Bóol ŋée téŋi baacɔ a bɔ́mɔtɛ́ bé Lóom
16
1 Uusú onyíinyí e woónjú u olumitinine ú mɔŋɔlɛ́ oócí wa yánáŋa,
nyiínyi ɛ́cɛ Fébée ;
wáŋa tiakɔ́nɛ́sɛ aá hiɔ́bɔ hí belumitinine *Kilís hɛ́ Saáŋkɛlɛ́.ª
2 Énu wuúci káha bɔmbányɛ eé nyiínyi nyí Otéŋí a Waáŋá a nyɛnamá enyí belumitinine abɔ́ nyɛmána bá ɔkɛlaka,
énu wuúci ɔ́ɔ́lɔ́kɔ a bɛsana bikime a bɛ́áŋa bí o wuúci bɛ́ámbákɛ́na ;
wuúci bɛ́muátá wáŋa ɔwɔ́ɔ́lɔ́kɔ́nɔ́ baacɔ beéŋí,
ta hú yaŋɔ́ bɛ́muátá ooci.
3 Énu mi téŋítínyi ne Bilisíle na Akílas,
ª baláamɛ bé buólí e nyimónjóló ne Yésus Kilís ;
4 beébe eébé bá ŋa sɛ́ bébú iínjíékíne bíábɔ́ bɛɛtɔ́ ɔ ɔhɔ́nɔnɔ úúmi olíhe ;
tɛ́ cáŋa hú yaŋɔ́ bímuócí ŋé mi beébe iínjíé bitéŋíti a bɔmbányɛ bukime abɔ́ bá ŋa bɔ́ mɛ kɛláka ;
mbá ne belumitinine Kilís bekime áyá a bá tɛ ábɔ́ bá *Besuif.
5 Énu téŋíti tɔ́na hiɔ́bɔ hí belumitinine Kilís a hɛ́ naŋa hɛ́ bɛ́bándákána ɔ ɔbɛ́cɔ́kɔ́lɛ́na e uúbu ooki.
ª Énu téŋíti Ebáyínɛ́t,
uumi ɔɔcɔ u ɔtɛ́má ;
wuúci u ŋaá bá ɔɔcɔ u buúsebuúse awɔ́ u ŋaá háya mɔŋɔlɛ́ né Yésus Kilís i iisí cɛ Asi.
6 Énu téŋíti Malíi awɔ́ u ŋa lɛcaka muuyé buéŋí a yáánɔ́ asana.
7 Énu mi téŋítinyi na Andólóníkus ne Suniyaª,
báámɛ benúséyé ;
beébe tu ŋá sɔ́ bá eé ciíbe cɛ ɛcaná ɔlɔŋɔ.
Bá bɔ́ŋa eebe abá baacɔ bá ɛndɔ́ma ŋa bɔ́ bá bébú kékéke buéŋí ɔ ɔhɔla;
ª beébe bá ŋa bɔ́ cáŋa ɔháya mɔŋɔlɛ́ né Kilís na yaŋɔ́.
8 Énu mi téŋítínyi Ambiliyátus,
yáámɛ ekendinyi yɛ́ ɔtɛ́má awɔ́ tua sɔ́ŋa balatánɔ́ e nyimónjóló ne wuúci ne uusú Otéŋí a Waáŋá.
9 Énu mi téŋítínyi ne Ulúbɛŋ,
yáásɔ́ ekendinyi yí buólí e nyimónjóló ne Kilís,
na Ɛsɛtákis,
uumi ɔɔcɔ u ɔtɛ́má.
10 Nué mi téŋítínyi tɔ́na Abɛ́lɛs ;
wuúci u ŋoó tóŋgínyi tubílícínyínyí anyía u ne meé bíínjíe e nyimónjóló ne Kilís.
Énu mi téŋítínyi tɔ́na baacɔ bé ciíbe cɛ Alístóbule.ª
11 Énu mi téŋítínyi ne uumi onúséyé Elotíyɔŋ,
na baacɔ bé ciíbe cɛ Nalasise ;
beébe bá ŋa bɔ́ háya mɔŋɔlɛ́ né Otéŋí a Waáŋá.
12 Énu mi téŋítínyi ne Tilífɛn ne Tilífos ;
beébe bá ŋa bɔ́ nyíɔnɔ Otéŋí a Waáŋá buólí,
bá lɔ́kɔ́máka muuyé mukime.
Énu téŋíti tɔ́na uumi onyíinyí e woónjú u ɔtɛ́má Bɛlɛ́sit,
wuúci u ŋaá lɔ́kɔ́máká muuyé muéŋí e buólí bú Otéŋí a Waáŋá.
13 Énu téŋíti tɔ́na ne Olúfusª awɔ́ Bandɔ́mɛsɛ́ ŋɔɔ́ lɔ́tɔ,
na ciayɛ́ iinyí a wáŋa tɔ́na ciamɛ iinyí.
14 Énu mi téŋíkínyi na Asɛnɛkilite,
na Fɛlɛkɔŋ,
na Ɛlɛ́mɛs,
na Batɔ́lɔ́bas,
na Ɛlɛ́mas,
ne benyíinyí bé olumitinine bekime a bá bɔ́ŋa ɔlɔŋɔ ne beébe.
15 Énu téŋíti tɔ́na ne Filólóko,
ne Suulí,
ne Nélé,
ne uuyé onyíinyí e woónjú,
na Ɔlɛ́mbɛ,
ne belumitinine bekime a bá bɔ́ŋa ɔlɔŋɔ ne beébe.
16 Énu téŋgínyínyi banɔ́ na banɔ́,
nu bíémbíkinyinyi anyía nua nɔ́ŋa benyíinyí bé olumitinine.
Tuɔ́bɔ tú belumitinine Kilís tukime ŋa bɔ́ banɔ́ téŋi.
17 Baláamɛ,
ɛ ŋa mɛ́ banɔ́ láana anyía énu bíkékényíki na baacɔ e bé ŋe bú héléne mɔsalɔ́tɔ́nána,
bé kúfítíkínyi belumitinine ;
bé ŋe bú nuusi nyiékúnyi anyɛ́ bá ŋaá banɔ́ eékúnyíkí.
Nɔtɛ latákána bukendinyi na nyɛnamá nyɛ́ baacɔ eényí.
18 Yááŋa anyía tɛ́ cáŋa buólí bú Otéŋí a Waáŋá Yésus Kilís bá ŋa bɔ́ nyiɔ ;
bá ŋa bɔ́ nyíɔnɔ yáaŋa hú túábɔ́ tɔɔna tɔ́ bɛ́muátá,
aáná bé ŋe bú néŋe baacɔ bakɛla hɛkɔma,
na bɛmbányɛ bí mehúnyi.
19 Mbá aá banɔ́,
ɔɔcɔ okime ŋe menyi nyíánɔ́ nyɛlɔ́kɔ́mɛ́na anyɛ́ nu ŋa nɔ́ lɔ́kɔ́mɛ́na Otéŋí a Waáŋá.
Aáná i ŋeé mi bíléne a yáánɔ́ asana ;
ɛ aámbáka tɔ́na anyía nuanɔ́ bámɔ́kɔ́na ne injiŋé a bɛɛtɔ́ cɛ ɔkɛlaka bɛmbányɛ bɛ́ bɛsana,
ª nu sámbáka ɔkɛla a bɛɛbɛ́.
20 Hikúlúkúlú,
Bandɔ́mɛsɛ́,
Muínjie baacɔ mbuumu,
u kɔ́ yɔ́ɔlɔkɔ *Sátan ɛ ɛmbana cɛ cáánɔ́ akɔlɔ́.
Uusú Otéŋí a Waáŋá Yésus á banɔ́ sayábákɛ́na.
21 Timoté ewú tu ŋe sú nyíónyi ŋaá banɔ́ téŋi,
ta báámɛ benúséyé eebe tɔ́na :
Ne Lísius,
na Yásɔn,
ne Sosibatɛɛl.
22 Yaŋɔ́ Tɛɛtíyus,
muɔ́ŋɛ́na Bóol nufule,
ɛ ŋa mɛ́ banɔ́ téŋi tɔ́na eé nyiínyi nyí Otéŋí a Waáŋá.
23 Káyus ŋaá banɔ́ téŋi tɔ́na ;
nááyá ɛ náŋa yámɛ fianaka.
Wuúci u naŋa wá káháka hiɔ́bɔ hí belumitinine hikime.
Na Ɛlásɛt,
mutétényi mɔɔnyɛ́ mu bálɛ́ka,
ª ne uuyé onyíinyí Kuátus ŋa bɔ́ banɔ́ téŋi tɔ́na. [
24 Uusú Otéŋí a Waáŋá Yésus Kilís á banɔ́ sáyábákɛ́na banɔ́ bekime.]
Nyinyemi
25 Tu iínjíékíne hú Bandɔ́mɛsɛ́ nuúmi anyía wuúci u ŋaá basɔ́ kíndísi.
Aáná Ambányɛ yɛ́ Ɛsɔ́ma yí Yésus *Kilís eyí i ŋe mí húlínyi baacɔ ŋaa kɔ́ɔna bɔkɔ búmɔtɛ́,
yiíyi eéyé yɛ́ ŋaá bá indiitie buáyá.
26 Mbá aámbáya,
Bandɔ́mɛsɛ́ Indiwé meé yiíyi nambɔnakɛna baacɔ e cííyí Ciɔɔ́ŋɛ́ ecí *behémúnyi bɛsana ŋa bɔ́ ɔɔ́ŋɔ́kɔ́,
ananyía baacɔ bá mɔnɔŋɔ mekime ábɔ́ lɔ́kɔ́máka háyɛ u ŋaá sɔ́mbɔ́tɔ́ná ɔ ɔkɛla anyía baacɔ ébú yiíyi lumítékíníne,
bé wuúci lɔ́kɔ́mákɛ́na.
27 Tu iínjíékíne Bandɔ́mɛsɛ́ nuúmi e elime ci Yésus Kilís,
anyía wuúci bímuócí wáŋa ne injiŋé ikime ɔ ɔhɔla.
*Híáná yááŋa.ª