Bə̀ cír lyì bwàlpyɛ̀ bə̀ la tùntúmə́ bé ne sãɔ̃
6
Dwã nɛ́ nə̀myɛ́ wẽ́,
Kristə kwã-lyì bí yʼà nʼê súlí.
Zhwifubá byɛ̀bɛ́ bə̀ nʼê zɔ̀m gə̀rɛ́kɛ mɔ́ zɛ̃̀ bə̀ nʼê ŋwɔ́ŋwɔ̌ ǹdə́ byɛ̀bɛ́ bə̀ wɔ́ cɔ w lyì bí mú,
bə̀ zhe:
“Dɛ̃ gakó,
bə̀ gə la kùjú w tə́l,
bə̀ nʼê swě nə́myɛ̌ ejə̀nə̀ bé yò.”
2 Tùntúmə́ bé shí ǹdə́ bə̀lyè y zɛ̃̀ bə ce bə byẽ̀ Kristə kwã-lyì bí dwã bɛ́ gakó dwã yó,
bə wɔ̀ bɛ:
“Nə́myɛ̌ bə mə̂ sə nə́ yẽ̌ Yi zɔ̀mɛ̀ rɛ́ bwə̂l mó ne nə́ kʼá nʼé nyǐ kùjú tə́l yò yé.
3 Rə̀myɛ́ ce,
da-byâ,
círnə lyì bwàlpyɛ̀ á wẽ́,
sʼe yə̀ lyì byɛ̀bɛ́ á yě bə̀ bə̀ wɔ́ lyì-twə̂rh bə̀ zhe surhə,
bə̀ sú ǹdə́ Eshirhə náàcɛ̀nɛ́,
nə́ bʼâ pə bɛ tum dí rə̀myɛ́.
4 Sə nə́myɛ̌ jʼá nʼé nyǐ Yi-co w ǹdə́ Yi zɔ̀mɛ̀ rɛ́ bwə̂l mó yò.”
5 Bə̀ gakó shɛ̀nɛ́ dɛ̀bɛ́ tùntúmə́ bé byili mú,
bə zɛ̃̀ bə cír Ecẽẽ.
Ń yà ń zhí Yi ni dɛ̃´dɛ̃´,
n jà ń yà ń sú ǹdə́ Eshirhə náàcɛ̀nɛ́.
Bə̀ cír Shilipu myɛ,
e súlí Pɔrɔkɔɔrɛ,
ǹdə́ Nəkanɔɔrɛ,
ǹdə́ Timo,
ǹdə́ Parəmɛnaasɛ,
ǹdə́ Ancɔɔsɛ lyì bal mə̀dù ń yíl Nəkwala.
Ń yà ń zù Zhwifubá Yi-sɔ́má y shãã ga.
6 Bə zə bɛ bə bə̀ tùntúmə́ bé sõ.
Tùntúmə́ bé cĩ́ jɛ̀rh bə̀ yó,
bə lwə̀l Yi bə̀ yilə.
7 Yi zɔ̀mɛ̀ rɛ́ yʼà jʼâ nʼê yí jààsɛ́ gakó wə.
Kristə kwã-lyì bí yʼà nʼê súlí Zhərəzalɛm nɛ́.
Zhwifubá vwĩ̀-zwə́lnə bé myɛ nánzhəzhɔ̌ shɛ̀nɛ́ bə zù Kristə.
Bə̀ zɔ Ecẽẽ
8 Yi yʼà cĩ́ bwəl Ecẽẽ yó,
rə pɔ̃ jàn.
Ń yà ń nə́ ń wɛ̀rhɛ́ màmyaarhɛ ǹdə́ wò-jààrɛ̀ lyì bí wẽ́.
9 Rə̀myɛ́ yó,
lyì jàlà zɛ̃̀ bə̀ nʼê mà nyə̀-pâr ǹdə́ mɔ.
È yʼà wɔ́ Zhwifubá byɛ̀bɛ́ bə̀ shí Shərɛnɛ ǹdə́ Alɛsãdəri,
bə̀ wɔ́ dwã-gùlú jì y bə̀ nʼê byẽ̀ bə̀ “Yómə́ bə̀ nɔ bə̀ cìn-cìnú” mú lyì,
e súlí lyì byɛ̀bɛ́ bə̀ shí Shilishi ǹdə́ Azhi tənèsé wə.
10 Sə Eshirhə náàcɛ̀nɛ́ yʼà nʼê pɛ mɔ surhə ń mə́ ń zɔ̀mà.
Rə̀myɛ́ ce bə̀ yə̀ ŋwɛ̀nɛ́ bə zɔ̀m bə ji mu tɛ̃´ yé.
11 Bə zɛ̃̀ bə kɔ̃̀ lyì.
Lyì bí bə̀myɛ́ mɔ́ wɔ̀:
“Nə́ nyɛ̀ɛ̀ ń nyú w ń nə́ ń tùrh Muyiisi ǹdə́ Yi ga.”
12 Cɔ w lyì bí ǹdə́ náncɛsɛ́ ǹdə́ Muyiisi nyə́ né byilnə bé lyimə zɛ̃̀,
bə zə mɔ bə mʼe vò bùrsí gùlú w nánfɔ̀lɔ̀ w lyì bí yé né,
13 bə ce lyì dwã myɛ yí bə̀ nʼê gòm kɔma bə̀ ce ń nyí ni bə̀ zhe:
“Bal mɔ́ mɔ̀bɔ́ já ń nə́ ń fulsi Yi jì y ǹdə́ Muyiisi nyə́ né ga.
14 Nə́ nyɛ̀ɛ̀ ń nyú w ń zɔ̀m bə̀ Nazarɛtɛ lyì bal Yezu mú mà n wǔr Yi jì y n jà n lyə́r lùl-e-pwírí nyə́ né nyɛ̀bɛ́ Muyiisi byili nə́ba mó.”
15 Rə̀myɛ́ yó,
bùrsí gùlú w lyì bí gakó kwẽ̌ bə̀ nʼê nyǐ mu shɛ́shɛ́,
bə pwírí ń yé y nyɛ̌ ǹdə màlɛ́ka yé ta.