Kristə-lyì gùúlí yé né cìnə́ bé
3
Nyǐnə zɔ̀mɛ̀ rɛ́ tɛ̀bɛ́ à la byilu mú wɔ́ zhə̀n cìcì:
lò mɔ̀bɔ́ ń nə́ ń yâl n yə̀ Kristə-lyì gùlú yé né cə́bal,
wɔ́ tum tɛ̀bɛ́ rə̀ càn ń nə́ ń yâl n twĩ̀.
2 Kristə-lyì gùlú yé né cə́bal bə mə̂ sə n yə̀ lò mɔ̀bɔ́ ń zhe yò bə̀ nʼê byili yé.
Ń mə̂ sə n yə̀ kɛ̃ mə̀dù byal,
ń bə̀ká n nyǐ ń dõ yó w yé,
sə n yə̀ lò mɔ̀bɔ́ ń zhe ń cìn cɛ̀nɛ̀,
ń tumə né myɛ jʼà nʼê swí yírh,
sə n yə̀ lò mɔ̀bɔ́ ń nə́ ń zwẽ zhələ cɛ̀nɛ̀.
Ń mə̂ sə n yə̀ lò mɔ̀bɔ́ ń wɔ̌ Yi zɔ̀mɛ̀ rɛ́ ń nə́ ń byili.
3 Ń bə mə̂ sə n yə̀ sə̀-nyɔ̀rɔ́ yé;
ń bə mə̂ sə n yə̀ búlə́ cə́bal yé;
ń mə̂ sə n yə̀ wu-bɔ̀nɔ̀ ǹdə́ sónó cə́bal.
Ń bə mə̂ sə n yə̀ wɛ́rɛ́ yóm yé.
4 Ń mə̂ sə n nyǐ ń kɛ̀lɛ́ yò cɛ̀nɛ̀,
sə ń byâ bɛ́ yə̀ lyì byɛ̀bɛ́ bə̀ nʼê nyàm lò.
5 Lò gə wàr ǹ kɛ̀lɛ́ yò ǹ nə́ ǹ nyǐ cɛ̀nɛ̀,
etər ǹ bʼâ tó né ń nyǐ Yi gùlú w yò cɛ̀nɛ̀?
6 Ń bə mə̂ sə n yə̀ lò mɔ̀bɔ́ ń zù Kristə dùlìdùlì yé,
mùnì ga cìn-dɛ̃̌-zhõ̌ bə̀kʼa ce n jǐrh ǹdə lyìlyǒ ta Yi nyə̀ná nɛ́ wẽ́,
n tó rə̀myɛ́ dɛnnɛ n nə còrhò-tum ǹdə Shətana ta yé.
7 Sə kɔn wɔ́ nyɔ́ɔ́ bə̀ lyì bí byɛ̀bɛ́ bə̀ də̀ Kristə-lyì mú tó ń tùntwə̃̀ə̃̀ né dɛnnɛ bə nyɛ̀ mɔ̀.
Rə̀myɛ́ mʼa ce lò gakó zɔ̀m ń yil náàcɛ̀nɛ́,
mùnì ń bə̀ká n tu Shətana sòlò wẽ́ yé.
Kristə-lyì gùúlí tùntùnnə̀ bé
8 Kristə-lyì gùúlí tùntùnnə̀ bé myɛ mə̂ sə lyì bí nyɛ̀ bɛ̀ bə̀ tùntwə̃̀ə̃̀ né yilə,
sə bə jʼa yə̀ zhə̀n-cìnə́.
Bə̀ bə mə̂ sə bə nyɔ̀ sɛ̃´ kɔn lyɛ̃ cɛ nɛ yé,
sə bə̀ bə̀kʼa pyà wársɛ ǹdə́ yǔyǔ tumə yé.
9 Bə̀ mə̂ sə bə zə kɔn dɛ̀bɛ́ Yi byili nə́ Yi-ni-zhú mú shò-kwã nɛ́ mɔ́ kẽkẽ ǹdə́ wu-põ zhə̀n zhə̀nà.
10 Bə̀ mə̂ sə bə jɛ̀rɛ̀ bə nyǐ bə̀ tùntwĩ̀ĩ̀ rí yò náàcɛ̀nɛ́.
Bə̀ gə pwírí bə̀ bə yò zhe lò la byilu,
e fòró bə zɛ̃̀ bə pə bɛ sɔ́má bə twĩ̀ bə̀ tum dí.
11 Kana bɛ́ byɛ̀bɛ́ bə̀ wɔ́ Kristə-lyì gùúlí tùntùnnə̀ mó myɛ mə̂ sə lyì bí tó bə̀ tùntwə̃̀ə̃̀ né dɛnnɛ bə nyɛ̀ bɛ̀.
Bə̀ bə mə̂ sə bə zɔ̀m bə̀ dwã bɛ́ yil námməlwɛ̀lɛ́ yé.
Bə̀ mə̂ sə bə zə bə̀ cìn náàcɛ̀nɛ́ kɔn gakó wẽ́.
12 Kristə-lyì gùlú tùntùnnə̀ mə̂ myɛ sə n yə̀ kɛ̃ mə̀dù byal,
ń bə̀ká n nyǐ ń dõ yó w yé.
Ń mə̂ sə n nyǐ ń kɛ̀lɛ́ y ǹdə́ ń byâ bɛ́ yò náàcɛ̀nɛ́.
13 Kristə-lyì gùlú tùntùnnə̀ bé gə nʼê twĩ̀ bə̀ tum dí náàcɛ̀nɛ́,
lyì bí gakó mʼa cèrhé be.
Bə̀ gə́ zhí Yezu Kristə ne mó ce,
bə̀ mʼa ŋwɛ̀nɛ́ bə byili Yi zɔ̀mɛ̀ rɛ́ ǹdə́ wu-jɔ̀.
Kɔn dɛ́ dɛ̀bɛ́ nə́ Yi-ni-zhú mú ce nə́ lwar mɔ́ já dɛ̃´dɛ̃´
14 À nʼâ yâl a bə̀ a nə mɔ́ dwã nɛ́ nyɛ̀bɛ́ nyí ni,
sə ǹdə́ rə̀myɛ́ ga,
à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ.
15 Sə à gə yə̀ twí làlà,
ǹ gə kàrmə̀ sɛ́bɛ́ rɛ́ rə̀myɛ́,
ǹ bʼâ lwar ǹ gə́ mʼâ zə ǹ cìn ní ǹdə́ gùlú w ò wɔ́ Yi nã́nyì kwálá y mɔ́.
Wɔ́ gùlú w òmyɛ́ ò zhe Yi zhə̀n dɛ́ ò nʼô byili.
16 Zhə̀nà,
kɔn dɛ́ dɛ̀bɛ́ nə́ Yi-ni-zhú mú ce nə́ lwar mɔ́ já dɛ̃´dɛ̃´:
Kristə jǐrh numbyíní n ce bə lwar ń párá.
Eshirhə náàcɛ̀nɛ́ byili pamparɛ̃ɛ̃ bə̀ ń bə dóó zhe yé.
Màlɛ́kabá myɛ cìcì nɔ mɔ.
Bə̀ bwə̀l ń yò w bə byili lũ w lyì bí gakó ne.
Lyì bí zwẽ nyí bə zù mù cɛ yó,
sə ń nɔ zùwə́ dɛ̃̌ Arəzana wa.