Kristə tùntúm wɔ́ tum dí tɛ̀bɛ́ Kristə pɔ mɔ́ mɔ́ ǹ nə́ ǹ twĩ̀
4
Lò gakó mə̂ sə n nyǐ nə́ba ǹdə Kristə tùntùnnə̀ byɛ̀bɛ́ Yi ce bə̀ nʼê byili rə̀ ywẽ̀ nyɛ̀bɛ́ nə̀ yʼà shèè mó ta.
2 Bə̀ gə pɔ tum lò nè,
ǹ gə́ mə̂ sə́ wɛ̀rhɛ́ nɛ́ mɔ́,
wɔ́ ń twĩ̀ tum dí ǹdə bə̀ gə́ byili mú ní.
3 È gə wɔ́ àmyɛ́ yilə,
ámyɛ̌ gə nʼá kɛ́ à bùrsì myɛ,
lũ w bùrsí cìnə́ gə nʼê kɛ́ à bùrsì myɛ,
à tʼâ gá rə̀myɛ́ nɛ yé.
Sə àmyɛ́ cìcì mú myɛ tʼâ kɛ́ à cìn bùrsì yé.
4 À bə dóó nɛ à wɛ̀rhɛ́ yé.
Sə rə̀myɛ́ tʼâ yâl e wɔ̀ bʼà bə yò zhe yé.
Wɔ́ Cinu ń mà n kə́ à bùrsí.
5 Rə̀myɛ́ ce,
á bə̀kʼá cĩ́ dóó lò lò yó w ǹdə́ Cinu gwẽ̌ yə̀ twí yé.
Wɔ́ ńmyɛ̌ ń mà n ce kɔn dɛ̀bɛ́ rə̀ shèè cə-byín wẽ́ mó du pwẽ̀ nè pamparɛ̃ɛ̃.
Ń mà n byili numbyínsi wun bùlə̀ né.
Sə rə̀myɛ́ yi ní,
Yi bʼa pə lò gakó ne còrhó kɔ̀bɔ́ ò mə̂ dwã ǹdə́ mɔ́.
6 Da-byâ,
à zɔ̀m àmyɛ́ ǹdə́ Apɔlɔɔsɛ yò mùnì ga nə́ yə̀ myɔrhɔ á yilə.
À nʼâ yâl bʼâ tó nə́ dɛnnɛ á lwar zɔ̀mɛ̀ rɛ́ tɛ̀bɛ́ kùrə̀:
“Bə̀ká lyɛ̃ dɛ̀bɛ́ bə̀ kɛ̃ mɔ́ yé.”
Á mə̀dù ga bə̀ká n zhẽ̌ ń cìn dɛ̃̌ n zù lò mə̀dù,
n yẽ̌ ń dõ mó ne yé.
7 Mɔ̌ lò ń ce ǹ du ǹ dwã bɛ́?
Tɛ̀bɛ́ ǹ zhe mó gakó,
də̀ Yi rə̀ pɔ mɔ́ rɛ nà?
È nə gə wɔ́ Yi rə̀ pɔ mɔ́ rɛ,
wɔ́ byè yil ǹ nə́ ǹ zhẽ̌ ǹ cìn dɛ̃̌ ǹdə wɔ́ ǹ sə̀pwà jàn ǹ bə́ nə rɛ ta?
8 Á pú á wɔ́ nə̀cɛ̀nà,
á jǐrh pyâ,
á zhe kɔn dɛ̀bɛ́ gakó á nʼá yàlá.
Sə nə́myɛ̌ də̀ pyâ yé.
Á gə yʼâ wɔ́ pyâ zhə̀n zhə̀nà,
nə́myɛ̌ yʼâ wɔ̌ nə́ bʼâ tó ába nə́ yə̀ pyâ.
9 Sə àmyɛ́ nʼâ bùl bə̀ Yi ce nə́myɛ̌ byɛ̀bɛ́ nə́ wɔ́ Kristə tùntúmə́ mó ŋwɛ́nɛ́ lyì bí gakó kwã.
Nə́ jǐrh ǹdə lyì byɛ̀bɛ́ bə̀ kɔ́ bə̀ bùrsì bə̀ la gu ta.
Nə́ jǐrh lyì byɛ̀bɛ́ lũ w púlə́púlə́ ǹdə́ ò lyì bí ǹdə́ màlɛ́kabá la nyǔ.
10 Nə́myɛ̌ wɔ́ ǹdə nyə̀nyə̀rh ta Kristə sónó yilə,
sə ámyɛ̌ wɔ́ surhə cìnə́ ń wẽ́.
Nə́myɛ̌ bə jàn zhe yé,
sə ámyɛ̌ jɛ̀.
Bə̀ nʼê nyàm ámyɛ̌,
sə bə̀ tʼâ nyàm nə́myɛ̌ yé.
11 Ǹdə́ èlâsɛ̃´ ga,
nɔrh zhe nə́ba;
nə̀nyɛ̀lsɛ̀ zhe nə́ba;
nə́ bə gɔ̀nɔ̀ zhe sə nə́ zù yé;
bə̀ nʼê nwɛ̀nɛ̀ nə́ba;
nə́ wàr nə́ zhì jàà èdù yé;
12 nə́ rʼé nwɛ̀nɛ̀ nə́ cìn nə́ twĩ̀ nə́ mʼé pyà nə́ nyí kùjú.
Lò gə tùrh nə́ba myɛ,
nə́ zɔ̀m cɛ̀nɛ̀ nə́ pɔ̃.
Bə̀ gə nʼê nwɛ̀nɛ̀ nə́ba,
nə́ rʼé pyɛ́nɛ́.
13 Lò gə zɔ̀m nə́ yil námməlwɛ̀lɛ́ myɛ,
nə́myɛ̌ nʼé pɛ cícú lyì bí ni.
Nə́ jǐrh ǹdə lũ w ywə̀ə̀rhè ta,
ǹdə kɔn dɛ̀bɛ́ rə̀ bə kùr zhe ta numbyínsí yírhə́ wə,
kɔn mʼe yí èlâsɛ̃´.
14 È də̀ kɛ̃´ à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ a bʼa ce ába cìzhìl yé.
Wɔ́ cícú à la bʼa pə ába,
á gə́ wɔ́ à byâ byɛ̀bɛ́ à só mó yilə.
15 Bá lyì mɔ̀ɔ̀rhɛ̀ shí gə zɛ̃̀ bə̀ nʼê cèrhè ába Kristə ne tó mó shò-kwã nɛ́ myɛ,
á dabá də̀ nánzhəzhɔ̌ yé.
Wɔ́ àmyɛ́ à bwə̀l yò-ècɔ̀nɔ̀ nyí rí a byili ába,
á zɛ̃̀ á jǐrh à byâ Yezu Kristə wẽ́.
16 Rə̀myɛ́ ce,
à nʼâ lwə̀l ába ǹdə́ à wu gakó,
sʼá kwè à nà.
17 Sə à nʼâ twĩ̀ Timote á sõ.
Ń wɔ́ à byì-sónó Cinu wẽ́,
à zhe ń zhə̀nà.
Ń mà n lyǐrh ába kɔn dɛ̀bɛ́ gakó à nʼâ wɛ̀rhɛ́ Kristə ne zhú mú wẽ́.
Wɔ́ rə̀myɛ́ à nʼâ byili Kristə-lyì gùúlí rə̀ ŋwɛ́nɛ́ jààsɛ́ gakó wẽ́ mó lyì bí ni.
18 Lyì jàlà nʼê bùl bʼà kʼâ tʼâ bàn á sõ yé;
bə zɛ̃̀ bə̀ nʼê zhẽ̌ bə̀ cìn dɛ̃̌.
19 Sə kɔn gə wɔ́ Cinu pùbùlə̀,
à mʼa bə̀ á sõ dwã nɛ́ nyɛ̀bɛ́ nyí ni.
Sə à gə túwə́,
è də̀ cìn-byilu cìnə́ bé bə̀myɛ́ mɔ́ zɔ̀mà nɛ́ dúdú à la cilu yé.
À bʼa nyǐ wɔ́ byè bə̀ wɔ̌ bə̀ la wɔ̀rhɔ́?
20 Zhə̀nà,
Yi pyɛ̀lɛ̀ rɛ́ də̀ zɔ̀mà yò yé.
Wɔ́ Yi jàn.
21 Bə̀kɔ́n á nʼá yâl bʼà mʼa bə̀ á sõ?
À bə̀ á sõ ǹdə́ búlə́ ráá à bə̀ ǹdə́ sónó ǹdə́ wu-bɔ̀nɔ̀?