2
1 Énu menyí anyía ɛ ŋa mɛ́ nua ɛcálɛ eécí na makɛ́nda ne eenú eé buúse,
ne eé buúse bú belumitinine bá Lawotisé,
ne eé buúse bú belumitinine bekime e bé ti ŋé bú mi menyí.
2 Ɛ ŋa mɛ́ nua aáná anyía na banɔ́ ne beébe nuánɔ́ bámɔ́kɔ́na na ɛtɛ́má cɛɔ́nɛ́nánɔ́,
nu lénékéne e nyimónjóló noómi.
Aáná nu ká nɔ́ lɔ́kɔ́máka bɔmbányɛ bɔmbányɛ asana ayɛ́ Bandɔ́mɛsɛ́ ŋaá bátɛ́ná indiitie,
ª nuó yiíyi menyi bɔmbányɛ bɔmbányɛ,
yiíyi yááŋa Kilís.
3 Waáta Kilís áŋa ne injiŋé ikime ne omenyi okime.
Bɛandándá bɛ́ bɛmbányɛ bɛ́ bɛsana eébí ŋeé húle ná Bandɔ́mɛsɛ́.
4 Ɛ ŋa mɛ́ banɔ́ láana bɛsana eébí anyía ɔɔcɔ tɛ banɔ́ néŋé na ɔtáŋa ú ɛŋɔŋɔ.
5 Énu menyí anyía ta ya mɛ́ŋa haaca na banɔ́,
ɛ ŋa mɛ́ banɔ́ bɛ́táá bikúlú bikime ;
i bílénéke anyía nua nɔ́ŋa bɔɔ́nɛ́nánɔ́ a mɔŋɔlɛ́ amá nu ŋa nɔ́ háya né Kilís,
nu kɛlaka bɛsana a nyɛlatana noómi.
Olíhe ú belumitinine Yésus Kilís
6 Buátɛ́ bɔkɔ,
e nyilumitinine enyí nú ŋe nú lúmitinine anyía Yésus *Kilís áŋa Otéŋí a Waáŋá,
ánɔ cɔba ne buúse o olíhe háyɛ u ŋa yáamba.
7 Ánɔ bámɔ́kɔ́na bebíínjíénú nááyá,
nu látákɛ́na bɛsana abɛ́ bá ŋaá banɔ́ eékúnyíki,
ánɔ cɔba ne buúse ɔ ɔwɔɔ́nɛ́na e nyiékúnyi nyɛ́ bɛsana bí Kilís noómi,
nu iínjíékíne Bandɔ́mɛsɛ́ bitéŋíti buéŋí.
8 Énu bíkékényíki anyía ɔɔcɔ tɛ banɔ́ néŋé na yaála yí omenyi a yɛ́ tɛ ŋɔ́ yɔ́ɔ́lɔ.
ª Waáta omenyi oócí ú ŋeé húle na a abɛ́kɛ́lɛ́na cá baacɔ na a makɛ́nda me ibíne,
ú ti húle né Kilís.
9 Énu menyí anyía bɛsana bikime a bɛ́áŋa ná Bandɔ́mɛsɛ́,
bɛ́áŋa taaká tɔ́na híáná né Kilís,
bɔkɔ búmɔtɛ́ ;
10 nuó ményi tɔ́na anyía Bandɔ́mɛsɛ́ ŋaá banɔ́ iínjíékíné bɛnyɛ́ma bikime anyía nua nɔ́ŋa e nyimónjóló ne Kilís,
wuúci u ŋe téŋínyi metéŋí mekime a mááŋa na makɛ́nda na ɔ ɔmɛsɛ́ na ɔ ɔmuaná.
11 Nua nɔ́ŋa e nyimónjóló ne wuúci,
buátɛ́ bɔkɔ énu menyí anyía ú maá banɔ́ áácaka.
Mbá tɛ́ cáŋa a nyɛbɛ́áca anyɛ́ baacɔ naŋa bábɔ́ bɛ́ácáka.
Nyɛbɛ́áca eényí Kilís ú ŋeé nyiínyi kɛla;
ª ɛ́cɛ anyía ú má banɔ́ aáŋíá a buɔ́lɛ́ bɔ́ nyíánɔ́ nyɛbɛ́kɛ́lɛ́na a nyɛɛbɛ́ nyɛ́ buáyá.
12 Owootine awɔ́ bá ŋaá banɔ́ óótíne ŋoó tóŋínyi anyía bá ŋaá banɔ́ nyíé ɔlɔŋɔ ne Kilís ;
ú tóŋgínyi tɔ́na anyía na banɔ́ ne Kilís nú ma nɔ́ háányúá é biwéewé ɔlɔŋɔ ɔ́mɔtɛ́.
Yááŋa anyía nu ŋe nú lúmítíníne anyía Bandɔ́mɛsɛ́ ewú u ŋeé héenyi Kilís é biwéewé áŋa na makɛ́nda ma ɔ banɔ́ heényi é biwéewé tɔ́na.
13 Buáyá nu ŋa nɔ́ bá háyɛ biwéewé anyía nu ŋa nɔ́ bá nuanɔ́ kɛ́laka bɛsana a bɛɛbɛ́,
ɛ́cɛ Kilís tɛ ŋá banɔ́ aáŋíá a buɔ́lɛ́ bɔ́ nyíánɔ́ nyɛbɛ́kɛ́lɛ́na a nyɛɛbɛ́.
Mbá aámbáya,
Bandɔ́mɛsɛ́ má banɔ́ iínjie yɔɔ́sɔɔ́sɔ yí olíhe né Yésus Kilís,
yɔ́ basɔ́ nyɛánɛnɛna maasɔ́ maabɛ́,
basɔ́ bekime.
14 U ŋaá basɔ́ nyɛánɛ́nɛ́na buhíné ebú esúŋe ŋaá bá cá basɔ́ bátaka,
bú basɔ́ nuusiki.
ª U ŋeé buúbu aáŋíá buúse bukime,
yó buúbu túéhínyi né Yésus e uúyé owé ɔ ɔmbásá ɔ ɔmuaná.
15 Bandɔ́mɛsɛ́ ŋɔ́ sɔ́mɔ́kɔ makɛ́nda mekime ma bɛnyɛ́ma bikime a bɛ́áŋa na makɛ́nda na ɔ ɔmɛsɛ́ na ɔ ɔmuaná,
yó biíbi iínjíe aatɔ́ ɔlama eé buúse bɔ́ baacɔ bekime,
anyía wé tóŋínyi anyía uuyé Ɔɔ́nɔ́ ŋeé biíbi hɔ́la a makɛ́nda.
16 Buátɛ́ bɔkɔ,
nɔtɛ lɔ́kɔ́máka ɛtáŋa cɛ́ baacɔ a cɛ́ ŋa kɔɔ́na anyía :
« Nɔtɛ nyíá bɛnyɛ́ma bɛ́ ɔnyíá eébí,
nɔtɛ múána meluku emenyíé »,
ta anyía :
« Ánɔ kɛ́láka bɔŋanda eébú,
énu nyemíki na abála cé oólí,
na mɔɔ́sɛ́ mé ehélúme yí *Besuif. »
17 Nuti beébe lɔ́kɔ́mɛ́na,
anyía bɛsana eébí bikime ŋaá bá bíé tóŋgínyi tubílícínyínyí tɔ́ taaká cɛ asana a yɛ́ káá fáaya :
Yiíyi yááŋa Kilís bɛ́muátá.
18 Nuti beébe lɔ́kɔ́mɛ́na,
anyía bá ŋa bɔ́ kɔ́ɔna anyía baacɔ é kélíki cɛɛ́tɔ o obílóosi,
bé nyémiki *bililé bɛ́ masɔ́ma bɛ́ Bandɔ́mɛsɛ́.
Bá bɔ́ŋa na bumálá,
bá kɔ́ɔnaka anyía Bandɔ́mɛsɛ́ meé beébe tóŋgínyi bɛsana.
Nyɛnamá nyɛ́ baacɔ eényí ŋe bíbééti etémbí ne etémbí,
bá bɛ́tááka hú bɛsana bɛ́ ɔmɛsɛ́.
19 Bá tɛ abɔ́ bá a nyɛlatana ne Kilís a wáŋa aatɔ́.
Yiíye anyía né Kilís cɛɛ́tɔ ŋɔ bɔ́ŋɔ bɔkɔ bukime e bú ŋé ciíci bɛ́ámbɛ́na.
Baacɔ a bá bɔ́ŋa a nyɛlatana ne wuúci ŋa bɔ́ kɔ́ma nááyá háyɛ Bandɔ́mɛsɛ́ ŋa yáamba.
ª Wáŋa a nyɛlatana ne beébe háyɛ cɛɛ́tɔ cɛ ɔɔcɔ áŋa ɛlatákánɔ́ na ɔɔ́ŋɔ́ na tulaŋá.
20 Yaŋɔ́ ɛsɛ́ nu ŋe nú wé ɔ ɔlɔŋɔ ne Kilís,
buátɛ́ bɔkɔ bɛnyɛ́ma bikime a bɛ́áŋa na makɛ́nda na ɔ ɔmɛsɛ́ na ɔ ɔmuaná tɛ á bá ne butéŋí náánɔ́ e ?
Mbá anyíatɛ́ nu ŋe nú líhe háyɛ baacɔ bá ɔmɛsɛ́ ekúlú ayɛ́ nu ŋa nɔ́ látɛ́na esúŋe a cá ŋa kɔɔ́na anyía :
21 « Eti bítíse bɔkɔ eébú,
eti hiíte bɔkɔ ebunyíé,
eti buúbu ɔ́ɔ́kɛ́tɛ́na e ? »
22 Esúŋe ekime eécé ŋeé húle hú e eékúnyi cá baacɔ.
Cá ŋa mána ekúlú ayɛ́ baacɔ meé ceéce bɛ́kɛ́lákɛ́na.
23 Baacɔ ŋe bú keti anyía esúŋe eécé ŋe yíinjie injiŋé anyía bá ŋa kɔ́ɔna anyía ɔɔcɔ ŋá nyɛmána wu ɔlátákɛ́na *bikotí,
yó lóosi cɛɛ́tɔ,
u ciíci kélíki.
Mbá esúŋe eécé ŋɔɔ́ yɔ́ɔlɔ baacɔ hú ɔlátɛ́na nyiléne nyí cííbú imehú.