Pwəə sábá nə̀lyè nyân dɛ́ ń kɛ̃ n pə
Kɔrɛ̃tɛ
Kristə-lyì bí ni mú
Pwəə nə́ ń ce Kɔrɛ̃tɛ Kristə-lyì bí
1
Àmyɛ́ Pwəə à wɔ́ Yezu Kristə tùntúm ǹdə Yi gə́ nʼê yâl nɛ́.
Wɔ́ àmyɛ́ ǹdə́ nə́ da-byǐ Timote nə́ rʼé kɛ̃ sɛ́bɛ́ rɛ́ tɛ̀bɛ́ nə́ la Yi gùlú w lyì bí bə̀ ŋwɛ́nɛ́ Kɔrɛ̃tɛ nɛ́ mɔ́ nɛ pɔ.
È də̀ ámyɛ̌ dúdú yé.
Wɔ́ ǹdə́ Yi lyì bí byɛ̀bɛ́ gakó bə̀ ŋwɛ́nɛ́ Akəyi tənà y púlə́púlə́ wẽ́ mó.
2 Nə́ Da Yi ǹdə́ Cinu Yezu Kristə bʼa cĩ́ bwəl á yó,
sə bə pə ába yə̀-zùlə́!
Pwəə nə́ ń ce Yi nə̀báná
3 Bànà nə́ cèrhé nə́ Cinu Yezu Kristə Da Yi rí!
Ń wɔ́ nə́ Da ǹdə́ nə́ Yi.
Ń zhe wu-bɔ̀nɔ̀ dɛ̃´dɛ̃´.
Ń nə́ ń pɛ nə́ba wu-jɔ̀ twéé twéé.
4 Ń nə́ ń zal nə́ wun ni zwini dwí gakó wẽ́,
mùnì ga nə́myɛ ŋwɛ̀nɛ́ nə́ zə lyì byɛ̀bɛ́ bə̀ ŋwɛ́nɛ́ zwini dwí gakó wẽ́ mó wun ni ǹdə́ wu-jɔ̀ w kɔ̀bɔ́ Yi nʼê pɛ nə́ba mɔ́.
5 Nə́ rʼé nɛ wu-jɔ̀ dɛ̃´dɛ̃´ Kristə jàn yilə,
ǹdə nə́ gə́ nʼé tó mo nə́ nwɛ̀nɛ̀ dɛ̃´dɛ̃´ nɛ́.
6 Sə nə́ gə́ nʼé nwɛ̀nɛ̀ èta mɔ́,
wɔ́ á wun ni zal ǹdʼá vwârh yilə.
Nə́ gə́ nɔ wu-jɔ̀ mɔ́,
wɔ́ mùnì ga nə́ zə ámyɛ wun ni,
á ŋwɛ̀nɛ́ á pyɛ́nɛ́ á zhì kẽkẽ á nɔ̀nɔ̀ w wẽ́ ǹdə nə́myɛ ta.
7 Nə́ yě náàcɛ̀nɛ́ bʼâ gə́ nʼá tó á nwɛ̀nɛ̀ mɔ́ ce,
á bʼâ tó á nə wu-jɔ̀ w myɛ.
8 Da-byâ,
nə́ rʼé yâl bʼâ lwar bə̀ nə́ nwɛ̀nɛ̀ dɛ̃´dɛ̃´ Azhi tənà y wa.
Nɔ̀nɔ̀ w kɔ̀bɔ́ nə́ nɔ gàà mɔ́ yʼà du nə́ jàn.
Nə́ yʼà nʼê bùl bə̀ nə́ mʼâ cì.
9 Nə́ yʼâ nʼé bùl bə̀ bə̀ kɔ́ nə́ bùrsì bə̀ la nə́ba gu.
Rə̀myɛ́ ce,
nə́ yʼâ kʼé bə nə́ cìcì zhə̀n zhe yé.
Wɔ́ Yi zhə̀n nə́ yʼâ zhe,
bə̀ rə̀myɛ́ nʼê bwìrhì cùùrì.
10 Wɔ́ rə̀myɛ́ rə̀ zwẽ nə́ba cu jɔ̃̀ w rə̀myɛ́ yi ní,
sə rə̀ gwẽ̌ bʼa zwẽ nə́ba.
Zhə̀nà,
nə́ yě náàcɛ̀nɛ́ bə̀ rə̀ gwẽ̌ bʼa zwẽ nə́ba.
11 Ámyɛ nʼá sɛ̃ nə́ba ǹdə́ Yi lwə̂l.
Èta,
lyì nánzhəzhɔ̌ Yi-co jàn yilə,
Yi bʼa wɛ̀rhɛ́ nə́ba cɛ̀nɛ̀,
sə nunə nánzhəzhɔ̌ mʼa tó rə̀myɛ́ dɛnnɛ bə ce Yi nə̀bán nə́ yilə.
Pwəə nə́ ń byili kɔn dɛ́ dɛ̀bɛ́ rə̀ ce n lyə́r ń sɔ́má y zhəl mó mó
12 Kɔn dɛ̀bɛ́ rə̀ nʼê pɛ nə́ba wu-nyɔ̃̀ mɔ́,
wɔ́ nə́ gə́ pwèlè nə́ wun nə́ zə nə́ cìn lũ w wẽ́ ǹdə́ cɛ̀nɛ̀ ǹdə́ zhə̀n dɛ́ tɛ̀bɛ́ rə̀ nʼê shí Yi sono mó.
Sə kɔn du,
wɔ́ nə́ gə́ nʼé wɛ̀rhɛ́ èta ǹdʼámyɛ mɔ́.
Rə̀myɛ́ wɔ́ Yi pɛnɛ́,
sə è də̀ numbyíní surhə tum yé.
13-14 Nə́ yə̀ kɔn dõ nə́ sábá wẽ́ kɛ̃ nə́ pə ába yé.
Wɔ́ tɛ̀bɛ́ á nʼá kàrmə̀ á nyɛ̌ rə̀ kùr mó dúdú,
sə à nʼâ bùl bʼâ mʼâ jʼá sú rə̀ gakó kùr náàcɛ̀nɛ́.
Èlâsɛ̃´,
á nyɛ̌ rə̀ kùr námpɔ́lɛ́,
sə dɛ̃ rɛ́ tɛ̀bɛ́ Cinu Yezu ká ń bàn mɔ́ yùwə̀,
á wun bʼa yə̀ nyɛ̀n ǹdə́ nə́ba,
sə nə́myɛ wun bʼa yə̀ nyɛ̀n ǹdʼámyɛ.
15-16 Wɔ́ à gə́ yʼà yě rə̀myɛ́ pamparɛ̃ɛ̃ mɔ́ è ce à yʼà nʼâ yâl a jɛ̀rɛ̀ a tó á sono,
sʼa zhì á sono a lyɛ̃ a vò Masɛdwanɛ;
à gə shí gàà mɔ́,
sʼa kʼa tó á sono,
mùnì ga á wun kwɛrhɛ nə zə nyɛ̀n nə súlí,
sə á sɛ̃ nɛ a lyɛ̃ a yí Zhide.
17 À gə́ byili bʼà la rə̀myɛ́ wɔ̀rhɔ́ mɔ́,
à yə̀ tɛ́rɛ́ a mʼa byili ri nà?
Nà a gə gu à wẽ́ à la kɔn wɔ̀rhɔ́,
a gə zɛ̃̀ a wɔ̀ bə̀ “ɔ̃̀ɔ̃̂”,
a kʼa wɔ̀ bə̀ “ɔ̃́ʼɔ̃”,
wɔ́ numbyíní pùbùlə̀ tum nà?
18 Yi wɔ́ à zhə̀n-cí.
Rə̀ cìcì yě bə̀ kɔn dɛ̀bɛ́ à byili mú də̀ wò à wò bə̀ “ɔ̃̀ɔ̃̂” a jʼa kʼa wɔ̀ bə̀ “ɔ̃́ʼɔ̃” myɛ yé.
19 Àmyɛ́ ǹdə́ Shəlaasɛ ǹdə́ Timote gə́ bwə̀l Yi Byǐ Yezu Kristə yò w nə́ byili ába mó,
rə̀ yə̀ “ɔ̃̀ɔ̃̂” yàl rə kʼa yə́yɛ́lɛ́ rə yə̀ “ɔ̃́ʼɔ̃” yé.
Ń zɔ̀mà nɛ́ yàl “ɔ̃̀ɔ̃̂” twéé twéé yilə.
20 Zhə̀nà,
Yezu zɔ̀mà nɛ́ wɔ́ “ɔ̃̀ɔ̃̂” Yi nyə́ né rə̀ bwəl mó gakó yilə.
Wɔ́ ńmyɛ̌ dɛnnɛ nə́ rʼé tó né nə́ cèrhé Yi nə́ wɔ̀ bə̀:
“Amɛ̀n”.
21 Wɔ́ Yi cìcì rə̀ nʼê súlí nə́myɛ̌ ǹdʼámyɛ̌ ga jàn Kristə jàn yilə.
Wɔ́ rə̀myɛ́ rə̀ cír nə́ba rə cĩ́ nə́ dúdú rə̀ cìcì yilə.
22 Rə cĩ́ rə̀ myɔrhɔ nə́ yó,
rə jɛ̀rɛ̀ rə ce rə̀ Eshirhə y nə́ wun ní wẽ́,
rə mʼe byili bə̀ rə̀ bʼa pə nə́ba kɔn dɛ̀bɛ́ gakó rə̀ bwəl nə́ba rə̀ nyí mú.