ཕི༌ལི༌པི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌།
པ༌འུ༌ལུའི༌ ཇུ༌ ཞུ༌།
1:1-2
1
འི༌ ཨི༌གེ༌བོ༌ ཡེ༌ཤུ༌ མ༌ཤི༌ཀའེ༌ ཞབས༌ཏོག༌པ༌ པ༌འུ༌ལུ༌ དང༌ ཏི༌མོ༌ཐི༌ ཆོགས༌ནེ༌ ཨིན༌།
ངའེ༌ ཕི༌ལི༌པི༌ གྲོང༌ཁྱེར༌རི༌ ནང༌ང༌ མ༌ཤི༌ཀ༌ ཡེ༌ཤུའི༌ ཨིན༌ཁན༌ནི༌ མི༌ ཏམ༌པ༌གུན༌,
ཆོས༌ཚོགས༌སི༌ འུ༌སྐྱོང༌གུན༌ དང༌ ཞབས༌ཏོག༌ ཞུ༌ཁན༌གུན༌ལ༌ བྲིའད༌།
2 ང༌དང༌ངི༌ དཀོན༌མཆོག༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ལ༌ ཛད༌ཅེས༌ལ༌ ང༌ཞའེ༌ མོས༌ལམ༌ ཞུའད༌།
པ༌འུ༌ལུའི༌ ཕི༌ལི༌པི༌ ཆོས༌ཚོགས༌སི༌ ཕིའ༌ མོས༌ལམ༌ ཞུས༌།
1:3-11
3 ཁྱོ༌ཞ༌གུན༌ ཨིད༌ཏུ༌ ཅོ༌ ཟ༌ནེ༌,
ངའེ༌ ང༌རང༌ངི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌།
4 ཡང༌ ཏུས༌གྱུན༌ ངའེ༌ ཁྱོ༌ཞ༌གུན༌ནི༌ ཕིའ༌ ཐད༌པོ༌ ཉམ༌པོ༌ མོས༌ལམ༌ ཕུལ༌ལད༌།
5 ཅིའ༌ཟེར༌ན༌ ཁྱོ༌ཞ༌གུན༌ནི༌ ཏད༌པ༌ ཅོས༌པ༌ནེ༌ ཕར༌ལ༌ དག༌ས༌ ཙུགས༌པ༌,
གའ༌མོའེ༌ ནས༌ཚུལ༌ ཕེལ༌ཅེས༌སི༌ ཆག༌ལས༌སི༌ ནང༌ང༌ ངའ༌ རོགས༌ ཅོ༌ཨིན༌ཞིག༌ ཨིན༌།
6 ཡང༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ འི༌ ཆག༌ལས༌ ཟང༌པོ༌བོ༌ གོ༌ཟུག༌ ཛད༌ཁན༌ནི༌ དཀོན༌མཆོག༌གི༌,
ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབ༌ཅེས༌སི༌ ཞག༌ག༌,
ཏེ༌ ཆག༌ལས༌པོ༌ དྲན༌དྲ༌ གྲུབ༌ ཅུག༌ག༌ ཛད༌ཅེས༌པོ༌ ང༌ ལོ༌ཁྱེལ༌ རག༌།
7 ཁྱོ༌ཞའ༌ ངའེ༌ སྙིང༌ངི༌ ནང༌ང༌ ལུས༌ པ༌སང༌,
ངའེ༌ ཁྱོ༌ཞའ༌ ཚང༌མའེ༌ སྐོར༌ལ༌ ཏེ༌ཟུག༌ སམ༌ཅེས༌པོ༌ རང༌ཞིན༌ ཨིན༌ནོག༌།
ང༌ ཙོན༌ནི༌ ནང༌ང༌ ཡ༌ ཁྲིམས༌ཁུང༌ང༌ གའ༌མོའེ༌ ནས༌ཚུལ༌ སྐྱོབ༌ཨིན༌,
ཡང༌ ཏེ༌བོ༌ དེན༌བ༌ ཨིན༌ཁན༌བོ༌ སྟན༌ཨིན༌ ཡོད༌གྲོ༌,
དཀོན༌མཆོག༌གི༌ ཐུག༌རྗེ༌ གྱུད༌ཏེ༌ ཁྱོ༌ཞ༌གུན༌ནའང༌ ང༌ ཉམ༌པོ༌ ཁོང༌ངི༌ ཞབས༌ཏོག༌གི༌ ནང༌ང༌ དྲེས༌ཏེ༌ ཨིན༌ནོག༌།
8 ངེའང༌ ཁྱོ༌ཞའ༌,
མ༌ཤི༌ཀ༌ ཡེ༌ཤུ༌ ཙོགས༌ལ༌ ཅམས༌པ༌ ཅོ༌ཅེས༌པོའེ༌,
ངའ༌ ཁྱོ༌ཞའ༌ ཚང༌མ༌ ཡང༌སྐྱར༌ ཐུག༌ཅེས༌ལ༌ རིངས༌ཨིན༌ ཡོད༌ཁན༌བོའེ༌,
སྤང༌པོ༌ དཀོན༌མཆོག༌ ཨིན༌།
9 ངའེ༌ མོས༌ལམ༌ ཞུའད༌,
དཀོན༌མཆོག༌གི༌ ཁྱོ༌ཞའ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌སི༌ ནང༌ང༌ ཤེས༌རབས༌ དང༌ ཧ༌གོ༌ མང༌ང༌ སལ༌ལ༌ ཛད༌ཤིག༌།
10 མ༌ཤི༌ཀ༌ ལོགས༌ཏེ༌ ཕེབ༌ཅེས༌སི༌ ཏུས༌ ཚག༌པ༌,
སེམས༌ ལག༌མོ༌ དང༌ ནོངས༌མེད༌ ལུས༌ཤེས༌སི༌ ཕིའ༌,
ཚང༌མའེ༌སང༌ ཁག༌ཅན༌ ཅི༌ ཨིན༌ཁན༌བོ༌ ཁྱོ༌ཞའ༌ གྱུས༌ ཆ༌ཅེས༌ལ༌,
ངའེ༌ དོད༌པ༌ ཅོའད༌།
11 ཡེ༌ཤུ༌ མ༌ཤི༌ཀ༌ གྱུད༌ཏེ༌ ཡོང༌ཁན༌ནི༌ ཀྲང༌པོ༌ བྲས༌བུ༌ ཉམ༌པོ༌ ཁྱོ༌ཞའེ༌ རང༌ངི༌ མི༌ཚེའེ༌ སྐོང༌ཤིག༌,
ཏེ༌བོའེ༌ དཀོན༌མཆོག༌ག༌ སྤལ༌ དང༌ སྟོད༌པ༌ ཁྱོང༌ང༌ནོག༌།
གའ༌མོའེ༌ ནས༌ཚུལ༌ལི༌ ཡར༌གྱས༌།
1:12-17
12 སྤུན༌གུན༌,
ངའེ༌ སམ༌མ༌རག༌ ཁྱོ༌ཞ༌གུན༌ལ༌ འི༌བོ༌ གྱུས༌ ཆ༌གོས༌།
ངའ༌ ཇུང༌ཁན༌ ཚང༌མའེ༌ གའ༌མོའེ༌ ནས༌ཚུལ༌ལི༌ ཡར༌གྱས༌སི༌ ནང༌ང༌ རོགས༌ ཅོས༌ཏེ༌ ཨིན༌།
13 གྱལ༌པོའེ༌ ཁར༌རི༌ ནང༌ང༌ ཡོད༌ཁན༌ནི༌ མག༌མི༌ དང༌ ཞན༌མི༌ ཚང༌མའ༌,
ཡེ༌ཤུའ༌ ཞབས༌ཏོག༌ ཞུ༌ཅེས༌པོའེ༌,
ངའ༌ ཙོན༌ལ༌ ཀགས༌ཁན༌བོ༌ ཧ༌གོ༌ཏེ༌ ཨིན༌ནོག༌།
14 ཡང༌ ང༌ ཙོན༌ལ༌ ཀག༌ཅེས༌པོའེ༌,
གཙོ༌བོ༌ ཡེ༌ཤུའི༌ཀ༌ ཏད༌པ༌ བོར༌ཁན༌ སྤུན༌ མང༌པོ༌ཞིག༌གའང༌ སེམ༌སྟོབས༌ སྐྱེས༌ཏེ༌,
ཧམ༌པ༌ ཉམ༌པོ༌ ཇིག༌ཤེས༌ མེད༌པ༌,
དཀོན༌མཆོག༌གི༌ བཀའ༌ ཞན༌མ༌གུན༌ལ༌ ཤད༌ཨིན༌ ཨིན༌ནོག༌།
15 ཁ༌ཅིག༌གི༌ ངའེ༌ཀ༌ ཚིག༌ཅེས༌ ཡོངས༌ཏེ༌ མིང༌ཅན༌ གྱུར༌ཅེས༌སི༌ དོད༌པ༌ བོར༌ཏེ༌ མ༌ཤི༌ཀའེ༌ སྐོར༌ལ༌ ཤད༌ཅེས༌པོ༌ དེན༌བ༌ ཨིན༌ནོག༌།
ཨིན༌ནའང༌ ཞན༌ ཁ༌ཅིག༌གི༌ མ༌ཤི༌ཀའེ༌ སྐོར༌ལ༌ སེམས༌ ཟང༌པོའེ༌ ཐོག༌ནེ༌ ཤད༌ཨིན༌ ཨིན༌ནོག༌།
16 ཡ༌ཤའེ༌ ནང༌ང༌ མ༌ཤི༌ཀའེ༌ སྐོར༌ལ༌ ཤད༌ཁན༌གུན༌ལ༌,
དཀོན༌མཆོག༌གི༌ གའ༌མོའེ༌ ནས༌ཚུལ༌ སྐྱོབ༌ཅེས༌ལ༌ ང༌ འི༌རུ༌ བོར༌ར༌ ཛད༌ཁན༌བོ༌ ཧ༌གོ༌ཏེ༌ ཨིན༌ནོག༌།
17 ཨིན༌ནའང༌ ངའེ༌ཀ༌ ཚིག༌ཅེས༌ ཡང༌ མིང༌ཅན༌ གྱུར༌དོད༌ ཡོད༌ཏེ༌ མ༌ཤི༌ཀའེ༌ སྐོར༌ལ༌ ཤད༌ཁན༌གུན༌ནི༌ སེམས༌ ཟང༌པོའེ༌ ཐོག༌ནེ༌ མ༌ཤད༌ད༌,
ང༌ ཙོན༌ནི༌ ནང༌ང༌ ཡོད༌ཏུས༌ ནགས༌ མང༌ང༌ ཐོང༌ཅུག༌ཅེས༌སི༌ ཕིའ༌ ཤད༌ཨིན༌ ཨིན༌ནོག༌།
མ༌ཤི༌ཀའེ༌ ཕིའ༌ པ༌འུ༌ལུའི༌ མི༌ཚེ༌།
1:18-26
18 གྱུན༌ཚན༌བོ༌ ཟང༌པོ༌ ཨིན༌གྲོ༌ ཡ༌ ངན༌པ༌,
ཏེ༌བོ༌ ཁག༌ཅན༌ཞིག༌ མ༌ནོག༌,
ཁག༌ཅན༌བོ༌ ནི༌ མ༌ཤི༌ཀའེ༌ སྐོར༌ལ༌ གའ༌མོའེ༌ ནས༌ཚུལ༌ ཤད༌ཨིན༌ ཡོད༌ཁན༌བོ༌ ཨིན༌ནོག༌,
ཏེན༌ན༌བོའེ༌ཕིའ༌ ང༌ ཐད༌པོ༌ ཨིན༌།
འོ༌ན༌ ངའེ༌ ཏ༌རུང༌ངའང༌ ཐད༌པོ༌ ཅོ༌ཨིན༌།
19 ཁྱོ༌ཞ༌གུན༌ནི༌ མོས༌ལམ༌ དང༌ ཡེ༌ཤུ༌ མ༌ཤི༌ཀའེ༌ ཐུག༌ཉིད༌དི༌ རོགས༌ གྱུད༌ཏེ༌,
ངའ༌ ཏེ༌ རྡུག༌ངལ༌གུན༌ནེ༌ ཐར༌པ༌ ཐོབ༌ཅེས༌པོ༌ ང༌ གྱུས༌ཡོད༌།
20 ངའེ༌ སེམས༌སི༌ དོད༌པ༌ དང༌ རེ༌ཝ༌ ཆེན༌མོ༌བོ༌ མ༌ཤི༌ཀའེ༌ སྐོར༌ལ༌ ཤད༌ཅེས༌ལ༌ ཁྲེལ༌ མ༌ཁྲེལ༌ལ༌ སེམ༌སྟོབས༌ ཉམ༌པོ༌ ཤད༌ཅེས༌པོ༌ ཨིན༌,
ཀ༌ཟུག༌ ངའེ༌ ཅོ༌ཨིན༌ ཡོངས༌ཏེ༌ ཨིན༌།
ཏ༌ ང༌ ཤི༌ན༌ ཡ༌ ང༌ སོན༌ནའང༌,
ང༌རང༌ངི༌ མི༌ཚེའེ༌ ནང༌ང༌ མ༌ཤི༌ཀ༌ རྩི༌ཝ༌ ཁྱོང༌ཅེས༌པོ༌ ངའེ༌ དོད༌པ༌ ཨིན༌།
21 ངའ༌ སོན༌ཏེའ༌ དུག༌ཅེས༌པོ༌ ནི༌ མ༌ཤི༌ཀའ༌ རྩི༌ཝ༌ ཁྱོང༌ཅེས༌སི༌ ཕིའ༌ ཨིན༌,
ཡང༌ ཤི༌ཅེས༌པོ༌ ནི༌ ངའེ༌ ཕིའ༌ ཏེ༌སང༌ མང༌ང༌ ཕན༌ཐོགས༌ཅན༌ཞིག༌ ཨིན༌,
ཅིའ༌ཟེར༌ན༌ ང༌ ཁོང༌ ཉམ༌པོ༌ ལུས༌ཨིན༌།
22 ང༌ འི༌ ཟུགས༌པོའེ༌ ནང༌ང༌ དུག༌ན༌,
ངའེ༌ མ༌ཤི༌ཀའེ༌ ཕིའ༌ བྲས༌བུ༌ སྨིན༌ ཅུག༌ཨིན༌,
ཨིན༌ནའང༌ ང༌ ཅའང༌ གྱུས༌མེད༌ ཏེ༌ ཉིས༌ཀོའེ༌ ནང༌ནེ༌ ཀ༌བོ༌ གྱལ༌ལ༌ ཨིན༌།
23 ངའེ༌ སེམས༌སི༌ ནང༌ང༌ ཐེ༌ཚོམས༌ རག༌,
ཏེ༌ ཉིས༌ཀོའེ༌ ནང༌ནེ༌ ཀ༌བོ༌ ངའེ༌ ལྡམ༌ཨིན༌།
ང༌ འི༌ ཇིག༌རྟེན༌བོ༌ ཕངས༌ཏེ༌ མ༌ཤི༌ཀ༌ ཉམ༌པོ༌ ནམ༌ཁའེ༌ ནང༌ང༌ ལུས༌ཤེས༌སི༌ དོད༌པ༌ རག༌,
ཀ༌བོ༌ ངའེ༌ ཕིའ༌ མང༌ང༌ གྱལ༌ལ༌ཞིག༌ ཨིན༌།
24 ཨིན༌ནའང༌ ང༌ ཏ༌རུང༌ངའང༌ ཁྱོ༌ཞ༌གུན༌ ཉམ༌པོ༌ ལུས༌ཤེས༌པོ༌,
ཁྱོ༌ཞ༌གུན༌ནི༌ ཕིའ༌ མང༌ང༌ ཕན༌ཐོགས༌ ཆེའ༌ ཨིན༌ནོག༌།
25 ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ཅེས༌ དང༌ ཐད༌པོ༌ ཅོ༌ཅེས༌སི༌ ཕིའ༌,
ང༌ ཁྱོ༌ཞ༌གུན༌ ཉམ༌པོ༌ དུག༌ཅེས༌ ཡང༌ འི༌ ཟུགས༌པོའེ༌ ནང༌ང༌ ཏ༌རུང༌ངའང༌ ལུས༌ཤེས༌པོ༌,
ངའ༌ ཐེ༌ཚོམས༌ མེད༌པ༌ གྱུས༌ཡོད༌།
26 ངའ༌ ཡོང༌ང༌ཅིག༌,
ཁྱོ༌ཞ༌གུན༌ནི༌ མ༌ཤི༌ཀ༌ ཡེ༌ཤུའ༌ མང༌ང༌ སྟོད༌པ༌ ཕུལ༌ཨིན༌,
ཅིའ༌ཟེར༌ན༌ ཁོང༌ངི༌ ང༌ ཁྱོ༌ཞ༌གུན༌ནི༌ཀ༌ ལོགས༌ཏེ༌ ཁྱོང༌ང༌ ཛདས༌།
ནམ༌ཁའེ༌ ཡུལ༌མི༌ ཙོགས༌ལ༌ དུག༌གོས༌།
1:27-30
27 ཚང༌མའེ༌སང༌ ཁག༌ཅན༌བོ༌,
ཁྱོ༌ཞ༌གུན༌ནི༌ མ༌ཤི༌ཀའེ༌ གའ༌མོའེ༌ ནས༌ཚུལ༌ལི༌ ཕིའ༌ འོས༌པ༌ཅན༌ནི༌ མི༌ཚེ༌ཞིག༌ ཕུད༌གོ༌ཤེས༌ ཨིན༌ནོག༌།
ང༌ ཁྱོ༌ཞ༌གུན༌ ཡོད༌ས༌ ཡོངས༌ཏེ༌ ཐོང༌ཨིན༌ ཡ༌ ང༌ ཁྱོ༌ཞ༌གུན༌ནི༌ སྐོར༌ལ༌ ཚོར༌ཨིན༌,
གའ༌མོའེ༌ ནས༌ཚུལ༌ལི༌ ལོན༌བོའེ༌ ཕིའ༌,
ཁྱོ༌ཞ༌གུན༌ སེམས༌སི༌ ནང༌ང༌ ཅིག༌གྲིལ༌ སོང༌ཏེ༌ མག༌མི༌ ཅིག༌གི༌ ཚུལ༌ལ༌ ནོལ༌ཨིན༌ དུག༌ཅེས༌པོ༌ ང༌ གྱུས༌ཆེན༌།
28 ཅི༌ཚང༌མའེ༌ ནང༌ང༌ གྱབ༌གལ༌ ཅོ༌ཁན༌གུན༌ནི༌ ཀ༌ནེ༌ ཇིགས༌ མ༌ཇིགས༌།
ཁོང༌གུན༌ལ༌ མི༌ཇིགས༌ཤེས༌པོ༌ ནི༌ ཁོང༌གུན༌ མེད༌ཁན༌ ཅོའ༌ ཛད༌ཅེས༌,
ཡང༌ ཁྱོ༌ཞ༌གུན༌ སྐྱོབ༌བ༌ ཛད༌ཅེས༌སི༌ སྟགས༌ཤིག༌ ཨིན༌ནོག༌,
དཀོན༌མཆོག༌གི༌ ཏེ༌ ཚང༌མ༌ ཇུང༌ ཅུག༌ག༌ ཛད༌ཨིན༌།
29 དཀོན༌མཆོག༌གི༌ ཁྱོ༌ཞ༌གུན༌ལ༌ མ༌ཤི༌ཀ༌ ཏད༌པ༌ ཅོ༌ཅེས༌ ཅིག༌པོ༌ མན༌པ༌,
ཁོང༌ངི༌ ཕིའ༌ ནགས༌བར༌དོ༌ ཐོང༌ཅེས༌སི༌ རྩི༌ཝ༌བོ༌ སལ༌ལ༌ ཛད༌ཏེ༌ ཨིན༌།
30 ཁྱོ༌ཞ༌གུན༌ནའང༌ ངའ༌ ཇུངས༌ཁན༌ནི༌ ནགས༌ ཙོགས༌ ཐོང༌ཨིན༌ ཨིན༌ནོག༌,
ངའ༌ ནགས༌ ཐོང༌ཁན༌བོ༌ ཁྱོ༌ཞ༌གུན༌ནི༌ ཐོང༌ཏེ༌ ཨིན༌ནོག༌,
ཡང༌ ངའ༌ ཏ༌རུང༌ངའང༌ ཐོང༌ཨིན༌ ཡོད༌ཁན༌བོ༌ ཁྱོ༌ཞའེ༌ ཚོར༌ཨིན༌ ཨིན༌ནོག༌།