Pwəə ǹdə́ Shəlaasɛ zhə̀l Tesəloniki
17
Pwəə ǹdə́ Shəlaasɛ tó Anfyipoli ǹdə́ Apoloni bə lyɛ̃ bə vò Tesəloniki.
Zhwifubá dwã-gùlú jì èdù yʼà ŋwɛ́nɛ́ gàà.
2 Shìrhə́ y dɛ̃ rɛ́ gə́ tú e yí,
Pwəə zɛ̃̀ n vò dwã-gùlú jì y wə,
ǹdə ń gə́ ya n wɛ̀rhɛ́ nɛ́,
sə ń zhə̀l gàà twər rə̀tɔ̀ n zhərh ǹdə́ lyì bí byɛ̀bɛ́ bə̀ ŋwɛ́nɛ́ gàà mɔ́ Yi zɔ̀mɛ̀ rɛ́ shò-kwã nɛ́.
E jʼà wɔ́ shìrhə́ dɛ̃ dɛ̃ ń yà ń nə́ ń zhə̀lə̀.
3 Ń yà ń nə́ ń byili bi bə̀ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Kristə mó mà n nwɛ̀nɛ̀ n cì,
sə ń mà n ká n bwìrhì.
N zɛ̃̀ n súlí n wɔ̀ bə̀ wɔ́ Yezu mú mɔ̀bɔ́ ń nə́ ń bwə̀l ń yò w èta mɔ́ ń wɔ́ Kristə mó.
4 Zhwifubá jàlà shɛ̀nɛ́ bə zwẽ Pwəə ǹdə́ Shəlaasɛ zɔ̀mà nɛ́.
Gərɛkɛbá byɛ̀bɛ́ bə̀ yʼà só Yi mú myɛ nánzhəzhɔ̌ zwẽ nyí,
e súlí kana nánzhəzhɔ̌ bə̀ yʼà wɔ́ lyì-fwààlɛ̀.
5 Zhwifubá dwã bɛ́ zɛ̃̀ bə̀ nʼê dùr bwɛ̃̌.
Bə byẽ̀ cɔ w lyì-bəywààlɛ̀ jàlà ǹdə́ lyì dwã nánzhəzhɔ̌ bə cĩ́ dwã yó.
Lyì bí bə̀myɛ́ mɔ́ ǹdə́ Zhwifubá ga ce dweme cɔ w wa,
bə vò Zhasɔ̃ sõ kɛ̀lɛ́ wa,
bə̀ nʼê pyà Pwəə ǹdə́ Shəlaasɛ,
bə̀ la mʼe vò cɔ w lyì bí yé né,
6 sə bə̀ pyà pyà bɛ̀ bə ga.
Bə zɛ̃̀ bə zə Zhasɔ̃ ǹdə́ Kristə-lyì dwã bə mʼe vò cɔ w bùr-kárna bɛ́ yé né.
Bə̀ gə́ zə bɛ bə yí bə zhɛ̀,
bə zɛ̃̀ bə̀ nʼê bya bə̀ zhe:
“Lyì bí byɛ̀bɛ́ èta mɔ́ wɔ́ cə-lwəə́re jààsɛ́ gakó wə,
sə bə̀ zə bə̀ cə-lwəə́ré bə yí nyɔ̀nɔ̀.
7 Bə̀ gakó nʼê cẽ Orɔm pyɔ̌ mɔ́ nyə́ né;
bə̀ nʼê byili bə̀ pyɔ̌ dõ ŋwɛ́nɛ́ ń yíl Yezu,
sə Zhasɔ̃ zwẽ be ń sõ kɛ̀lɛ́ wa.”
8 Zɔ̀mà nɛ́ nə̀myɛ́ mɔ́ zɛ̃̀ lyì-zhâ bɛ́ ǹdə́ cɔ w bùr-kárna bɛ́ lyimə ne,
9 sə bùr-kárna bɛ́ ce Zhasɔ̃ ǹdə́ Kristə-lyì bí dwã bɛ́ kwɛ̃̌,
fòró bə dwĩ̀ bì.
Pwəə ǹdə́ Shəlaasɛ zhə̀l Bere
10 Cɛ y gə́ yìì,
Kristə-lyì bí jʼa ce Pwəə ǹdə́ Shəlaasɛ lyɛ̃ bə vò Bere.
Bə̀ gə́ yú gàà,
bə lyɛ̃ bə vò Zhwifubá dwã-gùlú jì y wẽ́.
11 Sə Zhwifubá byɛ̀bɛ́ bə̀ ŋwɛ́nɛ́ gàà mɔ́ pwèlè bə̀ wun du byɛ̀bɛ́ bə̀ ŋwɛ́nɛ́ Tesəloniki ní mú,
bə zwẽ Yi zɔ̀mɛ̀ rɛ́ náàcɛ̀nɛ́,
bə zɛ̃̀ bə̀ nʼê tɛ́rɛ́ rɛ,
bə̀ la nyǐ rə̀myɛ́ ǹdə́ tɛ̀bɛ́ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ wɔ́ rə̀dù,
mùnì ga bə lwar ǹdə́ kɔn dɛ́ dɛ̀bɛ́ Pwəə nə́ ń byili mú gə wɔ́ zhə̀nà,
12 sə bə̀ nánzhəzhɔ̌ zù Kristə.
Gərɛkɛbá kana byɛ̀bɛ́ bə̀ wɔ́ lyì-fwààlɛ̀ ǹdə́ bə̀ bala nánzhəzhɔ̌ myɛ shɛ̀nɛ́ bə zù Kristə.
13 Tesəloniki Zhwifubá gə́ nyɛ̀ɛ̀ bə̀ Pwəə nə́ ń bwə̀l Yi zɔ̀mɛ̀ rɛ́ Bere né myɛ,
bə twèlé bə vò gàà,
bə ce lyì bí zɛ̃̀ bə ce dweme.
14 Kristə-lyì bí jʼa zhì dɛ̃̌ bə ce bə zhìì Pwəə bə cĩ́ mwə̃́ y sɔ́má y yó.
Sə Shəlaasɛ ǹdə́ Timote mɛ̃ Bere né.
15 Byɛ̀bɛ́ bə̀ yʼà nʼê zhìì Pwəə mó jʼa zə mɔ bə yí Atɛnnɛ.
N zɛ̃̀ n lwə̀l bè,
bə̀ bə̀ gə kʼâ yúwə́,
sə bə wɔ̀ Shəlaasɛ ǹdə́ Timote ne,
bə̀ bə̀ ce jàn nɛ́ bə bə̀ ń sõ làlà.
Pwəə zɔ̀m ǹdə́ Atɛnnɛ yé né cìnə́ bé
16 Pwəə gə́ yà ń ŋwɛ́nɛ́ Atɛnnɛ nɛ́ ń nə́ ń dɛ̃̀ Shəlaasɛ ǹdə́ Timote yi ní,
n pwírí cɔ w òmyɛ́ lyì bí wɔ́ wẽ̀ tɛ̀bɛ́ rə̀ də̀ Yi dúdú bə̀ nʼê zwə́lə́.
Rə̀myɛ́ ce ń wu zhìlì dɛ̃´dɛ̃´.
17 N zù Zhwifubá dwã-gùlú jì y wẽ́ ń nə́ ń zhərh ǹdə́ bɛ,
ǹdə́ lyì bí byɛ̀bɛ́ bə̀ də̀ Zhwifubá bə jʼà só Yi mú,
sə ń yà ń nə́ ń zhərh ǹdə́ lyì bí byɛ̀bɛ́ gakó ń yà ń nə́ ń nɛ cɔ w lyì bí dwã-joló jààsɛ́ wẽ́ mó twéé twéé.
18 Surhə cìnə́ kùrə̀ nə̀lyè myɛ yʼà ŋwɛ́nɛ́,
bə̀ nʼê byẽ̀ bə̀ Epyiciriyẽbá ǹdə́ Esətoyishẽbá.
Bə̀myɛ́ mɔ́ jàlà zɛ̃̀ bə̀ nʼê zɔ̀m ǹdə́ mɔ.
Bə̀ jàlà yʼà zhe:
“Wɔ́ bə̀kɔ́n sɔ̀ mɔ̀bɔ́ nə́ ń ce myɛ̌?”
Bə̀ dwã myɛ yʼà zhe:
“È nyɛ̌ ǹdə wɔ́ yə dwã yò ń nə́ ń zɔ̀m ta.”
E jʼà wɔ́ Yezu ǹdə́ cùùrì bùrhù yò Pwəə yà ń nə́ ń bwə̀lə̀.
Wɔ́ rə̀myɛ́ è ce bə zɛ̃̀ bə̀ nʼê zɔ̀m èta.
19 Bə zə mɔ bə vò cɔ w cìnə́ bé gùlú w yé né.
Bə bwə̀rh mò bə wɔ̀:
“Ǹ wɔ̌ ǹ bʼâ byili nə́ba kàrmɔ́ nándùl mó ǹ tú ǹ nə́ ǹ cèrhè mó kùrə̀?
20 Kɔn dɛ́ dɛ̀bɛ́ ǹ nə́ ǹ byili nə́ba mó wɔ́ kɔn nándùl,
e zɛ̃̀ nə́ só sə nə́ lwar rə̀ kùrə̀.”
21 Atɛnnɛ lyì bí ǹdə́ zhələ bé byɛ̀bɛ́ bə̀ yʼà tó be bə̀ ŋwɛ́nɛ́ gàà mɔ́ gakó yʼà jʼâ wɔ́ kɔn dɛ́ rə̀myɛ́ nándùl lé dúdú bə̀ nʼê cili,
bə jʼà nʼê byili ri dwã nɛ myɛ.
22 Pwəə zɛ̃̀ n zhì cɔ w cìnə́ bé gùlú w yé né n wɔ̀:
“Atɛnnɛ lyì,
à pwírí á wɔ́ lyì byɛ̀bɛ́ á nʼá pyà Yi kɔn gakó wẽ́.
23 À yʼà tó á cɔ w wa à nʼâ byɛ́lɛ́ wa,
à nʼâ nyǐ vwĩ̀-jùúlí tɛ̀bɛ́ á nʼá zwə́l á vwə̃̀ né rə̀ yó á mʼá cèrhé á yə né mó.
À nɔ vwĩ̀-jìlú òdù bə̀ kɛ̃ ò yó bə wɔ̀:
‘Nə́ yə̀l Yi rí tɛ̀bɛ́ pár yé.’
Lwarna bə̀ Yi rí tɛ̀bɛ́ á yə̀l rə̀ párá,
á jʼâ nʼá zwə́l vwə̃̀ á mʼá cèrhé re mó,
wɔ́ rə̀myɛ́ yò à tú à nʼâ bwə̀l à byili ába.
24 Wɔ́ Yi rí tɛ̀bɛ́ rə̀ wɛ̀rhɛ́ lũ w ǹdə́ kɔn dɛ̀bɛ́ gakó rə̀ ŋwɛ́nɛ́ ò wẽ́ mó,
rə̀ cǐ dɛ̃̌ ǹdə́ cɛ yá.
Rə̀ tʼâ jòm jì kɛ̀bɛ́ numbyínə́ lù wẽ́ yé.
25 Rə̀ bə numbyíní sɛ̃ɛ̃´ tum zhe yé,
bə̀ kaka yə̀ rə̀ mwìrì yé.
Wɔ́ rə̀myɛ́ gaga mɔ́ rə̀ ce numbyíní ŋwɛ́nɛ́;
rə̀myɛ́ rə̀ nʼê pɛ y myə̂l ǹdə́ kɔn gakó.
26 Rə̀ tó lò mə̀dù sásá dɛnnɛ rə wɛ̀rhɛ́ numbyínə́ bé dwə́ né gakó,
mùnì ga bə jòm lũ w cə-yala nɛ́ gakó wə.
Rə pə dwí gakó jàà;
rə ce shí ǹdə́ fɔ̀ ǹdə́ nəpwã̀ ŋwɛ́nɛ́.
27 “Rə̀ wɛ̀rhɛ́ èta,
mùnì ga numbyínə́ bé pyà rɛ̀,
sə dɛ̀ga ǹdə́ bə̀ gə tú bə̀ la rɛ pyâ,
sə bə tə́tɛ̀lɛ́ rɛ bə na.
Sə è gə wɔ́ zhə̀n yilə,
Yi bə nyɛ ǹdə́ nə́myɛ̌ mə̀dù ga yé,
28 bə̀ wɔ́ rə̀myɛ́ rə̀ nʼê pɛ nə́ba myə̂l;
rə̀myɛ́ rə̀ ce nə́ ŋwɛ́nɛ́;
rə̀myɛ́ rə̀ ce nə́ wɔ̌ nə́ zhẽ̌ nə́ nà nə́ ji.
Á surhə cìnə́ jàlà myɛ kɛ̃ bə wɔ̀:
‘Zhə̀nà,
nə́ wɔ́ rə̀ byâ.’
29 “Sə nə́ gə wɔ́ Yi byâ,
nə́ bə mə̂ sə nə́ bù bə̀ kɔn dɛ̀bɛ́ numbyíní nʼê tɛ́rɛ́ e zɛ̃̀ e zə sánə́má,
ráá kã̀mɔ,
ráá nə́kulu e wɛ̀rhɛ́ mɔ́ nyɛrhɛ dwã ǹdə́ Yi yé.
30 Lyì bí yʼà nʼê wɛ̀rhɛ́ wẽ̀ dé rə̀myɛ́ mɔ́ shãã ga,
bə̀ gə́ yʼà yə̀l Yi gə́ wɔ́ kɔn ná-dwí yil né mó yilə,
sə rə̀ kʼê tʼâ nyǐ shãã ga nyə̀ná nɛ́ nə̀ lyɛ̃ mɔ́ ǹdə yò ta yé.
Rə̀ nʼê byẽ̀ lyì bí gakó jààsɛ́ gakó wẽ́ èlâsɛ̃´,
bə̀ bə̀ pyìrhí bə̀ wun,
31 bə̀ rə̀ vùr dɛ̃ rə̀ la mʼe tó mɔ̀bɔ́ rə̀ cír mó dɛnnɛ rə bùr lyì bí gakó bùrsì ǹdə́ cángá.
Rə̀ bwìrhì mu,
rə mʼe byili lyì bí gakó ne bə̀ wɔ́ ńmyɛ̌ ń la bùrsí kɔ́.”
32 Bə̀ gə́ nyɛ̀ɛ̀ Pwəə nə́ ń zɔ̀m cùùrì bùrhù yò,
bə̀ jàlà zɛ̃̀ bə̀ nʼê fulsi mu;
jàlà zɛ̃̀ bə̀ zhe:
“Ǹ zɔ̀mà nɛ́ nə̀myɛ́ wɔ́ dɛ̃ dõ nə́ bʼâ cili ni.”