Yə̀-zùlə́ ŋwɛ́nɛ́ nə́myɛ̌ ǹdə́ Yi bwə̂l wə
5
Nə́ gə́ zhí Yi ni mú ce nə́ kʼé bə dwə́ə́re zhe yé.
Èlâsɛ̃´,
yə̀-zùlə́ ŋwɛ́nɛ́ nə́myɛ̌ ǹdə́ rə̀myɛ́ bwə̂l wə,
nə́ Cinu Yezu Kristə jàn yilə.
2 Ń ce nə́ tó nə́ Yi-ni-zhú mú dɛnnɛ nə́ ŋwɛ̀nɛ́ nə́ lwar rə̀ sónó w gə́ nyɛ̌ nɛ́.
Èta,
nə́ zhǐ ò wẽ́ kẽkẽ.
Nə́ wun jʼà nyɛ̀,
bə̀ nə́ yě bə̀ nə́ bʼâ nə cəl rə̀ zùwə́ y wẽ́.
3 Sə kɔn du,
nə́ wun gə́ nyɛ̀ mɔ́,
wɔ́ nə́ gə́ yě bə̀ nə́ gə nʼé nwɛ̀nɛ̀ myɛ,
nɔ̀nɔ̀ w òmyɛ́ bʼa ce nə́ pyɛ́nɛ́ nə́ zhì kẽkẽ.
4 Sə cìn-pyɔ́nɔ́ mɔ́ mə̀myɛ́ bʼa ce,
nə́ zhì nə́ nà yó yò-còlò yi ní.
Èta,
nə́ gə pyɛ́nɛ́ nə́ zhì nə́ nà y yó,
nə́ bʼâ ŋwɛ̀nɛ́ nə́ dɛ̃̀ Yi nyì-bwelé y pyǐrh mó.
5 E jà rə̀ nyì-bwelé y nə́ rʼé dɛ̃̀ è pyǐrh mó də̀ jə́jɔ̀rɔ́ kɔn yé,
bə̀ Yi ce rə̀ sónó w sú nə́ wun ní,
rə̀ Eshirhə y rə̀ pɔ nə́ba mɔ́ jàn yilə.
6 Zhə̀nà,
yi rí tɛ̀bɛ́ Yi yʼà cír mó gə́ tú e yí,
ǹdə́ nə́ yʼâ gwẽ̌ wɔ́ bə-jàn-zhəəre cìnə́,
Kristə cù lyì-bəlwâlsɛ yilə.
7 Kɔn zum ǹdə́ lò la shɛ̀nɛ́ n cì wu-cángá cí yilə,
sə dɛ̀ga,
lò wɔ̌ ń mà n shɛ̀nɛ́ n cì lyì-twə̂ yilə.
8 Sə ǹdə́ nə́ gə́ yʼâ gwẽ̌ wɔ́ yə̀-bəlwàálɛ cìnə́ yi ní,
Kristə cù nə́ yilə.
Wɔ́ èta Yi tó né rə byili nə́ba rə̀ sónó wə́.
9 Ń jal mɔ́ mə̀ ló tɛ̃´ mɔ́ ce nə́ kʼé bə dwə́ə́re zhe yé;
sə kɔn du,
nə́ yě pamparɛ̃ɛ̃ bə̀ ń bà n zwẽ nə́ba nə́ lú Yi lyim dí yé né.
10 Nə́ yʼâ wɔ́ Yi zwə̀,
sə rə̀ tó rə̀ Byǐ mú cu mú dɛnnɛ rə kwɛrhɛ nə́ yò ǹdə́ rə̀ cìcì.
Sə kɔn du èlâsɛ̃´,
nə́ yò gə́ kwɛrhɛ ǹdə́ rɛ mɔ́ ce,
rə̀ bʼa tó rə̀ Byǐ mú bùrhù mú dɛnnɛ rə vwârh nə́ba.
11 Sə è də̀ rə̀myɛ́ dúdú yé.
Nə́ wun nyɛ̀ ǹdə́ Yi,
nə́ Cinu Yezu Kristə jàn yilə,
bə̀ wɔ́ ńmyɛ̌ jàn yil nə́ yò kwɛrhɛ ǹdə́ Yi.
Adəma dóó ce lyì bí gakó nʼê cì, sə Yi pɔ nə́ba nyǔ Yezu Kristə jàn yilə
12 Wɔ́ lò mə̀dù sásá dɛnnɛ yə̀-bəlɔ̀lɔ́ tó né o zù lũ w wẽ́.
Lò mó ńmyɛ̌ mɔ́ wɔ́ Adəma.
Sə wɔ́ yə̀-bəlɔ̀lɔ́ ò zə cu o bà.
Wɔ́ rə̀myɛ́ è ce lyì bí gakó nʼê cì,
bə̀ bə̀ gakó wɛ̀rhɛ́ yə̀-bəlwàálɛ.
13 Yi gə́ pɔ rə̀ nyə́ né Muyiisi ni mú,
ǹdə́ yə̀-bəlɔ̀lɔ́ yʼà jɛ̀rɛ̀ ò ŋwɛ́nɛ́ lũ w wə.
Sə nyə́ gə́ yʼà tɛ̀nɛ́ mɔ́ ce,
Yi yʼà tʼâ nyǐ rə̀myɛ́ ǹdə yò ta yé.
14 E jà kɔn zhí Adəma e bʼe yí Muyiisi yi ní,
cu mú zɔ jàn.
Adəma cẽ Yi nyí ni.
Bá lyì byɛ̀bɛ́ bə̀ yʼà yə̀ yə̀-bəlɔ̀lɔ́ wɛ̀rhɛ́ ǹdə ń ta mɔ́ myɛ cìcì yʼà nʼê cì.
Adəma yà ń wɔ́ mɔ̀bɔ́ ń yà ń mə̂ sə n bə̀ mɔ́ nyɔrhɔ.
15 Sə Yi pɛnɛ́ y ǹdə́ Adəma yə̀-bəlɔ̀lɔ́ w bə dwã mə̂ yé.
Zhə̀nà,
lò mə̀dù sásá dóó ce lyì nánzhəzhɔ̌ nʼê cì,
sə Yi pɛnɛ́ y zhe kùr dɛ̃´dɛ̃´ du.
Wɔ́ Yezu Kristə jàn yil Yi wɛ̀rhɛ́ cɛ̀nɛ̀ dɛ̃´dɛ̃´ ǹdə́ lyì nánzhəzhɔ̌.
16 Kɔn dɛ́ dɛ̀bɛ́ Yi nʼê pɛ mɔ́ ǹdə́ yə̀-bəlɔ̀lɔ́ w lò mə̀dù mə n bə̀ mɔ́ nyân dɛ́ də̀ rə̀dù yé.
Yə̀-bəlɔ̀lɔ́ w lò mə̀dù mə n bə̀ mɔ́ ce Yi kə́ lyì bí bùrsì,
rə pə bɛ còrhò-tum.
Zhə̀nà,
lyì bí wɛ̀rhɛ́ yə̀-bəlwàálɛ nánzhəzhɔ̌,
sə Yi ce bə̀ kʼê bə dwə́ə́re zhe,
rə̀ gə́ pɔ bɛ rə̀ pɛnɛ́ y mɔ́ yilə.
17 Lò mə̀dù sásá dóó yilə,
cu mú zɔ jàn,
sə Yi tó Yezu Kristə dúdú sá dɛnnɛ rə̀ nʼê pɛ pansɛ nánzhəzhɔ̌ numbyínə́ bé ne.
Yi nʼê wɛ̀rhɛ́ bɛ cɛ̀nɛ̀,
rə ce bə̀ kʼê bə dwə́ə́re zhe yé,
sə bə̀ mʼa nə nyǔ bə tó bə jí pyɛ̀lɛ̀ Kristə jàn yilə.
18 Lò mə̀dù sásá dóó ce lyì bí gakó nə còrhò-tum.
Èta myɛ,
lò mə̀dù sásá cángá tumə ce bə̀ kʼê bə dwə́ə́re zhe yé,
sə bə̀ zhe nyǔ myɛ ń jàn yilə.
19 Shãã ga,
wɔ́ lò mə̀dù sásá ń yà ń cẽ Yi nyí ni,
lyì nánzhəzhɔ̌ zɛ̃̀ bə jǐrh yə̀-bəlwàálɛ cìnə́.
Èta myɛ,
wɔ́ lò mə̀dù sásá ń shɛ̀nɛ́ Yi nyí ni,
lyì nánzhəzhɔ̌ zɛ̃̀ bə jǐrh lyì byɛ̀bɛ́ bə̀ bə dwə́ə́re zhe.
20 Yi nyə́ né túwə́,
dwə́ə́ré jʼa zɛ̃̀ rə̀ nʼê súlí,
rə jǐrh nánzhəzhɔ̌.
Sə yə̀-bəlwàálɛ́ gə́ súlí dɛ̃´dɛ̃´ mə̀gã̌,
Yi yò-ècɛ̀nà nɛ́ súlí dɛ̃´dɛ̃´ du.
21 Yə̀-bəlɔ̀lɔ́ w yʼà zhe ŋwɔ̀nɔ́ ò nʼô gwi lyì bí.
Èta myɛ,
Yi yò-ècɔ̀nɔ̀ w zhe ŋwɔ̀nɔ́ ò nʼô ce nə́ kʼé bə dwə́ə́re zhe,
nə́ zɛ̃̀ nə́ zhe nyǔ mə̀ tʼâ la zhɔ̌ nə́ Cinu Yezu Kristə jàn yilə.