Kɔn dɛ̀bɛ́ rə̀ ŋwɛ́nɛ́ dɛ̃̌ yi w mú gakó nʼê cèrhé Pyì-bwɛ̀lɛ́ y bə̀ zwə́l mó
5
A nə sɛ́bɛ́ rə̀ ŋwɛ́nɛ́ mɔ̀bɔ́ ń jě pyɛ̀lɛ̀ də̀gwã́ y yó mó jə̀jĩ́ y wə,
rə̀ yé y ǹdə́ rə̀ kwã y ga kɛ̃,
sə bə̀ yʼà pyípyílí ri,
bə pyə́l lɛ ǹdə́ pyə́lsɛ shàlpyɛ̀ sə̀ cĩ́ myaarhɛ.
2 A nə màlɛ́ka èdù è wɔ́ jàn cə́bal è nʼê bya è mʼê bwə̀rh è zhe:
“Mɔ̌ lò ń mə̂ ǹdə́ pyə́lsɛ́ vǔr sə n púr sɛ́bɛ́ rɛ́?”
3 Sə lò yà ń tɛ̀nɛ́ dɛ̃̌ yi wə,
ráá cɛ yó,
ráá cɛ y kùr w ń wɔ̌ sɛ́bɛ́ rɛ́ ń la púr n kàrmə̀ yé.
4 À gə́ pwírí lò tɛ̀nɛ́ ń mə̂ ǹdə́ sɛ́bɛ́ rɛ́ púr n kàrmə̀,
a kúrh yə́-nàná.
5 Sə náncɛ y èdù wò nè:
“Bə̀ká kúrh yé.
Nyǐ pyɔ̌ Dəvyidi nɔ̃̌ w Zhidə kwálá y bɔrɔ w jú bɛlɛ.
Ò wɔ̌ sɛ́bɛ́ rɛ́ pyə́lsɛ́ shàlpyɛ̀ y ò la vǔr o púr re.”
6 Rə̀myɛ́ yi ní,
à nɔ Pyì-bwɛ̀lɛ́* è zhǐ cəcəl w pyɛ̀lɛ̀ də̀gwã́ y yé né,
wò-nyùùrí rə̀na y ǹdə́ náncɛsɛ́ zɛ̃̀ bə kə́kɛ́lɛ́ ya.
È nyɛ̌ ǹdə wɔ́ zwə́l bə̀ yʼà zwə́l y ta;
è nyimə né yʼà wɔ́ nyàlpyɛ̀,
è yírhə́ né myɛ nyàlpyɛ̀.
Sə è yírhə́ né wɔ́ éshìrhə́ né nyàlpyɛ̀ y Yi twĩ̀ cɛ yó jààsɛ́ gakó wẽ́ mó.
7 E twẽ̌ e yí e zwẽ sɛ́bɛ́ rɛ́ rə̀ yʼà ŋwɛ́nɛ́ mɔ̀bɔ́ ń jě pyɛ̀lɛ̀ də̀gwã́ y yó mó jə̀jĩ́ y w mú.
8 È gə́ zwẽ de,
wẽ̀ dé rə̀na y ǹdə́ náncɛsɛ́ shí-èlyè ǹdə́ sə̀na y tu bə̀ nə̀dwə́nə́ yó,
bə wùlì è yé né.
Mə̀dù gakó zhe dàkɔ̀nɔ́ ǹdə́ sánə́má nə̀zhǐrh ń jɔ̃̀ wà,
wẽ̀ rə̀ lwẽ́ nã́nyə̀nyɛ̀lɛ́ yʼà sú nə̀zhĩ̌sí.
Rə̀myɛ́ nʼê myɛrhɛ Yi lyì bí Yi-cəəré.
9 Sə bə̀ ju nwə̃́ nándwə̃̀ bə̀ nʼê nún bə̀ zhe:
“Ǹmyɛ́ mə̂ ǹdə́ sɛ́bɛ́ rɛ́ tɛ̀bɛ́ kǒ,
ń vùr rə̀ pyə́lsɛ́ sə̀ pyə́l lɛ mɔ́,
bə̀ wɔ́ ǹmyɛ́ bə̀ zwə́l.
Ǹ zə ǹ jal mɔ́ ń zwẽ lyì dwí dwí,
bə̀ zɔ̀mà nɛ́ wɔ́ dúdúmə́ dúdúmə́,
bə̀ shí lũ w tənèsé gakó wə.
10 Ǹ ce bə jǐrh Yi tənà y lyì,
bə jǐrh vwĩ̀-zwə́lnə Yi tum dí yilə,
sə bə̀ mʼa jí pyɛ̀lɛ̀ lũ w wẽ́.”
11 À yʼà gwẽ̌ nʼâ nyǐ.
Sə à nyɛ̀ɛ̀ màlɛ́kabá nánzhəzhɔ̌ cələ,
bə̀ yʼà wɔ́ mɔ̀rh-fwààlɛ̀ nánjə̀jóló,
bə̀ kə́kɛ́lɛ́ pyɛ̀lɛ̀ də̀gwã́ y ǹdə́ wò-nyùùrí rə̀na y ǹdə́ náncɛsɛ́.
12 Bə̀ nʼê bya bə̀ zhe:
“Pyì-bwɛ̀lɛ́ y bə̀ zwə́l mó mə̂ ǹdə́ ŋwɔ̀nɔ́,
ǹdə́ nə̀cɛ̀ndɛ̀,
ǹdə́ surhə,
ǹdə́ jàn,
ǹdə́ zùwə́,
ǹdə́ còrhó!”
13 A nyɛ̀ɛ̀ wẽ̀ dé tɛ̀bɛ́ gakó Yi wɛ̀rhɛ́ rə̀ ŋwɛ́nɛ́ dɛ̃̌ yi wə,
ǹdə́ cɛ y yó ǹdə́ cɛ y kùr w mó,
ǹdə́ nə̀-fɔ̀lɔ̀ w wẽ́ mó,
ǹdə́ kɔn dɛ̀bɛ́ gakó rə̀ ŋwɛ́nɛ́ lũ w wẽ́ mó cələ rə̀ nʼê wə̀lə̀:
“Mɔ̀bɔ́ ń jě pyɛ̀lɛ̀ də̀gwã́ y yó mó,
ǹdə́ Pyì-bwɛ̀lɛ́ y yil bʼa du ǹdə́ còrhó,
ǹdə́ zùwə́,
ǹdə́ ŋwɔ̀nɔ́,
byinə nə̀ bə zhɔ̌ zhe yilə!”
14 Sə wò-nyùùrí rə̀na y wòwə̀:
“Amɛ̀n!”
Náncɛsɛ́ tu sə̀ nə̀dwə́nə́ yó sə cèrhé Yi ǹdə́ Pyì-bwɛ̀lɛ́ yá.