Kristə bùrhù mú
15
Da-byâ,
à kʼâ nʼâ lyǐrh ába yò-ècɔ̀nɔ̀ nyí rí à bwə̀l a byili ába mó yò.
Á zwẽ de á zhǐ kẽkẽ.
2 Á gə zɔ rɛ ǹdə à gə́ bwə̀l lè a byili ába né,
wɔ́ rə̀myɛ́ rə̀ bʼa vwârh ába.
È gə də̀ rə̀myɛ́,
sə́ nyǐ á Yi-ni-zhú mú wɔ́ nánfò.
3 À byili ába kɔn dɛ́ dɛ̀bɛ́ bə̀ byili àmyɛ nɛ mɔ́,
sə wɔ́ rə̀myɛ́ rə̀ zhe kùr du,
bə̀ Kristə cù nə́ yə̀-bəlwàálɛ́ yilə,
ǹdə bə̀ gə́ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ né.
4 Bə̀ co mo,
n ká n bwìrhì ń dwã nə̀tɔ̀ yùwə̀,
ǹdə bə̀ gə́ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ né.
5 Ń byili ń cìn Pyɛɛrɛ nɛ,
n zɛ̃̀ n byili ń cìn ń tùntúmə́ bé shí ǹdə́ bə̀lyè y ne.
6 Rə̀myɛ́ kwã nɛ́,
n byili ń cìn ń kwã-lyì bí jàlà nɛ̀ ǹdə́ bə̀ zhǐ dwã yó.
Bə̀ yʼà du lyì zwã̌-ànu.
Bə̀ jàlà cùwə̀,
sə bə̀ nánzhəzhɔ̌ gwẽ̌ ŋwɛ́nɛ́.
7 Sə rə̀myɛ́ kwã nɛ́,
ń byili ń cìn Zhakɛ nɛ,
n zɛ̃̀ n byili ń cìn ń tùntúmə́ bé gakó ne.
8 Rə̀myɛ́ gakó kwã nɛ́,
n zɛ̃̀ n byili ń cìn àmyɛ́ mɔ̀bɔ́ à nyɛ̌ ǹdə byì-shɛ̀mɛ́ kɛ̀bɛ́ bə̀ lùl ǹdə́ è cànsɛ́ gwẽ̌ yə̀ yí ta mɔ́ nɛ,
9 bʼà wɔ́ námpɔ́lɛ́ ń tùntúmə́ bé gakó wẽ́.
À nwɛ̀nɛ̀ Yi lyì bí gùlú wə́.
Rə̀myɛ́ ce,
kɔn bə mə̂ sə bə byẽ̀ nè bə̀ Kristə tùntúm yé.
10 Wɔ́ Yi gə́ wɔ́ sónó cə́bal mɔ́ è ce,
à wɔ́ à gə́ wɔ́ nɛ́,
sə rə̀ sónó w ò ŋwɛ́nɛ́ ǹdə́ nɛ mɔ́ yə̀ nánfò yàl yé.
Àmyɛ́ gaga mɔ́ twĩ̀ du Kristə tùntúmə́ bé gakó.
Sə è gə wɔ́ zhə̀n wál yilə,
è də̀ àmyɛ́ sə̀pwà jàn à mʼa twĩ̀ yé.
Wɔ́ Yi sónó w rə̀ zɔ ǹdə́ nɛ mɔ́.
11 È gə wɔ́ àmyɛ́ ráá bə̀myɛ́,
nə́myɛ̌ ga wɔ́ yò-ècɔ̀nɔ̀ nyí rí rə̀myɛ́ rə̀dù y nə́ rʼé bwə̀l nə́ byili.
Wɔ́ rə̀myɛ́ nyí ámyɛ zwẽ.
Cùùrí bùrhù mú
12 Da-byâ,
nə́ rʼé bwə̀l bə̀ Kristə bwìrhì n zɛ̃̀ n du cùùrì wẽ́.
Byè yil á lyì jàlà nʼê wə̀l bə̀ cùùrì tʼâ la bùrhù?
13 Cùùrí gə tʼâ la bùrhù,
rə̀myɛ́ sə́ nyǐ Kristə myɛ yə̀ bwìrhì yé.
14 E jà Kristə gə yə̀ bwìrhì,
sə́ nyǐ kɔn dɛ́ dɛ̀bɛ́ nə́ rʼé bwə̀l nə́ byili mú bə kùr zhe yé,
sə́ nyǐ kɔn dɛ́ dɛ̀bɛ́ ámyɛ zwẽ rə̀ nyí mú wɔ́ nánfò.
15 Kɔn súlí myɛ,
sə́ nyǐ nə́myɛ̌ gə́ wò bə̀ Yi bwìrhì Kristə mó,
wɔ́ kɔma nə́ rʼé gòm nə́ ce Yi nyí ni.
Cùùrí gə tʼâ la bùrhù,
sə́ nyǐ Yi yə̀ Kristə myɛ bwìrhì yé.
16 Cùùrí gə tʼâ la bùrhù,
rə̀myɛ́ sə́ nyǐ Kristə myɛ yə̀ bwìrhì yé.
17 E jà Kristə gə yə̀ bwìrhì,
sə́ nyǐ á Yi-ni-zhú mú myɛ bə kùr zhe yé,
bʼâ gwẽ̌ ŋwɛ́nɛ́ á yə̀-bəlwàálɛ́ wẽ́.
18 Kɔn gə wɔ́ èta,
sə́ nyǐ byɛ̀bɛ́ bə̀ zù Kristə bə zɛ̃̀ bə cì mú jé.
19 È gə wɔ́ lũ w kɔ̀bɔ́ nə́ ŋwɛ́nɛ́ ò wẽ́ èlâsɛ̃´ mɔ́ dúdú yil nə́ zù Kristə nə́ rʼé dɛ̃̀ kɔn ń sõ,
sə́ nyǐ nə́ zhe zwini du lyì bí gakó.
20 Lwarna bʼè də̀ èta yé.
Kristə bwìrhì zhə̀n ga,
n zɛ̃̀ n du cùùrì wẽ́,
n mə n byili bə̀ byɛ̀bɛ́ bə̀ cù mú myɛ bʼa bwìrhì.
21 Cu mú wɔ́ lò mə̀dù dɛnnɛ mə̀ tó né mə bà.
Sə wɔ́ lò mə̀dù jàn yil myɛ cùùrí gakó bʼa tó né rə bwìrhì.
22 Wɔ́ Adəma dɛnnɛ cu mú tó né mə bà,
lyì bí gakó nʼê cì.
Sə wɔ́ Kristə jàn yil bə̀ gakó bʼa kʼa nə myə̂l.
23 Wɔ́ Kristə ń tó yé n bwìrhì.
Rə̀myɛ́ kwã nɛ́,
ń gə ká ń túwə́,
wɔ́ byɛ̀bɛ́ bə̀ zù mù mú bə̀ mʼa bwìrhì.
Wɔ́ èta kɔn gakó la nɛ́ tó.
24 Kristə gə tú ń cɔ̀ jàn cìnə́ byɛ̀bɛ́ bə̀ ŋwɛ́nɛ́ dɛ̃̌,
ǹdə́ ŋwɔ̀nɔ́ cìnə́ bé dwí gakó jàn dɛ́ yi ní,
ń mà n pə ń pyɛ̀lɛ̀ rɛ́ ń Da Yi ni.
Rə̀myɛ́ kwã nɛ́,
kɔn gakó bʼa zhɛ̀.
25 Sə kɔn wɔ́ nyɔ́ɔ́ bə̀ Kristə jí pyɛ̀lɛ̀ rɛ́,
kɔn bʼe yí dɛ̃ rɛ́ tɛ̀bɛ́ Yi la ce n nɔ̀ rə̀ zwə̀ bé gakó ń nə̀rh kùr w mó.
26 Sə zù-bal mɔ́ nánkwaá mɔ́ ń la zhìlù mú,
wɔ́ cu.
27 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Yi co kɔn gakó ń nə̀rh kùr wə̀.”
Sə nə́ yě pamparɛ̃ɛ̃ bə̀,
bə̀ gə́ wò bə̀ kɔn gakó ŋwɛ́nɛ́ ń nə̀rh kùr w mó,
wɔ́ zhə̀nà,
sə Yi twə́r tɛ̀nɛ́ wẽ̀ dé tɛ̀bɛ́ gakó rə̀ la Kristə nə̀rh kùr w yál mɔ́ wẽ́ yé,
bə̀ wɔ́ Yi rə̀ pɔ mɔ ŋwɔ̀nɔ́ kɔn gakó yó.
28 Byǐ mú gə tú ń nə́ ń jí pyɛ̀lɛ̀ kɔn gakó yó,
Da mɔ́ mɔ̀bɔ́ ń pɔ mɔ ŋwɔ̀nɔ́ kɔn gakó yó mó mà n jí pyɛ̀lɛ̀ ńmyɛ yó wə.
Èta,
Yi bʼa jí pyɛ̀lɛ̀ námpúm kɔn gakó yó.
29 Lyì jàlà ŋwɛ́nɛ́ bə̀ nʼê ce bə pə bɛ nɛ̃̌-shɔ cùùrì yilə.
Sə cùùrì gə yʼà tʼâ la bùrhù,
wɔ́ bə̀kɔ́n nyɔ̀ɔ̀rhɛ́ bə̀ nɛ̃̌-shɔ mɔ́ èta mɔ́ la bɛ pɔ?
30 Sə nə́myɛ̌ cìcì mú,
wɔ́ bə̀kɔ́n yil nə́ jʼá tʼá gá nə́ myə̂l lé ne twéé gakó?
31 Da-byâ,
zhə̀nà,
dɛ̃ gakó à tʼâ gá à myə̂l lé ne yé.
À wu nyɛ̀ ǹdʼába nə́ Cinu Yezu Kristə jàn yilə.
Wɔ́ rə̀myɛ́ è ce à nʼâ byili ába rə̀myɛ́.
32 À bú dwã ǹdə́ lyì Efɛɛzɛ nɛ,
bə̀ tùntwə̃̀ə̃̀ né nyɛ̌ ǹdə gɔ vwàmá tùntwə̃̀ə̃̀ ta.
È gə wɔ́ lũ w nyə̀ná nɛ́ dúdú yil à bú búlə́ né nə̀myɛ́,
wɔ́ bə̀kɔ́n nyɔ̀ɔ̀rhɛ́ à la nɔ?
Cùùrì gə tʼâ la bùrhù,
sə nə́ wɛ̀rhɛ́ ǹdə səswalá èdù gə́ byili ní.
È wòwə̀:
“Nə́ jí sə nə́ nyɔ̀,
bə̀ nəkɔl nə́ la cú.”
33 Dɛ̃̌na á cìnə̀,
bə̀ wɔ́ dɔwa námməlwɛ̀lɛ́ ń nə́ ń cɔ̀ yò.
34 Káná bə̀ á nà y yó,
sʼá yẽ̌ yə̀-bəlɔ̀lɔ́ wɔ̀rhɔ́ nɛ.
Lyì jàlà ŋwɛ́nɛ́ á wẽ́ bə̀ yə̀l Yi pár yé.
À nʼâ wə̀l èta à la mʼa ce ába cìzhìlə̀.
Wɔ́ etər cùùrí la bùrhù rə yə̀ nɛ́?
35 Dɛ̀ga,
mɔ̃̌ mà n zɛ̃̀ ń nə́ ń bwə̀rh ń cìnə̀:
“Etər cùùrí bʼa tó né rə bwìrhì?
Wɔ́ etər yala nɛ́ nyɛ̀bɛ́ nə̀ la kʼa bʼe bwìrhì mú mʼa yə̀ nɛ́?”
36 Lò mɔ̀bɔ́ ń nə́ ń bùl rə̀myɛ́ bə surhə zhe yé.
Ǹ gə kwè jíjí byǐ ǹ dùwə̀,
è wàr è mʼa lyĩ ǹdə́ è yə̀ bwár yé.
37 È gə wɔ́ yál-byǐ ráá jíjí dwí dõ byǐ ǹ la dú,
wɔ́ byǐ y ǹ nə́ ǹ dwì.
E zɛ̃̀ e lyĩ e byì e ce eshɔ̀.
Sə byǐ y tʼâ la já e lyĩ eshɔ̀ yé.
38 Wɔ́ Yi rə̀ nʼê ce yál-byǐ lyĩ e byì e jǐrh yál-eshɔ̀ ǹdə rə̀ gə́ nʼê yâl nɛ́.
Wɔ́ rə̀myɛ́ rə̀ nʼê ce jíjí gakó ce rə̀ shəshɔ̀.
39 Wẽ̀ dé gakó yala nɛ́ də̀ rə̀dù yé.
Numbyíní yala nɛ́ ǹdə́ vwâm mɔ́ yala nɛ́ də̀ rə̀dù yé.
Kúmí yala nɛ́ ǹdə́ émwâ myɛ yala nɛ́ də̀ rə̀dù yé.
40 Wẽ̀ ŋwɛ́nɛ́ dɛ̃̌,
rə̀ tɛ̀ ŋwɛ́nɛ́ cɛ yó,
sə tɛ̀bɛ́ rə̀ ŋwɛ́nɛ́ dɛ̃̌ mɔ́ ǹdə́ cɛ yó nyân dɛ́ cɛ̀nɛ̀ rɛ́ də̀ rə̀dù yé.
41 Yi rí cɛ̀nɛ̀ rɛ́ ǹdə́ cànà y cɛ̀nɛ̀ rɛ́ ǹdə́ cã̀mə́sɔ̌sɛ́ cɛ̀nɛ̀ rɛ́ də̀ rə̀dù yé.
Cã̀mə́sɔ̌sɛ́ myɛ gakó cɛ̀nɛ̀ rɛ́ də̀ rə̀dù yé.
Cã̀mə́sɔ̀wá gakó zhe è cɛ̀nɛ̀.
42 Kɔn bʼa yə̀ èta cùùrí myɛ gə tú rə̀ bwìrhì yi ní.
Numbyíní gə cù bə ce y tɛ̃´ cɛ y wẽ́,
ǹdə bə̀ gə́ yʼa dù jíjí ní,
è yala nɛ́ nʼê bwárá.
Sə è gə kʼa bwìrhì,
è kʼê wàr è la bwár yé.
43 Numbyíní yala nɛ́ bə̀ nʼê ce gɔ́rɔ́ wẽ́ mó bə kùr zhe yé.
Sə è gə kʼâ la bùrhù,
wɔ́ yala nyɛ̀bɛ́ nə̀ zhe kùr è la mʼe bwìrhì.
Nyɛ̀bɛ́ bə̀ nʼê ce gɔ́rɔ́ w wẽ́ mó bə jàn zhe yé.
Sə è gə kʼâ la bùrhù,
wɔ́ yala nyɛ̀bɛ́ nə̀ zhe jàn è la mʼe bwìrhì.
44 Numbyíní yala nɛ́ bə̀ nʼê ce gɔ́rɔ́ wẽ́ ǹdə jíjí byǐ ta mɔ́ wɔ́ lũ w nyə̀ná nɛ́.
Sə è gə kʼâ la bùrhù,
wɔ́ Eshirhə náàcɛ̀nɛ́ nyə̀ná nɛ́ è la mʼe bwìrhì.
Cɛ yó dúdú yala nɛ́ myɛ ŋwɛ́nɛ́.
Nyɛ̀bɛ́ nə̀ jǐrh Eshirhə náàcɛ̀nɛ́ nyə̀ná mɔ́ myɛ ŋwɛ́nɛ́.
45 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Adəma nã́yə́ə́ mó wɔ́ numbyíní.
Yi wɛ̀rhɛ́ mɔ rə pɔ̃ nyǔ.”
Sə Adəma nánkwaá mɔ́ wɔ́ Eshirhə,
è nʼê pɛ nyǔ.
46 È də̀ mɔ̀bɔ́ ń wɔ́ Eshirhə y mó ń jɛ̀rɛ̀ n bə̀ yé.
Wɔ́ mɔ̀bɔ́ ń wɔ́ numbyíní y mú ń jɛ̀rɛ̀ n bà.
47 Adəma nã́yə́ə́ mó wɔ́ cɛ y shó w wẽ́ ń shí ní,
sə bə̀lyè nyân mɔ́ wɔ́ Arəzana w ń shí ní.
48 Byɛ̀bɛ́ bə̀ wɔ́ lũ w lyì bí mú wɔ́ ǹdə mɔ̀bɔ́ bə̀ zə cɛ y shó w bə mɔ mɔ́ ta.
Byɛ̀bɛ́ bə̀ wɔ́ dɛ̃̌ Arəzana w lyì bí mú wɔ́ ǹdə mɔ̀bɔ́ ń shí dɛ̃̌ Arəzana w mɔ́ ta.
49 Èta myɛ,
nə́ bʼâ nyɛrhɛ mɔ̀bɔ́ ń shí Arəzana w mɔ́,
ǹdə nə́ gə́ nyɛrhɛ mɔ̀bɔ́ bə̀ zə cɛ y shó w bə mɔ mɔ́ ta.
50 Da-byâ,
à nʼâ yâl a wɔ̀ bə̀ kɔn dɛ̀bɛ́ rə̀ wɔ́ nàmá ǹdə́ jal kɔn tʼâ la jàà nɔ Yi tənà y wẽ́ yé.
Kɔn dɛ̀bɛ́ rə̀ nʼê cì rə̀ bwár mɔ́ tʼâ la cəl nɔ nyǔ mə̀ tʼâ la zhɔ̌ wẽ́ yé.
51-52 À mʼa byili ába kɔn rə̀ kùr lwar zum:
nə́ gakó tʼá la cú yé.
Lũ zhɔ̌ pɔ́lá y wúl mó yi ní,
nə́ gakó bʼâ lyə́r twər rə̀dù sá,
ǹdə yírh gə́ yʼa kámsɛ nɛ́.
Pɔ́lá y gə tú è wúl,
byɛ̀bɛ́ bə̀ cù mú gakó mʼa bwìrhì.
Bə̀ yala nɛ́ kʼê tʼâ la bwár yé,
sə nə́ gakó bʼâ lyə́r.
53 Wɔ́ nyɔ́ɔ́ bə̀ yala nɛ́ nyɛ̀bɛ́ nə̀ nʼê cì nə̀ bwár mɔ́ bə̀kʼa kʼe cì nə bwár yé.
54 Sə yala nɛ́ nyɛ̀bɛ́ nə̀ nʼê cì nə̀ bwár mɔ́ gə tú nə̀ kʼê tʼâ la cú nə bwár,
rə̀myɛ́ yi ní,
kɔn dɛ́ dɛ̀bɛ́ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó bʼa pyìrh.
Bə̀ kɛ̃ rə̀ wẽ́ bə wɔ̀:
“Cu mú jàn gɔwa,
bə̀ ŋwɛ̀nɛ́ mɔ.
55 Cu,
yẽ̀ ǹ jàn dɛ́ ŋwɛ́nɛ́?
Cu,
yẽ̀ ǹ swã̀ y ŋwɛ́nɛ́?”
56 Wɔ́ yə̀-bəlɔ̀lɔ́ ò wɔ́ cu mú swã̀ yá.
Sə wɔ́ Muyiisi nyí rí rə̀ wɔ́ yə̀-bəlɔ̀lɔ́ w jàn dɛ́.
57 Cenə nə́ ce Yi nə̀báná,
bə̀ wɔ́ rə̀myɛ́ rə̀ ce nə́ jí bɛlɛ nə́ Cinu Yezu Kristə jàn yilə.
58 Rə̀myɛ́ ce,
da-byâ nántwə̂rh,
zhǐnə á nà y yó kẽkẽ,
á bə̀kʼá twẽ̌ yé.
Twĩ̌nə Cinu tum dí twéé gakó ǹdə́ yə̀wâl.
Á yě bə̀ Cinu tum dí á nʼá twĩ̀ mú tʼâ la nánfò yál yé.