Zhakɛ
sɛ́bɛ́ rɛ́ ń kɛ̃ mɔ́
Zhakɛ nə́ ń ce Yi dwí rí púlə́púlə́
1
Àmyɛ́ Zhakɛ,
à wɔ́ Yi ǹdə́ Cinu Yezu Kristə tùntùnnə̀,
à nʼâ kɛ̃ sɛ́bɛ́ rɛ́ tɛ̀bɛ́ à mʼâ ce ámyɛ̌ Yi dwí rí kwálsɛ́ shí ǹdə́ sə̀lyè y lyì bí á làà lũ w gakó wẽ́ mó.
Pyɛ́nɛ́na á cìn yò-còlò yi ní
2 Da-byâ,
yò-cə̀ə̀lè dwí gakó gə pú ába,
sʼá nyǐ á cìn ǹdə lyì byɛ̀bɛ́ bə̀ zhe wu-nyɔ̃̀ námpúm ta.
3 Á yě bə̀ zwini gə nʼê zhẽ̀ á Yi-ni-zhú mú,
rə̀myɛ́ nʼê ce á wun tʼâ gɛ yé.
4 Cenə á cìn-pyɔ́nɔ́ mɔ́ pyìrh tùm-ècɛ̀nà wẽ́,
mùnì ga á cɛ̀nɛ̀ rɛ́ yə̀ námpúm,
yò bə̀kʼa zhì á yó w yé,
sə kaka bə̀kʼa mwìrì ába yé.
Lwə̂lnə Yi ǹdʼá wun gakó, sʼá bə̀kʼá ce tə́tɔ̀ná yé
5 Lármɔ gə mwìrì ámyɛ̌ mə̀dù,
sə n lwə̀l Yi ni,
bə̀ rə̀ bʼa pɔ̃.
Yi tʼâ nyǐ rə̀ mʼe pə yé,
rə̀ tʼâ cír yé.
6 Sə n lwə̀l ǹdə́ Yi-ni-zhú,
ń bə̀ká n ce tə́tɔ̀ná yé.
Lò mɔ̀bɔ́ ń nə́ ń ce tə́tɔ̀ná,
ń nyɛ̌ ǹdə nə̀-fɔ̀lɔ̀ nɛ̃̌ ta,
zho w gə nʼô ce,
mə̀ nʼê shìì mə jʼà nʼê zɛ̃̀.
7 Lò mó ńmyɛ̌ mɔ́ bə̀ká n bù bə̀ ń mà n nə kɔn Cinu sõ yé,
8 bə̀ ń wu də̀ òdù,
n jà ń tá ń zhì nà èdù yó yé.
Kɔn gə́ la nɛ́ tó nə̀cɛ̀nà bɛ́ yilə
9 Da-byǐ mɔ̀bɔ́ ń wɔ́ nə̀mɔ̀,
ń mə̂ sə n ce ń wu yə̀ nyɛ̀n,
Yi gə́ zhẽ̌ ń yó dɛ̃̌ mɔ́ yilə.
10 Sə mɔ̀bɔ́ ń wɔ́ nə̀cɛ̀m-bal,
ńmyɛ mə̂ sə n ce ń wu yə̀ nyɛ̀n,
Yi gə́ lwəl ń yó tɛ̃´ mɔ́ yilə,
bə̀ ń nyɛ̌ ǹdə gɔ pùní ta.
Ń tá ń la nɛ́ mãɔ̃ yé.
11 Nə̀nyɔ́nɔ́ w gə byìlə̀,
ò lumi rí nʼê mà rɛ̀ rə tu tɛ̃´,
rə̀ cɛ̀nɛ̀ rɛ́ jé.
Èta myɛ,
nə̀cɛ̀m-bal mɔ́ mà n pyɛ̀nɛ̀ ǹdə gɔ pùní ta ń tumə né wẽ́.
Yi tʼâ cìrh lò rə̀ ce né ǹ wɛ̀rhɛ́ lwɛlɛ yé
12 Lò mɔ̀bɔ́ ǹ zhì kẽkẽ yò-còlò yi ní,
ǹ bʼâ yə̀ wu-nyɔ̃̀ cí,
bə̀ yò-còlò w gə́ zɔ mɔ́ ń jʼâ ŋwɛ̀nɛ́ ń zhì kẽkẽ mó ce,
ǹ bʼâ nə nyǔ mə̀ tʼâ la zhɔ̌.
Nyǔ mú mə̀myɛ́ wɔ́ kwândɛ́ tɛ̀bɛ́ Yi bwəl rə̀ nyí byɛ̀bɛ́ bə̀ só re mó ne mó.
13 Sòlò gə tú ò zhe lò lwɛlɛ wɔ̀rhɔ́ yilə,
sə ń bə̀ká n bù bə̀ wɔ́ Yi rə̀ nʼê cìrh mò rə̀ ce lwɛlɛ rɛ́ wẽ́ yé.
Kaka wàr Yi rə̀ la sòlò rə wɛ̀rhɛ́ lwɛlɛ yé,
Yi myɛ tʼâ cìrh lò lò rə̀ ce lwɛlɛ wẽ́ yé.
14 Lò gakó wɔ́ ǹ shil námməlwɛ̀lɛ́ y è ŋwɛ́nɛ́ ǹ wẽ́ mó è nʼê swèlè mó è ce ǹ wɛ̀rhɛ́ lwɛlɛ.
15 Ǹ gə yẽ̌ shil námməlwɛ̀lɛ́ y nɛ ǹ wẽ́,
è nʼê ce ǹ wɛ̀rhɛ́ yə̀-bəlɔ̀lɔ́;
sə ǹ gə cə̀ə̀lè ǹ nə́ ǹ wɛ̀rhɛ́ wa,
wɔ́ ǹ cu sɔ́má yó ò zə mɔ́ ò ŋwɛ́nɛ́.
16 À da-byâ nántwə̂rh,
á bə̀kʼá jə́jɛ̀rɛ́ á cìn yé.
17 Kɔ̀-ècɛ̀nɛ́ dwí gakó,
wɔ́ dɛ̃̌ yi w rə̀ nʼê shí ní.
Rə̀ nʼê shí dɛ̃̌,
Yi rí rə̀ wɛ̀rhɛ́ nə̀nyɔ́nɔ́ w ǹdə́ cànà y ǹdə́ cã̀mə́sɔ̌sɛ́ mɔ́ sõ.
Cə-byṹ tɛ̀nɛ́ Yi sõ yé;
rə̀ wɔ́ rə̀myɛ́ twéé twéé,
rə̀ tʼâ lyə́r námpɔ́lɛ́ myɛ cìcì yé.
Rə̀ sõ mó è bə zhe bə̀ cəcɛ̃ ráá nə̀nyɔ́nɔ́ yé.
18 Rə̀ tó rə̀ zɔ̀mɛ̀ rɛ́ rə̀ wɔ́ zhə̀n mɔ́ dɛnnɛ rə pə nə́ba nyǔ ǹdə́ rə̀ sə̀pwà pùbùlə̀,
mùnì ga nə́ yə̀ nã́yə́ə́ wẽ̀ dé tɛ̀bɛ́ gakó rə̀ wɛ̀rhɛ́ mɔ́ wẽ́.
Yálna Yi zɔ̀mɛ̀ rɛ́ zwennə, sʼá bə̀kʼá yə̀ rə̀ cilnə dúdú yé
19 À da-byâ nántwə̂rh,
lwarna bə̀ lò gakó mə̂ dwã sə́ cili zɔ̀mɛ̀ rɛ́ cɛ̀nɛ̀,
sə ǹ bə̀ká zɔ̀m làlà yé,
sə ǹ lyim myɛ bə̀kʼa zɛ̃̀ làlà yé.
20 Lwarna bə̀ lò mɔ̀bɔ́ ń zhe lyim tá ń wɛ̀rhɛ́ kɔn dɛ̀bɛ́ rə̀ wɔ́ cángá Yi yírh w yé.
21 Rə̀myɛ́ ce,
zhɛ̃´na kɔn dɛ̀bɛ́ gakó rə̀ wɔ́ jìmdì,
ǹdə́ tùntùm-bəlwâlsɛ dwí gakó.
Zwẽnə zɔ̀mɛ̀ rɛ́ Yi co á wun ní wẽ́ mó ǹdə́ wu-bɔ̀nɔ̀,
bə̀ rə̀ wɔ̌ ába rə̀ la vwârh.
22 Yálna zɔ̀mɛ̀ rɛ́ zwennə,
sʼá bə̀kʼá yə̀ rə̀ cilnə dúdú yé.
È gə də̀ rə̀myɛ́,
wɔ́ ámyɛ̌ cìcì á nʼá jə́jɛ̀rɛ́ á cìnə̀.
23 Lò mɔ̀bɔ́ ǹ nə́ ǹ cili Yi zɔ̀mɛ̀ rɛ́ ń zɛ̃̀ ǹ tá ǹ wɛ̀rhɛ́ ǹdə rə̀ gə́ nʼê byili ní,
ǹ nyɛ̌ ǹdə lò mɔ̀bɔ́ ń nə́ ń nyǐ ń yé zhə̀zhé wẽ́ ta,
ń nə ń cìn ǹdə ń gə́ wɔ́ nɛ́.
24 Ń gə nyǐ ń cìn ń zhɛ̀,
n zhǐr ń la,
n pú n swě ń gə́ wɔ́ nɛ́.
25 Yi nyí rí wɔ́ kɔ̀-ècɛ̀nɛ́,
rə̀ nʼê pɛ cìn-cìnú numbyíní ni è wu w wẽ́.
Rə̀myɛ́ ce,
lò mɔ̀bɔ́ ǹ nə́ ǹ cili nyí rí rə̀myɛ́,
ń tɛ́rɛ́ rɛ ǹ wẽ́,
ń zɛ̃̀ ǹ zhǐ ǹ nà y yó rə̀ wẽ́,
ǹ nə́ ǹ wɛ̀rhɛ́ ǹdə rə̀ gə́ nʼê byili ní,
ǹ tá ǹ swě re,
ǹ bʼâ nə wu-nyɔ̃̀ kɔn dɛ̀bɛ́ ǹ nə́ ǹ wɛ̀rhɛ́ mɔ́ wẽ́.