Nufule nɔ́ ɔláta enú Bóol ŋɔ yɔɔ́ŋɔ́kɛ́ná
Timoté
Bóol ŋeé téŋi Timoté
1
1 Yaŋɔ́ Bóol,
*ɔɔcɔ u ɛndɔ́ma u *Yésus *Kilís,
e nyitélímínyi anyɛ́ *Bandɔ́mɛsɛ́ ŋeé mi teliminyi anyía yámɛ bá muhulinyi baacɔ Ambányɛ yɛ́ Ɛsɔ́ma a yɛ́ ŋa lɛ́ca olíhe awɔ́ u ŋaá basɔ́ bɛ́tánɛ́na anyía tua sɔ́ŋa e nyimónjóló ne Yésus Kilís.
2 Ɛ ŋa mɛ́ ɔ wɔɔ́ŋɛ́na nufule eenu,
kuɔŋɔ́ Timoté,
uumi ɔɔ́nɔ́ u ɔtɛ́má.
Na ciasɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá kuɔŋɔ́ sáyabakɛna,
bá ɔ bɛ́cáma mahana,
bé o wiínjie mbuumu ɔɔ́wɔ ɔ ɔtɛ́má noómi.
Bóol ŋeé kíndísi Timoté ne ilébé
3 I ŋeé mi iínjie Bandɔ́mɛsɛ́ bitéŋíti ɔɔ́wɔ a asana.
I ŋeé mi wuúci nyiɔnɔ ne híími hɛcɔɔ́cɔ́ e hifúúménénú a hɛ́áŋa ɔ ɔtɛ́má háyɛ cíími sɔ́kɔ́nɔ́ ŋe bú wuúci nyiɔ́kɛ́na.
ª Ekúlú ekime eyí í ŋe mí wuúci bɛ́cɔ́kɔ́lɛ́na,
ɛ ŋɔ mɛ́ ɔ bɛ́táá ne nebutúé na nabuɔ́sɛ́.
4 Ɛ naŋa yámɛ bɛ́tááka bíɔ́wɔ bɛlɛlá ebí o ŋoó hémúkúnyi,
ª ɛcaná cɛ ɔ kuɔŋɔ́ lɛ́cɔtɔna cío mi nyióyo ɔ ɔtɛ́má,
anyía yémi bílénéke buéŋí.
5 I ŋeé mi iínjie Bandɔ́mɛsɛ́ bitéŋíti ɔɔ́wɔ a asana anyía ɛ ŋa háná mɛ́ bɛ́táá anyía ɔ ŋɔɔ́ háya mɔŋɔlɛ́ né Yésus *Kilís taaká taaká.
Olumitinine oócí ŋaá cáŋacáŋa ɔ bá na ɔ ɔtɛ́má ú ciɔwɔ ɛnyɛɛ́nɔ́ Loyis na ɔ ɔtɛ́má ú ɔɔnyia Énis.
I ŋe mí menyi ɔɔ́mɛ ɔ ɔtɛ́má anyía wáŋa tɔ́na nɔ́ɔ́wɔ.
6 Yaátɛ́ asana ɛ ŋɔ mɛ́ ɔ laana tɔ́na anyía bɛ́kɛ́ndákɛ́na ɔ ɔkɛla na makɛ́nda mekime bɔkɔ abɔ́ Bandɔ́mɛsɛ́ ŋó yóo cuméke ekúlú ayɛ́ ɛ ŋɔ mɛ́ ɔ tála aabá a aatɔ́.
7 Yááŋa anyía tɛ́ cáŋa elilé yɛ́ ɔbɛ́naanɛna Bandɔ́mɛsɛ́ naŋa waá basɔ́ iínjíékíne,
mbá u ŋaá basɔ́ iínjie Elilé yí ne ciéhíhi ne olénéke bɔsɔ́ɔ́kɔ́ ne injiŋé a cɛ́ ŋá basɔ́ ɔɔ́lɔ a ambányɛ yɛ́ nyɛbɛ́kɛ́lɛ́na.
8 Buátɛ́ bɔkɔ atɛ lɔ́kɔ́máka aatɔ́ ɔlama o owoókísi baacɔ asana yí uusú Otéŋí a Waáŋá,
ta yáámɛ asana yɛ́ bɛ́muátá yaŋɔ́ ooci awɔ́ ya mɛ́ŋa eé ciíbe cɛ ɛcaná a yááyɛ́ asana;
ª mbá a makɛ́nda amá Bandɔ́mɛsɛ́ ŋó yóo wiínjie,
eéhínyínyi ɔlɔ́kɔ́ma muuyé ɔlɔŋɔ na yaŋɔ́ a asana na Ambányɛ yɛ́ Ɛsɔ́ma.
9 Bandɔ́mɛsɛ́ ŋaá basɔ́ nohi.
U ŋaá basɔ́ lɔ́ŋɔ́kɔ anyía túásɔ́ bámɔ́kɔ́nɛ́na bifúúménénú bɛ́ baacɔ ;
tɛ́ cáŋa a asana na bíásɔ́ bɛmbányɛ bɛ́ abɛ́kɛ́lɛ́na,
mbá hú anyía na nyíáyɛ́ nyɛtákɛ́na nyɛ́ bɛsana na yááyɛ́ yaála yí nuubo.
U ŋaá kɛ́láka aáná e elime ci Yésus Kilís,
ekúlú ayɛ́ u ŋaá bá ɛ́cɛ u ti ŋe kéti na ɔmuaná na ɔmɛsɛ́.
10 Aámbáya ú maá basɔ́ tóŋínyi bɔmbányɛ bɔmbányɛ nuubo eénú a nyɛfaaya nyɛ́ muasɔ́ Munohi Yésus Kilís.
Wuúci u ŋeé menyisi owé,
yó tóŋgínyi a Ambányɛ yɛ́ Ɛsɔ́ma anyía tu tɛ ká sɔ́ fɔ́nɔ́,
mbá tu ká sɔ́ bá na yɔɔ́sɔɔ́sɔ yí olíhe yí ekúlú ekime.
11 Yaŋɔ́,
Bandɔ́mɛsɛ́ ŋeé mi télímínyi ne muhulinyi baacɔ Ɛsɔ́ma na ɔɔcɔ u ɛndɔ́ma anyía yémi hulíkínyi baacɔ bɛsana eébí,
i beébe biíbi eékúnyíki.
12 Buátɛ́ bɔkɔ ɛ ŋa mɛ́ lɔ́kɔ́ma nyɛnamá nyí muuyé eenyi ;
mbá ta híáná,
ɛ tɛ ŋá mɛ lɔ́kɔ́ma aatɔ́ ɔlama,
ananyía i ŋe mí menyi ɔɔcɔ awɔ́ ɛ ŋa mɛ́ háya mɔŋɔlɛ́ nááyá,
yaŋɔ́ tɔ́na na mɔŋɔlɛ́ anyía wáŋa na makɛ́nda me otétényíki bɔkɔ ebú u ŋeé mí cuméke ɔ ɔkɔɔ́háma buɔ́sɛ́ etéebú abɔ́ u ká ká hálɔ́mɔ́na.
13 Hulíkínyi taaká taaká cɛ́ bɛsana bɔkɔ búmɔtɛ́ háyɛ i ŋo mí o biíbi hulíkínyi,
mbá e bíínjie ne o olumitinine ne o oléne bɔsɔ́ɔ́kɔ́ ;
bɛsana eébí ŋeé hule e nyimónjóló anyɛ́ tua sɔ́ŋa ne Yésus Kilís.
14 Tétényíki Ambányɛ yɛ́ Ɛsɔ́ma eéyé ayɛ́ Bandɔ́mɛsɛ́ ŋo yóo cúméke,
a makɛ́nda me *Efúúménénú yí Elilé a yɛ́áŋa e cíísú ɛtɛ́má noómi.
15 Kuɔŋɔ́ bɛ́muátá o ŋoó menyi bɔmbányɛ bɔmbányɛ anyía belumitinine bekime bé ekéti yí iisí yɛ́ Asi na maá bɔ́ mɛ bɛ́yuátáka ;
ne Fisɛlɛ na Ɛlɛ́mɔ́sɛ́n á bɔ́ŋa ɔ ɔlɔŋɔ ú baacɔ oócí.
16 A aháŋá ne Onésífɔɔl,
u naŋa waá mɛ ɔɔ́lɔ́kɔ bikúlú a bɛ́mɔtɛ́.
U tɛ ŋá lɔ́kɔ́ma aatɔ́ ɔlama eé buúse bɔ́ baacɔ a asana ayɛ́ ya mɛ́ŋa eé ciíbe cɛ ɛcaná.
Otéŋí a Waáŋá é wuúci sáyábákɛ́na na ciayɛ́ ciíbe cɛ baacɔ áyá.
17 Ekúlú ayɛ́ ú ŋgaá faáya aaha o *Lóom,
u ŋeé bíínjíé o o húle mɛ áamba na makɛ́nda,
yɔ́ kɔ mɛ kuana haála ahɛ́ ɛ ŋaá mɛ bá.
18 Uusú Otéŋí a Waáŋá é wuúci sáyábɛ́na a buɔ́sɛ́ ebú u kéé kélísíki baacɔ.
Kuɔŋɔ́ bɛ́muátá,
o ŋoó menyi bɔmbányɛ ɔ ɔhɔla baacɔ bekime moólí emé Onésífɔɔl ŋaá mɛ ɔɔ́lɔ́kɔ,
ekúlú ayɛ́ ɛ ŋa mɛ́ bá ɛ Ɛfɛ́ɛsɛ.