Énu bíínjíékíne ná Bandɔ́mɛsɛ́ háyɛ afɔná a yɔɔ́sɔ
12
1 Yaátɛ́ asana aná,
a nyɛbɛ́cáma anyɛ́ Bandɔ́mɛsɛ́ ŋá basɔ́ bɛ́cáma mahana,
ɛ ŋa mɛ́ banɔ́ báta,
banɔ́ báámɛ benyíinyí,
isíʼo :
Cɔ́kɔ́lɛ,
énu bíínjíékíne banɔ́ bɛ́muátá nááyá háyɛ etúké yɛ́ afɔná a yááŋa yɔɔ́sɔ,
yiíyi efúúménénú,
yí wuúci bílénékíne.
Bú káá bá taaká ci nyi-wuúci-nyemi nyí elilé a yáánɔ́ aháŋá.
2 Nɔtɛ cɔba ne buúse o olíhéke i iŋetí cɛ baacɔ bá ɔmɛsɛ́ ooci,
mbá ánɔ bɛ́nyɛ́anáka Bandɔ́mɛsɛ́ é kumbútúkúne cíínú ɛbɛ́táá ɔ ɔkɛla anyía wá kɔmbɔ́tɔ́na cíínú ɛtɛ́má,
ananyía nuénú ményi aátɛ́ Bandɔ́mɛsɛ́ ŋá yaámba anyía nuánɔ́ kɛ́láka.
Buúbu búáŋa bɔmbányɛ,
bú wuúci bílénékíne,
buúbu bɔmbányɛ bɔmbányɛ háyɛ u ŋá yáamba.
3 A makɛ́nda ma yaála yí nuubo ayɛ́ Bandɔ́mɛsɛ́ ŋeé mi boosíki,
ɛ ŋa mɛ́ laana hú náányɛ́ á banɔ́ isíʼo :
Nuti bíbéétíki.
Énu menyí yáaŋa nyíánɔ́ nyɛbá nyɛ́ bɛ́muátá a makɛ́nda ma bɛsana bí olumitinine amá Bandɔ́mɛsɛ́ ŋaá banɔ́ iínjíékíne.ª
4 Ánɔ lɛcá !
Ɔɔcɔ okime áŋa na bɛláŋá biéŋí a ciayɛ́ cɛɛ́tɔ ;
bɛláŋá eébí tɛ á bá ne buólí búmɔtɛ́ a cɛɛ́tɔ.
5 Híáná ta basɔ́ tua sɔ́ŋa beéŋí mbá tua sɔ́ŋa balatákánɔ́ ɔɔcɔ ɔmɔtɛ́ e nyimónjóló ne *Kilís ;
hú naányɛ́ u nyiɔkɔ búáyɛ́ buólí mbá basɔ́ bekime bɛláŋá bɛ́ cɛɛ́tɔ ɛ́mɔtɛ́.
6 Bandɔ́mɛsɛ́ ŋaá basɔ́ bóósi náányíá náányia,
háyɛ u ŋeé léne.
Mbɔ́kɔ u ŋo yóo wiínjíe olumitinine ú ohémúkúnyi bɛsana,
biíbi hémúkúnyí ne olumitinine oócí.
7 Mbɔ́kɔ u ŋó yóo wiínjie makɛ́nda ma ɔnyiɔkɛna bɔsɔ́ɔ́kɔ́,
beébe nyiɔkɛ́na.
Mbɔ́kɔ me oweékúnyíki bɔsɔ́ɔ́kɔ́,
beébe eékúnyíki !
8 Mbɔ́kɔ me okíndísíki baacɔ,
beébe kíndísíki.
Mbɔ́kɔ u ŋó yóo wiínjíe makɛ́nda me owiínjíékíne baacɔ bɛnyɛ́ma,
beébe iínjíekine,
atɛ fanɛ́na.
Mbɔ́kɔ makɛ́nda me okendisiki belumitinine,
beébe kendísíki na ɔtɛ́má okime háyɛ yɛ́ ŋaá bɛ́amba.
Mbɔ́kɔ ma ɔwɔɔ́lɔ́kɔ bahanahana,
beébe ɔɔ́lɔ́kɔ ne obíléne.
9 Énu lénéke bɔsɔ́ɔ́kɔ́ na ɔtɛ́má ɔ́mɔtɛ́,
nu liŋekine ɔkɛla bɛɛbɛ́ bɛ́ bɛsana.
Ánɔ hákɛ́na makɛ́nda ɔ ɔkɛla bɛmbányɛ bɛ́ bɛsana.
10 Énu lénékéne banɔ́ na banɔ́ háyɛ ba-ɔɔ́nɔ́ u yaayɛ́,
nu kékékéne ɔ ɔhɔla.
11 Ánɔ nyɛánáka bɔnɔ́nɔ́,
énu bíínjíékíne ɔ ɔnyiɔnɔ Otéŋí a Waáŋá na ɔtɛ́má okime.
12 Aáná,
énu bílénéke ekúlú ekime,
nu hákɛ́na mɔŋɔlɛ́ ná Bandɔ́mɛsɛ́.
Énu eéhíkínyínyi muuyé na yɔɔ́nɛ́nánɔ́ yɛ́ ɔtɛ́má,
nuó bíínjie na makɛ́nda ɔ ɔbɛ́cɔ́kɔ́lɛ́na Bandɔ́mɛsɛ́ ekúlú ekime.
13 Ánɔ ɔɔ́lɔ́kɔ bɔsɔ́ɔ́kɔ́ belumitinine na bɛnyɛ́ma e bí ŋeé beébe bɛ́ámbɛ́na,
nu káháka bɔmbányɛ baacɔ a bá ŋa bɔ́ fáaya e cíínú iiki.
14 Ánɔ sayábákɛ́na baacɔ a bá ŋa bɔ́ banɔ́ tékese,
nuti beébe lɔmɔ́kɔ.
15 Énu bílénéke ɔlɔŋɔ ɔ́mɔtɛ́ na baacɔ e bé ŋe bú bíléne,
nu lɛlaka na baacɔ a bá ŋa bɔ́ lɛ́la.
16 Ánɔ lɔ́kɔ́mákána banɔ́ na banɔ́,
nuti bíbéétíki mbá énu bílóósíki bu bílóósiki a bɔkɔ bukime abɔ́ nu ŋa nɔ́ kɛla,
nuti bíkétíki anyía nua nɔ́ŋa ne injiŋé.*
17 Nuti hélúmúkúnyínyi bɔɔbɛ́ a bɔɔbɛ́,
mbá ánɔ kɛláka baacɔ bekime bɔmbányɛ.*
18 Ánɔ bɛ́kɛ́ndɛ́na olíhéke a nyɛlɔ́kɔ́mána na baacɔ bekime,
mbɔ́kɔ ohónyí áŋa wú ɔbɔ́ŋɛa aáná.
19 Banɔ́ báámɛ baacɔ bá ɔtɛ́má,
nuti bífúnéke bɛsana banɔ́ bɛ́muátá,
mbá ánɔ nyɛ́ana Bandɔ́mɛsɛ́ wó lóbísíkínyi baacɔ háyɛ yááŋa yɔ́ɔ́ŋɔ́kɔ́nɔ́ anyía :
« Yaŋɔ́ bɛ́muátá,
i ké mí bífúneke baacɔ ;
yaŋɔ́,
i ké mí beébe hélúmúkúnyinyi bɔɔbɛ́ abɔ́ bá ŋa bɔ́ kɛla. »*
20 Mbá ta híáná,
ɔɔ́wɔ a aháŋá :
« Mbɔ́kɔ muɔwɔ muliŋine áŋa na ɛcaná,
muúmu aafɛ́na ;
mbɔ́kɔ muáŋa ne nyimóti,
muúmu iínjíe menyífé ;
mbɔ́kɔ ɔ ŋɔɔ́ kɛla aáná,
o ŋoó muúmu katɛna bɛánáka a aatɔ́. »
21 Eti lumítíne ta buɔ́sɛ́ anyía bɔɔbɛ́ óo teŋginyi,
mbá nuúsíki bɔɔbɛ́ o ohónyí wú ɔkɛlaka bɛmbányɛ bɛ́ bɛsana.