མར༌ཀུས༌སི༌ བྲིའ༌ ཛད༌ཁན༌ནི༌ གའ༌མོའེ༌ ནས༌ཚུལ༌།
མར༌ཀུས༌སི༌ སྤེ༌ཆའེ༌ སྐོར༌།
འི༌ སྤེ༌ཆའེ༌ ནང༌ང༌ འི༌ སྤེ༌ཆ༌ བྲི༌ཁན༌བོའེ༌ སྐོར༌ལ༌ ཅའང༌ བྲིས༌ཏེ༌ མེད༌ཏེ༌ ཨིན༌ནོག༌,
ཨིན༌ནའང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ནི༌ བྲིས༌ཁན༌གུན༌ གྱུད༌ཏེ༌ འི༌ སྤེ༌ཆ༌ བྲི༌ཁན༌ ཡོ༌ཧཱ༌ནན༌ མར༌ཀུས༌ ཨིན༌ཁན༌བོ༌ གྱུས༌ ཆའ༌ནོག༌།
ཁོའེ༌ སྐོར༌ལ༌ མ༌ཤི༌ཀའེ༌ སྐུ༌ཚབས༌གུན༌ནི༌ ཆག༌ལས༌སི༌ སྤེ༌ཆའེ༌ 12:12 དང༌ 25 ཡང༌ 15:37 ནང༌ང༌ བྲིའ༌ ཛད༌ཏེ༌ ཡོད༌ཏེ༌ ཨིན༌ནོག༌།
མར༌ཀུས༌ པི༌ཏྲར༌རི༌ ཕྲོ༌པ༌ མ༌ ཉེ༌མོ༌ཞིག༌ ཨིན༌པིན༌,
ཡང༌ ཁོའ༌ པི༌ཏྲར༌རི༌ ཏེ༌ཏུས༌སི༌ མ༌ཤི༌ཀ༌པ༌གུན༌ལ༌ ལབ༌ཞ༌ མང༌པོ༌ སལ༌ཁན༌གུན༌ གྱུད༌ཏེ༌ གཙོ༌བོའེ༌ མོལ༌ཁན༌ དང༌ ཆག༌ལས༌ ཚང༌མའེ༌ སྐོར༌ལ༌ ཚོར༌།
ཚོར༌ཏེ༌ སྟིང༌ནེ༌,
ཁོའེ༌ ཏེ༌ ཚང༌མ༌ ཚིར༌ ནང༌ཞིན༌ བྲིའ༌ ཛདས༌,
ཀ༌བོ༌ ང༌དང༌གུན༌ལ༌ དག༌ས༌ མར༌ཀུས༌སི༌ བྲིའ༌ ཛད༌ཁན༌ནི༌ གའ༌མོའེ༌ ནས༌ཚུལ༌ལི༌ ནང༌ང༌ ཐོབ༌བ༌ནོག༌།
ཆོས༌སི༌ ཁས༌པ༌ མང༌ཆེའ༌ འི༌ སྤེ༌ཆ༌བོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 17 དང༌ 27 ནི༌ ཉེ༌ཁོར༌ལ༌ བྲིའ༌ ཛད༌ཁན༌བོའ༌ ཁའ༌ཆམས༌ཏེ༌ ཨིན༌ནོག༌།
རོམ༌མི༌ གྱལ༌པོ༌ ནེ༌རོའེ༌ ཏད༌པ༌ཅན༌གུན༌ལ༌ ནགས༌ སྟན༌ཅེས༌ གོ༌ཟུག༌གི༌ སང༌ སྔུན༌ལ༌ མར༌ཀུས༌སི༌ འི༌ ཆག༌བྲིས༌པོ༌ ཁོང༌ རོམ༌མི༌ གྱལ༌སའེ༌ ནང༌ང༌ ཡོད༌ ཟ༌ནེ༌,
ཏེ༌རུ༌ དུག༌ཁན༌ ཡ༌ཧུ༌དཱ༌པ༌ མན༌ཁན༌ ཏད༌པ༌ཅན༌གུན༌ནི༌ ཕིའ༌ བྲིའ༌ ཛདས༌།
འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌གུན༌ ནི༌:
1 ཏད༌པ༌ ཅོ༌ཁན༌ དང༌ མ༌ཅོ༌ཁན༌ ཉིས༌ཀོའེ༌ སྙིང༌ངི༌ ནང༌ང༌ ཡེ༌ཤུ༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏན༌ཏན༌ ཅོ༌ཅུག༌ཅེས༌པོ༌ ཨིན༌ནོག༌།
2 མ༌ཤི༌ཀ༌པ༌གུན༌ལ༌ རྡུག༌ངལ༌ ཇུང༌ཅེས༌སི༌ ཕིའ༌ གྲལ༌གྲིག༌ ཅོ༌ཅེས༌ ཀ༌ཟུག༌ ཡེ༌ཤུའི༌ ཁོང༌ གྲུལ༌ལ༌ ཛད༌ཁན༌ནི༌ ལམ༌མི༌ཀ༌ གྲུལ༌ཁན༌གུན༌ལ༌ རྡུག༌ངལ༌ ཐོང༌ཨིན༌ མོལ༌ཏེ༌ ལན༌ མང༌པོ༌ ལབ༌བ༌ ཛདས༌།
3 ཡེ༌ཤུ༌ མ༌ཤི༌ཀ༌ དཀོན༌མཆོག༌གི༌ སྲས༌ ཨིན༌ ཨིན༌ནའང༌,
འི༌ ཇིག༌རྟེན༌ནི༌ཀ༌ ཞབས༌ཏོག༌ ལེན༌ཅེས༌ལ༌ མན༌པ༌,
ཞབས༌ཏོག༌ ཞུའ༌ལ༌ སྐྱོདས༌།
4 ཡེ༌ཤུའི༌ ཞབས༌ཏོག༌གི༌ ཆག༌ལས༌པོ༌ ནི༌,
མི༌གུན༌ སྡིག༌པའེ༌ ཀ༌ནེ༌ སྐྱོབ༌ཅེས༌པོ༌ ཨིན༌པིན༌།
5 ཡེ༌ཤུའི༌ ཆག༌ལས༌གུན༌ནི༌ ཁོང༌ ཅི༌ཚང༌མའེ༌,
༼ཡང༌ན༌ འི༌ ཇིག༌རྟེན༌,
སེམས༌ཉིད༌དི༌ ཇིག༌རྟེན༌,
ནམ༌ལ༌,
ཟུ༌མོ༌གུན༌ དང༌ ཤི༌ཅེས༌སི༌༽ གཙོ༌བོ༌ དང༌ སྤོན༌བོ༌ ཨིན༌ཁན༌བོ༌ སྟན༌ན༌ནོག༌།