Kɔn dɛ́ dɛ̀bɛ́ Pwəə yà ń bwə̀l n byili Kɔrɛ̃tɛ Kristə-lyì bí ni mú
2
Da-byâ,
à gə́ yʼà tú á sõ a bwə̀l Yi zhə̀n dɛ́ rə̀ yʼà shèè a byili ába mó,
à yə̀ rɛ̀ bwə̀l ǹdə́ nyì-gwàl ráá lũ w surhə yé.
2 Rə̀myɛ́ yi ní,
kaka dõ yò yʼà yə̀ nɛ̀ zwì,
è súlí Yezu Kristə yò w ne yé;
kɔn du,
Yezu Kristə də̀-jɔrhɔ́ w yó pəpa mɔ́ yò w ò zù nì.
3 Kɔn súlí myɛ,
à gə́ yʼà ŋwɛ́nɛ́ á sõ yi ní,
à yə̀ à cìn zə a yə̀ kàndɔ yé,
ywẽ yʼà zhe ne à nʼâ kəkə.
4 À yə̀ à kàrmɔ́ cèrhè a bwə̀l yò-ècɔ̀nɔ̀ nyí rí ǹdə́ nyì-gwàl ǹdə́ numbyíní surhə yé.
Wɔ́ Eshirhə náàcɛ̀nɛ́ è yʼà nʼê byili è jàn dɛ́ nánfɔ̀lɔ̀ w pamparɛ̃ɛ̃ à kàrmɔ́ wẽ́.
5 Èta,
á Yi-ni-zhú mú yə̀ numbyíní surhə wẽ́ shí yé;
wɔ́ Yi jàn dɛ́ wẽ́ mə̀ shí ní.
Pwəə nə́ ń zɔ̀m surhə nyɛ̀bɛ́ nə̀ nʼê shí Yi sõ mó yò
6 E jà wɔ́ surhə nə́ rʼé bwə̀l nə́ byili lyì bí byɛ̀bɛ́ bə̀ jǐrh námpwə̀lə́ Yi-ni-zhú mú wẽ́ mó ne.
Sə è də̀ lũ w kɔ̀bɔ́ surhə né,
ráá ò pyâ bɛ́ bə̀ la tɛ̃´ jó mó surhə yé.
7 Wɔ́ surhə nyɛ̀bɛ́ nə̀ nʼê shí Yi sõ,
sə nə̀ shèè numbyínsí yé né.
Yi yʼà dámâ rə tɛnɛ surhə né nə̀myɛ́ rə cĩ́ ǹdə́ lũ w yʼà gwẽ̌ tɛ̀nɛ́ yé,
rə̀ la bʼe ce nə́ tó nə́ nə rə̀ zùwə́ yə́.
8 Lũ w kɔ̀bɔ́ pyɔ̌ mə̀dù ga yə̀ surhə né nə̀myɛ́ mɔ́ nɛ yé.
Bə̀ gə yʼà nɔ nɛ,
bə̀ gə yə̀ Cinu mú ń wɔ́ zùwə́ cə́bal mɔ́ də̀-jɔrhɔ́ yó pəpa yé.
9 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Yi tɛnɛ kɔn rə̀dù byɛ̀bɛ́ bə̀ só re mó yilə,
sə lò yírh gwẽ̌ yə̀ rɛ nɛ yé,
lò zhɛ̃̌ gwẽ̌ yə̀ rɛ̀ nyɛ̀ɛ̀ yé,
numbyíní gwẽ̌ yə̀ rə̀ bùl è wẽ́ myɛ yé.”
10 Wɔ́ nə́myɛ̌ nɛ Yi byili ri ǹdə́ rə̀ Eshirhə y jàn,
bə̀ Eshirhə y nʼê nyǐ kɔn gakó,
bá tɛ̀bɛ́ rə̀ shèè Yi surhə wẽ́ mó myɛ.
11 Mɔ̌ lò ń wɔ̌ ń mà n lwar kɔn dɛ̀bɛ́ rə̀ ŋwɛ́nɛ́ numbyíní wu wẽ́?
È gə də̀ è cìcì,
lò lò wàr ń mà n lwar yé.
Èta myɛ,
wɔ́ mɔ̌ ń mà n lwar kɔn dɛ̀bɛ́ rə̀ ŋwɛ́nɛ́ Yi wẽ́?
Lò lò wàr ń mà n lwar,
ǹdə́ è gə də̀ rə̀ Eshirhə y yé.
12 È də̀ lũ w éshìrhə́ y nə́myɛ̌ nɔ yé.
Wɔ́ Yi Eshirhə yə́.
Rə̀myɛ́ ce,
nə́ wɔ̌ nə́ lwar pansɛ́ shɛ̀bɛ́ Yi pɔ nə́ba mɔ́ kùrə̀.
13 Nə́ tʼá zɔ̀m pansɛ́ sə̀myɛ́ mɔ́ yò ǹdə́ lũ w surhə né yé.
Nə́ rʼé zɔ̀m sə̀ yò ǹdə́ surhə né nyɛ̀bɛ́ Yi cìcì Eshirhə y nʼê pɛ nə́ba mɔ́.
Èta,
nə́ rʼé zɔ̀m Eshirhə y yò ǹdə́ zɔ̀mà nɛ́ nyɛ̀bɛ́ èmyɛ́ cìcì byili nə́ba mɔ́.
14 Lò mɔ̀bɔ́ ǹ nə́ ǹ bùl lũ w nyə̀ná nɛ́ dúdú,
ǹ tá ǹ zwẽ Yi Eshirhə y nyə̀ná nɛ́ yé.
Yi Eshirhə y nyə̀ná nɛ́ nyɛ̌ ǹdə nyə̀nyààrɛ̀ ta ǹ yilə;
ǹ wàr nə̀ kùrə̀ ǹ la lwar yé.
Wɔ́ Eshirhə y dúdú è nʼê ce lò ŋwɛ̀nɛ́ ń lwar è nyə̀ná nɛ́ ǹdə́ lũ w nyə̀ná nɛ́ pár dwã wa.
15 Lò mɔ̀bɔ́ Yi Eshirhə y ŋwɛ́nɛ́ ǹdə́ mɔ́,
ǹ wɔ̌ ǹ lwar kɔn gakó pár dwã wa,
sə lò wàr ń mà n lwar ǹmyɛ́ yé-shò yé.
16 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Mɔ̌ lò ń yě kɔn dɛ̀bɛ́ Cinu nə́ ń bùlə̀?
Mɔ̌ lò ń wɔ̌ ń mà n pɔ̃ cícú?”
Sə nə́myɛ̌ wɔ̌ nə́ lwar Kristə bùlə̀ né.