ hɔ́á baacɔ a bá ŋa bɔ́ látɛ́na abɛ́kɛ́lɛ́na cé olumitinine,
mbá bé ti lumitíne anyía makɛ́nda ma Bandɔ́mɛsɛ́ áŋa ma ɔkɛla anyía bébú líhéke háyɛ ú ŋé léne.
Ɛ ŋa mɛ́ ɔ laana anyía limine haaca na baacɔ eébé.
6 Baacɔ a bɔ́mɔtɛ́ bé úúbú ɔlɔŋɔ naŋa bé hule ebú óofokine eé meébe,
bé eékíkínyi beénjú bá bɔtɔhɔ a bɔ́mɔtɛ́ anyía bé lumítékíne maabɔ́ mehúnyi.
Beénjú eébé ne meé bú oofine ɔ ɔkɛla anamánamá cá bɛɛbɛ́ bɛ́ bɛsana ekime e cé ŋeé beébe bíléníne ɛ ɛtɛ́má.
7 Bé ŋe bú léne ɔwaákɔ́nɛ́na bɛsana ;
asana ɔ́mɔtɛ́,
bá tɛ ŋá bɔ́ háya bɛɛtɔ́ o omenyi taaká cɛ́ bɛsana.
8 Buáyá,
na Sáanɛs na Sámbɛlɛsª ŋe bú núúsíki Moyís ;
híáná baacɔ eébé ŋe bú núúsi taaká.
Bá tɛ ábɔ́ bá tɔ́na ne injiŋé,
bá bɛ́tááka hú bɛɛbɛ́ bɛ́ bɛsana,
úúbú olumitinine ti ŋéé beébe ɔɔ́lɔ́ ta bɔkɔ.
9 Mbá bá tɛ ŋá bɔ́ cɔba ne buúse ;
búábɔ́ buála kéé bítóŋínyi a baacɔ háyɛ bé ŋeé menyi buáyá buála bɔ́ na Sáanɛs na Sámbɛlɛs.
Ilébé a cɛ́ ŋa lɛca Timoté bɛ́muátá
10 Mbá kuɔŋɔ́,
o ŋoó menyi bɔmbányɛ na nyiámɛ nyiékúnyi,
na yáámɛ́ ambányɛ yɛ́ nyɛbɛ́kɛ́lɛ́na,
na anyána ɛ́ náŋa yámɛ bɛ́tááka,
i lumitekinine,
na anyána i ŋe mí eéhínyínyi,
i lénéke bɔsɔ́ɔ́kɔ́,
na anyána i ŋe mí oónyísínyi nyiámɛ nyɛkɔɔna.
11 O ŋoó menyi tɔ́na anyána bé ŋe mi tékéséke,
míɔ lɛcaka muuyé.
Muuyé mɔ́ háányɛ́ ne indekese cɛ́ háányɛ́ ɛ tɛ ɔ́mɔ wɔɔ́ndɛ́mánána na a bálɛ́ka cɛ Antióseª,
ne ci Ikóniyomª ne ci Lisitɛ́lɛª e ?
Mbá ta híáná,
Otéŋí a Waáŋá ŋeé mi kétúnyíki e muuyé eémú mukime.
12 Aá taaká,
baacɔ a bá ŋa bɔ́ áamba olíhe ne e nyimónjóló ne Yésus *Kilís,
na háyɛ Bandɔ́mɛsɛ́ ŋeé léne,
ká bɔ́ ɔɔ́ndɛ́mákánána ne indekese ciéŋí.
13 A aháŋá na baŋána na baacɔ bá mabɛ́lɛ́áka,
bé ké búle abɔ́ cɔ́ba ne buúse ɔ ɔkɛla bɛsana a bɛɛbɛ́,
bá ká bɔ́ nánaka ohónyí ;
bó nénisiki tɔ́na bɔsɔ́ɔ́kɔ́ bé etémbí.
14 Ɔɔ́wɔ a aháŋá,
cɔbá ne buúse ɔ ɔlátɛ́na bɛsana abɛ́ ɔ ŋɔɔ́ waákɔ́nákɛ́na,
wó biíbi lumitinine ne uúwe ɔtɛ́má okime,
anyía o ŋoó menyi bɔmbányɛ bɔ́ɔ́wɔ beékúnyi.
15 Yááŋa anyía o otúme ɔɔ́wɔ a bunɔ́sɛ́,
ª o ŋoó menyi Ciɔɔ́ŋɛ́ e cifúúménénú ;
cí ŋo yóo wiínjie injiŋé anyía ɔ́ɔ bá ne olíhe ananyía ɔ ŋɔɔ́ háya mɔŋɔlɛ́ né Yésus Kilís.
16 Ciɔɔ́ŋɛ́ cɛ́ Bandɔ́mɛsɛ́ ikime a ciɔ́ŋɔ́kɔ́nɔ́ ŋaá bɛ́ɔɔ́ŋɔ́kɔ na makɛ́nda me Elilé yɛ́ Bandɔ́mɛsɛ́ ;
cɛ́ ŋɔ yɔɔ́lɔ ne o oweékúnyi baacɔ taaká,
ne o otélímínyi na anana na bɛsana a bɛɛbɛ́,
ne o oweékúnyi baacɔ nyɛbɛ́kɛ́lɛ́na a nyɛtálɛ́mánánɔ́,
17 ananyía munyiɔnɔ Bandɔ́mɛsɛ́ á bámɔ́kɔ́nɛ́na na bɔkɔ bukime e uúyé ɔtɛ́má noómi.
Buúbu bú ŋe wuúci bɛ́ámbɛ́na anyía waá kɛlaka bɛmbányɛ bɛ́ bɛsana.