Èlâsɛ̃´, nə́ cǐ nə́ cìnə̀; nyə́ né kʼê bə nə́ba cǐ yé
7
Da-byâ,
á yě nyə́ né.
Rə̀myɛ́ ce,
à nʼâ bùl bʼâ yě kɔn dɛ́ dɛ̀bɛ́ à nʼâ yâl a byili ába mó:
lò gə gwẽ̌ yə̀ cì,
nyə́ né cǐ mu.
2 À mʼa byili ába myɔrhɔ òdù:
kɛ̃ gə jú byal,
byal mɔ́ gə gwẽ̌ yə̀ cì,
nyə́ né ce ń bə mə̂ sə n kə́ n jí byal dõ yé.
Sə byal mɔ́ gə tú ń cùwə̀,
kɛ̃ mɔ́ zɛ̃̀ ń cǐ ń cìnə̀.
Nyə́ né kʼê tʼâ cə̀r ń yé ne yé.
3 Ń gə jú byal dõ,
ǹdə́ ń byal mɔ́ cìcì mú gwẽ̌ ŋwɛ́nɛ́,
bə̀ yʼa byẽ̀ kɛ̃ mɔ́ ńmyɛ̌ mɔ́ bə̀ kə-nə̀fòló.
Sə byal mɔ́ gə cùwə̀,
nyə́ né kʼê tʼâ cə̀r rə̀myɛ́ yé.
N zɛ̃̀ ń cǐ ń cìnə̀.
Ń wɔ̌ n jí byal dõ,
bə̀ rə̀myɛ́ də̀ fwə̂l yé.
4 Da-byâ,
kɔn wɔ́ èta ǹdʼámyɛ.
Á mù dwã nɛ Kristə yala nɛ́ wẽ́,
e jǐrh ǹdə wɔ́ cú á cù ta,
á du nyə́ né wẽ́,
á jǐrh ń lyì,
ńmyɛ̌ mɔ̀bɔ́ ń cù n ká n bwìrhì mú,
mùnì ga nə́ ŋwɛ̀nɛ́ nə́ twĩ̀ tumə nyɛ̀bɛ́ nə̀ sú Yi yírhə́.
5 Zhə̀nà,
shãã ga,
nə́ gə́ yʼâ gwẽ̌ nʼê twĩ̀ nə́ yala nɛ́ pùbùlə̀ yi ní,
nyə́ né yʼà ce shilə námməlwâlsɛ ŋwɛ́nɛ́ nə́ wẽ́.
Sə rə̀myɛ́ yó-gurə́ y yʼà wɔ́ cu.
6 Sə èlâsɛ̃´,
nə́ cǐ nə́ cìnə̀,
nyə́ né kʼê bə nə́ba cǐ yé,
bə̀ è nyɛ̌ ǹdə wɔ́ cú nə́ cù ta,
nə́ du kɔn dɛ́ dɛ̀bɛ́ rə̀ yʼà ce nə́ wɔ́ ǹdə yómə́ ta mɔ́ wẽ́.
Èlâsɛ̃´,
nə́ yẽ̌ kɔn dɛ́ dɛ̀bɛ́ rə̀ yʼà kɛ̃ nyə́ né sɛ́bɛ́ rɛ́ wẽ́ shãã ga mɔ́ nɛ,
nə́ zɛ̃̀ nə́ ji kùr nə́ rʼé twĩ̀ Yi pùbùlə̀ ǹdə́ Eshirhə náàcɛ̀nɛ́ jàn.
Wɔ́ nyə́ né nə̀ ce nə́ lwar yə̀-bəlɔ̀lɔ́ yò
7 Sə rə̀myɛ́ nə nʼê yâl e wɔ̀ bə̀ byè?
Nyə́ né wɔ́ kɔ̀-bəlwɛ̀lɛ́?
Gaga!
Wɔ́ nyə́ né nə̀ ce a lwar yə̀-bəlɔ̀lɔ́ yò.
Nyə́ né gə yʼà yə̀ bwɛ̃̌-dǔr mó yò zɔ̀m,
à yʼà tʼâ la lwar bə̀ mə̀ ŋwɛ́nɛ́ yé.
Nyə́ né wòwə̀:
“Bə̀ká yâl ǹ dõ kɔn ǹdə́ bwɛ̃̌-dǔr yé.”
8 Yə̀-bəlɔ̀lɔ́ jʼa tó rə̀myɛ́ dɛnnɛ o ce bwɛ̃̌-dǔr dwí gakó à wẽ́.
Nyə́ né gə yʼà tɛ̀nɛ́,
yə̀-bəlɔ̀lɔ́ yʼà nyɛ̌ ǹdə kɔn dɛ̀bɛ́ rə̀ cù ta.
9 Shãã ga,
nyə́ né gə́ yʼà tɛ̀nɛ́ mɔ́,
à yʼà ŋwɛ́nɛ́.
À wu tʼâ zɛ̃̀ yé.
Sə nyə́ né gə́ tú kwã nɛ́,
yə̀-bəlɔ̀lɔ́ zɛ̃̀ ò ŋwɛ́nɛ́ à wẽ́.
10 A zɛ̃̀ a jǐrh ǹdə cùù ta.
Nyə́ né nyɛ̀bɛ́ nə̀ yʼà tú ni nyǔ pɔ mɔ́,
kʼâ wɔ́ cu nə̀ pɔ nɛ.
11 Yə̀-bəlɔ̀lɔ́ tó kɔn dɛ́ dɛ̀bɛ́ nyə́ né nʼê byili bə̀ rə̀ súl mó dɛnnɛ o swèlè nè o ce a jǐrh ǹdə cùù ta.
12 È jà nyə́ né cìcì mú wɔ́ kɔn dɛ̀bɛ́ rə̀ càn;
kɔn dɛ̀bɛ́ gakó nə̀ nʼê byili mú càn,
rə̀ wɔ́ cángá,
rə̀ mâ.
13 Sə kɔn dɛ̀bɛ́ rə̀ càn wɔ̌ rə̀ bʼa ce àmyɛ́ jǐrh ǹdə wɔ́ cú à cù ta?
Gaga!
Wɔ́ yə̀-bəlɔ̀lɔ́ ò tó kɔn dɛ̀bɛ́ rə̀ càn dɛnnɛ o ce a jǐrh ǹdə wɔ́ cú à cù ta.
Ò tó nyə́ né dɛnnɛ o byili ni ò lwɛlɛ rɛ́ jàn dɛ́ gə́ wɔ́ nɛ́.
À gə nʼâ yâl cɛ̀nɛ̀ a twĩ̀ gakó, kʼâ wɔ́ lwɛlɛ rɛ́ à na
14 Zhə̀nà,
nə́ yě bə̀ nyə́ né wɔ́ Yi sõ nə̀ shí ní.
Sə àmyɛ́ wɔ́ numbyíní,
à jàn yə̀ yí yé,
à wɔ́ yə̀-bəlɔ̀lɔ́ yóm.
15 À yə̀l kɔn dɛ́ dɛ̀bɛ́ à nʼâ wɛ̀rhɛ́ mɔ́ kùr yé.
À tʼâ wɛ̀rhɛ́ kɔn dɛ́ dɛ̀bɛ́ à nʼâ yâl mɔ́ yé.
Wɔ́ tɛ̀bɛ́ à tʼâ yâl mɔ́ à nʼâ wɛ̀rhɛ́.
16 Sə è gə wɔ́ tɛ̀bɛ́ à tʼâ yâl mɔ́ à nʼâ wɛ̀rhɛ́,
sə́ nyǐ à nʼâ tó rə̀myɛ́ dɛnnɛ à byili bə̀ nyə́ né càn.
17 Sə è gə wɔ́ zhə̀n yilə,
rə̀myɛ́ də̀ àmyɛ́ ǹdə́ à sə̀pwà à nʼâ twĩ̀ rə̀myɛ́ yé.
Wɔ́ yə̀-bəlɔ̀lɔ́ w ò ŋwɛ́nɛ́ à wẽ́ mó ò nʼô twĩ̀.
18 À yě bʼà jàn dɛ́ gə́ yə̀ yí mú ce,
kɔ̀-ècɛ̀nɛ́ də́-byǐ tɛ̀nɛ́ à wẽ́ yé.
À nʼâ yâl cɛ̀nɛ̀ rɛ́ a twĩ̀,
sə à wàr yé,
19 bʼà tʼâ wɛ̀rhɛ́ cɛ̀nɛ̀ rɛ́ à nʼâ yâl mɔ́ yé.
Wɔ́ lwɛlɛ rɛ́ à tʼâ yâl mɔ́ à nʼâ wɛ̀rhɛ́.
20 Sə è gə wɔ́ tɛ̀bɛ́ à tʼâ yâl mɔ́ à nʼâ wɛ̀rhɛ́,
rə̀myɛ́ də̀ àmyɛ́ ǹdə́ à sə̀pwà à nʼâ twĩ̀ yé.
Wɔ́ yə̀-bəlɔ̀lɔ́ w ò ŋwɛ́nɛ́ à wẽ́ mó ò nʼô twĩ̀ ǹdə́ nɛ.
21 Èta,
à pwírí kɔn rə̀dù ŋwɛ́nɛ́ ǹdə́ nɛ:
rə̀myɛ́ ce,
à gə nʼâ yâl cɛ̀nɛ̀ a twĩ̀ gakó,
kʼâ wɔ́ lwɛlɛ rɛ́ rə̀ nʼê twĩ̀.
22 À só Yi nyə́ né à wu w wẽ́ dɛ̃´dɛ̃´,
23 sə à pwírí kɔn dõ ŋwɛ́nɛ́ à wẽ́.
Kɔn dɛ́ rə̀myɛ́ mɔ́ ce a jǐrh yə̀-bəlɔ̀lɔ́ w rə̀ ŋwɛ́nɛ́ à wẽ́ mó yóm.
E jà kɔn dɛ́ rə̀myɛ́ mɔ́ bə shɛ̀ tɛ̀bɛ́ à yě à surhə né wẽ́ bə̀ rə̀ wɔ́ zhə̀n mɔ́ yò yé.
24 Zwini zhe ne!
À yala nɛ́ wɔ́ numbyíní yala nə̀ la cú.
Wɔ́ mɔ̌ ń mà n zwẽ ne?
25 Bànà nə́ tó nə́ Cinu Yezu Kristə dɛnnɛ nə́ ce Yi nə̀báná!
Sə rə̀myɛ́ gakó nʼê yâl rə byili bʼà surhə né wẽ́,
à nʼâ shɛ̀nɛ́ Yi nyə́ né yò.
Sə à gə́ wɔ́ numbyíní mú ce,
à nʼâ shɛ̀nɛ́ yə̀-bəlɔ̀lɔ́ w nyí ni.