Pwəə cĩ́ ń nyí yò pyɔ̌ Agərəpa nɛ
26
Agərəpa wɔ̀ Pwəə ne:
“Ǹ wɔ̌ ǹ zɔ̀m èlâsɛ̃´.”
Pwəə zɛ̃̀ n zhẽ̌ ń jɛ̃̀ dɛ̃̌ n wɔ̀:
2 “Pyɔ̌ Agərəpa,
à gə́ zhǐ ǹ yé né zà à la byili ywẽ̀ né nyɛ̀bɛ́ gakó Zhwifubá nʼê cĩ́ à yó w mó ce à wu nyɛ̀,
3 bə̀ ǹ yě bə̀ lùl-e-pwírí y ǹdə́ bə̀ nyə̀-pàárɛ́ gə́ wɔ́ nɛ́ náàcɛ̀nɛ́.
Rə̀myɛ́ ce,
à nʼâ lwə̀l mɔ́,
sə́ zhìlì ǹ yala nɛ ń cili kɔn dɛ̀bɛ́ à la zɔ̌m.
4 “Zhwifubá gakó yě à gə́ yàl nɛ́ à bə̀swɛ́nɛ́ yi ní ga à dwí rí wẽ́ ǹdə́ Zhərəzalɛm nɛ́.
5 Bə̀ yě à pár kɔn dɛnɛ.
Bə̀ yě bʼà wɔ́ Farɛzhɛ̃ɛ̃,
e jʼà wɔ́ Farɛzhɛ̃ɛ̃bá bə̀ zum dɛ̃´dɛ̃´ Muyiisi nyə́ né zõ mó yil du bə̀ dwã bɛ́.
Zhwifubá gə nʼê yàlá,
bə̀ wɔ̌ bə̀ byili bə̀ nyǐ rə̀myɛ́ wɔ́ zhə̀nà.
6 À nʼâ dɛ̃̀ kɔn dɛ́ dɛ̀bɛ́ Yi bwəl rə̀ nyí nə́ nàmbala bɛ́ nɛ mɔ́.
Wɔ́ rə̀myɛ́ yil bə̀ zɔ nɛ èlâsɛ̃´ bə̀ mʼê bùrə̀.
7 Nə́ dwí rí kwálsɛ́ shí ǹdə́ sə̀lyè y lyì bí nʼê dɛ̃̀ kɔn dɛ́ dɛ̀bɛ́ Yi bwəl rə̀ nyí mú,
bə̀ mʼê cèrhé Yi cəcɛ̃ ǹdə́ nə̀nyɔ́nɔ́.
Pyɔ̌ Agərəpa,
àmyɛ nʼâ dɛ̃̀ kɔn dɛ́ rə̀myɛ́ mɔ́.
Wɔ́ rə̀myɛ́ yil Zhwifubá nʼê cĩ́ ywẽ̀ à yó wə.
8 Wɔ́ byè yil ámyɛ̌ Zhwifubá nə tʼá yâl á zwẽ nyí bə̀ nyǐ Yi mʼa bwìrhì cùùrì?
9 “Àmyɛ́ cìcì mú yʼà nʼâ bùl bʼà mə̂ sʼa wɛ̀rhɛ́ à gə́ wɔ̌ nɛ́ gakó a cɔ̀ Nazarɛtɛ lyì bal Yezu yil lé.
10 Wɔ́ èta à yʼà nʼâ wɛ̀rhɛ́ nɛ́ Zhərəzalɛm nɛ́.
Yi jì y vwĩ̀-zwə́lnə bé yé né cìnə́ bé yʼà pɔ nɛ sɔ́má à nʼâ zal Yi lyì nánzhəzhɔ̌ à ce byə̀nə́-jù wə̀.
Sə bə̀ gə pɔ nyí bə̀ bə̀ mə̂ ǹdə́ gu,
à wu yʼa zə nyɛ̀n rə̀ yilə.
11 À yʼà nʼâ tó Zhwifubá dwã-gùúlí jìsí wẽ́ à nwɛ̀nɛ̀ Kristə-lyì bí,
à nʼâ yâl a nyɛ́ɛ́ bɛ bə yẽ̌ Yezu ni zhú mú ni.
À lyim yʼà zɛ̃̀ dɛ̃´dɛ̃´ ǹdə́ bɛ.
A twèlé a vò a nwɛ̀nɛ̀ bɛ̀ cɛmɛ dwã w myɛ.
12 “Dɛ̃ rə̀dù,
vwĩ̀-zwə́lnə bé yé né cìnə́ bé yʼà twĩ̀ nì à la Damaasɛ a vò a zə Kristə-lyì bí.
13 Pyɔ̌ Agərəpa,
à tú a yí sɔ́má yó,
ǹdə́ yi rí yú yə́-pɛ̀lɛ́ ecəl wə,
a jʼa nə pwẽ̀ nánfɔ̀lɔ̀ rə̀ shí dɛ̃̌,
rə yə̂r rə kə́kɛ́lɛ́ àmyɛ́ ǹdə́ byɛ̀bɛ́ bə̀ yʼà tó ne mó ga.
Rə̀ yʼà du nə̀nyɔ́nɔ́ pwẽ̀.
14 Nə́ gakó jʼa ló tɛ̃´.
A nyɛ̀ɛ̀ cəl rə̀ byẽ̀ nè ǹdə́ nə́ dwí rí zɔ̀mà rə wɔ̀:
‘Swəə,
Swəə,
byè yil ǹ nə́ ǹ nwɛ̀nɛ̀ nɛ̀?
Byè yil ǹ nə́ ǹ jíjǐ ǹdə vwâm mɔ̀bɔ́ mə̀ cə́bal nə́ ń mà ǹdə́ də̀-dɔ̀lɔ̀ ta?’
15 “A zɛ̃̀ a bwə̀rh a wɔ̀:
‘Yó-cə́bal,
ǹmyɛ́ wɔ́ mɔ̌ lò?’
N wɔ̀ nɛ̀:
‘Àmyɛ́ wɔ́ Yezu.
Wɔ́ àmyɛ́ ǹ nə́ ǹ nwɛ̀nɛ̀ mɔ́.
16 Zɛ̃̀ ń zhì dɛ̃̌,
bʼà cír mó ǹ la yə̀ à tùntùnnə̀.
Wɔ́ rə̀myɛ́ yil à byili mú à cìnə̀.
Ǹ bʼâ yə̀ à zhə̀n-cínnə,
mùnì ga ń byili lyì bí dwã bɛ́ nɛ kɔn gə́ tó né ń bə́ nə nɛ zà,
sə́ byili bi kɔn dɛ̀bɛ́ à gwẽ̌ la ce ǹ yírhə́ nə mɔ́ myɛ.
17 À bʼa yìlì mú Zhwifubá ǹdə́ byɛ̀bɛ́ bə̀ də̀ Zhwifubá mó wẽ́.
Wɔ́ bə̀myɛ́ sõ à la mɔ́ nɛ́ tũ̌,
18 mùnì ń púr bə̀ yírhə́,
bə du cə-byín wẽ́ bə bə̀ pwẽ̀ wə̀;
bə du Shətana jɔ̃̀ w bə zù Yi,
mùnì bə nə bə̀ yə̀-bəlwàálɛ sǔbri,
sə bə nə cəl jàà y kɛ̀bɛ́ Yi cĩ́ rə̀ lyì bí ni mú wẽ́.’
19 “Pyɔ̌ Agərəpa,
kɔn zhí rə̀myɛ́ yi ní ga,
à yə̀ kɔn dɛ́ dɛ̀bɛ́ Yi zhì dɛ̃̌ rə byili ni èta mɔ́ cẽ yé.
20 À jɛ̀rɛ̀ a bwə̀l Yi zɔ̀mɛ̀ rɛ́ a byili Damaasɛ lyì bí ni;
a zɛ̃̀ a bwə̀l lè a byili Zhərəzalɛm lyì bí ni;
rə̀myɛ́ kwã nɛ́,
a bwə̀l lè a byili Zhide tənà y lyì bí gakó ne;
a zɛ̃̀ a bwə̀l lè a byili cɛmɛ nɛ́ dwã bɛ́ lyì bí ni,
bə̀ bə̀ pyìrhí bə̀ wun bə zù Yi,
sə bə twĩ̀ tùntwə̃̀ə̃̀ nyɛ̀bɛ́ nə̀ bʼa byili bə̀ bə̀ pyìrhí bə̀ wun zhə̀nà.
21 “Wɔ́ rə̀myɛ́ è ce Zhwifubá zə nɛ ǹdə́ à ŋwɛ́nɛ́ Yi jì y kɔ̀nɔ́ w wa,
bə̀ yʼà nʼê yâl bə gu ni.
22 Sə Yi sɛ̃ nɛ kɔn mʼe yí zà,
à gwẽ̌ zhǐ à wɔ́ rə̀ zhə̀n-cínnə lyì-fwààlɛ̀ ǹdə́ byɛ̀bɛ́ bə̀ də̀ lyì-fwààlɛ̀ ga yé né.
Wɔ́ kɔn dɛ́ dɛ̀bɛ́ Yi nyì-zwennə bé ǹdə́ Muyiisi byili bə̀ rə̀ mə̂ sə rə wɛ̀rhɛ́ mɔ́ yò à nʼâ zɔ̀mà,
sə è də̀ kɔn dõ yé.
23 Bə̀ wò bə̀ bə̀ mʼa nwɛ̀nɛ̀ Kristə mó,
sə wɔ́ ńmyɛ̌ ń mà n yə̀ nã́yə́ə́ mó n bwìrhì n zɛ̃̀ n du cùùrì wẽ́,
n bwə̀l pwẽ̀ dé yò n byili Zhwifubá ǹdə́ byɛ̀bɛ́ bə̀ də̀ Zhwifubá mó ne.”
24 Pwəə gwẽ̌ nə́ ń byili kɔn gə́ tó né mó,
sə Fesətuusi bya n wɔ̀ mɔ̀:
“Ǹ cèrhè dɛ̃´dɛ̃´;
rə̀myɛ́ ce ǹ wu w jé ń jǐrh nyə̀nyà.”
25 Pwəə wɔ̀ mɔ̀:
“À yó-cə́bal mɔ́ sõ,
à yə̀ nyə̀nyà jǐrh yé.
Zɔ̀mà nɛ́ nyɛ̀bɛ́ à nʼâ byili mú wɔ́ zhə̀nà.
Nə̀ də̀ zɔ̀mà nyɛ̀bɛ́ nə̀ bə kùr zhe yé.
26 Pyɔ̌ Agərəpa də̀ zhə-bal ywẽ̀ né nyɛ̀bɛ́ wẽ́ yé.
Ń yě nə̀ yé-shò.
Nə̀ yə̀ shèè gɔ́gwã́ w nə mʼe wɛ̀rhɛ́ yé.
Wɔ́ rə̀myɛ́ è ce à mʼa zɔ̀m kɔn gakó ń yé né ǹdə́ à wu gakó.
27 Pyɔ̌ Agərəpa,
ǹ nə́ ǹ zwẽ kɔn dɛ̀bɛ́ Yi nyì-zwennə bé byili mú nyí?
À nʼâ bùl bə̀ nyǐ ǹ nə́ ǹ zwẽ rə̀ nyí.”
28 Agərəpa wɔ̀:
“Ǹ nə́ ǹ yâl ń ce a jǐrh Kristə-lò ǹ kùr yó èlâsɛ̃´?”
29 Pwəə wɔ̀ mɔ̀:
“È gə wɔ́ èlâsɛ̃´,
ráá kɔn mʼa dɛnɛ ń mə́ jǐrh Kristə-lò myɛ,
àmyɛ́ nʼâ lwə̀l Yi ni sʼe bə̀kʼa yə̀ ǹ dúdú yé,
sʼe yə̀ ámyɛ̌ byɛ̀bɛ́ gakó á zhǐ zà á nʼá cili à zɔ̀mà nɛ́ mɔ́,
mùnì ga ámyɛ jǐrh ǹdə àmyɛ ta.
Sə à tʼâ yâl bə̀ bə̀ zə ámyɛ bə lyẽ ǹdə àmyɛ́ ta yé.”
30 Rə̀myɛ́ yó,
pyɔ̌ mɔ́ ǹdə́ cɔ w cə́bal mɔ́ ǹdə́ Bereniisi,
e súlí lyì bí byɛ̀bɛ́ bə̀ yʼà tó bə̀ ŋwɛ́nɛ́ gàà mɔ́ gakó shí tɛ̃´ bə zɛ̃̀,
31 bə zə dwã bə vò kwã nɛ́,
bə̀ nʼê zɔ̀m ǹdə́ dwã bə̀ zhe:
“Bal mɔ́ mɔ̀bɔ́ yə̀ kaka wɛ̀rhɛ́ rə̀ nʼê byili bə̀ ń mə̂ ǹdə́ gu,
ráá byə̀nə́-jù w co yé.”
32 Agərəpa zɛ̃̀ n wɔ̀ Fesətuusi ni:
“Ń gə yà ń yə̀ wə̀l bə̀ wɔ́ Orɔm pyɔ̌ mɔ́ ń mà n bùr ń bùrsí,
nə́ yʼâ bʼâ dwĩ̀ mù.”