Islayɛ́l áŋa bunɔŋɔ abɔ́ Bandɔ́mɛsɛ́ ŋɔɔ́ lɔ́tɔ́
9
1 Ɛ ŋa mɛ́ kɔɔna taaká e nyimónjóló anyɛ́ ya mɛ́ŋa ne Kilís;
ª i ti ŋé mi néŋe.
Ne Efúúménénú yí Elilé ne híími hɛcɔɔ́cɔ́ hɛ́ ɔtɛ́má áŋa tɔ́na báámɛ bambasɔ́mbásɔ.
2 Yááŋa anyía ɔtɛ́má ɔkánya ma mɛ hɔla buéŋí,
úúmi ɔtɛ́má bɛ́nyíáka ekúlú ekime.
3 Búáŋa bú o mi bílénékíne anyía Bandɔ́mɛsɛ́ á mɛ lɔmɔ́kɔ,
yaŋɔ́ tɔ́na ɔwaálɔ́nánɔ́ ne *Kilís a asana na bɔmbányɛ bɔ́ báámɛ benyíinyí abá tua sɔ́ŋa hɛnyɛ́nɔ́ hɛ́mɔtɛ́ ne beébe.ª
4 Bá bɔ́ŋa bɔnyɛ *Islayɛ́l.
Bandɔ́mɛsɛ́ ŋeé beébe lɔtɔ́kɔ háyɛ bááyɛ́ baáná bá ɔfana,
yó beébe tóŋgínyi anyána ú ŋo yóomo ;
u ŋa látákána membénúª ne beébe,
yó beébe iínjíékíne bikotí,
yó beébe tóŋgínyi anyána bábɔ́ nyɛ́mana bé o wuúci nyemiki,
yó beébe bɛ́tánákɛ́na bɛsana abɛ́ wá nyɛ́mana wu ɔkɛlaka ;
5 bá bɔ́ŋa bɔnyɛ sɔ́kɔ́nɔ́ cí nuúmi.
*Mesíi tɔ́na,
a nyɛbá nyɛ́ bɔnyɛ baacɔ,
áŋa u hííbú hɛnyɛ́nɔ́.
Wáŋa waáŋá ɔ ɔhɔla bɛnyɛ́ma bikime,
wuúci tɔ́na Bandɔ́mɛsɛ́ Muómóomo bikúlú bikime.
*Híáná yááŋa !
6 Ɔ́kɔ,
bú ŋo tóŋínyi anyía Bɛsana bɛ́ Bandɔ́mɛsɛ́ mé wé etémbí e ?
Eéʼeé !
Yááŋa anyía,
bɔnyɛ Islayɛ́l bukime tɛ á bá taaká cɛ́ baáná bá Bandɔ́mɛsɛ́.
7 Híáná bɔnyɛ *Abɛ́laham tɛ á bá beébe bekime taaká cɛ́ bááyɛ́ baáná.
Yááŋa anyía,
Bandɔ́mɛsɛ́ ŋaá laána Abɛ́laham ɔsɛ :
« E elime ci *Isak o kóó bíénékénéne háyɛ ɛ ŋɔ mɛ́ ɔ bɛ́tánɛ́ná. »*
8 Yááŋa anyía tɛ́ cáŋa baáná bekime e bé ŋe bú bíbíéné háyɛ baáná náŋa bébú bíbíéneke bá bɔ́ŋa baáná bá Bandɔ́mɛsɛ́ ;
mbá hú baáná e bé ŋe bú bíbíéne háyɛ Bandɔ́mɛsɛ́ ŋaá bɛ́táná,
beébe bá bɔ́ŋa taaká cɛ nyɛbaáná.
9 Ɛndána acɛ́ Bandɔ́mɛsɛ́ ŋaá bɛ́tánɛ́na Abɛ́laham eeci aana :
« Hú e ekúlú eeye aana,
ɛ ká ka mɛ hálɔ́mɔ́na,
míɔ kuana ɛ́cɛ Sáala meé bíéne ɔɔ́nɔ́ ɔnɔ́mɔcɔ́. »ª
10 Tɛ́ cáŋa ɔmanɔ́ oócí,
anyía Alabáka ŋeé bíéne nyɛhása banɔ́mɔcɔ́ béfendí hú na ciasɔ́ sɔ́kɔ́nɔ́ a ciáŋá Isak.
11-12 Yiíye anyía baáná eébé ŋaá bá ɛ́cɛ bé tí ŋé bú bíbíéné,
beébe tɛ́ka na ɔkɛla asana ta a yambányɛ ta a yaabɛ́,
ɛ́ɛhɛ́ Bandɔ́mɛsɛ́ ŋaá kɔɔna ɔsɛ :
« Ɔɔ́nɔ́ u buúse káá bá munyiɔnɔ mu ekuke.
»* Yááŋa anyía nyɛtákɛ́na nyɛ́ bɛsana nyɛ́ Bandɔ́mɛsɛ́ tɛ ŋá lɛca mekilíkínyí ma baacɔ a nyɛtáfa enyí u ŋeé beébe táfa.
U naŋa wɔɔ́ lɔ́ŋɔ́kɔ baacɔ háyɛ u ŋeé léne anyía wé nyíoyísínyi nyíáyɛ́ nyɛtákɛ́na nyɛ́ bɛsana.
13 Aáná yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Ɛ ŋa mɛ́ lɔtɔ́ *Yákɔb,
míɔ bɛ́yuáta Eso. »*
Bandɔ́mɛsɛ́, Alánuubo, áŋa ɔtálɛ́mánánɔ́
14 Mbá aátɛ́ yí etémbí aná e ?
Ɛ́cɛ anyía Bandɔ́mɛsɛ́ tɛ á bá ɔtálɛ́mánánɔ́ e ?
Eéʼeé,
te butíkítíki !
15 Yááŋa anyía u ŋaá laána *Moyís ɔsɛ :
« Ɛ ká mɛ́ bɛ́cáma mahana ɔɔcɔ ewú i ŋeé mi léne o wuúci bɛ́cáma mahana ;
mío wé cɛɛ́tɔ ɔɔcɔ ewú i ŋé mi léne o wuúci wé cɛɛ́tɔ. »*
16 Bú ŋo tóŋínyi anyía Bandɔ́mɛsɛ́ ŋa bɛ́cáma bɔ bɛ́cáma ɔɔcɔ mahana a yááyɛ́ ambányɛ yɛ́ ɔtɛ́má ;
tɛ́ cáŋa a nyɛháŋa nyɛ́ ɔɔcɔ ta anyía aayá a makɛ́nda ma bɛ́muátá.
17 Aayá a Ciɔɔ́ŋɛ́,
Bandɔ́mɛsɛ́ ŋaá laána tɔ́na Falawɔ́ŋ ɔsɛ :
« I ŋé mí o télímínyi otéŋí ananyía e elime cɛ yɔ́ɔ́wɔ aatɔ́ ɔnata,
yémi tóŋínyi na a baacɔ bekime maamɛ makɛ́nda na ɔ ɔmɛsɛ́ okime nulumí nɔ́ nyiámɛ nyiínyi. »*
18 Bú ŋo tóŋínyi tɔ́na anyía Bandɔ́mɛsɛ́ ŋaá bɛ́cáma mahana ooci ewú u ŋeé léne o wuúci bɛ́cáma mahana,
u netisiki ɔtɛ́má ú ooci ewú u ŋeé léne o wuúci netisi ɔtɛ́má.
19 Mbɔ́kɔ yááŋa aáná,
ɔɔcɔ a wɔmɔtɛ́ áŋa wu ɔbɛ́báta ɔsɛ :
« Mbá anyíatɛ́ Bandɔ́mɛsɛ́ ŋe túné a kákálɛ́na baacɔ aná e ?
Baacɔ ŋa bɔ́ kɛla hú bɛsana abɛ́ Bandɔ́mɛsɛ́ áŋa ɔtákákɛ́nánɔ́. »
20 Kuɔŋɔ́ ɔɔcɔ u bɔtɔhɔ,
ɔ ɔ́ŋa aátɛ́ o ŋóo kélísi Bandɔ́mɛsɛ́ e ?
O ŋoó keti anyía bɔkɔ abɔ́ bá tabɔ́naka na aabá áŋa na makɛ́nda ma ɔbata mu-buúbu-tábɔ́na bɔ́sɛ :
« Anyíatɛ́ ɔ́ɔ mɛ tábɔ́náka aáná e ? »*
21 Mumaa áŋa na makɛ́nda ma ɔmaaka na núáyɛ́ nɔmaa númɔtɛ́ anɔ́ wɔ́ tɔ́bɔ́kɔ na bɛmbányɛ́kɛ́ bí tusényí tú bekenyí ne tundúléndúle.
22 Mbá kuɔŋɔ́ aná,
aátɛ́ yí etémbí ɔ ɔ́ŋa wu ɔkɔɔnɔtɔna mbɔ́kɔ Bandɔ́mɛsɛ́ ŋo lóbísínyi baacɔ,
u beébe tóŋgínyi maayɛ́ makɛ́nda e ?
U ŋe yeéhíkínyínyi baacɔ buéŋí,
eebe abá u ŋa nyɛ́mána wu olóbísíkínyi anyía bá ŋa bɔ́ nyɛ́mana bé owéékúne.
23 U ŋoó tóŋínyi tɔ́na baacɔ nyɛnamá anyɛ́ yááyɛ́ yaála yí nuubo áŋa yeéŋí a yáásɔ́ aháŋá,
basɔ́ abá u ŋaá basɔ́ bɛ́cáma mahana.
U ŋaá cáŋa ɔ basɔ́ tabɔ́nɛ́na yaáláka yɛ́ núáyɛ́ nuúmi.
24 Tua sɔ́ŋa tɔ́na eebe abá Bandɔ́mɛsɛ́ ŋɔɔ́ lɔ́tɔ́kɔ́,
tɛ́ cáŋa hí e *Besuif noómi,
mbá na a baacɔ tɔ́na a bá tɛ ábɔ́ bá Besuif.
25 Aáná Bandɔ́mɛsɛ́ ŋaá kɔ́ɔna e nufule nú Osée,
ɔsɛ :
« Bunɔŋɔ a bɔ́ tɛ ɔ́mɔ́ bá búámɛ,
i ké mí buúbu lɔ́ŋɛ́ta anyía “Buamɛ”.
Hɛnyɛ́nɔ́ ahɛ́ ɛ tɛ ɔ́mɔ́ bá yemí lénéke,
i ké mí hiíhi lɔ́ŋɛ́ta anyía :
“Ɔtɛ́má”.*
26 Híáná,
a haála bɛ́muátá ahá bá ŋaá bá bá kɔ́ɔnaka báyɛ :
“Nu tɛ anɔ́ bá báámɛ”,
hí a hɔ́á bé kéé beébe lɔ́ŋɔ́kɔ báyɛ :
“Baáná bá Bandɔ́mɛsɛ́ a wáŋa wɔɔ́sɔ.” »ª
27 A asana na baacɔ bé *Islayɛ́l *Ɛsayí ŋaá kɔ́ɔ́na ɔsɛ :
« Ta yɛ́ cáŋa á bá anyía baacɔ bé Islayɛ́l á bɔ́ŋa beéŋí háyɛ ɔsɛ́bɛ́á ú asálá yɛ́ nuɔmɔ́,
hú imbuke cɛ baacɔ Bandɔ́mɛsɛ́ kéé nóhiki.
28 Yááŋa anyía Otéŋí a Waáŋá ké tényí kóó nyíóyísíkínyi bɔmbányɛ bɔmbányɛª bɛsana bikime abɛ́ u ŋaá bɛ́tánákɛ́ná baacɔ anyía u káá kɛ́laka ɔ ɔmɛsɛ́ okime. »*
29 Híáná waáta Ɛsayí ŋa cáŋa ɔ kɔɔnaka ɛ́cɛ bunyímé tɛ ŋa háma,
ɔsɛ :
« Mbɔ́kɔ Otéŋí a Waáŋá u ɛlɔŋɔ cí biité tɛ ɔ ɔsɔmɔ ɔmbana a wúmɔtɛ́ ú maasɔ́ mɔɔnɔ́,
keyé tu ŋa sɔ́ bá tú owéékúne háyɛ baacɔ bá na *Sɔ́tɔm na *Kɔmɔ́ɔlɛ. »ª
Ambányɛ yɛ́ Ɛsɔ́ma ŋa lɛca tɔ́na Besuif
30 Mbá aátɛ́ yí etémbí túásɔ́ kɔ́ɔ́na aná e ?
Tusíʼo :
Baacɔ a bá tɛ ábɔ́ bá *Besuif,
beébe bá tɛ ɔ́mɔ́ bɔ́ bá bábɔ́ aambaka ɔbámɔ́kɔ́na bɛtálɛ́mánánɔ́ bɛ́ baacɔ eeyé eé buúse,
Bandɔ́mɛsɛ́ mé beébe hiíteke aámbáya háyɛ bɛtálɛ́mánánɔ́ bɛ́ baacɔ eeyé eé buúse,
anyía bá ŋa bɔ́ háya mɔŋɔlɛ́ nááyá ;
31 yiíyi anyía Besuif a bá ŋa bɔ́ bá bábɔ́ aambaka anyía Bandɔ́mɛsɛ́ é beébe hiiteke háyɛ bɛtálɛ́mánánɔ́ bɛ́ baacɔ a nyɛlátɛ́na nyí *bikotí tɛ ɔ́mɔ́ bɔ́ bɔ́ŋɔ ohónyí.
32 Mbá anyíatɛ́ aná e ?
Yááŋa anyía bá ŋa bɔ́ bá bábɔ́ bɛ́tááka anyía Bandɔ́mɛsɛ́ áŋa wu o beébe hiiteke háyɛ bɛtálɛ́mánánɔ́ bɛ́ baacɔ eeyé eé buúse a nyɛlátɛ́na nyí bikotí nyiínyi ne nyiínyi,
ɔ ɔhɔla anyía bábɔ́ hákɛ́na mɔŋɔlɛ́ nááyá.
Ɛ́ɛhɛ́ bé ŋe bú kúféténe e nukúse e nú ŋé kúfítínyi baacɔ.
33 Nuúnu eénú Ciɔɔ́ŋɛ́ ŋa kɔ́ɔna cɛ́sɛ :
« Ánɔ lɛcá,
ya mɛ́ŋa otúmékénú e ciíbe ci *Síon nukúse e nú ŋé kúúsi baacɔ ɔ ɔmɛsɛ́ ;
nuúnu nú ŋé beébe kúfítínyi.
Aáná,
ɔɔcɔ awɔ́ u ŋaá háya mɔŋɔlɛ́ e nuúnu tɛ káá lɔ́kɔ́ma aatɔ́ ɔlama ta buɔ́sɛ́ ! »ª