SURA KATOLUNGGANINA NGGARI JAꞌI
YOHANES
Petabe
1
Sura eꞌi nggari jaꞌiku topanggeniaka topomparasaya, ka i Gayus, wega rapaku to mpuꞌu-mpuꞌu nipotoweku.
2 Wegaku, kuperapi ka Pue Alatala ala katuwumu mabelo-belo pade maroso koromu nasimbayu ewa pomparasayamu naroso.
3 Nadamba mpuꞌu raraku tempo bara sakuya mbaꞌa topomparasaya narata nanguli ka aku komi naroo nomparasaya pepatuduki to nakonona. Niuli ira komi mpuꞌu-mpuꞌu natuwu nantuki pepatuduki etu.
4 To mpuꞌu-mpuꞌu nompakadamba raraku etumo nangepe kareba to nanguli ana-anaku naroo natuwu nantuki pepatuduki to nakonona.
Pokainggu Gayus nitoiya Yohanes
5 Wegaku, komi mpuꞌu-mpuꞌu natutu nantulungi sampesuwu-sampesuwuta topomparasaya to nesai ri jaꞌimu, naupa komi daꞌapa nosinjani ante ira.
6 Ira nanguli ka topomparasaya ri seꞌi tempo kami nasiromu, neliu mpuꞌu towemu nantulungi ira. Jadi kuperapi, ane ira mesai woꞌu ri setu, tulungimo ira ante akala nabelo to nompakadamba rara Alatala, ala ira mamala mompapola polumako ira.
7 Ira nalau mompatolele Kareba Yesus ante daꞌa mantarima petulungi nuapa-nuapa nggari jaꞌi ntau to daꞌapa nomparasaya Alatala.
8 Sabana etu kita topomparasaya masipato mantulungi ira, ala kita woꞌu masintuwu ante ira mompatolele pepatuduki to nakonona nggari jaꞌi Alatala.
Neꞌe mompasiala pokainggu Diotrefes
9 Nariamo sura to nitulisiku ka topomparasaya ri setu, tapi i Diotrefes daꞌa nadota mantuki tesaku. Iꞌa aga madota ala tesana njambaꞌana ratuki ntau.
10 Jadi tempo aku marata ri setu kana kutesa mpakanoto ka komi nuapa pura to nikawiana, sabana powiana etu najaꞌa mpuꞌu. Nadea tesa dawa to najaꞌa mpuꞌu to niulina ewa kami. Daꞌa aga etu. Tempo roa-roata topomparasaya narata ri setu, iꞌa daꞌa nadota mantarima ira riara njapona. Pade iꞌa nombatagi topomparasaya ntanina ri setu mantarima ira. Pade ira to daꞌa nantuki tesana etu nisuwurakana nggari tatongo topomparasaya.
11 Wegaku, neꞌe mupasiala powia to nadenggona, tapi pasialamo to nabelona. Tau nompowia to nabelona iꞌa ana nu Alatala. Tapi tau nompowia to najaꞌana daꞌa ntoto nosinjani ante Alatala.
Yohanes nantoiya pokainggu Demetrius
12 Pura-pura tau nantoiya i Demetrius. Nggari pokaingguna to nanoana nanotomo ka ira iꞌa nantuki pepatuduki to nakonona. Kami woꞌu nantoiya iꞌa, pade ninjanimu nuapa to niuli kami namala raparasaya.
Tesa kaopuna
13 Danadea mpuꞌu tesa paraluu kutesa ka komi, tapi nipekiriku nabelopa neꞌe ratulisi riara sura.
14 Nisarumakaku mana masaeka aku momposirata komi pade mamala kita motesa mosirata mata.
15 Perapi Pue mombagane komi. Nadea tabe nggari jaꞌi roa-roata ri seꞌi. Pakasampe tabeku ri jaꞌi roa-roaku ri setu sambaꞌa bo sambaꞌa.