22
1 « Banɔ́,
na báámɛ benyíinyí ne cíími síkíne,
aámbáya ánɔ lɔ́kɔ́ma bɔmbányɛ nyiámɛ nyɛkála. »
2 Ɛ́makɛ́la bábɔ́ lɔ́kɔ́ma Bóol á táŋáka nuebélé,
uúbú ɔtáŋa ú ŋaá bá,
bé ŋé lésíkínyi hú mbuumu.
Mbá ɔsɛ :
3 « Ya mɛ́ŋa ɔɔcɔ u Besuif,
i ŋeé mi bíbíéne a Táas e ekéti yí iisí yí Silisí.
Asana ɔ́mɔtɛ́,
aaha a bálɛ́ka eeci ɛ ŋa mɛ́ kɔmáka,
mɛ́ɔ waákɔ́nákɛ́na anyána ya mɛ́ŋa wu ɔlátákɛ́na bɔmbányɛ *bikotí bí cíísú sɔ́kɔ́nɔ́ ;
Kamaliɛlª ú ŋeé mi eékúnyíkí.
I ŋeé mi bíínjíé buéŋí ná Bandɔ́mɛsɛ́ háyɛ banɔ́ bekime nua nɔ́ŋa bebíínjíénú hɛ́nánɔ.
4 I ŋe mí nuúsíki baacɔ a bá ŋa bɔ́ bá bábɔ́ látákɛ́na ohónyí ú Otéŋí a Waáŋá ;
mío beébe ɔ́ɔ́nɔ́kɔ.
Míɔ kɛlá tɔ́na anyía bá hatɛ́ákɛ́na ne beénjú na banɔ́mɔcɔ́,
bó beébe hákɛ́na eé ciíbe cɛ ɛcaná.
5 Ne *mutéŋínyi beluli nyiínjie a muáŋá na *baáŋá bé Besuif á bɔ́ŋa báámɛ bambasɔ́mbásɔ.
Beébe bé ŋe bú mi iínjíékíné tufule anyía yámɛ́ cɔbánɛ́na Besuif bá bálɛ́ka cɛ Tamás.
Aáná ɛ ŋa mɛ́ cɔbá hɔ́á ɔ ɔkɔhátɛna baacɔ bekime a bá ŋa bɔ́ látɛ́na ohónyí ú Otéŋí ;
mbá ɛ ŋa sɛ́ yé ke mí beébe hálámákánána eé Yelúsalɛm bɔɔ́tɔ́kɔ́kɔ́nɔ́,
anyía bé beébe tekéséke. »
Nyɛháya mɔŋɔlɛ́ nyí Bóol né Otéŋí a Waáŋá
6 « Ɛŋakɛlá yá mɛáŋa o ohónyí ɔ ɔcɔbaka ɔ ɔkɔɔ́háma aá Tamás,
hoóhi ne túefi,
i ŋe síké émi bítéme ɛ́cɛ yaandándá yí eese yɛ́ nɔ́maka,
yé húlúkúne ɔ Ɔmuaná má mɛ bɔŋɔlɛna.
7 Ɛ ŋa mɛ́ kuá ɔ ɔmɛsɛ́,
ɛ ŋá lɔ́kɔ́ma okelú áa mɛ bataka ɔ́sɛ :
“Sóol,
Sóol,
anyíatɛ́ o ŋo mí tekese aná e ?”
8 Mbá ɛsɛ́ :
“Otéŋí,
kuɔŋɔ́ ɛ́cɛ aányɛ́ ewú i ŋé mi tekese e ?”
Mbá okelú ɔ́sɛ :
“Yaŋɔ́,
ya mɛ́ŋa Yésus,
ɔɔcɔ u *Násalɛt,
ewú o ŋóo tekese.”
9 Baacɔ a bá ŋa bɔ́ bámɔ́kɔ́ná ɔlɔŋɔ na yaŋɔ́ ŋa bɔ́ lɛ́cá eese,
mbá beébe ta ɔlɔ́kɔ́ma okelú ú ɔɔcɔ awɔ́ u ŋaá bá wá mɛ táŋgɛ́na.
10 Ɛ ŋá batá tɔ́na ɛsɛ́ :
“Anyána yámɛ́ kɛlá aná,
Otéŋí a Waáŋá e ?”
Mbá ɔsɛ náámɛ :
“Hatɔ́na ɛndánáka,
oofíne aá Tamás.
Hɔ́á bá ŋa cɔba ɔ ɔ kuɔŋɔ́ laana bɔkɔ abɔ́ ɔ́ɔ nyɛmana wu ɔkɛlaka.”
11 Ɛ ŋa mɛ́ lɔbɔ ɛ tɛ háná lɛ́cana a asana na yaandándá yí eese eéyé ;
bíámɛ bikendinyi ŋe bú mi tímbíé ɔ ɔɔbɔ́,
bɔ́ mɛ cɔbana aá Tamás.
12 Ɔɔcɔ a wɔmɔtɛ́ ŋaá bá hɔ́á,
nyiínyi ɛ́cɛ *Ananías.
U ŋaá bá obíínjíénú o olumitinine noómi,
u látákɛ́na bíásɔ́ *bikotí.
*Besuif bekime bá Tamás ŋaá bá bébú wuúci lémbíki.
13 Aáná u ŋaá faáya ɔ ɔkɔ mɛ lɛ́ca,
mbá ɔsɛ náámɛ :
“Uumi onyíinyí Sóol,
túné lɛ́cakana.”
Hí e ekúlú etéeyé,
cáámɛ eése ŋe bíhúúnúé,
mío túné túme ɔlɛcana ;
i ŋé wuúci lɛca.
14 Aáná Ananías ŋa mɛ́ laána ɔsɛ :
“Bandɔ́mɛsɛ́ ci cíísú sɔ́kɔ́nɔ́ ŋa cáŋacáŋa ɔ kuɔŋɔ́ táfa anyía óo menyí bɛsana ebí ú ŋeé léne anyía ɔ́ɔ kɛláka ;
ɔ́ɔ lɛcá tɔ́na na cɔ́ɔ́wɔ eése hɛkɔŋɔ́ hɛ́ atálɛ́mánánɔ́ yɛ́ ɔɔcɔ,
mbá a lɔ́kɔ́máka na cɔ́ɔ́wɔ eetú ɔtáŋa ú nyíáyɛ́ nyuúté.
15 Aáná ɔ kɔ́ɔ́ bá uuyé ɔmbasɔ́mbásɔ eé buúse bɔ́ baacɔ bekime,
e beébe hulikinyi bɛsana abɛ́ ɔ́ mɔɔ́ lɔ́kɔ́máka,
wɔ́ lɛcaka.
16 Aámbáya aátɛ́ ó ŋo túné ɔ táta e ?
Hatɔ́na ɛndánáka,
batá bé o wootíne a nyíáyɛ́ nyiínyi,
mbá Bandɔ́mɛsɛ́ á súáka mɔ́ɔ́wɔ maabɛ́.” »
Bóol, ɛndɔ́ma a baacɔ a bá tɛ ábɔ́ bá Besuif
17 « E elime eécí,
nyiámɛ nyɛhálɔ́mɔ́na eényí eé Yelúsalɛm.
Ekúlú ayɛ́ ɛ ŋaá mɛ bá yamɛ́ bɛ́cɔ́kɔ́lɔ́kɛ́na eé *Ciíbe cɛ Bandɔ́mɛsɛ́,
ciamɛ injiŋé ŋá bɛ́kɔ́ŋɔ́na,
míɔ lɛca *eseye yɛ́ asana.
18 Ɛ ŋa mɛ́ lɛcá Otéŋí a Waáŋá,
yɔ́ mɛ laana ɔsɛ :
“Tényí hátɔna,
hɔla eé Yelúsalɛm,
anyía baacɔ bá hɔ́á ti ké bú lúmitine bɛsana ebí o kóó beébe bíkétíkínyi aámɛ a asana.”
19 Mbá ɛsɛ́ :
“Otéŋí a Waáŋá,
tɛ́ka beébe bɛ́muátá ŋe bú menyi anyía ɛ ŋaá mɛ bá yamɛ́ cɔbaka aá *bɛndaŋía bɛ́ ɔbɛ́cɔ́kɔ́lɛ́na ɔ ɔkɔhátɛna baacɔ a bá ŋa bɔ́ háya mɔŋɔlɛ́ nɔ́ɔ́wɔ e ?
Bé ményukune anyía i ŋe mí beébe hákɛ́ná eé ciíbe cɛ ɛcaná,
ɛ kɛlaka anyía bé beébe súbéke e ?
20 Ekúlú ayɛ́ bɔ́ ŋɔ yɔ́ɔ́nɔ́kɔ́ uuwe ɔmbasɔ́mbásɔ Itiene,
yaŋɔ́ bɛ́muátá ɛ ŋa mɛ́ bá hɔ́á,
ɛ ŋaá mɛ bá elime ɛmɔtɛ́ ne be-wuúci-ɔ́ɔ́nɔ ;
yaŋɔ́ i ŋe mí tétényíkí cííbú káaŋa.”
21 Mbá Otéŋí a Waáŋá ɔsɛ :
“Buaka,
cɔbá yáaŋa,
anyía ɛ ká mɛ́ ɔ tɔ́ma haaca né eebe a bá tɛ ábɔ́ bá *Besuif.” »
Bóol ɔsɛ wáŋa yeéti yí Lóom
22 *Besuif ŋe bú lésíkínyí mbuumu ɔ ɔlɔ́kɔ́ma ɔtáŋa ú Bóol oócí ɔ ɔkɔɔ́háma ekúlú ayɛ́ bá ŋa bɔ́ lɔ́kɔ́má buhúnyi eébú.
Bé ŋé túme ɔwaánjála báyɛ :
« Ánɔ basɔ́ ááŋɛ́na ɔɔcɔ ooci eesú eé buúse,
wé wé,
bú tɛ á bá butálɛ́mánánɔ́ anyía wá háná líhéke. »
23 Bá aánjáláka aáná,
bé oombokoko bíábɔ́ bɛlaŋa ɔ ɔmɛsɛ́,
bá áahakɛna ofunú ɔ ɔmuaná.
24 Mutéŋínyi bicénji ŋe iínjíé bááyɛ́ baacɔ makɛ́nda me owoofinyi Bóol a hɛkáká noómi,
bé wuúci súbéke anyía wé bíkétíki bɔmbányɛ asana ayɛ́ baacɔ ŋa bɔ́ aánjála nyɛnamá eényí.
25 Ahɛ́ bɔ́ ŋɔ yɔɔ́tɔ́kɔ́kɔ́ Bóol ne tukolí anyía bé túme o wuúci súbe,
mbá ɔsɛ né ecénji a yɛ́ ŋaá bá aáhá :
« Nua nɔ́ŋa na makɛ́nda me osúbéke yeéti yí *Lóom eyí bé ti ŋeé kélísi e ? »
26 Ɛ́makɛ́la ecénji eéyé á lɔ́kɔ́ma ɔtáŋa oócí,
u ŋá cɔbá ɔ ɔkɔláana mutéŋínyi bicénji ɔsɛ :
« O ŋoó menyi bɔkɔ abɔ́ ɔ́ mɔɔ́ bá asɛ ɔ́ɔ kɛláka e ?
Ɔɔcɔ ocinyíé áŋa yeéti yí Lóom. »
27 Mutéŋínyi bicénji ŋé bíkósíti né Bóol,
mɔsɛ nááyá :
« Ɔ́ɔ mɛ laána,
ɔ́kɔ,
ɔ ɔ́ŋa yeéti yí Lóom e ?
» Mbá Bóol ɔsɛ :
« Ɛ́ɛ,
yááŋa taaká. »
28 Mutéŋínyi bicénji mɔsɛ :
« Ya mɛ́ŋa obínyímísíkínyi mɔɔnyɛ́ meéŋí né betéŋí anyía yámɛ bámɔ́kɔ́na yeéti yí Lóom.
» Mbá Bóol ɔsɛ :
« Yaŋɔ́ ya mɛ́ŋa yeéti yí Lóom a nyiámɛ nyibíbíéne. »
29 Baacɔ a bá ŋa sɛ́ bébú súbéké Bóol anyía wá táŋáka bɔmbányɛ ŋa bɔ́ hátɔ́kɔ́ná aáhá fiaŋɔ bó súétéke haaca.
Te mutéŋínyi bicénji bɛ́muátá ŋeé túmé olíkíme,
ekúlú eyí mu ŋeé menyi anyía Bóol áŋa yeéti yí Lóom,
ta híáná mu ŋa kɛ́la anyía bé wuúci ɔ́ɔ́tɔ́kɔ́kɔ.
Bóol ŋa bɛ́kála eé buúse bɔ́ baacɔ bé Hitúlé a hiáŋá
30 Ɔ ɔyá ɔyá,
mutéŋínyi bicénji a muáŋá ŋaá bá mué lénéke omenyi bɔmbányɛ bɔmbányɛ a asana a yaátɛ́ *Besuif ŋa bɔ́ sɔ́mɛ́na Bóol.
Ɛ́ɛhɛ́ mu ŋaá laána baacɔ anyía bé wuúci hembúléke tukolí.
Mu ŋaá bándáka ne betéŋínyi *beluli nyiínjie ne Hitúlé a hiáŋá.
Aáhá aná mu ŋaá kɛ́lá anyía bé héléne Bóol,
mu ŋé wuúci télímínyí eébú eé buúse.