Yi yə̀ Esərayɛl lyì bí zhɛ̃̀ yé
11
A zɛ̃̀ à nʼâ yâl a bwə̀rh a nyìwé:
Yi nə zɛ̃̀ wɔ́ zhɔ̃́ rə̀ zhɔ̃̀ rə̀ lyì bí?
Gaga!
Àmyɛ́ cìcì mú də̀ Esərayɛl lò nà?
Wɔ́ Abəraham nɔ̃̌ Bɛ̃zhamɛ kwálá y wẽ́ bə̀ lùl nè né.
2 Yi yə̀ rə̀ lyì bí rə̀ dámâ rə cír mó zhɛ̃̀ yé.
Lyǐrhnə kɔn dɛ̀bɛ́ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə mʼe zɔ̀m Elyi yò,
ń gə́ yà ń nə́ ń zhərh ǹdə́ Yi Esərayɛl lyì bí shò-kwã nɛ́ ǹdə́ wu-zhìlù mú yò.
3 Ń wòwə̀:
“Cinu,
bə̀ gu ǹ nyì-zwennə bé gakó,
bə wǔr ǹ vwĩ̀-jùúlí.
Wɔ́ àmyɛ́ dúdú à dàl.
Sə bə̀ nʼê pyà àmyɛ bə̀ la gu.”
4 Wɔ́ bə̀kɔ́n Yi zɛ̃̀ rə byili?
Rə̀ wòwə̀:
“Lyì bí byɛ̀bɛ́ bə̀ yə̀ shɛ̀nɛ́ bə wùlì yi rí tɛ̀bɛ́ bə̀ nʼê byẽ̀ bə̀ Baalɛ yé né mó wɔ́ nunə mɔ̀ɔ̀rhɛ̀ tàlpyɛ̀.
Wɔ́ bə̀myɛ́ à cír à cìcì yilə.”
5 Zà zà myɛ gwẽ̌ wɔ́ èta.
Lyì màngɛlɛ́ gwẽ̌ dàl,
sə wɔ́ Yi sónó w ò ce rə cír be.
6 È də̀ bə̀ tùm-ècɛ̀nà yil rə̀ cír be yé.
Wɔ́ rə̀ gə́ só be mó dúdú yilə.
È gə yʼà wɔ́ bə̀ tùntwə̃̀ə̃̀ yilə,
sə́ nyǐ rə̀ sónó w yʼà də̀ sónó páá yé.
7 Wɔ́ bə̀kɔ́n nə́ nə bʼâ wɔ̀?
Esərayɛl lyì bí yə̀ tɛ̀bɛ́ bə̀ yʼà nʼê pyà mɔ́ nɛ yé.
Wɔ́ byɛ̀bɛ́ Yi cír mó dúdú bə̀ nɔ rɛ,
sə byɛ̀bɛ́ bə̀ dàl mɔ́ yʼà tʼâ yâl bə sú rə̀ kùr yé.
8 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Rə̀myɛ́ yi ní ga,
Yi pyi bə̀ surhə,
rə pyi bə̀ yírhə́,
rə shĩ bə̀ zhã̌,
kɔn mʼe yí zà.”
9 Dəvyidi myɛ wòwə̀:
“Kùjú kɔ̀bɔ́ bə̀ la jú bʼa yə̀ zhẽ́ bə̀ la bʼe zhẽ̀ bè;
ò yə̀ gɔ́rɔ́ bə tu ò wẽ́,
bə nə còrhò-tum.
10 Bə̀ yírhə́ bʼa pyi,
bə jǐrh lyìlyə̂r,
sə də̀-kúrhú bʼa kə́ bɛ,
bə̀ kʼê wàr bə kwẽ̌ yé.”
11 È gə wɔ́ èta,
à nʼâ yâl a bwə̀rh gwẽ̌:
Zhwifubá tu tɛ̃´.
Sə rə̀myɛ́ nʼê byili bə̀ bə̀ kʼê wàr bə̀ la zã̀ɔ̃̀ gaga nà?
Ɔ̃́ʼɔ̃,
è də̀ èta yé.
Zhə̀nà,
bə̀ dówə́;
byɛ̀bɛ́ bə̀ də̀ Zhwifubá mɔ́ zɛ̃̀ bə tó rə̀myɛ́ dɛnnɛ bə nə vwârh.
Zhwifubá tə̀ rə̀myɛ́ yil bə̀ nʼê dùr bwɛ̃̌.
12 Zhwifubá dóó w ce lũ w lyì bí dwã bɛ́ nə cɛ̀nɛ̀.
Bə̀ gə́ tu tɛ̃´ mɔ́ myɛ ce byɛ̀bɛ́ bə̀ də̀ Zhwifubá mó nə cɛ̀nɛ̀.
È gə wɔ́ èta,
sə́ nyǐ Zhwifubá púlə́púlə́ gə kʼa tú bə̀ zù Yi,
rə̀ bʼa pə bɛ cɛ̀nɛ̀ rɛ́ kɔn lyɛ̃ cɛ nɛ.
Yi nʼê vwârh lyì byɛ̀bɛ́ bə̀ də̀ Zhwifubá mó
13 Èlâsɛ̃´,
wɔ́ ámyɛ̌ byɛ̀bɛ́ á də̀ Zhwifubá mó à ba.
Wɔ́ ámyɛ̌ yil à wɔ́ Yezu Kristə tùntúm.
Sə tum dí rə̀myɛ́ ń pɔ nɛ mɔ́ zhe kùr à yilə.
14 Sə à nʼâ bùl bə̀ à dwí lyì bí bʼa tə̀ rə̀myɛ́ yil bə zɛ̃̀ bə̀ nʼê dùr bwɛ̃̌.
Èta,
bə̀ jàlà bʼa tó rə̀myɛ́ dɛnnɛ bə nə vwârh.
15 Zhə̀nà,
Yi yʼà yẽ̌ Zhwifubá ne rə mʼe kwɛrhɛ lũ w lyì bí dwã bɛ́ yò ǹdə́ rə̀ cìcì.
Sə rə̀ gə kʼâ tú rə̀ zwẽ be,
etər kɔn bʼa yə̀ nɛ́?
Kɔn mʼa yə̀ ǹdə lò gə́ ya n cì,
n zɛ̃̀ n ká n bwìrhì ní!
16 Bə̀ gə fɔ́n búrú kə̀kàlà bə̀ pɔ Yi ni,
ò kùr ré rə̀ dàl mɔ́ gakó wɔ́ rə̀myɛ́ rə̀ cǐ.
Bə̀ gə pɔ cǒ nə̀rh Yi ni,
sə́ lwar bə̀ rə̀ jʼâ cǐ ǹdə́ ò jɛ̀sɛ́ myɛ ga.
17 Esərayɛl lyì bí nyɛ̌ ǹdə cǒ bə̀ zhele ta.
Bə zɛ̃̀ bə gõ ò jɛ̀sɛ́ jàlà.
Ǹmyɛ́ mɔ̀bɔ́ ǹ də̀ Zhwifu mú nyɛ̌ ǹdə cǒ kɔ̀bɔ́ ò lyĩ tɛ̃´ nánfò jɛ̃̀ ta,
bə̀ gòm bə mʼe lyə́r kɔ̀bɔ́ ò zhele mó jɛ̀sɛ́ sə̀ gòm mó.
Èlâsɛ̃´,
ǹmyɛ zɛ̃̀ ǹ nə́ ǹ tó ǹ jí kɔn dɛ̀bɛ́ gakó rə̀ nʼê shí cǒ w bə̀ zhele mó nèsé wẽ́ mó.*
18 Rə̀myɛ́ ce,
ǹ bə mə̂ sə́ zhẽ̌ ǹ cìn cǒ w jɛ̀sɛ́ bə̀ gòm mó sono yé.
Ǹmyɛ́ zɛ̃̀ ǹ nə́ ǹ yâl ń zhẽ̌ ǹ cìnə̀,
lwar bʼè də̀ ǹmyɛ́ ǹ zə cǒ w nèsé ǹ zhǐ yé.
Wɔ́ sə̀myɛ́ sə̀ zə mɔ́ sə̀ zhǐ.
19 Dɛ̀ga,
ǹ bʼâ wɔ̀:
“Bə̀ gòm cǒ w jɛ̀sɛ́ mùnì ga bə kwè àmyɛ́ bə mʼe lyə́r se.”
20 Ǹ gə byili èta,
rə̀ wɔ́ zhə̀nà.
Wɔ́ cǒ w jɛ̀sɛ́ gə́ yə̀ Yi ni zhí yil bə̀ gòm sè,
ǹmyɛ́ zɛ̃̀ ǹ zhǐ sə̀ jàà w ǹ gə́ zhí Yi ni mú yilə.
Sə bə̀ká zhẽ̌ ǹ cìn dɛ̃̌ yé.
Ǹ gaga mɔ́ mə̂ sə́ ce ywẽ zə mɔ́.
21 Zhə̀nà,
Yi gə gòm cǒ w kɔ̀bɔ́ ò zhele mó jɛ̀sɛ́,
sə́ lwar bə̀ rə̀ tʼâ la ǹmyɛ nɛ yõ̌ yé.
22 Lwar bə̀ Yi wɔ́ wu-bɔ̀nɔ̀ cə́bal,
rə jʼà zum myɛ.
Rə̀ nʼê gwirhi rə̀ yé ǹdə́ byɛ̀bɛ́ bə̀ tu tɛ̃´ mɔ́.
Sə è gə wɔ́ ǹmyɛ́ yilə,
rə̀ zhe wu-bɔ̀nɔ̀ ǹdə́ mɔ́.
Ǹ mə̂ sə́ já ǹ ŋwɛ́nɛ́ rə̀ wu-bɔ̀nɔ̀ w wẽ́.
È gə də̀ rə̀myɛ́,
rə̀ bʼa gõ ǹmyɛ ǹdə cǒ jɛ̃̀ ta rə ji tɛ̃´.
23 Sə è gə wɔ́ Zhwifubá yilə,
bə̀ gə tú bə̀ kʼâ shɛ̀nɛ́ bə̀ zwẽ nyí bə zhí Yi ni,
rə̀myɛ́ yi ní,
bə̀ mʼa lyə́r be cǒ w ne bə zhì ǹdə shãã ga mɔ́ ta;
bə̀ Yi zhe jàn,
rə̀ wɔ̌ rə̀ bʼa kʼa lyə́r be cǒ w ne kə́dò.
24 Zhə̀nà,
ǹmyɛ́ mɔ̀bɔ́ ǹ də̀ Zhwifu,
ǹ wɔ́ cǒ kɔ̀bɔ́ ò lyĩ tɛ̃´ nánfò jɛ̃̀ bə̀ gòm bə mʼe lyə́r kɔ̀bɔ́ bə̀ zhele mó,
e jʼà də̀ èta kɔn mə̂ sə rə tó né yé.
Sə è gə wɔ́ Zhwifubá yilə,
bə̀myɛ́ wɔ́ cǒ w kɔ̀bɔ́ bə̀ zhele mó jɛ̀rh.
Rə̀myɛ́ ce,
Yi mʼa lyə́r be cǒ w bə̀ yʼà jɛ̀rɛ̀ bə̀ zhǐ ò yó mó ne nàná.
Esərayɛl lyì bí púlə́púlə́ bʼa nə vwârh
25 Da-byâ,
nyǐnə kɔn dɛ̀bɛ́ rə̀ yʼà shèè.
Wɔ́ rə̀myɛ́ à nʼâ yâl a ce á lwar,
mùnì ga á bə̀kʼá wɔ̀ bʼâ zhe surhə á yě kɔn gakó yé.
Yi ce Esərayɛl lyì bí kə̀kàlà yə̀ ŋwɛ̀nɛ́ bə sú rə̀ kùr yé,
kɔn la mʼe yí lũ w lyì bí dwã bɛ́ gakó ŋwɛ̀nɛ́ bə nə vwârh mɔ́.
26 Rə̀myɛ́ yi ní,
Esərayɛl lyì bí púlə́púlə́ bʼa zɛ̃̀ bə nə vwârh.
Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀:
“Zwennə mó mà n shí Səyɔ̃,
sə ń mà n vùr Zhakɔɔbɛ kwálá y lyì bí yó-kùùlí.
27 Wɔ́ rə̀myɛ́ rə̀ wɔ́ dɔbrɛ́ à la zal ǹdə́ bɛ mɔ́,
à gə tú à vùr bə̀ yə̀-bəlwàálɛ́ yi ní.”
28 Bə̀ yə̀ shɛ̀nɛ́ bə zwẽ yò-ècɔ̀nɔ̀ nyí rí yé,
bə jǐrh Yi zwə̀,
sə rə̀myɛ́ yàl kɔn dɛ̀bɛ́ rə̀ sɛ̃ ámyɛ̌ byɛ̀bɛ́ á də̀ Zhwifubá mó ne.
E jà wɔ́ bə̀myɛ́ Yi tə̀ bə̀ nàmbala bɛ́ yil rə cír bə̀ wɔ́ rə̀ lyì rə̀ só.
29 Bə̀ Yi tʼâ pɛ rə̀ kʼâ zwẽ yé.
Lyì byɛ̀bɛ́ rə̀ byẽ̀,
rə̀ kʼê tʼâ zhɛ̃̀ bɛ̀ yé.
30 Shãã ga,
á yʼâ cẽ Yi nyí ni.
Sə zà zà,
Zhwifubá gə́ yə̀ rə̀ nyí ni zwẽ mó yilə,
rə̀ dùr á nɔ̀nɔ̀.
31 Bə̀ cẽ Yi nyí ni,
rə̀ mʼê dùr á nɔ̀nɔ̀ èlâsɛ̃´,
sə rə dùr bə̀myɛ nɔ̀nɔ̀.
32 Yi ce numbyínə́ bé gakó cẽ rə̀ nyí ni,
mùnì rə dùr bə̀ gakó nɔ̀nɔ̀.
Yi du kɔn gakó
33 Nyǐnə Yi cǐ kɔn gakó námpúm!
Rə̀ surhə né ǹdə́ rə̀ lwar mɔ́ bə swɛ̃´ zhe yé.
Mɔ̌ lò ń wɔ̌ ń mà n lwar kɔn dɛ̀bɛ́ Yi kɔ́ rə cĩ́ rə̀ surhə wẽ́?
Mɔ̌ lò ń wɔ̌ ń mà n lwar rə̀ gə́ nʼê wɛ̀rhɛ́ nɛ́ yé-shò?
34 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Mɔ̌ ń wɔ̌ ń mà n lwar kɔn dɛ̀bɛ́ Cinu nə́ ń bùlə̀?
Mɔ̌ lò ń wɔ̌ ń mà n yə̀ ń cícírnə?
35 Mɔ̌ lò ń jɛ̀rɛ̀ n pə kɔn Yi ni,
sə rə̀myɛ́ zɛ̃̀ rə kʼa mʼe càrh mɔ̀?”
36 Kɔn gakó wɔ́ Yi sõ rə̀ nʼê shí ní;
wɔ́ Yi rə̀ ce kɔn gakó ŋwɛ́nɛ́,
e jʼà wɔ́ rə̀myɛ́ yil kɔn gakó ŋwɛ́nɛ́.
Yi mə̂ dwã ǹdə́ còrhó byinə nə̀ bə zhɔ̌ zhe yilə!
Amɛ̀n!