Pwəə sɛ́bɛ́ rɛ́ nã́yéé ré ń kɛ̃ n pə
Kɔrɛ̃tɛ
Kristə-lyì bí ni mú
Pwəə nə́ ń ce Kɔrɛ̃tɛ Kristə-lyì bí
1
1-2 Àmyɛ́ Pwəə,
Yi byẽ̀ nè ǹdə́ rə̀ pùbùlə̀ bʼà yál Yezu Kristə tùntúm.
Wɔ́ àmyɛ́ ǹdə́ nə́ da-byǐ Sɔsətɛnnɛ nə́ rʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ byɛ̀bɛ́ á wɔ́ Yi gùlú w lyì bí,
á ŋwɛ́nɛ́ Kɔrɛ̃tɛ nɛ́ mɔ́ nɛ pɔ.
Yi byẽ̀ ába bʼâ yál rə̀ lyì Yezu Kristə jàn yilə,
ǹdə́ byɛ̀bɛ́ bə̀ ŋwɛ́nɛ́ jààsɛ́ gakó wẽ́,
bə̀ nʼê cèrhé Yezu Kristə mó,
ń wɔ́ nə́myɛ̌ ǹdə́ bə̀myɛ́ ga Cinu.
3 Nə́ Da Yi ǹdə́ Cinu Yezu Kristə bʼa cĩ́ bwəl á yó,
sə bə pə ába yə̀-zùlə́!
Pwəə nə́ ń ce Yi nə̀bán rə̀ yò-ècɛ̀nà nɛ́ yilə
4 À nʼâ ce Yi nə̀bán á yil twéé gakó yò-ècɛ̀nà nɛ́ nyɛ̀bɛ́ rə̀ wɛ̀rhɛ́ ába Yezu Kristə jàn yil mó yilə.
5 Zhə̀nà,
Yi pɔ ába rə̀ pansɛ nánzhəzhɔ̌ Yezu Kristə yilə.
Sə kɔn du,
rə̀ pɔ ába rə̀ zɔ̀mɛ̀ rɛ́ bwə̂l mó,
rə jʼa pə ába lárma.
6 Bə̀ bwə̀l Kristə yò w bə byili ába,
sə á zwẽ ò nyí zhə̀nà.
7 Rə̀myɛ́ ce,
Yi pɛnɛ́ èdù ga yə̀ ámyɛ̌ byɛ̀bɛ́ á nʼá dɛ̃̀ nə́ Cinu Yezu Kristə twírí y mú mwìrì yé.
8 Wɔ́ Yi rə̀ bʼa ce á zhì kẽkẽ kɔn mʼe yí dɛ̃ rɛ́ tɛ̀bɛ́ nə́ Cinu Yezu Kristə mà n ká n bə̀ mɔ́,
sə yò tʼâ la á yó w yál ń twírí y yù w yé.
9 Yi wɔ́ zhə̀n-cí.
Wɔ́ rə̀myɛ́ rə̀ byẽ̀ ába bʼâ mú rə̀ Byǐ nə́ Cinu Yezu Kristə ne mó.
Pɔrá bə mə̂ sʼe yə̀ Kristə-lyì gùlú w wẽ́ yé
10 Da-byâ,
à nʼâ lwə̀l ába nə́ Cinu Yezu Kristə yil lé yilə:
nyɛ̀ɛ̀nà dwã zɔ̀mà kùrə̀;
pɔrá bə̀kʼa yə̀ á bwə̂l w yé;
cenə á nyí yə̀ rə̀dù námpúm;
cenə á pùbùlə̀ né yə̀ rə̀dù,
sə á surhə né myɛ yə̀ rə̀dù.
11 Zhə̀nà,
da-byâ,
lyì shí Kolowe dǒ sõ bə bʼe byili ni bʼâ nyí bə dwã mə̂ yé.
12 Kɔn dɛ̀bɛ́ à nʼâ yâl a wɔ̀ mɔ́,
wɔ́:
á jàlà nʼê wə̀l bə̀ bə̀myɛ́ wɔ́ Pwəə kwã-lyì,
jàlà wɔ̀ bə̀ bə̀myɛ́ wɔ́ Apɔlɔɔsɛ kwã-lyì,
jàlà myɛ wɔ̀ bə̀ bə̀myɛ́ wɔ́ Kəfaasɛ* kwã-lyì,
jàlà wɔ̀ bə̀ bə̀myɛ́ wɔ́ Kristə kwã-lyì.
13 Kristə bɔ̀n dwã w kə̀kàlsɛ̀ nánzhəzhɔ̌ nà?
Wɔ́ Pwəə bə̀ pəpa də̀-jɔrhɔ́ w yó á yil nà?
Nà wɔ́ Pwəə yil lé yil á zwẽ nɛ̃̌-shɔ wá?
14 À nʼâ ce Yi nə̀báná à gə́ yə̀ nɛ̃̌-shɔ á mə̀dù ga nɛ pɛ mɔ́ yilə.
Wɔ́ Kərsəpuusi ǹdə́ Gəyuusi dúdú ni àmyɛ́ pɔ nɛ̃̌-shɔ.
15 Èta,
lò lò wàr ń mà n wɔ̀ bə̀ wɔ́ àmyɛ́ yil lé yil ń zwẽ nɛ̃̌-shɔ yé.
16 Zhə̀nà,
à pɔ nɛ̃̌-shɔ Sətəfanaasɛ kɛ̀lɛ́ y lyì bí ni,
sə à tʼâ bùl bʼà pɔ nɛ̃̌-shɔ lò dõ ne yé.
17 Kristə yə̀ nɛ̀ twĩ̀ bʼà pə nɛ̃̌-shɔ yé.
Ń twĩ̀ nì bʼà bwə̂l yò-ècɔ̀nɔ̀ nyí rí,
sə à bə̀kʼa bwə̀l lè ǹdə́ numbyínsi lárma zɔ̀mà yé.
Èta,
ń cu mú də̀-jɔrhɔ́ w yó mó tʼâ la nánfò yál yé.
Yi tó Yezu Kristə dɛnnɛ rə byili nə́ba rə̀ cìcì surhə né
18 Bə̀ gə́ nʼê bwə̀l bə̀ Kristə cù də̀-jɔrhɔ́ w yó mó,
zɔ̀mà nɛ́ nə̀myɛ́ nyɛ̌ ǹdə nyə̀nyààrɛ̀ ta byɛ̀bɛ́ bə̀ yò nʼô yâl o zhìlì mú yilə.
Sə è gə wɔ́ nə́myɛ̌ byɛ̀bɛ́ nə́ ŋwɛ́nɛ́ vwârh mɔ́ sɔ́má y yó mó yilə,
nə̀ wɔ́ Yi jàn.
19 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀:
“À bʼa cɔ̀ surhə cìnə́ bé surhə né;
a ce lárma cìnə́ bé lárma mɔ́ jǐrh nánfò.”
20 Surhə cə́bal nə kə́ ń zhe kùrə̀?
Byɛ̀bɛ́ bə̀ nʼê byili nyə́ né bə̀ dwã bɛ́ nɛ mɔ́,
ǹdə́ byɛ̀bɛ́ bə̀ yě lũ w kɔ̀bɔ́ zɔ̀mà nɛ́ zɔ̌m mɔ́,
bə̀myɛ nə kʼê zhe kùrə̀?
Nyǐnə Yi ce lũ w surhə né jǐrh nyə̀nyààrɛ̀ kɔna.
21 Lũ w lyì bí nɔ Yi surhə né,
sə bə̀ yə̀ ŋwɛ̀nɛ́ bə lwar Yi pár ǹdə́ bə̀ cìcì surhə né yé.
Wɔ́ rə̀myɛ́ è ce,
rə̀ zɔ̀mɛ̀ rɛ́ rə̀ nyɛ̌ ǹdə nyə̀nyààrɛ̀ kɔn ta mɔ́,
Yi pwírí kɔn mə̂ bə̀ rə̀ vwârh lyì bí byɛ̀bɛ́ bə̀ zù rì zɔ̀mɛ̀ rɛ́ rə̀myɛ́ jàn yil mó.
22 Zhwifubá nʼê yâl bə nə màmyaarhɛ;
byɛ̀bɛ́ bə̀ də̀ Zhwifubá mó nʼê yâl surhə zɔ̀mà.
23 Sə nə́myɛ̌ wɔ́ Kristə mó bə̀ pəpa də̀-jɔrhɔ́ w yó mó yò nə́ rʼé bwə̀l nə́ byili.
Zhwifubá bə shɛ̀ rə̀myɛ́ yò yé;
rə̀ wɔ́ nyə̀nyààrɛ̀ kɔn byɛ̀bɛ́ bə̀ də̀ Zhwifubá mó yilə.
24 Sə è gə wɔ́ byɛ̀bɛ́ Yi byẽ̀ mó yilə,
ǹ gə wɔ́ Zhwifu,
ǹ gə də̀ Zhwifu myɛ,
Kristə wɔ́ Yi jàn ǹdə́ rə̀ surhə.
25 Tɛ̀bɛ́ bə̀ nʼê bùl bə̀ rə̀ wɔ́ nyə̀nyààrɛ̀ kɔn Yi yil mó,
du numbyíní surhə;
tɛ̀bɛ́ bə̀ nʼê bùl bə̀ rə̀ wɔ́ nə̀bwɛ̀nɛ̀ kɔn Yi yil mó,
du numbyíní jàn.
26 Da-byâ,
nyǐnə ámyɛ̌ byɛ̀bɛ́ Yi byẽ̀ mó wẽ́ á nyìwé:
è gə wɔ́ lũ w nyə̀ná nɛ́ yilə,
surhə cìnə́ bə já á wẽ́ yé,
jàn cìnə́ myɛ bə já yé;
e jà lyì-fwààlɛ̀ myɛ bə já yé.
27 Sə Yi cír kɔn dɛ̀bɛ́ rə̀ wɔ́ nyə̀nyààrɛ̀ kɔn lũ w yil mó,
rə bʼe ce surhə cìnə́ cìzhìlə̀.
Rə cír kɔn dɛ̀bɛ́ rə̀ wɔ́ bə-jàn-zhəəre kɔn lũ w yil mó,
rə bʼe ce jàn cìnə́ cìzhìlə̀.
28 Yi cír kɔn dɛ̀bɛ́ rə̀ bə kùr zhe,
tɛ̀bɛ́ rə̀ yə̀ yírh swí,
tɛ̀bɛ́ rə̀ də̀ kaka lũ w yil mó,
rə bʼe cɔ̀ kɔn dɛ̀bɛ́ rə̀ zhe kùr ò yil mó.
29 Rə̀ wɛ̀rhɛ́ èta,
mùnì ga lò lò bə̀ká n zhẽ̌ ń cìn dɛ̃̌ rə̀myɛ́ Yi yé né yé.
30 Wɔ́ rə̀myɛ́ rə̀ mù ába dwã nɛ ǹdə́ Yezu Kristə.
Wɔ́ Kristə ń jǐrh surhə né nə̀ shí Yi sõ nə́myɛ̌ yil mó.
Wɔ́ ńmyɛ̌ jàn yil Yi ce nə́ kʼé bə dwə́ə́re zhe,
rə ce nə́ jǐrh rə̀myɛ́ lyì námpúm,
rə zwẽ nə́ba nə́ yə̀-bəlwàálɛ́ wẽ́,
31 mùnì kɔn yə̀ ǹdə bə̀ gə́ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ né.
Bə̀ kɛ̃ bə wɔ̀:
“Lò mɔ̀bɔ́ ǹ nə́ ǹ yâl ń cèrhé ǹ cìnə̀,
sə́ cèrhé ǹ cìn kɔn dɛ́ dɛ̀bɛ́ Cinu wɛ̀rhɛ́ mɔ́ yilə.”