Pwəə zhə̀l Masɛdwanɛ n zhì gàà n lyɛ̃ n vò Gərɛsɛ
20
Lyì-zhâ bɛ́ gə́gã̌ mɔ́ gə́ zhɛ̀ kwã nɛ́,
Pwəə zɛ̃̀ n byẽ̀ Kristə kwã-lyì bí n cĩ́ dwã yó n pə bɛ cícú,
n ce bə̀ nə̀báná,
n zɛ̃̀ n zhǐr ń la Masɛdwanɛ tənà y wa.
2 Ń gə́ yú gàà mɔ́,
ń tó cɛmɛ nɛ́ wa,
n zhə̀rh ǹdə́ Kristə-lyì bí n dɛnɛ,
n mə n pə bɛ cícú,
n zɛ̃̀ n lyɛ̃ n vò Gərɛsɛ tənà y wa.
3 N mɛ̃ gàà cànsɛ̀ sə̀tɔ̀,
sə rə̀myɛ́ kwã nɛ́,
ń yà ń nə́ ń yâl n byɛrhɛ ǹdə́ bǔ-bwəl n vò Siri.
Sə n pwírí Zhwifubá sə̀ ǹdə́ dwã bə̀ nʼê yâl bə zə mɔ,
n jà n gu ń wẽ́ bə̀ ń mà n ká n kwɛ̃̀ n tó Masɛdwanɛ.
4 Ń tó-dwã bɛ́ yʼà wɔ́:
Bere lyì bal Pyiruusi byǐ Sɔpatɛɛrɛ,
ǹdə́ Tesəloniki lyì byâ Arəsətarkɛ ǹdə́ Səkunduusi,
ǹdə́ Dɛrbɛ lyì bal Gəyuusi,
ǹdə́ Timote,
e súlí Azhi lyì byâ Tishiki ǹdə́ Tərofyimi.
5 Bə̀myɛ́ tó yé bə vò bə dɛ̃̀ nə́ba Tərəwaasɛ nɛ́.
6 È gə wɔ́ nə́myɛ̌ yilə,
búrú w ò yə̀ sã̀-nə̀byẽ̌ ò wẽ́ ce mó címsí gə́ tú e lyɛ̃,
nə́ zù bwəl Shilipu cɔ w wa,
nə́ wɛ̀rhɛ́ dwã nə̀nu nə́ byɛrhɛ nə́ vò bə̀ sõ Tərəwaasɛ nɛ́,
nə́ wɛ̀rhɛ́ dwã nyàlpyɛ̀ gàà.
Pwəə zɔ̀m ǹdə́ Tərəwaasɛ Kristə-lyì bí
7 Shìrhə́ y dɛ̃ rɛ́ də̀dɛ̀nɛ́ y nə́ gùlí dwã mùnì ga nə́ kə́ búrú w nə́ tə̀ ǹdə́ dwã.
Pwəə yà ń mə̂ sə n zhǐr gàà è zɛ̃̀ nəkɔkɔ́lɛ́ yá.
Rə̀myɛ́ ce,
ń zhərh ǹdə́ Kristə-lyì bí kɔn bʼe yí ecə̃-swélé.
8-9 Nə́ yʼâ ŋwɛ́nɛ́ dɛ̃̌-yó jì èdù wẽ́.
È jìsí yʼà wɔ́ sə̀tɔ̀ sə zhílí dwã yó,
sə wɔ́ sə̀tɔ̀ nyâ y wẽ́ nə́ yʼâ ŋwɛ́nɛ́.
Bə̀ yʼà ju pàntámsɛ nánzhəzhɔ̌ bə cĩ́ ní.
Ébɔ́-dâl mə̀dù yà ń jě tə́kwə́rə́ y yó,
ń yíl Etiki.
Jan yʼà zù mù dɛ̃´dɛ̃´,
sə Pwəə zɔ̀mà nɛ́ gə́ dɛnɛ dɛ̃´dɛ̃´ mɔ́ ce,
n dɛ̀ɛ̀ dɛ̀ɛ̀ n shí gàà n tu tɛ̃´.
Bə̀ gə́ tú bə̀ la mɔ kǒ,
bə pwírí ń cùwə̀.
10 Pwəə jʼá só tɛ̃´,
n lwəl n kwè mò,
n wɔ̀:
“Á wun bə̀kʼa zɛ̃̀ yé.
Ń yə̀ cì yé.”
11 Pwəə gə́ ká n jì dɛ̃̌-yó jì y wə,
n kwè búrú w n kə́ dwã w nə́ tə̀ ǹdə́ dwã,
n zɛ̃̀ n jí kùjú,
n kə́ n ji zɔ̀mà nɛ́ kùr n zɔ̀m zɔ̀m kɔn bʼe yí cə-lár,
n zɛ̃̀ n zhǐr.
12 È gə wɔ́ ébɔ́-dâl mɔ́ yilə,
bə̀ zə mɔ bə kwɛ̃̀ ǹdə́ ń yírhə́.
Sə rə̀myɛ́ zɔ lyì bí gakó wun ni.
Pwəə zhì Tərəwaasɛ n vò Myəlɛ
13 Rə̀myɛ́ yó,
Pwəə yà ń byili bə̀ ń mà n kwè sɔ́má y ǹdə́ ń nə̀rh,
nə́myɛ̌ zɛ̃̀ nə́ zù bǔ-bwəl nə́ tó yé nə́ la Asɔɔsɛ;
nə́ gə yú gàà,
sə nə́ kwè mò.
14 Nə́ gə́ yúwə́,
Pwəə bə̀ n nə nə́ba gàà,
nə́ kwè mò ǹdə́ bǔ-bwəl lé nə́ mʼé vò Myətəlɛ̃ɛ̃.
15 Nə́ zhì gàà nə́ kʼé kwè bǔ-bwəl.
È zɛ̃̀ nəkɔkɔ́lɛ́ yùwə̀,
nə́ bwəlse Cɔɔsɛ.
È lyẽ̌ yù w nə́ yí Samɔɔsɛ;
è dwã nə̀tɔ̀ yù w nə́ yí Myəlɛ.
16 Pwəə yà ń tá ń yâl n jíjírhí Azhi tənà y wẽ́ yé.
Ń yírh yʼà lum,
bə̀ ń yà ń nə́ ń yâl ǹdə́ Yi gə sɛ̃ sə n yí Zhərəzalɛm Pantəkɔtɛ címsí yilə.
Rə̀myɛ́ ce,
ń yə̀ Efɛɛzɛ tó yé.
Pwəə cící Efɛɛzɛ Kristə-lyì gùlú w yé né cìnə́ bé
17 Pwəə zɛ̃̀ n zhì Myəlɛ nɛ́ n twĩ̀ bə byẽ̀ Efɛɛzɛ Kristə-lyì gùlú w yé né cìnə́ bé.
18 Bə̀ gə́ túwə́,
n wɔ̀ bɛ:
“À gə́ tú Azhi tənà y wẽ́ mó,
á yě à tùntwə̃̀ə̃̀ né gə́ yàl nɛ́ ǹdʼába.
19 À twĩ̀ Cinu tum dí ǹdə́ cìn-lwəl ǹdə́ yə́-nàná,
ǹdə́ nɔ̀nɔ̀,
bə̀ Zhwifubá yʼà nʼê pyà lwɛlɛ ǹdə́ nɛ.
20 À byili ába kɔn dɛ̀bɛ́ gakó rə̀ wɔ̌ rə̀ bʼa sɛ̃ ába.
A bwə̀l Yi zɔ̀mɛ̀ rɛ́ a byili ába á sõ kâlsɛ́ wẽ́,
ǹdə́ lyì bí gakó yé né,
a byili ába rə̀ kùrə̀.
21 A ce Zhwifubá ǹdə́ byɛ̀bɛ́ bə̀ də̀ Zhwifubá mó lwar bə̀ bə̀ mə̂ sə bə pyìrhí bə̀ wun bə zâ Yi,
sə bə zù nə́ Cinu Yezu.
22 “Èlâsɛ̃´,
à la Zhərəzalɛm,
sə wɔ́ Eshirhə náàcɛ̀nɛ́ è nʼê nyɛ́ɛ́ nɛ bʼà zhəl.
À yə̀l kɔn dɛ̀bɛ́ rə̀ la nɛ wɔ̀rhɔ́ gàà yé.
23 Sə cɛmɛ nɛ́ nyɛ̀bɛ́ gakó à tó nə̀ wẽ́ mó,
Eshirhə náàcɛ̀nɛ́ nʼê byili ni bə̀ bə̀ mʼa nwɛ̀nɛ̀ nɛ̀,
bə ce ne byə̀nə́-jù wə̀.
Wɔ́ rə̀myɛ́ dúdú à yě.
24 È gə wɔ́ àmyɛ́ yilə,
à gə cù ráá à gə ŋwɛ́nɛ́ myɛ,
rə̀myɛ́ də̀ kaka à yil yé,
àmyɛ́ wírí a bwə̀l Yi sónó w yò-ècɔ̀nɔ̀ nyí rí a báásɛ;
bə̀ wɔ́ rə̀myɛ́ Cinu Yezu pɔ nɛ bʼà twĩ̌.
25 “À jòm á sõ a bwə̀l Yi pyɛ̀lɛ̀ rɛ́ yò wə́.
Sə èlâsɛ̃´,
à yě bʼâmyɛ̌ mə̀dù ga kə́ ń tá ń la nɛ nɔ yé.
26 Rə̀myɛ́ ce,
à nʼâ wə̀l ába zà:
á gə zɛ̃̀ á tú á yẽ̌ kɔn dɛ̀bɛ́ à bwə̀l a byili ába mó ne,
rə̀myɛ́ kʼê də̀ àmyɛ́ yò yé,
27 bʼà byili ába kɔn dɛ̀bɛ́ gakó Yi nʼê yàlá.
À yə̀ ába kaka shèè yé.
28 Ámyɛ̌ cìcì mú dɛ̃̌na á cìnə̀.
Yìlìnə̀ lyì bí Eshirhə náàcɛ̀nɛ́ pɔ ába bə̀ yìlìnə̀ mó,
ǹdə vwã̌-ènɔ̀n gə́ nə́ ń yìlì ń vwàmá ta,
sʼá nyǐ Yi gùlú w lyì bí yò.
Yi tó rə̀ cìcì Byǐ mú jal mɔ́ mə̀ ló tɛ̃´ mɔ́ dɛnnɛ rə̀ cǐ bi.
29 “À yě bə̀ àmyɛ́ gə tú à kʼâ tɛ̀nɛ́,
lyì bʼa fwĩ́ tɛ̃´ ǹdə gɔ-kùl-bəlwâlsɛ ta,
sə bə̀ tʼâ la vwàmá nɛ́ nɛ yõ̌ yé.
30 Èta myɛ,
lyì bʼa zɛ̃̀ ámyɛ̌ cìcì wẽ́ ǹdə́ kɔma,
bə bʼe vwɛ̃ Kristə kwã-lyì nánzhəzhɔ̌ bə tó bə̀ kùrə̀.
31 Rə̀myɛ́ ce,
dɛ̃̌na á cìnə̀,
sʼá lyǐrh bʼà yàl nɛ́ ǹdʼába byinə nə̀tɔ̀,
sə à yʼà nʼâ cící ába twéé twéé ǹdə́ yə́-nàná.
32 “Èlâsɛ̃´,
à nʼâ yẽ̌ ába à ce Yi jɔ̃̀ wà,
sə rə̀ sónó zɔ̀mɛ̀ rɛ́ yìlì ába,
bə̀ zɔ̀mɛ̀ rɛ́ rə̀myɛ́ wɔ̌ rə̀ bʼa súlí á jàn,
rə ce á nə cəl nə̀cɛ̀ndɛ́ tɛ̀bɛ́ Yi cĩ́ rə̀ lyì bí ni mú wẽ́.
33 À yə̀ lò wɛ́rɛ́ ǹdə́ lò sánə́má ǹdə́ lò gɔ̀nɔ̀ yâl yé.
34 Á cìcì yě bə̀ wɔ́ à jɛ̀sɛ́ shɛ̀bɛ́ èta mɔ́ à bʼa twĩ̀ a nə àmyɛ́ ǹdə́ à tó-dwã bɛ́ ga nyí kùjú.
35 À byili ába twéé gakó bə̀ twĩ̌nə èta,
mùnì á ŋwɛ̀nɛ́ á sɛ̃ nə̀mwà nɛ̀,
sʼá lyǐrh Cinu Yezu cìcì zɔ̀mɛ̀ rɛ́.
Ń wòwə̀:
‘Lò mɔ̀bɔ́ ǹ nə́ ǹ pɛ,
ǹ wɔ́ wu-nyɔ̃̀ cí du lò mɔ̀bɔ́ bə̀ nʼê pɛ mɔ.’ ”