Aabɛ́ yɛ́ nyɛbɛ́kɛ́lɛ́na nyɛ́ buáyá a yáaŋa ewéénú
6
1 Mbá aátɛ́ tua sɔ́ŋa tu obíóndísínyi ɔkɔɔna aná e ?
Ɔ́kɔ,
tu ŋa sɔ́ nyɛmána tu ɔcɔbaka ne buúse ɔ ɔkɛlaka bɛsana a bɛɛbɛ́ ɔ ɔkɛla anyía yaála yí nuubo yɛ́ Bandɔ́mɛsɛ́ é teké ɔ ɔhɔla e ?
2 Eéʼeé,
buúse bukime !
Tua sɔáŋa bewéénú a nyɛkɛla nyɛ́ bɔɔbɛ́,
mbá anyána tuasɔ́ nyɛmána tú o túné cɔba ne buúse ɔ ɔkɛla bɛsana a bɛɛbɛ́ o olíhe e ?
3 Nu ŋe nú ményi anyía basɔ́ bekime ebé tu ŋe sú bíótókíne e elime ci Yésus *Kilís,
ª tu ŋe sú bíótókíne a nyɛlatana nyí nyimónjóló ne uuyé owé.
4 Tua sɔ́ŋa aná háyɛ e benyiénú ne wuúci o *obíótíne ú nyɛlatana nyí nyimónjóló ne uuyé owé,
ananyía tú o búle líhe yɔɔ́sɔɔ́sɔ yí olíhe,
bɔkɔ búmɔtɛ́ háyɛ Kilís ŋaá háányua e biwéewé e elime cɛ makɛ́nda me nuúmi ma ciayɛ́ Síkíne.
5 Yááŋa anyía tua sɔ́ŋa balatákánɔ́ e nyimónjóló ne wuúci e úúyé owé.
Híáná tɔ́na,
tu ká sɔ́ bá balatákánɔ́ e nyimónjóló ne wuúci a nyíáyɛ́ nyɛhaanyua e biwéewé.
6 Túá lɔ́kɔ́ma aná :
Ekúlú eyí Yésus Kilís ŋeé wé waátákɛ́nánɔ́ ɔ ɔmbásá ɔ ɔmuaná,
Bandɔ́mɛsɛ́ ŋa yáátákɛ́ná tɔ́na ɔ ɔmbásá yáásɔ́ aabɛ́ yɛ́ nyɛbɛ́kɛ́lɛ́na nyɛ́ buáyá ɔlɔŋɔ ne Yésus Kilís,
o o nyiínyi menyísi,
tu tɛ háná bámɔ́kɔ́na bɛɔ́lɛ́ bɛ́ bɔɔbɛ́.
7 Yááŋa anyía ɔɔcɔ ewú ú meé wé a yáaŋa ɔhaŋɔ́nánɔ́ ɔ buɔ́lɛ́ bɔ́ bɔɔbɛ́.
8 Ekúlú eyí tú me sú wé balatánɔ́ e nyimónjóló ne Kilís,
tua sɔáŋa na mɔŋɔlɛ́ anyía tu ké sú líhéke tɔ́na balatánɔ́ e nyimónjóló ne wuúci.
9 Tu ŋe sú ményi anyía Kilís ŋa háányua e biwéewé,
aáná u tɛ á bá wu owéétútúne.
Owé tɛ á bá wú o túné wuúci hiíte ta buɔ́sɛ́.
10 Ekúlú eyí Kilís ŋeé wé,
u ŋeé wé ekúlú ɔ́mɔtɛ́ e bikúlú bikime a asana a yɛ́ ŋa lɛca bɔɔbɛ́ ;
híáná olíhe ewú u ŋeé líhe aámbáya,
u ŋeé líhe a asana a yɛ́ ŋa lɛca Bandɔ́mɛsɛ́.
11 Híáná,
banɔ́ tɔ́na,
énu bíhíítéke háyɛ e bewéékúnénú a nyɛkɛla nyɛ́ bɛsana a bɛɛbɛ́,
mbá háyɛ nua nɔ́ŋa bɔɔ́sɔ a asana a yɛ́ ŋa lɛca Bandɔ́mɛsɛ́,
anyía nua nɔ́ŋa e nyimónjóló ne Yésus Kilís.
12 Yaátɛ́ asana bɔɔbɛ́ tɛ ɔ́mɔ́ nyɛ́mána bú ɔ háná mánakɛna aná cianɔ́ cɛɛ́tɔ a cɛ naŋa cɛ á lɔ́kɔ́mákɛ́na bíáyɛ́ bɛsana e bí ŋeé ciíci hámɛ́na ɔ ɔtɛ́má noómi.
13 Nuti túné bíínjie ɔ ɔkɛlaka tɔ́na bɛɛbɛ́ bɛ́ bɛsana,
mbá énu bíínjíékine ná Bandɔ́mɛsɛ́ bímuócí ;
anyía nua nɔ́ŋa baacɔ e bé ŋe bú wéékúne,
bɔ́ háanyuaka e biwéewé.
Énu bíínjíékíne nááyá banɔ́ bɛ́muátá bekimekime ɔ ɔkɛla anyía wá banɔ́ kílísíki bɛmbányɛ bɛ́ bɛsana.
14 Ɛ́ɛhɛ́ ɔkɛlaka bɛɛbɛ́ bɛ́ bɛsana tɛ ɔ́mɔ́ nyɛmána wú ɔ háná ɔbámɔ́kɔ́nɛ́na e úúnú olíhe noómi te butíkítíki,
anyía *bikotí tɛ ŋá háná a banɔ́ mánɛna ;
mbá yaála yí nuubo yɛ́ Bandɔ́mɛsɛ́ yɛ́ ŋaá banɔ́ mánɛna aámbáya.
15 Mbá aátɛ́ bú ŋo tóŋínyi aná e ?
Mbá yááŋa anyía ayɛ́ yaála yí nuubo yɛ́ Bandɔ́mɛsɛ́ ŋaá basɔ́ mánɛna aáná,
ɛ́ɛhɛ́ túásɔ́ nyɛmana tu ɔcɔbaka ne buúse ɔ ɔkɛla bɛɛbɛ́ bɛ́ bɛsana anyía bikotí tɛ ŋa háná basɔ́ manɛna e ?
Eéʼeé,
tɛ́ cáŋa aáná.
16 Nu ŋe nú ményi bɔmbányɛ anyía ɔɔcɔ okime ewú e lumitine obítúé wuúci bɛ́muátá ná ɔɔcɔ o o wuúci lɔ́kɔ́mɛ́na háyɛ yɔɔ́lɛ́ a yáaŋa taaká yɔɔ́lɛ́ yɛ́ ɔɔcɔ oócí.
Híáná,
mbɔ́kɔ nu ŋa nɔ́ lɔ́kɔ́mɛ́na bɔɔbɛ́,
nua nuáŋa bíáyɛ́ bɛɔ́lɛ́ ;
owé ŋaá banɔ́ bísúéne ekúlú eéyé.
Mbá,
mbɔ́kɔ nu ŋa nɔ́ lɔ́kɔ́mɛ́na Bandɔ́mɛsɛ́,
nua nuáŋa bíáyɛ́ bɛɔ́lɛ́,
u káá banɔ́ kílisiki bɛmbányɛ bɛ́ bɛsana.
17 Ɔ́kɔ,
tɛ́ka tú iínjíékíne Bandɔ́mɛsɛ́ bitéŋíti e ?
Banɔ́ abá nu ŋa nɔ́ bá buáyá a buɔ́lɛ́ bɔ́ bɔɔbɛ́,
nú ma nɔ́ látákɛ́na aámbáya ne úúnú ɔtɛ́má okime nyiékúnyi anyɛ́ nu ŋa nɔ́ lɔ́kɔ́máká.
18 Bandɔ́mɛsɛ́ ŋaá banɔ́ kátɔ́náka a buɔ́lɛ́ bɔ́ bɔɔbɛ́,
nua nuáŋa betiŋékénú háyɛ bɛɔ́lɛ́ ɔ ɔkɛla anyía núánɔ́ látákɛ́na bɛmbányɛ bɛ́ bɛsana.
19 Ɛ ŋaá mɛ táŋa na banɔ́ ne mehúnyi amá baacɔ naŋa bábɔ́ táŋáka na baacɔ bá bɛtaá.
Yááŋa anyía buáyá nu ŋe nú bíínjíékíné banɔ́ bekimekime o olíhe háyɛ eebe a bá bɔ́ŋa betiŋékénú a buɔ́lɛ́ bɔ́ ɔkɛlaka na bɛsana bɛ́ mɔnyɔ́kɔ́lɔ́ na bɛ́ nyɛŋána nyikime,
nu kɛlakɛna Bandɔ́mɛsɛ́ aatɔ́ ɔnata.
Híáná nuánɔ́ nyɛmana nu obíínjíékíne tɔ́na aámbáya banɔ́ bekimekime betiŋékénú háyɛ bɛɔ́lɛ́ o olíhe atálɛ́mánánɔ́ yí olíhe e wufúúménénú.
20 Buáyá,
ekúlú ekime ayɛ́ nu ŋa nɔ́ bá betiŋékénú a buɔ́lɛ́ bɔ́ nyɛkɛla nyɛ́ bɛɛbɛ́ bɛ́ bɛsana,
ta bɔkɔ tɛ ɔ́mɔ́ banɔ́ eékínyi ɔlátɛ́na nyɛháŋa nyɛ́ Bandɔ́mɛsɛ́.
21 Ekúlú eéyé nu ŋa nɔ́ bá nuánɔ́ kɛlaka bɛɛbɛ́ bɛ́ bɛsana ;
biíbi bɛ́ ŋaá banɔ́ lémisi bɛɛtɔ́ aámbáya,
mbá aátɛ́ nu ŋa nɔ́ hɔ́máká a bɛsana eébí e ?
Ta bɔkɔ.
Yááŋa anyía bɛ́ ŋaá banɔ́ bísúéne hú owé.
22 Mbá aámbáya Bandɔ́mɛsɛ́ ma banɔ́ kátɔ́náka a buɔ́lɛ́ bɔ́ nyɛkɛla nyɛ́ bɛɛbɛ́ bɛ́ bɛsana ;
nua nuáŋa bɛɔ́lɛ́ bɛ́ Bandɔ́mɛsɛ́.
Bíánɔ́ bɛnamá áŋa olíhéke efúúménénú yí olíhe,
nyibíóndísínyi áŋa ɔbɔ́ŋɔ yɔɔ́sɔɔ́sɔ yí olíhe yí ekúlú ekime.
23 Yááŋa anyíaʼo,
bɛnamá e bí ŋeé húle a nyɛkɛla nyɛ́ bɛɛbɛ́ bɛ́ bɛsana áŋa owé,
mbá nyiínjie nyɛ́ Bandɔ́mɛsɛ́ a yááyɛ́ yaála yí nuubo áŋa yɔɔ́sɔɔ́sɔ yí olíhe yí ekúlú ekime e nyimónjóló ne uusú Otéŋí a Waáŋá Yésus Kilís.