ཡོ༌ཤུའ༌ སྤེ༌ཆ༌།
ཡ༌ཝའེ༌ ཡོ༌ཤུའ༌ བཀའ༌ སལས༌།
1:1-9
1
ཡ༌ཝའེ༌ ཞབས༌ཏོག༌པ༌ མོ༌ཟེས༌ ཀྲོངས༌ཏེ༌ སྟིང༌ནེ༌,
མོ༌ཟེས༌ལ༌ རོགས༌ཅོ༌ཁན༌ ནུན༌ནི༌ བུ༌ཚ༌ ཡོ༌ཤུའ༌ ཡ༌ཝའེ༌ མོལས༌,
2 “ངའ༌ ཞབས༌ཏོག༌ ཞུ༌ཁན༌ མོ༌ཟེས༌ ཤི༌ཏེ༌ མེད༌,
ཏ༌ ཁྱོ༌རང༌ དང༌ ཨིས༌ར༌ཨེལ༌པ༌ ཚང༌མ༌ ཡོར༌དཱན༌ ལྩངས༌པོ༌ རྒལ༌ཅེས༌ལ༌ གྲལ༌གྲིག༌ ཅོས༌ ཡང༌ གོ༌ཁྲིད༌ ཅོས༌ཏེ༌ ཁྱོ༌ཞའ༌ ངའེ༌ ཏང༌ཅེས༌ཅན༌ནི༌ ས༌ཀྱད༌ལ༌ ཁོང༌གུན༌ ཁྱེར༌།
3 མོ༌ཟེས༌ལ༌ ཁ༌ཆད༌ ཅོ༌ཁན༌ ནང༌ཞིན༌,
ངའེ༌ ཁྱོ༌ཞའེ༌ རྐང༌པ༌ བོར༌ཅེས༌ཅན༌ནི༌ ས༌ཀྱད༌ ཚང༌མ༌ ཁྱོ༌ཞའ༌ ཏང༌ཨིན༌།
4 ལྷོ༌ ཆོགས༌སི༌ ཐང༌སྟོང༌ ནེ༌ ཅང༌ ཆོགས༌སི༌ ལེ༌བ༌ནོན༌ནི༌ རི༌གུན༌ ཚོག༌པ༌ ཡང༌ ཤར༌ ཆོགས༌སི༌ ལྩངས༌པོ༌ ཆེན༌མོ༌ ཡུཕ༌རེ༌ཀྲས༌ ནེ༌ ནུབ༌ ཆོགས༌སི༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ ཁྱོ༌ཞའེ༌ ས༌ཀྱད༌ ཁྱེད༌ཨིན༌,
ཏེ༌ ནང༌ང༌ ཧེད༌པ༌གུན༌ནི༌ ཡུལ༌ ཚང༌མ༌ ཐེས༌ཏེ༌ ཨིན༌ནོག༌།
5 ཡོ༌ཤུའ༌,
ཁྱོ༌རང༌ངི༌ མི༌ཚེའེ༌ གང༌པོའེ༌ ནང༌ང༌ ཁྱོ༌རང༌ང༌ མག༌ ཏངས༌ཏེ༌ སུ༌ཞིག༌གིའང༌ ཕམ༌ཀལ༌ མི༌ཉན༌།
མོ༌ཟེས༌ ཉམ༌པོ༌ དུག༌ག༌ ཙོགས༌ལ༌ ང༌ ཏུས༌གྱུན༌ ཁྱོ༌རང༌ ཉམ༌པོ༌ དུག༌ཨིན༌།
ངའེ༌ ཁྱོ༌རང༌ མ༌ནེ༌ མི༌ཕང༌།”
6 “སེམས༌སི༌ ནང༌ང༌ ཤེད༌ཅན༌ གྱུར༌ཏེ༌ སྤོས༌པ༌ ལེན༌ ཅིའ༌ཟེར༌ན༌ ངའེ༌ ནའ༌ ཁུར༌ཏེ༌ ཁྱོ༌ཞའེ༌ ཕ༌མེས༌པོ༌གུན༌ལ༌ ཏང༌ཅེས༌སི༌ ས༌ཆའེ༌ ནང༌ང༌ ཁྱོ༌རང༌ངི༌ གོ༌ཁྲིད༌ ཅོས༌ཏེ༌ འི༌ མི༌གུན༌ ཁྱེར༌ཅེས༌ ཨིན༌ནོག༌།
7 ཤེད༌ཅན༌ གྱུར༌ཏེ༌ སྤོས༌པ༌ ཀྲག༌པོ༌ ལེན༌།
ངའེ༌ ཞབས༌ཏོག༌པ༌ མོ༌ཟེས༌སི༌ ཁྱོ༌རང༌ང༌ ཏངས༌ཁན༌ནི༌ ཁྲིམས༌ ཚང༌མ༌ ཁའ༌ཉན༌ཅེས༌ ཏན༌ཏན༌ ཅོས༌།
ཏེ༌གུན༌ནེ༌ གྱུར༌ཏེ༌ ཡས༌པ༌ ཡ༌ ཡོ༌མ༌ མ༌ཆ༌ ཏེ༌ནེ༌ ཁྱོ༌རང༌ ཀ༌རུ༌ ཆ༌ནའང༌ ཁྲངས༌པོ༌ ལུས༌ཨིན༌།
8 མི༌གུན༌ ཛོམས༌ས༌ འི༌ ཁྲིམས༌སི༌ སྤེ༌ཆ༌ ཏུས༌གྱུན༌ ཁྱོ༌རང༌ངི༌ སིལ༌གོས༌།
ཉིན༌ཚན༌ མེད༌པ༌ ཏེ༌གུན༌ ཇངས༌ཏེ༌ ཏེ༌ནང༌ང༌ བྲིས༌ཏེ༌ ཡོད༌ཁན༌ ཚང༌མ༌ ཁྱོ༌རང༌ངི༌ ཅོ༌ཅེས༌ལ༌ ནང༌ང༌ བོར༌།
ཏེ༌ནེ༌ ཁྱོ༌རང༌ ཁྲངས༌པོ༌ ལུས༌ཏེ༌ ཡར༌གྱས༌ ཆེན༌།
9 ངའེ༌ ཁྱོ༌རང༌ང༌ བཀའ༌ ཏང༌ངད༌,
ཤེད༌ཅན༌ གྱུར༌ཏེ༌ སྤོས༌པ༌ ལེན༌།
ཇིགས༌ མ༌ཇིགས༌ ཡ༌ སེམ༌ཤུག༌ ཆག༌ མ༌ཅུག༌ ཅིའ༌ཟེར༌ན༌ ཡ༌ཝ༌ ཁྱོ༌རང༌ངི༌ དཀོན༌མཆོག༌ ཁྱོ༌རང༌ ཀ༌རུ༌ ཆ༌ནའང༌ ཉམ༌པོ༌ ཡོད༌།”
ཡོ༌ཤུའེ༌ སྤུང༌གོལ༌ལི༌ ཕིའ༌ གྲལ༌གྲིག༌ ཅོས༌།
1:10-18
10 ཏེ༌ནེ༌ ཡོ༌ཤུའེ༌ ཨིས༌ར༌ཨེལ༌པའེ༌ གོ༌སྐྱོང༌གུན༌ལ༌ བཀའ༌ ཏངས༌,
11 “ཀུར༌ ཙུག༌ཏེ༌ ཡོད༌སའེ༌ ནས༌ས༌ ཚང༌མ༌ སོང༌ཏེ༌ མི༌གུན༌ལ༌ ཟན༌ གྲལ༌གྲིག༌ ཅོ༌ཅེས༌ལ༌ ཟེར༌ ཅིའ༌ཟེར༌ན༌ ཞག༌ སུམ༌པའེ༌ ཞག༌ག༌ ང༌དང༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ང༌དང༌ང༌ སལ༌ཅེས༌ཅན༌ནི༌ ས༌ཀྱད༌པོ༌ ལེན༌ན༌ལ༌ ཆ༌ཅེས༌ ཨིན༌ནོག༌།”
12 ཏེ༌ནེ༌ ཡོ༌ཤུའེ༌ རུ༌བེན༌ དང༌ གཱད༌དི༌ སྡེ༌ གང༌པོ༌ ཡང༌ མ༌ནས༌སའེ༌ སྡེ༌ ཕེད༌པོའ༌ བོདས༌ ཡང༌ ཟེརས༌,
13 “ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཁྱོ༌ཞའ༌ བཀའ༌ སལ༌ཁན༌བོ༌ ཨིད༌ཏུ༌ ཅོ༌ཤིག༌།
ང༌དང༌གུན༌ནི༌ དཀོན༌མཆོག༌ ཡ༌ཝའེ༌ ཁྱོ༌ཞའ༌ ཚུགས༌ཏེ༌ དུག༌ཅེས༌ལ༌ འི༌ ས༌ཀྱད༌པོ༌ སལ༌ལ༌ ཛད༌ཏེ༌ ཨིན༌ནོག༌།
14 ཁྱོ༌ཞའེ༌ ན༌མ༌,
ཕྲུ༌གུ༌ དང༌ སེམས༌ཅན༌ ཚང༌མ༌ འི༌ཀ༌ མོ༌ཟེས༌སི༌ ཁྱོ༌ཞའ༌ སལ༌ཁན༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ དུག༌ཅུག༌ ཨིན༌ནའང༌ ཁྱོ༌ཞའེ༌ མི༌ གྱལ༌ལ༌ ནོལ༌ཁན༌ ཚང༌མ༌ ཚོན༌ཆ༌ ཁུར༌ཏེ༌ ཡོར༌དཱན༌ ལྩངས༌པོའེ༌ འ༌ངོ༌ ཆོགས༌ལ༌ ཞན༌ སྡེ༌གུན༌ནི༌ སང༌ སྔུན༌ལ༌ སོང༌ཏེ༌ ཁྱོ༌ཞ༌རང༌ངི༌ སྤུན༌གུན༌ལ༌ རོགས༌ ཅོ༌གོས༌,
15 ནམ༌ཚོག༌པ༌ ཡ༌ཝའེ༌ ཁྱོ༌ཞའ༌ སལ༌ཁན༌ ཙོགས༌ ཁོང༌གུན༌ལ༌ ངལ༌ཚོ༌ མི༌སལ༌ ཡང༌ ནམ༌ཚོག༌པ༌ ཡ༌ཝ༌ དཀོན༌མཆོག༌གི༌ ཁོང༌གུན༌ལ༌ སལ༌ཅེས༌ཅན༌ནི༌ ས༌ཀྱད༌པོ༌ ཁོང༌གུན༌ནི༌ མི༌ལེན༌།
ཏེ༌སྟིང༌ནེ༌ མོ༌ཟེས༌སི༌ ཁྱོ༌ཞའ༌ སལ༌ཁན༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ འི༌ ས༌ཆའེ༌ ནང༌ང༌ ཞི༌དེ༌ ཉམ༌པོ༌ དུག༌ག༌ ཁྱོ༌ཞའ༌ ལོགས༌ཏེ༌ ཆ༌ནའང༌ གྲིག༌།”
16 ཁོང༌གུན༌ནི༌ ཡོ༌ཤུའ༌ ལན༌ཏངས༌,
“ཉེ༌རང༌ངི༌ ང༌ཞའ༌ བཀའ༌ སལ༌ཁན༌ ཚང༌མ༌ ང༌ཞའེ༌ ཅོ༌ཨིན༌ ཡང༌ ཉེ༌རང༌ངི༌ ང༌ཞའ༌ ཀ༌རུ༌ ལམ༌ཅུག༌ནའང༌ ང༌ཞ༌གུན༌ ཆེན༌།
17 ཏུས༌གྱུན༌ ང༌ཞ༌གུན༌ནི༌ མོ༌ཟེས༌སི༌ ཁའ༌ ཉན༌ན༌ ཙོགས༌ལ༌ ཉེ༌རང༌ངི༌ ཁའ༌ ཉན༌ཨིན༌ ཡང༌ མོ༌ཟེས༌ ཉམ༌པོ༌ ཞུག༌ས༌ ཙོགས༌ལ༌ ཡ༌ཝ༌ ཉེ༌རང༌ངི༌ དཀོན༌མཆོག༌ ཉེ༌རང༌ ཉམ༌པོ༌ ཞུགས༌ཤིག༌།
18 ཉེ༌རང༌ངི༌ བཀའ༌ ཏང༌ཁན༌གུན༌ལ༌ ཁའ༌ མ༌ཉན༌ན༌ ཉེ༌རང༌ངི༌ གོ༌ཁྲིད༌ ཅོ༌ཁན༌ནི༌ གྱབ༌གལ༌ ཅོ༌ཁན༌ ཚང༌མ༌ སད༌ཨིན༌།
ཤེད༌ཅན༌ གྱུར༌ ཡང༌ སྤོས༌པ༌ ལེན༌།”