Pwəə nə́ ń byili Kɔrɛ̃tɛ Kristə-lyì bí ni bə̀ bə̀ mə̂ sə bə sɛ̃ bə̀ da-byâ bɛ́ Zhərəzalɛm nɛ́ mɔ́ nɛ
8
Da-byâ,
nə́ rʼé yâl nə́ byili ába yò-ècɔ̀nɔ̀ w kɔ̀bɔ́ Yi wɛ̀rhɛ́ Masɛdwanɛ Kristə-lyì gùúlí ni mú.
2 Zwini zɔ bɛ dɛ̃´dɛ̃´,
sə ǹdə́ rə̀myɛ́ ga,
bə̀ wun yàl nyɛ̀n dɛ̃´dɛ̃´.
Bə̀ wɔ́ nə̀mwà,
sə ǹdə́ rə̀myɛ́ ga,
bə̀ pɔ bə̀ jɛ̃̀-kɔn dɛ̃´dɛ̃´ ǹdə́ bə̀ wun gakó.
3 Bə̀ pɔ ǹdə bə̀myɛ gə́ zhe né;
bə̀ gaga mɔ́ pɔ kɔn dwini bə̀ gə́ zhe né.
Àmyɛ́ cìcì mú nɔ bə̀ gə́ pɔ nɛ́ ǹdə́ à yírh:
bə̀ pɔ ǹdə́ bə̀ sə̀pwà pùbùlə̀.
4 Bə̀ lwə̀l nə́ba ǹdə́ bə̀ wun gakó bə̀ nə́ zwẽ bə̀ pansɛ́,
nə́ vò nə́ pə Zhərəzalɛm nɛ́ bə mʼe sɛ̃ Kristə-lyì bí ni.
5 Bə̀ jɛ̀rɛ̀ bə pə bə̀ cìn Cinu ni,
fòró bə zɛ̃̀ bə pə bə̀ cìn nə́myɛ nɛ ǹdə Yi gə́ nʼê yâl nɛ́.
Bə̀ pɔ bə̀ cìn dɛ̃´dɛ̃´ kɔn lyɛ̃ nə́ gə́ yʼâ nʼé bùl né.
6 Nə́ lwə̀l Titi bə̀ ń já n twĩ̀ nɔ̀nɔ̀-dǔr tum dí tɛ̀bɛ́ ń ju rə̀ kùr á sõ Zhərəzalɛm lyì bí yil mó,
n báásɛ.
7 Á zhí Kristə ne ǹdʼá wun gakó,
á mʼá nʼá wɛ̀rhɛ́ kɔn gakó cɛ̀nɛ̀:
á nʼá bwə̀l Yi zɔ̀mɛ̀ rɛ́ cɛ̀nɛ̀,
á yě zhə̀n dɛ́ gə́ wɔ́ nɛ́,
á zhe yə̀wâl,
á só nə́ba.
Rə̀myɛ́ gakó wɔ́ nə̀cɛ̀ndɛ̀ nánfɔ̀lɔ̀ á zhe.
Sə nə́ rʼé yâl sʼá ce jàn nɛ́ á zə yə̀wâl ǹdə́ nɔ̀nɔ̀-dǔr tum dí rə̀myɛ́ mɔ́ myɛ.
8 È də̀ nyí à nʼâ pɛ ába yé.
Wɔ́ yál à nʼâ yâl bʼâmyɛ zə yə̀wâl ǹdə Kristə-lyì gùúlí dwã bɛ́ ta,
mùnì ga á byili bʼâ zhe sónó zhə̀nà.
9 Á yě nə́ Cinu Yezu Kristə gə́ só nə́ba nɛ́.
Ń yà ń zhe kɔn gakó,
sə ń shɛ̀nɛ́ n zə ń cìn n yə̀ nə̀mɔ̀ ámyɛ̌ yilə,
mùnì n tó nə̀mɔ̀ɔ̀rɛ́ rə̀myɛ́ dɛnnɛ n ce á jǐrh nə̀cɛ̀nà.
10-11 Wɔ́ kɔn dɛ̀bɛ́ à nʼâ bùl yò w òmyɛ́ shò-kwã nɛ́ mɔ́ à nʼâ byili ába.
Wɔ́ ámyɛ̌ á tó yé á tɛ́rɛ́ tum dí rə̀myɛ́ yò jẽ̀ nè ga,
á jʼâ jɛ̀rɛ̀ lyì bí gakó á twĩ̀ dì.
Èlâsɛ̃´,
cə̀ə̀lènə̀ á nʼá twĩ̀ tum dí rə̀myɛ́ ǹdʼá wun gakó,
á pə kɔn dɛ̀bɛ́ á zhe mó kɔn tó ǹdə á gə́ ju kùr á bù ní.
Wɔ́ rə̀myɛ́ rə̀ wɔ́ kɔn dɛ̀bɛ́ rə̀ zhe kùr á yilə.
12 Lò gə nə́ ǹ pɛ kɔn dɛ̀bɛ́ ǹ zhe ǹdə́ ǹ pùbùlə̀,
Yi nʼê zwẽ de.
È də̀ tɛ̀bɛ́ ǹ bə zhe mó rə̀ nʼê yí Yi pùbùlə̀ yé.
Wɔ́ tɛ̀bɛ́ ǹ zhe ń pə rɛ mɔ́ rə̀ nʼê yí rə̀ pùbùlə̀.
13 È də̀ yál à nʼâ yâl bʼâ kwě kɔn dɛ̀bɛ́ á zhe mó gakó á bʼá sɛ̃ lyì dwã nɛ,
ámyɛ̌ zɛ̃̀ á jǐrh zúzúnú cìnə́ yé.
Wɔ́ yál à nʼâ yâl bʼâmyɛ̌ ǹdə́ bə̀myɛ́ ga myɛrhɛ dwã.
14 Èlâsɛ̃´,
ámyɛ̌ gə́ zhe dɛ̃´dɛ̃´ mɔ́ ce,
á wɔ̌ á mʼâ sɛ̃ byɛ̀bɛ́ bə̀ bə kaka zhe mó ne.
Èta,
ámyɛ gə tú á kʼá bə kaka zhe,
ǹdə́ bə̀myɛ gə zhe dɛ̃´dɛ̃´,
bə̀ wɔ̌ bə̀ mʼa sɛ̃ ámyɛ nɛ.
Èta,
á gakó bʼâ myɛrhɛ dwã.
15 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Lò mɔ̀bɔ́ ń yà ń pwà kùjú dɛ̃´dɛ̃´ myɛ,
ò myɛrhɛ ǹdə́ ń jú.
Lò mɔ̀bɔ́ ń yà ń kə́ ń pwà námpɔ́lɛ́ myɛ,
ò yə̀ ń jú mwìrì yé.”
16 À nʼâ ce Yi nə̀báná,
bə̀ wɔ́ rə̀myɛ́ rə̀ co yə̀wâl Titi wẽ́ ń nə́ ń yâl n sɛ̃ ába ǹdə àmyɛ ta.
17 Titi shɛ̀nɛ́ kɔn dɛ́ dɛ̀bɛ́ nə́ lwə̀l mò mó nyí.
Ń zwẽ nyí ǹdə́ ń sə̀pwà pùbùlə̀ ń bàn á sõ ǹdə́ ń wu gakó.
18 Sə nə́ bʼâ ce nə́ da-byǐ mə̀dù tó mo ń bà.
Nə́ da-byǐ mú ńmyɛ̌ mɔ́ nə́ ń bwə̀l yò-ècɔ̀nɔ̀ nyí rí ǹdə́ yə̀wâl,
ce Kristə-lyì gùúlí nʼê zɔ̀m ń yil náàcɛ̀nɛ́.
19 Wɔ́ gùúlí lyì bí bə̀ súlí bə cír mo ń la nə́ba tó nə́ zə pansɛ́ nə́ mʼé vò nə́ pə Zhərəzalɛm Kristə-lyì bí ni.
Wɔ́ tum dí rə̀myɛ́ nə́ rʼé twĩ̀ nə́ mʼé sɛ̃ lyì bí dwã bɛ́ nɛ Cinu yil lé còrhó yilə.
20 Bə̀ pɔ nə́ba wársɛ dɛ̃´dɛ̃´ sə nə́ bʼâ nyǐ sə̀ yò cɛ̀nɛ̀.
Wɔ́ rə̀myɛ́ è ce nə́ tʼá yâl sə bə tó sə̀ dɛnnɛ bə zhìlì nə́ yil yé.
21 Nə́ rʼé pyà sə nə́ twĩ̀ cɛ̀nɛ̀.
È bə̀kʼa yə̀ Cinu dúdú yírh w yé.
Nə́ rʼé pyà sə nə́ twĩ̀ cɛ̀nɛ̀ numbyínsi myɛ yírh wə.
22 Nə́ ce nə́ da-byǐ dõ la bɛ tó ń bà.
Ń zhe dwã nɛ sãɔ̃ tum dí yə̀wâl.
Nə́ cìcì mú nɔ rə̀myɛ́ twər nánzhəzhɔ̌ ǹdə́ nə́ yírhə́.
Ń gə́ zɛ̃̀ ń zhe á zhə̀n dɛ̃´dɛ̃´ èlâsɛ̃´ mɔ́ ce,
ń gaga mɔ́ nə́ ń yâl n ce yə̀wâl nɛ́ ǹdə́ tum dí rə̀myɛ́ dwini shãã ga.
23 È gə wɔ́ Titi yilə,
ńmyɛ̌ wɔ́ à tó-dõ,
nə́ rʼé tó dwã nə́ twĩ̀ á yilə.
Sə byɛ̀bɛ́ bə̀ tó mo bə̀ bàn mɔ́ wɔ́ Kristə-lyì gùúlí rə̀ twĩ̀ bì.
Bə̀ wɔ́ lyì byɛ̀bɛ́ bə̀ nʼê twĩ̀ Kristə yil lé còrhó yilə.
24 Cenə bə lwar bʼâ só be zhə̀n zhə̀nà.
Gùúlí lyì bí gə nyɛ̀ɛ̀ rə̀myɛ́,
bə̀ mʼa lwar bə̀ nə́ gə́ byili bi bə̀ nə́ wun nyɛ̀ ǹdʼába mɔ́ wɔ́ zhə̀nà.