Lyì nánjə̀jóló nʼê cèrhé Cinu dɛ̃̌ yi wə
19
Rə̀myɛ́ kwã nɛ́,
a kʼa nyɛ̀ɛ̀ cəl nánfɔ̀lɔ̀ ǹdə lyì nánjə̀jóló dweme ta,
rə̀ zhì dɛ̃̌ yi w rə wɔ̀:
“Àlɛ́lɔyà!
Cinu nə còrhó!
Wɔ́ nə́ Yi rí rə̀ vwârh nə́ba mɔ́.
Rə̀ zhe zùwə́,
rə jʼà wɔ́ jàn cí.
2 Rə̀ nʼê kɛ́ rə̀ bùrsí cángá ǹdə́ zhə̀nà.
Rə̀ pɔ còrhò-tum kə-nə̀fòló w páá mɔ́ nɛ,
bə̀ ò yʼà nʼô zə ò fwə̂l tumə né ò cɔ̀ lũ wə́.
Ò gə́ gu Yi tùntùnnə̀ bé mó ce rə̀ zhìlì ò yò.”
3 Bə kʼe wɔ̀:
“Àlɛ́lɔyà!
Cinu nə còrhó!
Zhə̀nà,
cɔ w nánfɔ̀lɔ̀ w ò kwɛ̃´ myǐn mú nyɛ̀rh la dɛ̃̌ yi w byinə nə̀ bə zhɔ̌ zhe yilə.”
4 Rə̀myɛ́ yi ní,
náncɛsɛ́ shí-èlyè ǹdə́ sə̀na y ǹdə́ wò-nyùùrí rə̀na y ga tu bə̀ nə̀dwə́nə́ yó,
bə wùlì Yi rí rə̀ jě rə̀ pyɛ̀lɛ̀ də̀gwã́ y yó mó yé né,
bə zɛ̃̀ bə̀ nʼê cèrhé re bə̀ zhe:
“Amɛ̀n!
Àlɛ́lɔyà!
Cinu nə còrhó!”
5 Cəl rə̀dù zɛ̃̀ rə zhì pyɛ̀lɛ̀ də̀gwã́ y gə́ zhǐ má rə wɔ̀:
“Ámyɛ̌ Yi tùntùnnə̀ bé,
lyì-fwààlɛ̀ ǹdə́ yə̀-yírh-swí cìnə́ ga á nʼá nyàm dɛ̀ mɔ́,
cèrhénə nə́ Yi rí!”
6 Rə̀myɛ́ kwã nɛ́,
a nyɛ̀ɛ̀ cəl ǹdə lyì-zhâ nánjə̀jóló cələ ta,
ráá ǹdə wɔ́ nɛ̃̌ mə̀ nʼê wùl ta,
ráá ǹdə wɔ́ dwà è nʼê kúkwìrí ta,
rə̀ zhe:
“Àlɛ́lɔyà!
Cinu nə còrhó!
Èlâsɛ̃̌,
wɔ́ Cinu nə́ Yi jàn-bə-swɛ̃´-zhe cə́bal mɔ́ dúdú ń wɔ́ pyɔ̌.
7 Bànà nə́ fùù ǹdə́ wu-nyɔ̃̀,
nə́ cèrhé mo,
bə̀ èlâsɛ̃´ wɔ́ Pyì-bwɛ̀lɛ́ y kɛ̃-jú wə́,
è kɛ̃ mɔ́ tɛnɛ n zhɛ̀.
8 Bə̀ pɔ sɔ́má kɛ̃ mɔ́ nɛ n zù kàmə̀-zù-pwã̀ è bə jìmdì zhe,
è nʼê jə́jɛ̀mɛ́.
È nʼê myɛrhɛ Yi lyì bí tùntwə̃̀ə̃̀ né nə̀ wɔ́ cángá mɔ́.”
9 Màlɛ́ka y wɔ̀ nɛ̀:
“Kɛ̃ ń byili bə̀ byɛ̀bɛ́ bə̀ byẽ̀ Pyì-bwɛ̀lɛ́ y kɛ̃-jú w jàà w mɔ́ wɔ́ wu-nyɔ̃̀ cìnə́.”
E kʼe wɔ̀:
“Zhə̀nà,
zɔ̀mà nɛ́ nyɛ̀bɛ́ wɔ́ Yi cìcì zɔ̀mà páá.”
10 A zɛ̃̀ a tu à nə̀dwə́nə́ yó è yé né à la y còrhó.
Sə è wò nè:
“Dɛ̃̌ ǹ cìnə̀,
bə̀ká wɛ̀rhɛ́ èta yé,
bʼà wɔ́ Yi tùntùnnə̀ ǹdə ǹmyɛ́ ǹdə́ ǹ da-byâ bɛ́ bə̀ zhí zhə̀n dɛ́ Yezu byili mú ni mú ta.
Wɔ́ Yi yé né ǹ mə̂ sə́ wùlì ní,
ń cèrhé re.”
Zhə̀n dɛ́ tɛ̀bɛ́ Yezu byili mú,
wɔ́ rə̀myɛ́ rə̀ nʼê ce yə̀wâl lyì bí bə̀ nʼê zɔ̀m zɔ̀mà nɛ́ nyɛ̀bɛ́ Yi byili bi mú wẽ́.
Lò ń jě eshã námpwã̀ ń nə́ ń bwí ǹdə́ bǔ-ku wə́
11 Rə̀myɛ́ kwã nɛ́,
a nə dɛ̃̌ yi rí rə̀ pul.
A pwírí eshã námpwã̀ è duwə.
Mɔ̀bɔ́ ń jě y mó yíl “Zhə̀n cə́bal,
lò mɔ̀bɔ́ ń zhǐ ń nà yó”.
Ń nə́ ń bùr ń bùrsí cángá;
ń búlə́ né ń nə́ ń bwí mú myɛ wɔ́ cángá.
12 Ń yírhə́ né nʼê yə̂r ǹdə myǐn ta.
Ń pú pyɛ̀lɛ̀ yə́-púr nánzhəzhɔ̌.
Yil rə̀dù yʼà kɛ̃ rə dɛ̃ mɔ.
È gə də̀ ńmyɛ̌ cìcì,
lò dõ yə̀l yil lé rə̀myɛ́ yé.
13 Ń yà ń zù kàmə̀-zù-èdɔ̀lɔ̀,
ò gakó wɔ́ jal dúdú.
Bə̀ nʼê byẽ̀ mò bə̀ “Yi zɔ̀mɛ̀”.
14 Dɛ̃̌ yi shə̀dɛ́ɛ́sɛ́ tó mo ǹdə́ shəshərh námpwə̀rh.
Shə̀dɛ́ɛ́sɛ́ gakó zù kàmə̀-zù-pwə̀rh pwɛ̃´pwɛ̃´ sə̀ bə jìmdì zhe yé.
15 Búlə́ shù ò zhe nyí dɛ̃´dɛ̃´ nʼô shí mɔ̀bɔ́ ń jě eshã y mɔ́ nyú w ò dwi.
Ń la zə w n mə n zhìlì tənèsé lyì bí gakó yò.
Ń mà n cìní bi ǹdə́ jàn nánkùlù.
Ń mà n ce sɛ̃´-cǒ byâ kùlkṍ w kɔ̀bɔ́ bə̀ mʼê wɛ̀rhɛ́ sɛ̃´ mɔ́ mɔ́ wẽ́,
n zù n nɔ̀ bɛ̀ ǹdə́ ń nə̀rh.
Kùlkṍ w òmyɛ́ nʼô myɛrhɛ Yi jàn-bə-swɛ̃´-zhe cə́bal mɔ́ lyim dí nánfɔ̀lɔ̀ wá.
16 Bə̀ yʼà kɛ̃ yil rə̀dù ń kàmə̀-zù-èdɔ̀lɔ̀ w ǹdə́ ń cí rí ni.
Bə̀ nʼê byẽ̀ mò bə̀ “Pyâ bɛ́ gakó Pyɔ̌,
ǹdə́ Cǐnnə bé gakó Cinu”.
17 Rə̀myɛ́ kwã nɛ́,
a nə màlɛ́ka èdù è zhǐ nə̀nyɔ́nɔ́ w wẽ́,
e zɛ̃̀ e búbwéé dɛ̃´dɛ̃´ e ce dɛ̃̌ yi kúmdí gakó ne e wɔ̀:
“Bànà dwã yó á jí Yi címsí nánfɔ̀lɔ̀ w kùjú wə́.
18 Bànà á dɔ̃̀ pyâ bɛ́ ǹdə́ jàn cìnə́ bé ǹdə́ eshesé ǹdə́ sə̀ jòmnə̀ bé gakó,
sʼá dɔ̃̀ yómə́ ǹdə́ byɛ̀bɛ́ bə̀ cǐ bə̀ cìnə̀,
e súlí lyì-fwààlɛ̀ ǹdə́ byɛ̀bɛ́ bə̀ yə̀ yírh swí ga.”
19 A zɛ̃̀ a kʼa nə bǔ-ku w ǹdə́ cɛ yó pyâ bɛ́ ǹdə́ bə̀ shə̀dɛ́ɛ́sɛ́ gakó.
Bə̀ zhǐ dwã yó bə̀ la bú ǹdə́ eshə-pwã̀ y jòmnə̀ mó ǹdə́ ń shə̀dɛ́ɛ́sɛ́.
20 Sə bə̀ zɔ bǔ-ku w ǹdə́ mɔ̀bɔ́ ǹ yà ń nə́ ń myìnì lyì bí bə̀ ńmyɛ̌ wɔ́ Yi nyì-zwennə mó.
Ń yà ń nə́ ń wɛ̀rhɛ́ màmyaarhɛ bǔ-ku w yé né ń mə́ ń yǔr lyì bí byɛ̀bɛ́ ò myɔrhɔ w yʼà wɔ bə̀ yala nɛ,
bə̀ nʼê cèrhé ò nyɔrhɔ w bə̀ mɔ mɔ́.
Bə zɛ̃̀ bə ji bǔ-ku w ǹdə́ mɔ̀bɔ́ ń nə́ ń myìnì lyì bí bə̀ ńmyɛ̌ wɔ́ Yi nyì-zwennə mó ga púrhú cə́m myǐn mə̀ lɛ̀lɛ̀ tɛ̃´ ǹdə bù-sà ta wẽ́ ǹdə́ bə̀ yírhə́ ga.
21 Búlə́ shù w ò nʼô dwi mɔ̀bɔ́ ń jě eshã y nyǔ w mú gu byɛ̀bɛ́ bə̀ dàl mɔ́ ga,
kúmdí gakó bə̀ rə jí bi.