Ne Bíel na Sáaŋ me bú eéŋúnyísi asákála
3
1 Búmɔtɛ́ buɔ́sɛ́,
ne Bíel na Sáaŋ ŋa bɔ́ bá bábɔ́ cɔ́cɔbaka eé *Ciíbe cɛ Bandɔ́mɛsɛ́ i injéŋí ɛ́tátɔ́ cɛ́ nabuɔ́sɛ́,
ekúlú eéyé baacɔ naŋa bábɔ́ bɛ́cɔ́kɔ́lɔ́kɛ́na Bandɔ́mɛsɛ́.
2 Ɔɔcɔ a wɔmɔtɛ́ ŋaá bá aáhá eé buúse bú ehenyi yí nyiofine nyɛ́ nɔháatɛ́ nú Ciíbe cɛ Bandɔ́mɛsɛ́.
Bá ŋaá bá bɔ́ lɔ́ŋɔ́kɔ ehenyi eéyé anyía « Ambányɛ́kɛ́ yí ehenyi ».
ª Ɔɔcɔ oócí ŋeé bíbíéné asákála.
Mɔɔ́sɛ́ mekime bá ŋaá bá bé keé wuúci limísíkínyi hɔ́á anyía wá lɛ́báka mɔɔnyɛ́ ná baacɔ a bá ŋa bɔ́ bá bébú óófókíne bá hámɔ́kɔ́na eé Ciíbe cɛ Bandɔ́mɛsɛ́.
3 Ekúlú ayɛ́ ɔɔcɔ oócí ŋa lɛ́ca ne Bíel na Sáaŋ ábɔ́ cɔ́cɔbaka o okowóofine hɔ́á,
u ŋé beébe kɔŋɛna bɔkɔ.
4 Bé ŋe bú wuúci tála eése,
mbá Bíel ɔsɛ :
« Basɔ́ lɛ́cáka ! »
5 Aáná u ŋeé beébe bísíémúkúnyí,
u bíkétíki anyía bá ŋa bɔ́ cɔ́ba o o wuúci iínjie bɔkɔ.
6 Mbá Bíel ɔsɛ :
« Ta mɔɔnyɛ́,
te kóolo,
ɛ tɛ ámɛ bá ne biíbi buúse bukime ;
mbá bɔkɔ abɔ́ ya mɛ́ŋa ne buúbu míɔ cɔbá ɔ ɔ kuɔŋɔ́ iínjie :
A makɛ́nda me nyiínyi nyí Yésus *Kilís,
ɔɔcɔ u *Násalɛt,
[hatɔ́na ɛndánáka,]
kandáka ! »
7 U ŋé wuúci tímbíé ɔ ɔɔbɔ́ ú manɔ́mɛ,
u ŋé wuúci hetúnyi ɛndánáka ;
hí e ekúlú eéyé,
na cááyɛ́ akɔlɔ́ na túáyɛ́ tukɔlɔ́kɔtɛ́á ŋɔ yɔɔ́nɛ́na.
8 Buátɛ́ bɔkɔ ú ŋaá tálɛ́mɛ́ná ɛndánáka,
u ŋé béme ɔ ɔmuaná,
nyitúme ɔkanda eényí.
U ŋé oofíne eé Ciíbe cɛ Bandɔ́mɛsɛ́ ɔlɔŋɔ na baacɔ bá ɛndɔ́ma ;
u kandaka,
u béléméke,
u nyemiki tɔ́na Bandɔ́mɛsɛ́.
9 Baacɔ bekime a bá ŋa bɔ́ bá hɔ́á wuúci lɛcaka,
waá kándaka,
u nyemiki Bandɔ́mɛsɛ́.
10 Ekúlú eyí bé ŋe bú ményí anyía mulɛ́ba bɛnyɛ́ma eé buúse bɔ́ Ambányɛ́kɛ́ yí ehenyi yí Ciíbe cɛ Bandɔ́mɛsɛ́ muáŋa,
bé ŋé túme olíkíme,
bé kékéke buéŋí asana a yɛ́ ma bɛ́kɛ́láka nááyá.
Bíel ŋa táŋa na baacɔ eé Ciíbe cɛ Bandɔ́mɛsɛ́
11 Ɔɔcɔ oócí ŋá bɛ́cábɛ́na ɔlátɛ́na ne Bíel na Sáaŋ,
bá ŋa bɔ́ bá a yaalɛ yí *Ciíbe cɛ Bandɔ́mɛsɛ́ ayɛ́ bɔ́ ŋɔɔ́ lɔ́ŋɔ báyɛ « Yaalɛ yɛ́ *Sálɔmɔn ».
ª Aáná baacɔ bekime ŋa bɔ́ fáakɔna náábɔ́ na ɔtɛ́tá.
12 Ɛ́makɛ́la Bíel áa lɛ́ca aáná,
mbá ɔsɛ ná nyɛkɔca nyɛ́ baacɔ :
« Banɔ́,
buamɛ bú *Islayɛ́l,
anyíatɛ́ nu ŋe nú kéké buéŋí asana eeye e ?
Nu ŋa nɔ́ basɔ́ bítíbítínyi buéŋí a asana eyí tú me sú kéndisi asákála eeye háyɛ anyía a máásɔ́ makɛ́nda ma bɛ́muátá tú ma sɔ́ kɛ́laka,
ta anyía basɔ́ tua sɔ́ŋa bɛmbányɛ bɛ́ baacɔ ɔ ɔhɔla eé buúse bɔ́ Bandɔ́mɛsɛ́.
13 Eéʼeé,
yááŋa anyía Bandɔ́mɛsɛ́ ewú cíísú sɔ́kɔ́nɔ́ a cɛ́áŋa anyía na *Abɛ́laham,
ne *Isak,
na *Yákɔb,
ŋaá bá cíé nyémiki,
ú moo tóŋínyi anyána muayɛ́ munyiɔnɔ Yésus áŋa muáŋá.
Banɔ́,
nu ŋe nú túé waáta Yésus,
núó wuúci bɛ́sáŋɔ́na eé buúse bú Bílat awɔ́ u ŋaá bá ú ma sɔ́mbɔ́tɔ́na anyía bá nyɛ́ána Yésus.
14 Nu ŋa nɔ́ bɛ́sáŋɔ́ná ooci awɔ́ u ŋaá bá wuúci atálɛ́mánánɔ́ yɛ́ ɔɔcɔ,
wuúci efúúménénú yɛ́ ɔɔcɔ tɔ́na,
búɔ́ banɔ́ bílénékíne anyía nuánɔ́ báta Bílat anyía wá banɔ́ nyɛ́ánɛ́na muɔ́nɔ baacɔ.
15 Yaátɛ́ asana nú ŋa nɔ́ kɛ́la anyía bá ɔɔ́nɔ́kɔ ɔɔcɔ a wáŋa Muínjíéne olíhe.
Ta híáná,
Bandɔ́mɛsɛ́ ŋeé wuúci heenyútúne e biwéewé ;
basɔ́ bɛ́muátá tua sɔ́ŋa bé wuúci lɛcákánɔ́ wɔɔ́sɔ.
16 Asana yɛ́ ɔɔcɔ ooci awɔ́ nu ŋa nɔ́ lɛ́ca,
nu wuúci menyukune áŋa anyía,
makɛ́nda me nyiínyi nyí Yésus má ma kɛ́la anyía wá kɛ́nda a asana eyí tu ŋe sú wuúci lumitinine.
Ɛ́ɛ,
asana ayɛ́ tu ŋa sɔ́ háya mɔŋɔlɛ́ né Yésus má kɛ́la anyía ɔɔcɔ ooci á yaáŋɔ́núá buúse bukime,
banɔ́ bɛ́muátá nu lɛcaka.
17 Buamɛ é,
yɛ́ ŋa lɛ́cana aámbáya anyía na banɔ́ na báánɔ́ betéŋí nu ŋa nɔ́ bɛ́sáŋɔ́ná Yésus anyía nu tɛ ɔ́mɔ nɔ́ bá nuenú ményukune bɔkɔ abɔ́ nu ŋa nɔ́ bá nuanɔ́ kɛ́laka.
18 Asana ɔ́mɔtɛ́,
asana ayɛ́ Bandɔ́mɛsɛ́ ŋaá kɔ́ɔ́náka buáyá e nyuúté nyɛ́ bááyɛ́ *behémúnyi bɛsana ŋa nyɛmána yí obínyíóyísínyi aáná ;
u ŋaá kɔ́ɔ́na ɔsɛ uuyé Ɔlɔtɔ́nɔ́ ŋá nyɛmána wu ɔlɔ́kɔ́máka ɔkála.
19 Buátɛ́ bɔkɔ ánɔ bɛ́kákálákɛ́na máánɔ́ maabɛ́ aná,
mbá nɔ sɔ́mba ɔkɔlɔ́ eé meéme ;
núɔ́ hálɔ́mɔ́kɔ́na ná Bandɔ́mɛsɛ́ anyía wáá banɔ́ nyɛ́ánákɛ́nɛ́na máánɔ́ maabɛ́.
20 Aáná Otéŋí Bandɔ́mɛsɛ́ káá banɔ́ iínjie bikúlú bí ehélúme ekúlú ayɛ́ u káá tɔ́ma *Mesíi awɔ́ ú ŋɔ lɔ́tɔ́ buáyá a yáánɔ́ asana,
wuúci wáŋa Yésus *Kilís.
21 Waáta Yésus ooci wá nyɛ́mana wu ɔ caŋá ke límine ɔ Ɔmuaná ɔ ɔkɔɔ́háma ekúlú ayɛ́ Bandɔ́mɛsɛ́ kéé kúmbutune bɔkɔ bukime ;
híáná u ŋa kɔ́ɔ́náka buáyá e nyuúté nyɛ́ bááyɛ́ behémúnyi bɛsana e befúúménénú.
22 Híáná *Moyís ŋaá láákɛ́na cíísú sɔ́kɔ́nɔ́ ɔsɛ :
“Otéŋí,
cianɔ́ Bandɔ́mɛsɛ́,
káá banɔ́ tɔ́mɛ́na *muhémúnyi bɛsana a mú káá bá háyɛ yaŋɔ́ ;
mu káá bá ɔɔcɔ u búánɔ́ bunɔŋɔ.
Nu ká nɔ́ lɔ́kɔ́máka bɔkɔ bukime abɔ́ mu káá banɔ́ láakɛna.
23 Ɔɔcɔ okime awɔ́ u tɛ káá lɔ́kɔ́mɛ́na muátá muhémúnyi bɛsana,
bé kéé wuúci ááŋia ɔ ɔlɔŋɔ ú baacɔ bá bunɔŋɔ,
mbá bé wuúci ɔ́ɔ́nɔ.”*
24 Behémúnyi bɛsana bá Bandɔ́mɛsɛ́ bekime tɔ́na ŋa bɔ́ táŋáka bɛsana a bɛ́ káá bɛ́kɛ́láka ɔ mɔɔ́sɛ́ eémé,
o otúme na *Samuɛl ɔ ɔkɔɔ́háma na bɔsɔ́ɔ́kɔ́ e bé ŋe bú líhéké a cíáyɛ́ elime.
25 Buamɛ e,
asana eyí behémúnyi bɛsana bá Bandɔ́mɛsɛ́ ŋa bɔ́ kɔ́ɔ́náka anyía yɛ́ káá bɛ́kɛ́láka ŋaá banɔ́ lɛ́ca,
anyía a yáánɔ́ asana Bandɔ́mɛsɛ́ ŋaa látána bumbénú ne cíísú sɔ́kɔ́nɔ́ ekúlú ayɛ́ u ŋaá láána Abɛ́laham ɔsɛ :
“Ɛ ká mɛ́ sayabakɛna baacɔ bá tɔnyɛ́nɔ́ tukime tɔ́ ɔmɛsɛ́ e elime ci hííwu hɛnyɛ́nɔ́.”ª
26 Náánɔ́ aná Bandɔ́mɛsɛ́ ŋaá cáŋacáŋa ɔtɔ́ma muayɛ́ munyiɔnɔ anyía muá banɔ́ sáyábákɛ́na,
mbá mu kɛla anyía ɔɔcɔ okime aá banɔ́ á nyɛ́ána mááyɛ́ mekilíkínyí a maabɛ́. »