Asana yɛ́ na Ananías na Safɛ́la
5
1 Mbá,
ɔɔcɔ ɔmɔtɛ́ ŋaá bá aáhá ne nyiínyi anyía *Ananías,
úúyé oónyí ŋaá bá ɛ́cɛ Safɛ́la ;
u ŋeé túé yáábɔ́ ekéti yí iisí.
2 Aáná bá ŋa bɔ́ lɔ́kɔ́máná ne oónyí anyía wé huné mɔɔnyɛ́ a mɔ́mɔtɛ́,
wá nambá ;
u ŋé hiíte a má ŋɔ lɔ́bɔ,
u ŋé ke iínjíé ná baacɔ bá ɛndɔ́ma.
3 Aáná Bíel ŋeé wuúci batá ɔsɛ :
« Ananías,
anyána *Sátan áŋa wu onyíóyo ɔɔ́wɔ ɔ ɔtɛ́má a nyɛnamá enyí o ŋoó néŋe *Efúúménénú yí Elilé,
mbá a namba mɔɔnyɛ́ a mɔ́mɔtɛ́ me ekéti yí iisí eyí ó moó túé e ?
4 Yaŋɔ́ ɛsɛ,
ekéti yí iisí eéyé ŋaá bá yɔ́ɔ́wɔ ɛ́cɛ o ti móo yiíyi túé e ?
Te ekúlú eyí ó moó yiíyi túé tɛ́ka mɔ́ɔ́wɔ mɔɔnyɛ́ mááŋa e ?
Mbá anyána ɔ́ mɔɔ́ kɛ́laka nyɛnamá nyɛ́ asana eeye ɔɔ́wɔ ɔ ɔtɛ́má e ?
Menyi anyía tɛ́ cáŋa baacɔ ó moó néŋe,
mbá Bandɔ́mɛsɛ́. »
5 Ɛŋakɛlá Ananías áa lɔ́kɔ́ma ɔtáŋa ú Bíel oócí,
u ŋá kuá,
nyiwé eényí.
Aáná bulíkílíki ŋeé tímbíé baacɔ bekime a bá ŋa bɔ́ lɔ́kɔ́máká asana eéyé.
6 Bɛnɔ́kɔ́ bɛ́ baacɔ ŋa bɔ́ faáya,
bɛ́ ŋá bákákɛ́na úúyé omime na ɔmbɔ́mɔ́,
bí ŋgé nyie.ª
7 Ɛŋakɛlá ekúlú ma hɔ́la hoóhi háyɛ bɔkɔ bú injéŋí ɛ́tátɔ́,
oónyí u Ananías ŋó oofíne,
u ti ményi asana a yɛ́ ma bɛ́kɛ́láka.
8 Bíel ɔsɛ nááyá :
« Ɔ́ɔ mɛ laána,
Meemé,
ɔ́kɔ,
mɔɔnyɛ́ mekime me onduné ú iisí eeme mááŋa e ?
» Mbá ɔsɛ :
« Ɛ́ɛ,
ímeémé mááŋa mekime. »
9 Bíel ɔsɛ :
« Aátɛ́ yá kɛ́la anyía núánɔ́ lɔ́kɔ́mána ɔ ɔkɔkɔna Efúúménénú yí Elilé yí Otéŋí a Waáŋá e ?
Ɔ́ɔ lɛcá,
baacɔ e bé me ke bú nyie uuwu ɔnɔ́mɛ,
ibeébe eé buúse bú ehenyi,
bɔ́ cɔba ɔ ɔ kuɔŋɔ́ súéténe tɔ́na. »
10 Hí e ekúlú eéyé,
oónjú ŋá kuá owéénú eé buúse bɔ́ ɔɔcɔ u ɛndɔ́ma.
Bɛnɔ́kɔ́ bɛ́ baacɔ ŋe bú óófíne,
bí ŋé wuúci kuána owéénú ;
bí ŋgé wuúci nyie hoóhi na ɔnɔ́mɛ.
11 Yaátɛ́ asana bulíkílíki ŋeé tímbíé na hiɔ́bɔ hí belumitinine Yésus hikime,
na baacɔ a bá ŋa bɔ́ lɔ́kɔ́máká asana eéyé.
Baacɔ bá ɛndɔ́ma ŋa bɔ́ kɛ́la bikéki bí tubílícínyínyí
12 Baacɔ bá ɛndɔ́ma ŋa bɔ́ bá bábɔ́ kɛ́laka ne bikéki bí tubílícínyínyí ne bikémése bɛ́ bɛsana biéŋí.
Belumitinine bekime ŋa bɔ́ bá bábɔ́ bɛ́bándákána na ɔtɛ́má ɔ́mɔtɛ́ a yaalɛ yɛ́ Sálɔmɔn yɛ́ nɔháatɛ́ nú *Ciíbe cɛ Bandɔ́mɛsɛ́.
13 Asana ɔ́mɔtɛ́,
ta ɔɔcɔ u etémbí awɔ́ u tɛ ɔ́mɔɔ́ bá mulumitinine,
ti ómoó weéhínyínyi ɔkɔlátana e úúbú ɔlɔŋɔ ;
ta híáná,
baacɔ bá bunɔŋɔ ŋa bɔ́ bá bébú beébe lénéke buéŋí.
14 Ɔmbana ú belumitinine Yésus ŋaá bá waá kɔ́maka bikúlú bikime,
ne beénjú na banɔ́mɔcɔ́.
15 A asana ne bikéki bí tubílícínyínyí abɛ́ baacɔ bá ɛndɔ́ma ŋa bɔ́ bá bábɔ́ kɛ́láka,
ɛ́ɛhɛ́ baacɔ beéŋí ŋa bɔ́ bá bábɔ́ cɔ́bakana bɔkɔnɔ́kɔ́nɔ i ihényí,
bé beébe fienyikinyi na a maándɔ́ ne e ebúyé,
anyía ekúlú eyí Bíel ŋa hɔ́la hɔ́á te hú yááyɛ́ ehuéhue é húé ɔkɔnɔ́kɔ́nɔ ɔmɔtɛ́ eé beébe,
mbá u aáŋɔ́nua.
16 Híáná bitúte bɛ́ baacɔ biéŋí ŋaá bá bíé húlúkúne tɔ́na a tɔbálɛ́kabálɛ́ka a túáŋa hoóhi ne Yelúsalɛm,
bé hélékénéne na bɔkɔnɔ́kɔ́nɔ ne eebe abá *bɛɛbɛ́ bí bililé ŋaá bá bíé yébíki ;
bekime eébé aáŋɔ́núaka.
Baacɔ bá ɛndɔ́ma ŋa bɔ́ bɛ́kála eé buúse bú Hitúlé a hiáŋá
17 Yaátɛ́ asana ne *mutéŋínyi beluli nyiínjie a muáŋá na baacɔ abá u ŋaá bá ne beébe bá ɔlɔŋɔ ú *Basatusiɛ́ŋ ŋa bɔ́ bá bébú lóbísíkínyi baacɔ bá ɛndɔ́ma buéŋí.
18 Aáná bé ŋeé beébe hátɛ́ákɛ́ná,
bé ŋé beébe hákɛ́na eé ciíbe cɛ ɛcaná cɛ kɔ́mɛ́na.
19 Mbá ne butúé,
*elilé yɛ́ bɔsɔ́ma yɛ́ Bandɔ́mɛsɛ́ ŋaá faáya,
yí ŋé kuúnéke bihenyi bí ciíbe cɛ ɛcaná,
yí ŋé hémúnyi baacɔ bá ɛndɔ́ma,
mbá yɛ́sɛ náábɔ́ :
20 « Ánɔ cɔbá eé *Ciíbe cɛ Bandɔ́mɛsɛ́,
núé hulíkínyi baacɔ bɛsana a bɛ́ ŋa lɛ́ca yɔɔ́sɔɔ́sɔ yí olíhe eéyé. »
21 Ɛ́makɛ́la bábɔ́ lɔ́kɔ́ma aáná,
bá ŋá cɔba tútútú nɔɔ́nɔyá,
bé ŋge oófókíne a nɔháatɛ́ nú Ciíbe cɛ Bandɔ́mɛsɛ́,
bé ŋé túme oweékúnyi baacɔ.
Ciátɛ́ nɔɔ́nɔyá eécí,
ne mutéŋínyi beluli nyiínjie a muáŋá ne úúyé ɔlɔŋɔ ú baacɔ ŋa bɔ́ bándáka bekendisi Besuif e Hitúlé a hiáŋá.
Bá ŋá tɔ́ma bicénji o okohéléne baacɔ bá ɛndɔ́ma abá bá ŋaá háyá eé ciíbe cɛ ɛcaná.
22 Mbá ekúlú eyí bicénji ŋgaá hámá eé ciíbe cɛ ɛcaná,
beébe ta ɔkuana baacɔ bá ɛndɔ́ma hɔ́á.
Bá ŋa bɔ́ hálɔ́mɔ́na,
bá ŋá láákɛ́na baacɔ bé Hitúlé a hiáŋá,
23 báyɛ :
« Tú ma sɔ́ kúana bihenyi bí ciíbe cɛ ɛcaná bɛfacákánɔ́ bɔmbányɛ,
betétényi ciíbe cɛ ɛcaná bekime ŋa bɔ́ bá tálɛ́mákɛ́na e meése mé bihenyi ;
mbá ta híáná,
ekúlú eyí tuésú kúuneke bihenyi,
basɔ́ ta ɔkuana ɔɔcɔ a baacɔ eébé. »
24 Ɛ́makɛ́la ne mutéŋínyi bicénji bí Ciíbe cɛ Bandɔ́mɛsɛ́ ne betéŋínyi *beluli nyiínjie ábɔ́ lɔ́kɔ́ma aáná,
injiŋé ŋé beébe nyíme a bɛɛtɔ́ a asana eéyé ;
bá bɛ́bátáka báyɛ :
« Anyána asana eéyé káá bá e ? »
25 Aáná ɔɔcɔ a wɔmɔtɛ́ ŋaá fááya o okoó beébe laana ɔsɛ :
« Ánɔ lɛcá !
Baacɔ eébé abá nú ŋa nɔ́ hátɛ́ákɛ́na,
núɔ hákɛ́na eé ciíbe cɛ ɛcaná á bɔ́ŋa ehenyíé eé Ciíbe cɛ Bandɔ́mɛsɛ́,
bé eékúnyíki baacɔ bɛsana. »ª
26 Mutéŋínyi bicénji bí Ciíbe cɛ Bandɔ́mɛsɛ́ ŋa cɔ́bá na bááyɛ́ baacɔ ;
bá ŋá ka hálámánána baacɔ bá ɛndɔ́ma o moyóyónó,
anyía bicénji bɛ́muátá ŋaá bá bíé líkíméke anyía baacɔ á bɔ́ŋa bé o beébe túméke andányɛ́.
27 Ɛ́makɛ́la bé ke bú beébe hálámánáná,
bé ŋé beébe oofínyi haála ehé Hitúlé a hiáŋá ŋaá bá ;
mbá mutéŋínyi beluli nyiínjie a muáŋá meé túme obícónyi baacɔ bá ɛndɔ́ma,
28 ɔsɛ :
« Yaŋɔ́ ɛsɛ,
tu ŋá sɔ́ banɔ́ kóti buúse bukime anyía nɔtɛ háná éékúnyi bɛsana abɛ́ ɔɔcɔ oócí ŋaá bá we yéékúnyíki e ?
Mbá ánɔ lɛcá bɔkɔ abɔ́ nú ma nɔ́ kɛ́laka,
nú ma nɔ́ sásaka nyíánɔ́ nyiékúnyi a baacɔ bekime bá bálɛ́ka ci Yelúsalɛm ikime ;
nu ŋa nɔ́ áamba ɔ basɔ́ túéhínyi owé ú ɔɔcɔ oócí a bɛɛtɔ́. »
29 Ne Bíel na baacɔ bá ɛndɔ́ma a bɔ́mɔtɛ́ ŋa bɔ́ bɛ́káláka,
báyɛ :
« Tu ŋá sɔ́ nyɛ́mána tú ɔlɔ́kɔ́mákɛ́na Bandɔ́mɛsɛ́ ɔ ɔhɔla baacɔ.
30 Yááŋa anyía Bandɔ́mɛsɛ́ ewú cíísú sɔ́kɔ́nɔ́ ŋaá bá cíé nyémiki,
wuúci ú ŋeé héényi Yésus o owé,
ooci awɔ́ nú ŋa nɔ́ ɔɔ́nɔ́ ɛ́cɛ nú ma nɔ́ aátákɛ́na ɔ ɔmbásá.
31 Bandɔ́mɛsɛ́ ŋeé bééti Yésus ɔ Ɔmuaná a aháŋá yí úúyé ɔɔbɔ́ ú manɔ́mɛ ;
u ŋé wuúci télímínyi ne Otéŋí ne Munohi baacɔ ɔ ɔkɛla anyía baacɔ bé *Islayɛ́l ábɔ́ bɔ́ŋɔ ohónyí wú ɔbɛ́kákálákɛ́na máábɔ́ maabɛ́,
mbá bá sɔ́mba ɔkɔlɔ́ eé meéme,
Bandɔ́mɛsɛ́ yó beébe nyɛ́anakɛna máábɔ́ maabɛ́.
32 Basɔ́ eebe,
tú ŋe sú húlinyi baacɔ bɛsana a bɛ́ ŋa bɛ́kɛ́láka ;
*Efúúménénú yí Elilé ayɛ́ Bandɔ́mɛsɛ́ ŋe yiínjíé ná baacɔ e bé ŋe bú wuúci lɔ́kɔ́mɛ́na ŋeé húli tɔ́na bɛsana eébí. »
33 Ɛ́makɛ́la baacɔ bé Hitúlé a hiáŋá ábɔ́ lɔ́kɔ́máka bɛsana eébí,
bá ŋá bɔ fámɔ́núáka ne hilóbi ;
bá ŋá bɛ́táá ɔwɔɔ́nɔ́kɔ baacɔ bá ɛndɔ́ma.
34 Mbá ɔɔcɔ ɔmɔtɛ́ ŋaá bá aaha,
nyiínyi báyɛ Kamaliɛl.
ª U ŋaá bá ɔɔcɔ u hitúlé hɛ́ Bafalisiɛ́ŋ,
wuúci muékúnyi bikotí,
baacɔ bekime ŋaá bá bébú wuúci kékéke buéŋí ;
ɔɔcɔ ooci ŋa hátɔ́na ɛndánáka ɛ ɛkatɛ́katɛ́ ci Hitúlé a hiáŋá,
u ŋá batá bicénji anyía bía caŋá hémúnyi baacɔ bá ɛndɔ́ma a nɔháatɛ́.
35 Ɛ́makɛ́la bé beébe hémúnyi,
mbá ɔsɛ ná baacɔ bé Hitúlé :
« Banɔ́,
buamɛ bú Islayɛ́l,
énu bíkékényíki na bɔkɔ abɔ́ nú ŋa nɔ́ bɛ́táá ɔkɛla baacɔ eebe.
36 Ánɔ bɛ́tááka bɔmbányɛ anyía tuɔŋɔ tɛ ŋa hɔ́la tuéŋí ayɛ́ Tɛ́tas ɔɔcɔ a wɔmɔtɛ́ ŋe bítóŋínyí,
u bíkétíki anyía wáŋa taaká cɛ́ ɔɔcɔ ;
baacɔ beéŋí ŋe bú wuúci látáká hoóhi hɛɛcɔª hɛ́mɔtɛ́.
Mbá ekúlú ayɛ́ baacɔ ŋe bú wuúci ɔɔ́nɔ́,
baacɔ bekime e bé ŋe bú wuúci látákɛ́na ŋa bɔ́ sáásíáka,
ta ɔɔcɔ ta ɔlɔbɔ ɔ ɔlɔŋɔ oócí.
37 E elime ciayɛ́,
ekúlú yɛ́ mɔfanana,
Yútas,
ɔɔcɔ u *Kalilé,
ŋe bítóŋínyí tɔ́na ;
baacɔ beéŋí ŋe bú wuúci látákɛ́ná.
Mbá ekúlú eyí bé ŋeé wuúci ɔɔ́nɔ́ tɔ́na,
baacɔ bekime e bé ŋe bú wuúci látákɛ́na ŋa bɔ́ sáásíáka.
38 Buátɛ́ bɔkɔ,
ɛ ŋa mɛ́ banɔ́ láana aámbáya anyía nɔtɛ háná híite ekúlú a asana na baacɔ eebe ;
énu beébe nyɛ́ána,
bé súéte,
anyía mbɔ́kɔ ná baacɔ ne injiŋé ne buólí abɔ́ bá ŋa bɔ́ nyiɔ ŋeé húle,
bí kéé nyímúkúne buúse bukime.
39 Mbá mbɔ́kɔ taaká Bandɔ́mɛsɛ́ ú ŋeé beébe iínjie injiŋé cɛ ɔkɛlaka bɛsana eébí,
nu tɛ anɔ́ bá nú ɔbɔ́ŋɔ ohónyí wú o biíbi menyisi ;
énu bíkékényíki anyía yááŋa yɛ́ ɔbá anyía nú ma nɔ́ támba biité na Bandɔ́mɛsɛ́.
»
Ɔtáŋa ú Kamaliɛl ŋe bílénékíne baacɔ bé Hitúlé a hiáŋá ;
40 aáná bé ŋe bú óófínyi baacɔ bá ɛndɔ́ma,
bé ŋé beébe súbéke,
bé ŋé beébe háyɛ́na okotí anyía bá tɛ háná cámba nyiínyi nyí Yésus,
nyi beébe nyɛana eényí.
41 Baacɔ bá ɛndɔ́ma ŋa bɔ́ hátɔ́na ɛ ɛkatɛ́katɛ́ ci Hitúlé a hiáŋá,
bé ŋé súéte,
bé bílénéke buéŋí,
anyía bú me bílénékíne Bandɔ́mɛsɛ́ anyía bábɔ́ lɔ́kɔ́máka muuyé a asana ne Yésus.
42 Bá ŋa bɔ́ cɔ́bá ne buúse o oweékúnyi baacɔ bɛsana,
bé húlíkínyi baacɔ Ambányɛ yɛ́ Ɛsɔ́ma yí Yésus,
Ɔlɔtɔ́nɔ́ u Bandɔ́mɛsɛ́,
ne eé Ciíbe cɛ Bandɔ́mɛsɛ́ ne eé meébe ma baacɔ mɔɔ́sɛ́ mekime.