23
Pwəə nyǐ bùrsí gùlú w lyì bí shɛ́shɛ́ n wɔ̀:
“Da-byâ,
à tó Yi ni ǹdə́ wu òdù kɔn mʼe yí zà.”
2 Sə Yi jì y vwĩ̀-zwə́lnə bé yé né cìnə́ bé gakó náncɛ Ananyaasɛ pə nyí byɛ̀bɛ́ bə̀ yʼà zhǐ Pwəə yala nɛ mɔ́ nɛ bə̀ bə̀ mâ ń nyí rí ni.
3 Pwəə zɛ̃̀ n wɔ̀ mɔ̀:
“Myìnù cə́bal,
ǹ nyɛ̌ ǹdə wɔ́ byílí kɛ̀bɛ́ bə̀ pwèlè ta.
Ǹ jě gàà ǹ la àmyɛ́ bùrsí bǔr ǹdə nyí rí gə́ nʼê byili ní,
ń zɛ̃̀ ń wɔ̀ bə̀ bə̀ mâ nɛ.
Nyí rí jʼà tʼâ byili èta yé.
Ǹmyɛ́ wɔ́ Yi rə̀ la mɔ́ mâ.”
4 Byɛ̀bɛ́ bə̀ yʼà zhǐ Pwəə nyí ni mú wɔ̀ mɔ̀:
“Yi jì y vwĩ̀-zwə́lnə bé yé né cìnə́ bé gakó náncɛ y ǹ nə́ ǹ tùrhə̀?”
5 Pwəə zɛ̃̀ n wɔ̀:
“Da-byâ,
à yə̀ lwar bə̀ wɔ́ vwĩ̀-zwə́lnə bé yé né cìnə́ bé gakó náncɛ y yé.
Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
‘Ǹ bə mə̂ sə́ tùrh ǹ dwí rí yó-cə́bal yé.’ ”
6 Pwəə gə́ yà ń yě bə̀ bùrsí gùlú w lyì bí wɔ́ Sadəsənyɛbá ǹdə́ Farɛzhɛ̃ɛ̃bá,
n bya n wɔ̀:
“Da-byâ,
àmyɛ́ wɔ́ Farɛzhɛ̃ɛ̃,
à dabá myɛ wɔ́ Farɛzhɛ̃ɛ̃bá.
À nʼâ zwẽ nyí ǹdə Farɛzhɛ̃ɛ̃bá ta,
bə̀ cùùrì bʼa bwìrhì.
Wɔ́ rə̀myɛ́ yil bə̀ zə nɛ bə̀ nʼê bùrə̀.”
7 Ń gə́ wò èta,
Farɛzhɛ̃ɛ̃bá ǹdə́ Sadəsənyɛbá jʼa zɛ̃̀ nyə̀-pâr nɛ ǹdə́ dwã,
bə pɔr dwã nɛ.
8 (Sadəsənyɛbá yʼà nʼê wə̀l bə̀ cùùrì tʼâ la bùrhù yé.
Bə̀ tʼâ zwẽ nyí bə̀ màlɛ́ka ǹdə́ wẽ̀ tɛ̀bɛ́ numbyíní yírhə́ wàr nə nɛ ŋwɛ́nɛ́ yé.
E jà Farɛzhɛ̃ɛ̃bá yʼà nʼê zwẽ nyí bə̀ rə̀myɛ́ gakó ŋwɛ́nɛ́.)
9 Bə jʼa zɛ̃̀ bə̀ nʼê ce sɔ̀ dɛ̃´dɛ̃´.
Muyiisi nyə́ né byilnə bé byɛ̀bɛ́ bə̀ yʼà wɔ́ Farɛzhɛ̃ɛ̃bá mɔ́ jàlà zɛ̃̀ bə cẽ yò w kɔ̀bɔ́ bə̀ nʼê cĩ́ Pwəə yó w mó,
bə wɔ̀:
“Nə́myɛ̌ bə bal mɔ́ mɔ̀bɔ́ dóó nɛ yé,
sə è nə gə wɔ́ màlɛ́ka ráá kɔn dõ rə̀ zɔ̀m ǹdə́ mɔ?”
10 Sɔ̀ɔ̀rɛ́ jʼa kwɛrhɛ rə nyáásɛ.
Ywẽ zə shə̀dɛ́ɛ́sɛ́ gakó yó-cə́bal mɔ́,
bə̀ dɛ̀ga bə̀ bʼa mà Pwəə bə zhəzhɛrɛ dwã jɛ̀rh wà.
Rə̀myɛ́ ce,
n pə shə̀dɛ́ɛ́sɛ́ nyí bə̀ sə̀ só tɛ̃´ sə zə mɔ sə mʼe du lyì bí wẽ́ sə kʼa mʼe vò sə̀ jàà y wa.
11 Cəcɛ̃ y èmyɛ́ yù w cìcì,
Cinu bə̀ n lyí Pwəə n wɔ̀ mɔ̀:
“Kám ǹ wu.
Ǹ yàl à zhə̀n-cínnə Zhərəzalɛm nɛ́;
ǹ gwẽ̌ bʼâ yə̀ à zhə̀n-cínnə Orɔm nɛ́ myɛ.”
12 Cɛ y gə́ tú e lá,
Zhwifubá jàlà zɔ̀m nyí rə̀dù bə bwəl nyí Yi yé né bə wɔ̀:
“Nə́ gə yə̀ Pwəə gwi,
kùjú ǹdə́ nɛ̃̌ tʼâ la nə́ nyí ni dwə̂rh yé.”
13 Sə byɛ̀bɛ́ bə̀ wɛ̀rhɛ́ nyì-bwelé y èmyɛ́ mɔ́ yʼà du nunə shə́-èna.
14 Bə zɛ̃̀ bə vò e nə vwĩ̀-zwə́lnə bé yé né cìnə́ bé ǹdə́ Zhwifubá náncɛsɛ́ bə wɔ̀ bɛ:
“Nə́ bwəl nyí Yi yé né bə̀,
nə́ gə yə̀ Pwəə gwi,
kùjú ǹdə́ nɛ̃̌ tʼâ la nə́ nyí ni dwə̂rh yé.
15 Èlâsɛ̃´,
è dâl ámyɛ̌.
Zhəlnə á nə bùr-kárna bɛ́ dwã bɛ́ á wɛ̀rhɛ́ nyí rə̀dù á vò á lwə̀l shə̀dɛ́ɛ́sɛ́ gakó yó-cə́bal mɔ́ nɛ bə̀ ń ce bə kʼa zə Pwəə bə bà,
ǹdə wɔ́ ń yò w á nʼá yâl á kwɛrhɛ á nyǐ náàcɛ̀nɛ́ ta,
sʼá yẽ̌ bə̀ nə́myɛ̌ yě nə́ gə́ mʼâ wɛ̀rhɛ́ nɛ́ nə́ gu mu ǹdə́ ń gwẽ̌ yə̀ bùrsí jàà y w yí yé.”
16 Sə Pwəə nəkɔ́-byǐ mə̀dù lwar bə̀ bə̀ wɛ̀rhɛ́ surhə bə̀ nʼê yâl bə gu mu.
N zɛ̃̀ n vò shə̀dɛ́ɛ́sɛ́ jàà y wa,
n kù mù jə̀fɔ́.
17 Pwəə já n byẽ̀ shə̀dɛ́ɛ́sɛ zɔ̌m yó-cìnə́ bé mə̀dù n wɔ̀ mɔ̀:
“Zə bə̀sɔ́bwɛ̀lɛ́ y kɛ̀bɛ́ ń mə́ vò á yó-cə́bal mɔ́ sõ.
È zhe zɔ̀mɛ̀ è la mɔ byilu.”
18 Shə̀dɛ́ɛ́sɛ́ zɔ̌m yó-cə́bal mɔ́ zə y n vò bə̀ gakó yó-cə́bal mɔ́ sõ n wɔ̀:
“Pwəə mó ń ŋwɛ́nɛ́ byə̀nə́-jù w mú ń byẽ̀ nè n wɔ̀ bʼà zə bə̀sɔ́bwɛ̀lɛ́ y kɛ̀bɛ́ a bə̀ ǹ sõ,
è la mɔ́ zɔ̀mɛ̀ byilu.”
19 Shə̀dɛ́ɛ́sɛ́ gakó yó-cə́bal mɔ́ zɛ̃̀ n zə bə̀sɔ́bwɛ̀lɛ́ y jɛ̃̀ nɛ̀ n mə n vò kwã nɛ́ bə̀ dúdú,
n bwə̀rh yə̀:
“Wɔ́ bə̀kɔ́n zɔ̀mɛ̀ ǹ zhe ǹ la nɛ byilu?”
20 Bə̀sɔ́bwɛ̀lɛ́ y wɔ̀:
“Zhwifubá wɛ̀rhɛ́ nyí rə̀dù bə̀ bàn mɔ́ lwə̂l bə̀ ǹ ce bə zə Pwəə bə bə̀ bùrsí gùlú w lyì bí yé né nəkɔla,
bə kwɛrhɛ bə nyǐ ń yò w ma náàcɛ̀nɛ́.
21 Bə̀ gə túwə́,
sə ǹ bə̀ká cili bə̀ zɔ̀mà nɛ́ yé.
Lyì ŋwɛ́nɛ́ bə̀ du shə́-èna bə̀ nʼê dɛ̃̀ Pwəə bə̀ la gu.
Bə̀myɛ́ mɔ́ bwəl nyí Yi yé né bə̀,
bə̀ gə yə̀ Pwəə gwi,
kùjú ǹdə́ nɛ̃̌ tʼâ la bə̀ nyí ni dwə̂rh yé.
Bə̀ tɛnɛ bə zhɛ̀.
Èlâsɛ̃´ wɔ́ ǹmyɛ́ nyí bə̀ nʼê dɛ̃̀.”
22 Shə̀dɛ́ɛ́sɛ́ gakó yó-cə́bal mɔ́ zɛ̃̀ n wɔ̀ bə̀sɔ́bwɛ̀lɛ́ y nɛ,
bə̀ è kʼa vò jè,
sə è bə̀kʼa byili lò dõ ne yé.
Bə̀ ce Pwəə la cɔ w cə́bal Fyilisi sõ
23 Rə̀myɛ́ kwã nɛ́,
shə̀dɛ́ɛ́sɛ́ gakó yó-cə́bal mɔ́ zɛ̃̀ n byẽ̀ shə̀dɛ́ɛ́sɛ zɔ̌m yó-cìnə́ bə̀lyè n wɔ̀ bɛ̀:
“Zhəlnə á zə shə̀dɛ́ɛ́sɛ zwã̌-àlyè,
ǹdə́ shɛ̀bɛ́ sə̀ nʼê pàr eshesé mó shə́-shàlpyɛ̀,
ǹdə́ shɛ̀bɛ́ sə̀ zhe swə́ né mó zwã̌-àlyè á tɛnɛ sɛ.
Də̀dɛ̀nɛ́ lùr nə̀bɔ́ gə yúwə́,
sʼá zhìì shəshesé cìnə́ bé á cĩ́ Səzarɛ sɔ́má y yó.
24 Pyâna shəshərh á mʼá kwè Pwəə,
mùnì á zə mɔ á yí cɔ w cə́bal Fyilisi sõ ǹdə́ yə̀-zùlə́.”
25 Shə̀dɛ́ɛ́sɛ́ yó-cə́bal mɔ́ zɛ̃̀ n kɛ̃ sɛ́bɛ́ n pə bɛ,
bə̀ gə yúwə́,
sə bə pə cɔ w cə́bal mɔ́ nɛ.
Ń kɛ̃ rə̀ wẽ́ n wɔ̀:
26 “Àmyɛ́ Kolote Ləzhaasɛ à nʼâ ce ǹmyɛ́ cɔ cə́bal Fyilisi.
27 Bal mɔ́ mɔ̀bɔ́ à ce bə zə bə bə̀ ǹ sõ èta mɔ́,
wɔ́ Zhwifubá bə̀ yʼà zɔ mɔ bə̀ la gu.
Sə à gə́ lwar bə̀ wɔ́ Orɔm lò ǹdə́ mɔ,
a zɛ̃̀ a zə shə̀dɛ́ɛ́sɛ nánzhəzhɔ̌ a vò a zwẽ mo.
28 À yʼà nʼâ yâl a lwar ń yò w kùrə̀.
À ce bə zə mɔ bə vò bə̀ bùrsí gùlú w lyì bí yé né.
29 Sə à pwírí yò w kɔ̀bɔ́ bə̀ nʼê cĩ́ ń yó w mó wɔ́ bə̀myɛ́ sə̀pwà Yi-sɔ́má nyə́,
sə è də̀ yò kɔ̀bɔ́ ò bʼa ce bə gu mu,
ráá bə ce mo byə̀nə́-jù w yé.
30 À nyɛ̀ɛ̀ bə̀ Zhwifubá zɔ̀m nyí rə̀dù bə̀ nʼê yâl bə gu mu.
Wɔ́ rə̀myɛ́ è ce,
à ce bə zə mɔ bə bə̀ ǹ sõ làlà,
sə à pɔ nyí byɛ̀bɛ́ bə̀ nʼê cĩ́ yò w ń yó w mó ne,
bə̀ bə̀ zhəl ǹ sõ.
Yi bʼa sɛ̃ mɔ́.”
31 Shə̀dɛ́ɛ́sɛ́ zə Pwəə sə mʼe kwè sɔ́má y cəcɛ̃ y èmyɛ́ cìcì,
sə mʼe yí Antipətiri ǹdə sə̀ yó-cə́bal mɔ́ gə́ byili ní.
32 È zɛ̃̀ nəkɔkɔ́lɛ́ yá,
bə ce shəshesé cìnə́ bé zə Pwəə bə mʼe lyɛ̃.
Byɛ̀bɛ́ bə̀ dàl mɔ́ gakó kʼa kwɛ̃̀ bə bə̀ shə̀dɛ́ɛ́sɛ́ jàà y wa.
33 Shəshesé cìnə́ bé gə́ yú Səzarɛ,
bə pə sɛ́bɛ́ rɛ́ cɔ w cə́bal Fyilisi ni,
bə pɔ̃ Pwəə myɛ.
34 Ń gə́ kàrmə̀ sɛ́bɛ́ rɛ́ n zhɛ̀,
n zɛ̃̀ n bwə̀rh Pwəə:
“Tənà kɛ̌ lò ǹdə́ mɔ́?”
Pwəə wɔ̀:
“À wɔ́ Shilishi lò.”
35 Fyilisi gə́ lwar,
n wɔ̀ mɔ:
“Byɛ̀bɛ́ bə̀ nʼê cĩ́ yò w ǹ yó w mó gə túwə́,
à bʼa zɛ̃̀ a bwə̀rh mó ǹ yò kùrə̀.”
N zɛ̃̀ n pə nyí bə̀ bə̀ ce Pwəə Erɔɔdɛ pyɛ̀lɛ̀ rɛ́ jì y wə,
sə bə yìlì mù.