Pyɛɛrɛ nə́ ń cící Kristə-lyì gùúlí yé né cìnə́ bé
5
Èlâsɛ̃´,
wɔ́ byɛ̀bɛ́ bə̀ wɔ́ yé né cìnə́ á wẽ́ mó à nʼâ yâl a cící.
Àmyɛ wɔ́ yé né cə́bal ǹdə á ta;
à wɔ́ Kristə nɔ̀nɔ̀ w zhə̀n-cí,
sə àmyɛ bʼa tó a nə zùwə́ y kɛ̀bɛ́ è bàn du mú.
2 Nyǐnə pyììsí Yi co á jɔ̃̀ w mɔ́ yò náàcɛ̀nɛ́ ǹdə́ wu-nyɔ̃̀,
ǹdə Yi gə́ nʼê yâl nɛ́,
sə è bə̀kʼa yə̀ ǹdə wɔ́ nyɛ́ɛ́ bə̀ nyɛ́ɛ́ ába nɛ yé,
sə è bə̀kʼa yə̀ wársɛ á nʼá yâl yé.
Nyǐnə sə̀ yò ǹdə́ sónó.
3 Á bə̀kʼá yə̀ yó-cìnə́ byɛ̀bɛ́ bə̀ zum ǹdə́ lyì bí byɛ̀bɛ́ Yi co bə̀ jɔ̃̀ w mɔ́ yé.
Yálna myɔrhɔ bə̀ yilə.
4 Èta,
nə̀nɔ̀n pyɔ̌ mɔ́ gə tú ń túwə́,
á bʼâ nə zùwə́ e yə̀ á kwândɛ twéé twéé.
Pyɛɛrɛ nə́ ń cící Kristə-lyì bí
5 Ámyɛ̌ byɛ̀bɛ́ á dàl mɔ́,
zwẽnə yé né cìnə́ bé nyí ni,
sʼá gakó shɛ̀nɛ́ dwã nyí ni ǹdə́ cìn-lwəl.
Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Yi bə cìn-byilu cìnə́ só yé,
sə rə̀ nʼê byili rə̀ sónó w cìn-lwəl cìnə́ bé ne.”
6 Lwəlnə á cìn tɛ̃´ jàn-cí Yi yé né,
mùnì ga yi rí gə tú è yúwə́,
sə rə zhẽ̌ á yó dɛ̃̌.
7 Yẽ̌nə twə́lə́ né nə̀ zhe ába mó gakó ne á ce Yi jɔ̃̀ wà,
bə̀ rə̀ nʼê nyǐ á yò.
8 Dɛ̃̌na,
á bə̀kʼá yẽ̌ á surhə né pyi yé,
bə̀ Shətana y è wɔ́ á zù-bal mɔ́ mɔ́ nʼê jíl dɛ̃̌ è bʼê swər ǹdə bɔrɔ ta,
è mʼê pyà lò mɔ̀bɔ́ è bʼa nə sʼe zhìlì ń yò.
9 Zhínə Yi ni kẽkẽ,
è bə̀kʼa ŋwɛ̀nɛ́ ába yé.
Á yě bʼâ da-byâ bɛ́ bə̀ ŋwɛ́nɛ́ lũ w púlə́púlə́ wẽ́ mó myɛ nʼê nwɛ̀nɛ̀ ǹdə á ta.
10 Á nɔ̀nɔ̀ w tʼâ la yé né yú yé.
Yi wɔ́ sónó cə́bal.
Rə̀ byẽ̀ ába mùnì á zù rə̀ zùwə̀ y wẽ́ Yezu Kristə jàn yilə.
Nɔ̀nɔ̀ w kwã nɛ́,
rə̀ cìcì bʼa ce á yə̀ rə̀myɛ́ lyì námpúm,
á zə jàn á zhì kẽkẽ,
ǹdə́ wu-jɔ̀.
11 Wɔ́ rə̀myɛ́ rə̀ wɔ́ jàn cə́bal byinə nə̀ bə zhɔ̌ zhe yilə!
Amɛ̀n!
Pyɛɛrɛ nə́ ń ce lyì bí ń mə́ ń gwi ń sɛ́bɛ́ rɛ́ yó
12 Wɔ́ àmyɛ́ à ce nə́ da-byǐ nántwə̂ Shəlvɛ̃ nə́ ń kɛ̃ sɛ́bɛ́ rɛ́ tɛ̀bɛ́ à la ába pɔ a bʼa cící ába.
Sə à nʼâ yâl sʼá lwar bə̀ pɛnɛ́ y kɛ̀bɛ́ á nɔ mɔ́ wɔ́ Yi pɛnɛ́ zhə̀n zhə̀nà,
sʼá jʼá zə y kẽkẽ.
13 Kristə-lyì bí Yi cír ǹdə ámyɛ ta bə̀ ŋwɛ́nɛ́ Babyəlɔnɛ nɛ́ mɔ́ nʼê ce ába.*
Markɛ myɛ nə́ ń ce ába.
14 Kwə̀ə̀lènə̀ dwã,
á ce dwã ǹdə́ sónó ǹdə da-byâ ta.
Yə̀-zùlə́ bʼa yə̀ nɛ́ ǹdʼámyɛ̌ byɛ̀bɛ́ gakó á wɔ́ Kristə-lyì bí mú!