ཏི༌ཏུས༌ལ༌ པ༌འུ༌ལུའི༌ ཆག༌བྲིས༌།
པ༌འུ༌ལུའི༌ ཆོགས༌ནེ༌ ཇུ༌།
1:1-4
1
འི༌ ཨི༌གེ༌བོ༌ ང༌ པ༌འུ༌ལུའི༌ ཆོགས༌ནེ༌ ཨིན༌།
ང༌ ནི༌ དཀོན༌མཆོག༌གི༌ ཞབས༌ཏོག༌པ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ ཨིན༌།
དཀོན༌མཆོག༌གི༌ ལྡམ༌མ༌ ཛད༌ཁན༌གུན༌ལ༌,
མ༌ཤི༌ཀའེ༌ ནང༌ང༌ ཨིད༌ཤེས༌ ཅོ༌ཅེས༌པོ༌ ཤད༌ཅེས༌ དང༌ དཀོན༌མཆོག༌གི༌ ལམ༌མི༌ཀ༌ གྲུལ༌ཨིན༌ མི༌ཚེ༌ ཕུད༌ཅེས༌སི༌ དེན༌བ༌བོ༌,
ཤེ༌ཤེས༌ ལབ༌བ༌ལ༌ ང༌ ལམ༌ཅུགས༌།
2 འི༌ དེན༌བ༌བོའེ༌ ཁོང༌གུན༌ལ༌ ཐའ༌མེད༌པའེ༌ མི༌ཚེ༌ ཡོད༌ཁན༌ནི༌ ལོ༌ཁྱེལ༌ ཏང༌ང༌ནོག༌,
ཀ༌བོ༌ ཏུས༌གྱུན༌ ཀྲང༌པོ༌ མོལ༌ཁན༌ནི༌ དཀོན༌མཆོག༌གི༌ ཇིག༌རྟེན༌ ཛད༌དི༌ སང༌ སྔུན༌ལ༌ ཞལ༌ཆད༌ ཛད༌ཏེ༌ ཨིན༌པིན༌།
3 ཏ༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌,
ངའེ༌ ཚང༌མ༌ལ༌ ཆོས༌ཤད༌ཅེས༌ གྱུད༌ཏེ༌ ཁོང༌ངི༌ འི༌ ལོན༌བོ༌ སྔོན༌ ཅུག༌ཏེ༌ ཨིན༌ནོག༌།
དཀོན༌མཆོག༌ ང༌དང༌ངི༌ སྐྱབ༌གོན༌ནི༌ བཀའ༌ སལ༌ཁན༌ ནང༌ཞིན༌ལ༌,
ཁོང༌རང༌ངི༌ ཕིའ༌ འི༌ ལས༌པོ༌ ངའེ༌ ལག༌ག༌ སྟད༌ད༌ ཛདས༌།
4 ང༌དང༌གུན༌ནི༌ ཏད༌པའེ༌ ནང༌ང༌,
ངའེ༌ དེན༌བའེ༌ བུ༌ཚ༌ ཙོགས༌ ཨིན༌ཁན༌ནི༌ ཅེས༌པའེ༌ སྤུན༌,
ཏི༌ཏུས༌ལ༌ བྲིའད༌།
དཀོན༌མཆོག༌ ཡབ༌ དང༌ ང༌ཏི༌ སྐྱབ༌གོན༌ མ༌ཤི༌ཀ༌ ཡེ༌ཤུ༌ ཉིས༌ཀོའེ༌ ཁྱོ༌རང༌ང༌ ཐུག༌རྗེ༌ དང༌ ཞི༌དེ༌ སལ༌ཤིག༌།
ཀརིཏྲ༌ཏྲི༌ ནང༌ང༌ ཏི༌ཏུས༌སི༌ ཞབས༌ཏོག༌གུན༌།
1:5-16
5 ཁྱོ༌རང༌ངི༌ ང༌དང༌གུན༌ནི༌ ལས༌གུན༌ གྲུབ༌ཅུག༌ཅེས༌ དང༌ ངའེ༌ ལབ༌ཞ༌ ནང༌ཞིན༌,
གྲོང༌ཁྱེར༌ རེ༌རེའེ༌ ནང༌ང༌ འུ༌སྐྱོང༌གུན༌ སྐོ༌ཅེས༌སི༌ གྱུན༌ཚན༌བོའེ༌ ཕིའ༌,
ངའེ༌ ཁྱོ༌རང༌ ཀརིཏྲ༌ཏྲི༌ ནང༌ང༌ བོར༌པིན༌།
6 འུ༌སྐྱོང༌གུན༌ སྐྱོན༌མེད༌ དང༌ ཁོ༌རང༌ངི༌ ན༌མ༌ ཉམ༌པོ༌ ཨིད༌ཤེས༌ཅན༌ ཡོང༌གོས༌།
ཡང༌ ཁོང༌ངི༌ ཕྲུ༌གུ༌གུན༌ ཏད༌པ༌ཅན༌,
ཡང༌ སྕོད༌ལམ༌ ངན༌པ༌ དང༌ ཁའ༌མི༌ཉན༌ ཡོད༌ཁན༌ནི༌ སྐྱོན༌ མ༌ཕོག༌ཁན༌ རིག༌ ཡོང༌གོས༌།
7 དཀོན༌མཆོག༌གི༌ ཆག༌ལས༌གུན༌ འུ༌སྐྱོང༌གུན༌ནི༌ ལག༌ག༌ སྟད༌ པ༌སང༌,
ཁོང༌ངི༌ མི༌ཚེ༌བོ༌ སྐྱོན༌མེད༌ཁན༌ཞིག༌ ཡོང༌གོས༌།
ཁོང༌ ཕོ༌སོ༌ཅན༌ ཡ༌ སྲོ༌དུང༌ཅན༌,
ཁོང༌ ཆང༌ མང༌པོ༌ ཐུང༌ཁན༌,
སྲོའེ༌ ནང༌ང༌ ནོད༌སྐྱལ༌ཁན༌ ཡ༌ པེ༌ནེ༌ ཕིའ༌ དོད༌པ༌ཅན༌ ཡོང༌ མ༌གོས༌།
8 ཐད༌པོ༌ ཉམ༌པོ༌ ཁོའེ༌ ཁང༌པ༌ ཡོང༌ཁན༌གུན༌ལ༌ གའ༌སུས༌ ཞུ༌ཁན༌,
ཡང༌ ཟང༌པོ༌ ལས༌གུན༌ལ༌ ཁོའེ༌ ཅེས༌པ༌ ཅོ༌གོས༌།
ཁོའེ༌ མི༌ཚེ༌བོ༌ ཤེས༌རབས༌སི༌ ནང༌ང༌ ཕུད༌གོས༌,
ཡང༌ ཐག༌ཅད༌གུན༌ ཆོག༌རིས༌ མེད༌པ༌ ཅོ༌གོས༌།
ཁོའེ༌ མི༌ཚེ༌བོ༌ ཏམ༌པ༌ དང༌ རང༌སེམས༌ ཅུན༌ཏེ༌ བོར༌ཉན༌ཁན༌ཞིག༌ ཡོང༌གོས༌།
9 ལབ༌ཁན༌ནི༌ ཨིད༌ཤེས༌ཅན༌ནི༌ ལོན༌ནི༌ཀ༌ ཁོའ༌ མ༌སྲན༌ཏྲེ༌ ཏད༌པ༌ ཡོང༌གོས༌,
ཏེ༌ནེ༌ ཁོའེ༌ ཞན༌མ༌གུན༌ལ༌ དེན༌བའེ༌ ལབ༌ཞ༌ ཉམ༌པོ༌ སྤོས༌པ༌ སྐྱེ༌ཅུག༌ ཉན༌ཨིན༌,
ཡང༌ ཏེ༌བོའེ༌ གྱབ༌གལ༌ ཅོ༌ཁན༌གུན༌ལ༌ ནོར༌ཏེ༌ ཨིན༌ཁན༌བོ༌ སྟན༌ ཐུབ༌ཨིན༌།
10 ངོ༌ལོག༌ ཅོ༌ཁན༌ནི༌ མི༌ མང༌པོ༌ཞིག༌ ཡོད༌ཏེ༌ ཨིན༌ནོག༌,
ཀ༌གུན༌ ཕན༌མི༌ཐོགས༌སི༌ སྤེ༌རའེ༌ ནང༌ང༌ དྲེས༌ཏེ༌ ཞན༌མ༌གུན༌ལ༌ གོབ༌སྐོར༌རད༌,
མིག༌སལ༌ལི༌ ཐར༌པ༌ ཐོབ༌ཅེས༌ལ༌,
བུ༌ཚ༌གུན༌ལ༌ སུན༌ནད༌a ཅོ༌གོས༌ ཟེར༌ཁན༌གུན༌།
11 ཁྱོ༌རང༌ངི༌ ཁོང༌གུན༌ལ༌ ཏེ༌ཙོགས༌ ཟེར༌ཅེས༌ནེ༌ སྒག༌གོས༌,
ཅིའ༌ཟེར༌ན༌ ཁོང༌གུན༌ནི༌ ཟུས༌མའེ༌ ལབ༌ཞ༌གུན༌ནི༌,
ནང༌ཚངས༌ གང༌པོ༌ དེན༌བའེ༌ ལབ༌ཞ༌གུན༌ནེ༌ ཐག༌རིང༌ང༌ ཁྲིད༌ཏེ༌ ཁྱེར༌ར༌ནོག༌།
ཡང༌ ཁོང༌གུན༌ནི༌ ཏེ༌བོ༌ ཁོ༌རང༌གུན༌ནི༌ ཕན༌ཐོགས༌སི༌ ཕིའ༌ ཅོའ༌ནོག༌།
12 འི༌བོ༌ ནི༌,
ཁོ༌རང༌གུན༌ནི༌ ཕྲོ༌ནེ༌ ལུང༌སྟོན༌པ༌ ཅིག༌གི༌,
“ཀརིཏྲ༌པ༌གུན༌ ཟུན༌ཇན༌,
ཁྱི༌ ཙོགས༌ དང༌ ལས༌མི༌ལམ༌ གྲོད༌ནབས༌ཅན༌” ཟེརས༌ཏེ༌ ཨིན༌ནོག༌།
13 ཁོའེ༌ ཟེར༌ཁན༌བོ༌ ཀྲང༌པོ༌ ཨིན༌པ༌,
ཏད༌པའེ༌ ནང༌ང༌ སྟན༌པོ༌ ལུས༌ཤེས༌སི༌ ཕིའ༌,
ཁྱོ༌རང༌ངི༌ ཏེ༌ཙོགས༌སི༌ སྤུན༌གུན༌ལ༌ མ༌སྲན༌ཏྲེ༌ ཁའ༌སྐྱེ༌ཏེ༌ སྐྱོང༌གོས༌།
14 ཁོང༌གུན༌ནི༌,
ཡ༌ཧུ༌དཱ༌པའེ༌ ཟུས༌མའེ༌ རུངས༌ དང༌ ཀྲང༌པོའ༌ གྱབ༌ ལོགས༌ཏེ༌ ཆའ༌ཁན༌གུན༌ནི༌ བཀའ༌གུན༌ལ༌ ཉན༌ མ༌གོས༌།
15 སེམས༌ ལག༌མོ༌ ཡོད༌ཁན༌གུན༌ནི༌ ཕིའ༌ ཅི༌ཚང༌མ༌ རྩང༌མ༌ ཨིན༌ནོག༌།
ཨིན༌ནའང༌ སྙིང༌ངི༌ ནང༌ང༌ རྩང༌མ༌ མེད༌ཁན༌ དང༌,
ཡེ༌ཤུའི༌ཀ༌ ཏད༌པ༌ མ༌ཅོ༌ཁན༌གུན༌ནི༌ ཕིའ༌ ཅི༌ཤིག༌གའང༌ རྩང༌མ༌ མེད༌པ༌ ཨིན༌ནོག༌,
ཅིའ༌ཟེར༌ན༌ ཁོང༌གུན༌ནི༌ སམ༌ཚུལ༌ དང༌ སེམས༌ གུན༌ ངན༌པ༌ ཡོད༌ཏེ༌ ཨིན༌ནོག༌།
16 ཏེ༌ཙོགས༌སི༌ མི༌གུན༌ནི༌ ཟེར༌ར༌ནོག༌,
ཁོང༌གུན༌ནི༌ དཀོན༌མཆོག༌ ཤེས༌སད༌།
ཨིན༌ནའང༌ ཁོང༌གུན༌ནི༌ ལས༌གུན༌ ཅོ༌ ཚུལ༌ལ༌ ལྟ༌ན༌,
དཀོན༌མཆོག༌གི༌ སྟིང༌རང༌ནེ༌ མ༌གྲུལ༌ཁན༌བོ༌,
ཤེས༌དུག༌།
ཁོང༌གུན༌ ནཕ༌རད༌ཅན༌ དང༌ ཁའ༌མི༌ཉན༌ ཡང༌ ཁོང༌གུན༌ལ༌ ཅའང༌ ལས༌ ཟང༌པོ༌ ཅོ༌ཉན༌ན༌ མ༌ནོག༌།