BUKU KATOLUONGUNA
Mazmur 73-89
Posisala katuwu tau najaꞌa bo tau nanjarumaka i PUE
73
Dade to nipowia Asaf.aMpuꞌu-mpuꞌu Alatala nabelo ri jaꞌi tau-tau to Israel,
ka tau to nagasa rarana.
2 Tapi aku sakedika nokanggaura nomparasaya,
ntora nalipo pomparasayaku,
3 sabana aku nasiriati ka tau nalanga rarana
tempo aku nanggita tau najaꞌa nadea pelabina.
4 Koro ira batena naroso,
bo daꞌa nirata nu juꞌa.
5 Ira daꞌa nombarasai kasusa to nabiasa nirasai manusia,
bo daꞌa nandasa ewa tau ntanina.
6 Etu sabana ira nompopokita inggu ira to nasombo,
bo batena noinggu nasoa.
7 Nggariara ntaꞌi ira nesuwu kajaꞌana;
nia jaꞌa ira daꞌa ria kaopu-opuna.
8 Ira nompongei-ngei ante tesa-tesa najaꞌa,
bo ante nalanga rara ira nonia mompadasa tau ntanina.
9 Ira nanguli sinjaꞌi Alatala ri suruga,
bo nangoa ri jaꞌi ntau ri dunia,
10 sampe todea Alatala woꞌu nompasiala pokainggu ira,
bo nomparasaya tesa-tesa ira.
11 Niuli tau-tau najaꞌa etu, “Daꞌa ninjani Alatala nuapa to najadina,
daꞌa ninjani Alatala to Neliu Nggalanga nuapa to nipowiata.”
12 Iwetumo tesa ntau najaꞌa;
ira aga nompasiromu mbara-mbara bo batena natuwu nasana.
13 Nompekiri katuwu ira etu nirasaiku daꞌa ria gunana aku moinggu magasa,
bara daꞌa ria gunana aku mana mowia silaka.
14 Sabana njaneo ntua aku nombarasai kasusa,
bo mpadondo-mpadondo aku nipandasa.
15 Aku daꞌa notesa ewa tau-tau nasombo to nanguli, “PUE Alatala daꞌa nanginjani nuapa to najadi.”
Ane rapana aku notesa iwetu, batuana aku nombabagiu todea-Mu.
16 Tapi tempo aku nompasimbuku manginjani katuwu ntau najaꞌa etu,
nakaja gaga kunjani.
17 Kaopuna aku nesua ri Sapo Mpepue,
pade ri setu ninjanikumo iwenu kaopu katuwu ntau najaꞌa.
18 Komi nombaboli ira ri jala to naringgaya,
pade nompakamba ira nanawu sampe namate.
19 Riara sampida mata ira kana maropu,
neliu nggasusa kaopu katuwu ira.
20 Ewa pangipi nalipo tempo tau nembangu naturu,
iwetu woꞌu ira kana malipo tempo Komi nasadia nompakaropu ira.
21 Tempo aku najuꞌa rara
bo daꞌa nasana pekiriku,
22 aku najadi tau nabodo bo daꞌa nanginjani nuapa-nuapa;
aku aga nasimbayu ewa binata ri ngayo-Mu.
23 Tapi naupa iwetu aku batena namosu ante Komi,
pade Komi batena nanjoko pale ngganaku.
24 Komi nanggeniaka aku ante pepatuduki-Mu,
pade ri eo nggapurina Komi kana mantarima aku ante pebila.
25 Aga Komi to nisarumakaku ri suruga;
aga Komi to nipolentoraku ri dunia.
26 Naupa koro bo raraku najadi nalente,
Komimo nompakaroso aku.
Komimo to nosanggani ante aku
sampe ri kasae-saena.
27 Tau-tau to nompalasi Komi kana maropu,
pura-pura tau to daꞌa natutu nomparasaya Komi kana Mupakaropu.
28 Tapi ane aku, neliu nggabelopa namosu ante Alatala.
Pue ALATALA nipajadiku petoꞌo pekalendu,
ala aku mamala mantesa mpengele-ngele powia-Na.