Babilɔnʋgbee bhlibhlie
18
‑Mʋʋ 'bɩgʋ,
'ɩn ɩn yia 'anzɩ ‑putu ‑yɔyɩ yalɩ 'bhʋda.
We ka 'tɩtɛ,
'ɩn we san nynia dʋdʋʋ da weee.
2 We 'kpɩa 'wʋ 'tɩtɛɛ,
we nɛɛ:
«Ɔ ka bhli,
Babilɔnʋgbe 'kadʋ ka bhli.
‑Bha zuzu 'nyii dɩlɩa ‑slɛɛn la.
Pʋɩnkazuzu weee ‑yɔ pʋɩnkazia weee
‑we wa nyɛa 'wʋ,
mʋ dɩlɩa ‑bha la.
3 Nɩɩ,
ɔ ka laga weee ɔ nʋ 'nyɛ sa duun,
'ɩn ‑mɔmɔ ‑ka ɔ nʋ 'ma,
'ɩn ‑mɔɔ ‑kanyɔ bhlilia ɔ mʋtnɩ lʋ.
Dʋdʋgʋ ‑nyɩmaa 'wlulapɩlɩnya ‑yɔ ɔ 'sɔ ka ‑budu 'wʋdɩ.
'Ya,
ɔ 'ŋnɩmnɩe 'kadʋʋ 'gbʋ,
dʋdʋ ‑gʋʋ ‑valɛpanya ka 'gwɛzi duun 'yɩ.»
4 'Ɩn ɩn yia wɛlɩ ‑putu 'bhʋa yalɩ 'nʋ,
we nɛɛ:
«Na nyɩma,
a 'tla Babilɔnʋgbe nʋkplɛ.
A ‑ka we lɛnʋ,
a 'na 'ka ɔ gbʋnyuu glaa ‑mɩ,
'ɩn sɩasɩe ‑we yia ɔ bhɩtɩa,
a 'na 'ka we 'wʋ ‑mɩ.
5 Nɩɩ,
ɔ gbʋnyii ylɩa yalɩ.
‑Lagɔ 'nɩ ɔ lɛnʋgbʋ 'nyii 'wʋdlʋ.
6 Sa ɔ nʋa ɔ nyɩma,
a nʋ 'sa ɔ.
‑We ɔ nʋa nyɩma ‑yla lɛ,
a nʋ we ‑zakpa 'sɔ lɛ ɔ ‑yla.
'Kɔpʋ ‑we 'wʋ ɔ 'nyɛnɩa nyɩma nʋ,
a palɩ ‑mɔ 'tɛlɔ nʋʋ ‑zakpa 'sɔ ɔ ‑yla.
7 'Dɛɛ 'ylimanɩe ‑yɔ 'ŋnɩmnɩe ɔ 'yɩbhaa.
We 'dɛɛ 'gbʋ,
a 'nyɛ ɔ 'sasʋkpa ‑sɩasɩe
‑yɔ guwʋwlʋwlʋe.
Ɔ nɛɛ ɔ 'dɛ ‑yla:
‹Ɩn ‑dɩ 'ŋnɩmnɩkpe ‑gʋla.
Ɩn 'nɩ ‑dʋgbaŋwnɔ,
'ɩn gu 'na 'ka 'mɩ 'wʋwlʋ.›
8 We 'dɛɛ 'gbʋ,
sɩasɩe 'kadɩ
‑we yia ɔ ylɩa 'ylɩ ‑bhlo nya,
mʋ nɩ:
nyɩmɛ ‑bhagu klaa,
guwʋwlʋwlʋe klaa,
we ‑yɔ ŋwɔ.
We 'dɛ weee yia ɔ ‑gbɛ yia.
'Ɩn ‑kosu 'ka ɔ ‑sie.
Cɩɩn,
Jejitapɛ ‑ɔ 'bhua ɔ ‑yɔgbʋ 'wʋ,
ɔ ka 'tɩtɛ.»
9 Nɩɩ,
dʋdʋgʋ ‑nyɩmaa 'wlulapɩlɩnya ‑yɔ ɔ ka ‑budu 'wʋdɩ.
Wa ka ɔ 'gwɛzi li.
We mɩ 'saa 'gbʋ,
‑kosu ‑we yia ɔ ‑siea,
wa ‑ka we gbeylo ‑yɔyɩ,
wia wa yia.
‑Gle wa yia 'paa wee 'gbee 'gbʋ.
10 Wa 'na 'ka we kwesi lanyni,
‑we ka gbʋ ‑wa,
nyanɔ wa yia nʋa wee sɩasɩe 'kadʋʋ 'gbʋ,
'ɩn wa 'ka gbaɛ:
«Gbʋnyuu!
Gbʋnyuu!
Babilɔnʋgbe 'kadʋ,
'gbe 'tɩtɛ,
‑Lagɔɔ 'cɛ 'kadʋ ka ɔ lasa
'lɛlɩ ‑bhlogbɔɔ nya.»
11 Nɩɩ,
dʋdʋ ‑gʋʋ ‑valɛpanya mɩ wida,
wa mɩ ‑gle 'pada wee 'gbee 'gbʋ.
Wa ‑valɛ'ɛ zɔ ‑slɛɛn.
12 Wa pɛlʋpa ‑li nɩ:
‑can klaa,
'gwɛzi 'pʋpa klaa,
tʋkpa ‑zɔnʋ klaa,
'pɛlɩlɩ klaa,
'naa ‑zɔnʋ klaa,
'naa ‑zalʋ ‑we ka ‑valɛ 'tɛa klaa,
‑mislɔ naa klaa,
we ‑yɔ suu 'yli ‑bhlo ‑bhlo ‑we wa'a 'yɩa bhebhe.
Tɛlɩtɛlɩli mɩ 'ya ‑bha,
tɔlʋa mɩ lʋɛgla nya,
tɔlʋa mɩ su ‑zɔnʋ nya,
tɔlʋa mɩ nɛtɛ ‑zɔnʋ nya,
'ɩn tɔlʋa mɩa tʋkpa 'nanɩ nya.
13 ‑Zapʋʋ nnanɩli mɩ ‑bha,
‑li ‑we ka ŋnɛ mɛnɩa,
we mɩ 'ya ‑bha,
‑mʋ ‑wa:
‑lasiklɔ klaa,
milɩ klaa,
we ‑yɔ 'wlɩ.
Nɩɩ,
nʋ klaa,
'kpɩ klaa,
bleya ‑yɔ we bhʋbhʋ klaa,
'bhlinya klaa,
bhlabhlɛnya klaa,
nɩmɛsʋʋnnya klaa,
we ‑yɔ ‑nɩmɛsʋʋʋn 'wʋgbizewotlonya mɩ 'ya ‑bha.
'Bhie,
galɩ ‑yɔ nyɩma tɔlʋa mɩ ‑bha.
14 Nɩɩ,
‑valɛpanya nɛɛ wee 'gbe ‑ylaɛ:
«‑Lu weee a 'yɩbhaa,
wa'a 'yɩ ‑slɛɛn we amaa ‑gbɛ.
‑We ka ‑valɛ 'tɛa,
‑we nanɩa 'yli,
we ka amaa ‑gbɛ mnɔ,
wa 'na 'ka 'maslɛɛn we 'yɩ amaa ‑gbɛ.»
15 ‑Valɛpanya,
‑wa 'yɩa 'gwɛzi wa ‑valɛ 'bɩ wee 'gbe 'wʋ,
wa 'na 'ka we kwesi lanyni.
Nyanɔ wa yia nʋa wee sɩasɩe 'kadʋʋ 'gbʋ.
Wia wa yia,
‑gle wa yia 'paa.
16 'Wʋ wa yia 'kpɩaɛ:
«Gbʋnyuu!
Gbʋnyuu!
Gbe 'kadʋ mɩa da nɩ,
'naa ‑zɔnʋ ‑yɔ 'naa ‑zalʋ
‑we ka ‑valɛ 'tɛa,
zlɩmɛ mʋ kaa we kuu.
‑Can klaa,
tʋkpa ‑zɔnʋ klaa,
we ‑yɔ 'pɛlɩlɩ,
'mʋ ɔ kpelia zlɩmɛ.
17 Nɩɩ,
'lɛlɩ ‑bhlogbɔɔ nya
we ‑li ‑zɔnʋ weee 'bhʋa la.»
Batoo ‑panya weee klaa,
‑wa plɩlɩa gumunyu ‑gʋ klaa,
we ‑yɔ ‑wa nʋa batoo 'wʋ lubho ‑yɔ ‑wa yɩa wanʋʋ lililu 'nyu ‑gʋ ‑valɛpapɩe 'bɩ,
wa 'dɛ weee ka wee 'gbe gwevla.
18 ‑Kosu mɩa wee 'gbe ‑sieda,
wa ‑ka we gbeylo ‑yɔyɩ,
'ɩn wa 'kpɩa 'wʋɛ:
«Gbe mɩa dɛ,
we 'sɔnʋ 'nɩ ‑mɩ.»
19 Bla wa slua 'wluo,
‑zugba wa wi,
wa pa ‑gle,
wa gbaɛ:
«Gbʋnyuu!
Gbʋnyuu!
Babilɔnʋgbe 'kadʋ,
nyɩma weee ‑wa plɩlɩa amaa ‑gbɛ
batoo 'wʋ gumunyu ‑gʋ,
wa ka 'gwɛzi ‑cɩan ‑zɛ amaa 'gbʋ.
Ama 'bhʋa la 'lɛlɩ ‑bhlo nya.»
20 Yalɩ,
wee 'gbe ka labhʋ,
a li 'mʋna.
‑Lagɔnyɩma,
ɔ tietienya,
ɔ gbʋʋ ‑falɩpanya,
amɩa li 'ya 'mʋna.
Nɩɩ,
‑Lagɔ ka wee 'gbe ɔ 'cɛ 'klʋslolu gbʋ ‑we we nʋa lɛ aɩn ‑yla,
we 'gbʋ.
21 Tɔʋn,
'anzɩ 'tɩtɛ yabhlo yia tʋkpa 'wʋbhu.
Nɩɩ,
wee tʋkpa wɔlʋ 'wʋ ‑glɩgbɔ 'bhisa.
We 'bhua we 'wʋ,
we vitelia we gumunyu lʋ,
'ɩn we nɛɛ:
«A yla,
'sa ‑bhlokpadɛ wa yia Babilɔnʋgbe vitelia,
'ɩn we 'ka labhʋ.
22 Wa 'na 'ka 'maslɛɛn lʋʋ 'nʋ Babilɔnʋgbe nʋkplɛ.
Wa 'na 'ka ‑petee wɛlɩ 'nʋ.
Wa 'na 'ka 'maslɛɛn lɛglɛ 'nʋ.
Wa 'na 'ka lubho ‑yɔ lubhonʋnya 'yɩ.
Wa 'na 'ka 'maslɛɛn 'wuu ‑jiji 'nʋ.
23 'Napɛɛ san 'na 'ka 'maslɛɛn lɩ
‑mɔ Babilɔnʋgbe nʋkplɛ.
Wa 'na 'ka nyimeslɔyu ‑yɔ ɔ 'ŋwnɔɔ wɛlɩ 'nʋ.
Nɩɩ,
amaa ‑valɛpanya 'ylia ‑benyi dʋdʋ weee ‑gʋ,
'ɩn a yia laga weee ‑dawli 'wʋnʋ
amaa ylisi nya.»
24 Nɩɩ,
‑Lagɔgbʋʋ ‑falɩpanya ‑yɔ ‑Lagɔnyɩmaa tlɩtlɩe,
we ‑yɔ nyɩma weee ‑wa wa 'bhaa dʋdʋ ‑gʋʋ tlɩtlɩe mɩ ɔ 'wlu.