ཏི༌མོ༌ཐིའ༌ པ༌འུ༌ལུའི༌ ཆག༌བྲིས༌ ཉིས༌པ༌།
པ༌འུ༌ལུའི༌ ཆོགས༌ནེ༌ ཇུ༌།
1:1-2
1
འི༌ ཨི༌གེ༌བོ༌ དཀོན༌མཆོག༌གི༌ ཐུག༌གོངས༌ ནང༌ཞིན༌,
མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ ལྡམ༌མ༌ ཛད༌ཁན༌ནི༌ ང༌ པ༌འུ༌ལུའི༌ ཆོགས༌ནེ༌ ཨིན༌།
མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པ༌ གྱུད༌ཏེ༌,
ཐའ༌མེད༌པའེ༌ མི༌ཚེ༌ སལ༌ཅེས༌སི༌ ཁོང༌ངི༌ ཞལ༌ཆད༌པོའེ༌ སྐོར༌ལ༌ ཤད༌ཅེས༌ལ༌,
ང༌ ཀལ༌ལ༌ ཛད༌ཏེ༌ ཨིན༌།
2 འི༌ ཨི༌གེ༌བོ༌ ངའེ༌ ཅེས༌པའེ༌ བུ༌ཚ༌ ཙོགས༌ ཏི༌མོ༌ཐིའ༌ བྲིའད༌།
དཀོན༌མཆོག༌ ཡབ༌ དང༌ ང༌དང༌གུན༌ནི༌ གཙོ༌བོ༌ མ༌ཤི༌ཀ༌ ཡེ༌ཤུའི༌,
ཁྱོ༌རང༌ང༌ ཐུག༌རྗེ༌,
སྙིང༌རྗེ༌ དང༌ ཞི༌དེ༌ སལ༌ཤིག༌།
པ༌འུ༌ལུའི༌ ཏི༌མོ༌ཐིའ༌ སྤོས༌པ༌།
1:3-18
3 ཏི༌མོ༌ཐི༌,
ཁྱོ༌རང༌ངི༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌,
ཁོང༌ང༌ ངའེ༌ སེམས༌ ལག༌མོ༌ ཉམ༌པོ༌ ཞབས༌ཏོག༌ ཞུའད༌,
ཀ༌ཟུག༌ ངའེ༌ ཕ༌མེས༌པོ༌གུན༌ནི༌ ཞུས༌ཏེ༌ ཨིན༌པིན༌,
ཉིན༌ཚན༌ མེད༌པ༌ ངའེ༌ མོས༌ལམ༌མི༌ ནང༌ང༌ ཁྱོ༌རང༌ ཨིད༌ཏུ༌ ཅོའད༌།
4 ང༌དང༌གུན༌ བེ༌ཏེ༌ ཆ༌ ཟ༌ནེ༌,
ཁྱོ༌རང༌ངི༌ ཆི༌མ༌ ཨིད༌ཏུ༌ ཡོངས༌ཏེ༌,
ང༌ ཁྱོ༌རང༌ ཉམ༌པོ༌ ཐུག༌ཅེས༌སི༌ དོད༌པ༌ སྲན༌ཏྲེ༌ རག༌།
ང༌དང༌གུན༌ ཡང༌སྐྱར༌ ཉམ༌པོ༌ ཛོམ༌མ༌ཅིག༌,
ངའ༌ སྐྱིད༌པོའེ༌ གང༌ཅེས༌ རག༌།
5 ང༌ ཁྱོ༌རང༌ངི༌ དེན༌བའེ༌ ཏད༌པ༌བོ༌ ཨིད༌ཏུའ༌ ཡོངས༌,
ཀ༌བོ༌ སྔུན༌ལ༌ ཁྱོ༌རང༌ངི༌ ཨ༌བི༌ ལུ༌འེས༌ དང༌ ཁྱོ༌རང༌ངི༌ ཨ༌མ༌ ཨེའུ༌ནི༌ཀེ༌ གུན༌ནི༌ ཅོའད༌པིན༌།
ཏེན༌ན༌ ཏད༌པ༌བོ༌ ཁྱོ༌རང༌ངི༌ ནང༌ང༌ དག༌སའང༌ ཡོད༌ཅེས༌པོ༌ ང༌ ལོ༌ཁྱེལ༌ རག༌།
6 ཏེན༌ན༌ གྱུན༌ཚན༌བོའེ༌ ཕིའ༌ ངའེ༌ ཁྱོ༌རང༌ངི༌ཀ༌ ལག༌པ༌ བོར༌ ཟ༌ནེ༌,
དཀོན༌མཆོག༌གི༌ སལ༌ལ༌ ཛད༌ཁན༌ནི༌ ཁྱུད༌པོ༌ སྟན༌པོ༌ དང༌ གྱས༌ ཅུགས༌ཅེས༌ལ༌ ཨིད༌ཏུ༌ སྐུལ༌ལད༌།
7 དཀོན༌མཆོག༌གི༌ ང༌དང༌གུན༌ལ༌ ཇིག༌ཤེས༌ དང༌ སེམས༌ཤུགས༌ མེད༌ཁན༌ནི༌ སེམས༌ཞིག༌ སལ༌ལ༌ མ༌ཛད༌ད༌ སྟོབས༌,
ཅེས༌པ༌ དང༌ རང༌སེམས༌ཅུན༌ ཐུབ༌ཁན༌ནི༌ སེམས༌ཞིག༌ སལ༌ལ༌ ཛད༌ཏེ༌ ཨིན༌ནོག༌།
8 ཏེ༌བོའེ༌ཕིའ༌ ང༌དང༌ངི༌ གཙོ༌བོ༌ མ༌ཤི༌ཀའེ༌ སྐོར༌ལ༌ ཞན༌མ༌གུན༌ལ༌ ཤད༌ཅེས༌ ཡང༌ ཁོང༌ངི༌ ཏོན༌ལ༌ ང༌ ཙོན༌ནི༌ ནང༌ང༌ ཡོད༌ཁན༌བོའ༌,
ཁྱོ༌རང༌ ཁྲེལ༌ མ༌ཁྲེལ༌།
དཀོན༌མཆོག༌གི༌ ཁྱོ༌རང༌ང༌ སལ༌ཁན༌ནི༌ སྟོབས༌ ཉམ༌པོ༌ གའ༌མོའེ༌ ནས༌ཚུལ༌ ཤད༌ཅེས༌སི༌ ནང༌ང༌,
ང༌ ཉམ༌པོ༌ ནགས༌བར༌དོ༌ ཁུར༌ཅེས༌སི༌ ཕིའ༌ གྲལ༌གྲིག༌ ཅོས༌།
9 དཀོན༌མཆོག༌གི༌ ང༌དང༌གུན༌ སྐྱོབ༌བ༌ ཛད༌ཏེ༌ མི༌ཚེ༌ ཏམ༌པ༌ཞིག༌ ཕུད༌ཅེས༌ལ༌ བོད༌ད༌ ཛད༌ཏེ༌ ཨིན༌ནོག༌།
འི༌བོ༌ ང༌དང༌རང༌ངི༌ ལས༌ ཅོ༌ཁན༌བོའེ༌ ཞས༌ཏེ༌ མན༌པ༌,
ཁོང༌ངི༌ ཐབས༌ དང༌ ཐུག༌རྗེ༌ ཞས༌ཏེ༌ ཨིན༌ནོག༌།
ཏུས༌ གོ༌ཟུག༌གི༌ སང༌ སྔུན༌ལ༌,
འི༌ ཐུག༌རྗེ༌བོ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ ཁོང༌ངི༌ ང༌དང༌གུན༌ལ༌ སལ༌ལ༌ ཛད༌ཅེས༌པོ༌ ཨིན༌པིན༌།
10 ཏ༌ མ༌ཤི༌ཀ༌ ཡེ༌ཤུ༌ ང༌དང༌ངི༌ སྐྱབ༌གོན༌ ཕེབ༌ཅེས༌པོའེ༌,
དཀོན༌མཆོག༌གི༌ ཏེ༌གུན༌ སལ༌པོ༌ ཅོས༌ཏེ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌།
མ༌ཤི༌ཀ༌ ཡེ༌ཤུའི༌ ཤི༌ཅེས༌སི༌ ཝང༌བོ༌ མེད༌ཁན༌ ཅོའ༌ ཛད༌ཏེ༌,
གའ༌མོའེ༌ ནས༌ཚུལ༌ གྱུད༌ཏེ༌ དེན༌བའེ༌ མི༌ཚེ༌ དང༌ ཏུས༌གྱུན༌ སོན༌ཏེའ༌ ལུས༌ཤེས༌སི༌ ལམ༌བོ༌ སྟན༌ན༌ ཛད༌ཏེ༌ ཨིན༌ནོག༌།
11 འི༌ གའ༌མོའེ༌ ནས༌ཚུལ༌ལི༌ ཏོན༌ལ༌ དཀོན༌མཆོག༌གི༌ ངའ༌ ཆོས༌ཤད༌ཁན༌,
སྐུ༌ཚབས༌ དང༌ གེར༌གན༌ ཞིག༌ ལྡམ༌མ༌ ཛདས༌།
12 ཏེ༌བོའེ༌ཕིའ༌ ངའ༌ འི༌རུ༌ ཙོན༌ཁང༌ངི༌ ནང༌ང༌ རྡུག༌ངལ༌ ཐོང༌ཨིན༌ ཡོད༌།
ཨིན༌ནའང༌ ངའ༌ ཏེ༌བོའེ༌ ཕིའ༌ ཁྲེལ༌ལ༌ མེ༌རག༌,
ཅིའ༌ཟེར༌ན༌ ང༌ གྱུས༌ཡོད༌ སུའི༌ཀ༌ ངའེ༌ ཏད༌པ༌ ཅོའད༌,
ཡང༌ ངའ༌ ཏན༌ཏན༌ ལོ༌ཁྱེལ༌ རག༌,
ཁོང༌ ལོགས༌ཏེ༌ སྐྱོད༌ཅེས༌སི༌ ཞག༌ ཚོག༌པ༌ ཁོང༌ངི༌ ཆག༌ག༌ ངའེ༌ སྟད༌ཁན༌ ཚང༌མ༌ སྐྱོབས༌ཏེ༌ བོར༌ར༌ ཛད༌ཨིན༌།
13 ཁྱོ༌རང༌ངི༌ ངའེ༌ ཀ༌ནེ༌ ཚོར༌ཁན༌ ཚང༌མ༌,
ལབ༌ཞ༌ ཟང༌པོའེ༌ སྤེ༌ཞིག༌གི༌ ཚུལ༌ལ༌ ཀོལ༌གོ༌ཤེས༌ ཨིན༌ནོག༌།
ཁྱོ༌རང༌ང༌ མ༌ཤི༌ཀ༌ ཡེ༌ཤུའི༌ ནང༌ང༌ ཡོད༌ཁན༌ནི༌ ཏད༌པ༌ དང༌ ཅེས༌པ༌ ཉམ༌པོ༌ ཏེ༌གུན༌ ཅོས༌།
14 ཡང༌ ང༌དང༌ངི༌ ནང༌ང༌ ཡོད༌ཁན༌ནི༌ ཏམ༌པའེ༌ ཐུག༌ཉིད༌དི༌ རོགས༌ གྱུད༌ཏེ༌,
དཀོན༌མཆོག༌གི༌ ཁྱོ༌རང༌ངི༌ ལག༌ག༌ སྟད༌ད༌ ཛད༌ཁན༌ནི༌ རིན༌ཅན༌ དེན༌བ༌གུན༌ལ༌ གྱལ༌ལ༌ ཅོས༌ཏེ༌ སྲུང༌སྐྱོབ༌ ཅོ༌གོས༌།
15 ཨ༌སི༌ཨཱ༌ནེ༌ ཨིན༌ཁན༌ནི༌ མ༌ཤི༌ཀའེ༌ ཞབས༌ཏོག༌པ༌ ངའེ༌ ཕྲོ༌པ༌ ཚང༌མའེ༌ ང༌ ཕངས༌ཏེ༌ ཨིན༌ཁན༌བོ༌ ཁྱོ༌རང༌ང༌ གྱུས༌ཨིན༌ནོག༌,
པི༌གེ༌ལུས༌ དང༌ ཧེར༌མོ༌གེ༌ནས༌ གུན༌ནིའང༌ ང༌ ཕངས༌ཏེ༌ སོང༌།
16 ཨོ༌ནེས༌སི༌ཕོ༌རུས༌སི༌ ནང༌ཚང༌གུན༌ནི༌ཀ༌ དཀོན༌མཆོག༌གི༌ ཐུག༌རྗེ༌ ཟིགས༌ཤིག༌,
ཅིའ༌ཟེར༌ན༌ ང༌ ཙོན༌པ༌ ཨིན༌ ཨིན༌ནའང༌ ཁོ༌ མ༌ནེ༌ མ༌ཁྲེལ༌ལ༌,
ལན༌ མང༌པོ༌ ང༌ ཐུག༌ག༌ ཡོངས༌ ཡང༌ སེམས༌སོ༌ ཏངས༌།
17 རོམ༌མི༌ ནང༌ང༌ ལེབས༌ཏེ༌ ཁོའེ༌ ང༌ ཐོབ༌ཐོབ༌ ཚོག༌པ༌ ཀ༌རུང༌ས༌ ཚང༌མ༌ལ༌ ཙལ༌ཏོག༌།
18 མ༌ཤི༌ཀ༌ ལོགས༌ཏེ༌ ཕེབས༌སི༌ ཏུས༌ལ༌,
གཙོ༌བོའེ༌ ཁོའ༌ སྙིང༌རྗེ༌ ཛད༌ཤིག༌།
ཨེ༌ཕེ༌སས༌སི༌ ནང༌ང༌ ཁོའེ༌ ངའ༌ ཙམ༌ཤིག༌གི༌ ཞབས༌ཏོག༌ གྱལ༌ལ༌ ཅོས༌ཏེ༌ ཞུས༌ཁན༌བོ༌ ཏི༌མོ༌ཐི༌ ཁྱོ༌རང༌ང༌ གྱལ༌ལ༌ ཅོས༌ཏེ༌ གྱུས༌ཨིན༌ནོག༌།