Lɛglɛɛ gbunʋ
9
Nɩɩ,
'anzɩɩ gbunʋ bhlɩa we lɛglɛ,
‑zɛlɩya yabhlo ‑we bhlia dʋdʋ,
'ɩn ɩn yia we ‑yɔyɩ.
'Bhʋka ‑we 'nɩa bhloluda ‑ka,
we ‑laklɩ wa 'nyɛa wee ‑zɛlɩya yoo.
2 We ‑kalɩa wee 'bhʋka,
gbeylo ‑we 'wlʋa ‑klaaa gbeylo mʋ 'tlaa ‑mɔ,
'ɩn we yia 'ylʋ ‑yɔ ‑pɩpɛ ylumanɩ.
3 Wee gbeylo 'wʋ ‑gangannya 'tlaa,
'ɩn we yia dʋdʋ ‑gʋ lamneni.
'Ɩn ‑Lagɔ yia 'tɩtɛ ‑we ‑yɔ ‑klagbetaa 'tɩtɛ 'wʋwlʋa we 'nyɛ.
4 Wa nɛɛ we ‑yla we 'na nʋnʋ gbʋnyuu ‑petu ‑yla lɛ ‑nɩ,
we ‑yɔ sunya ‑yɔ ‑titi ‑wɔtʋ.
Nɩɩ,
nyɩma ‑wa 'nɩa ‑Lagɔɔ yibhelida 'klʋ ‑yɔ ‑ka,
'ma we 'kaa gbʋnyuu ‑yla lɛnʋ.
5 Wa 'nɩ wee ‑gangannya 'yoo 'nyɛ we 'ka nyɩma 'bha.
Wa nɛɛ nɩɩ,
we sɩalɩ wa bhabha 'cʋ gbu zɔ.
Sa ‑klagbeta ‑ka 'pa,
'ɩn ‑bha glopoa nɩ,
we nʋ 'sa we.
6 We bhla,
tlɩtlɩee da wa yia ‑talɩa,
'ɩn wa 'na 'ka we 'yɩ,
we tʋ yia nyɩma 'bhaa,
'ɩn kwɛɛ ‑mʋʋ yia wa ‑gwaa.
7 Wee ‑gangannya 'wlʋsa nɩmɛsʋʋn,
‑we wa mnazɩa la tʋgʋ ‑nʋ nya,
'ɩn ‑we ka 'wluo 'wlʋa nɛɛ ‑can ‑kloo mɩ ‑bha.
We 'klʋ ‑yɔ nyɩmaa 'klʋ 'wʋwlʋ.
8 We 'nyi 'wlʋ 'ŋwnɩɩ 'nyi.
'Ɩn we gla 'wlʋ ‑jlaa gla.
9 We ka nɛtɛbana 'wʋ,
'ɩn we ‑kapuee paa ‑jiji.
We ‑jiji mɩa,
we 'wlʋ nɛɛ nɩmɛsʋʋn duun mɩ ‑wotloo 'wʋgbizeda ‑gwagwɩe nya we 'ka tʋ ‑gʋa mnɩ.
10 Wee ‑gangannyaa gʋn 'wlʋsa wee ‑klagbetaa gʋn,
‑we mɩa 'ylitɛlɩda seenɩ 'bhisa.
We gʋn nya we mnenia we 'ka nyɩma ‑yla gbʋnyuu lɛnʋ 'cʋ gbu zɔ.
11 Wee ‑gangannya ka 'wlulapɩlɩnyɔ:
'bhʋka ‑we 'nɩa bhloluda ‑ka,
we 'wʋ ‑Kuzuu 'anzɩ we ‑mɩa.
Nɩɩ,
we 'ŋnɩ ‑wa Abadɔn zuifʋwɛlɩ 'wʋ,
Apoliɔn glɛkɩwɛlɩ 'wʋ.
We ji ‑wa ‑Lunyumonyɔ.
12 Tɩatɩa ‑gbʋnyuu 'plɩa dɛ,
nɩɩ,
we ‑tʋ lʋ 'sɔ.
Lɛglɛɛ gbelibhlonʋ
13 Nɩɩ,
'anzɩɩ gbelibhlonʋ bhlɩa we lɛglɛ nɩ,
'ɩn,
ɩn yia wɛlɩ yabhlo 'nʋ.
‑Lagɔɔ 'slakagʋsalɩluu gwɩgwɩ ‑mnʋa 'yli we 'bhʋa.
Wee 'slakagʋsalɩlu mɩ ‑can nya,
'ɩn we mɩa ‑Lagɔ 'yu.
14 Wee wɛlɩ nɛɛ wee 'anzɩɩ gbelibhlonʋ kaa lɛglɛ kwɛɛ ‑yla:
«'Anzɩ ‑mnʋa ‑we mɩa gbʋanda,
‑gbʋa 'kadʋ wa laa Eflatɩ kwesi,
‑ɩn ‑blo we ‑nya.»
15 Wee 'anzɩ ‑mnʋa mɩa,
‑Lagɔ ka we lamnazɩ ɔ lubhoo ‑nʋ nya.
Wee ‑zʋ nɩɩ cʋ nɩɩ ylɩ nɩɩ 'lɛlɩ tɛɩɩn ‑nʋ nya ɔ mnazɩa we la,
we 'ka mnɩ,
we 'ka nyɩma 'wʋsɩsalɩ,
'ɩn we 'ka nyɩma ta glaa ‑bhlo 'bha.
Nɩɩ,
wɛlɩ gbaa,
'ɩn wa yia we ‑blo.
16 'Slʋja ‑wa mɩa nɩmɛsʋʋn ‑gʋ,
wa zɛlɩa wa 'mɩ ‑yla,
wa ŋwɛ nyni miniɔn 'wlu ‑bhlo.
17 ‑Mɔ na 'yli ‑kakɩe 'wʋ,
‑wa ‑dɩa wee nɩmɛsʋʋn ‑gʋla,
sa ɩn 'yɩa wa ‑yɔ mʋ nɩ:
nɛtɛbana mɩa wa 'wʋ,
we ‑za ‑kosu 'bhisa,
we ylu yalɩ 'bhisa,
we ‑za lɩɩ ‑bhubhɛɛ nʋkplɛ 'bhisa.
Wee nɩmɛsʋʋnnyaa 'wlu 'wlʋsa ‑jlaa 'wlu.
'Ɩn ‑kosu klaa,
gbeylo klaa,
we ‑yɔ ‑bhubhui slo tlaa we ŋwɛɛ.
18 Nɩɩ,
‑kosu klaa,
gbeylo klaa,
we ‑yɔ ‑bhubhui slonya 'tlaa da we ŋwɛɛ nɩ,
mʋ ‑wa sɩasɩe ta.
Mʋ 'bhaa dʋdʋgʋ ‑nyɩma ta glaa ‑bhlo.
19 Nɩɩ,
wee nɩmɛsʋʋnnyaa 'tɩtɛ mɩa,
we mɩ we ŋwɛ ‑yɔ,
'ɩn we mɩa we gʋn ‑yɔ.
We gʋn 'wlʋsa tɩbhɛ.
We ka 'wlu,
we nya we nʋa nyɩma ‑yla gbʋnyuu lɛ.
20 Wee sɩasɩe 'nɩ dʋdʋgʋ ‑nyɩma weee 'bha.
Nyɩma ‑wa ‑tʋa ‑bha,
wa 'nɩ wa tɛlɩtɛlɩlu 'bɩbhʋ.
Wa mɩ ‑bhlokpadɛ 'kuzunya bʋbɔda,
tɛlɩtɛlɩlu mɩa ‑can nya klaa,
'gwɛzi nya klaa,
nɛtɛ nya klaa,
tʋkpa nya klaa,
we ‑yɔ su nya,
wa 'nɩ we bʋbʋe 'bɩbhʋ.
'Ɩn wee tɛlɩtɛlɩli mɩa,
we'e 'yɩ la,
we'e 'nʋ 'ɩn we'e nɔ.
21 Nɩɩ,
wa 'nɩ wa dlɩ 'bhiti,
wa mɩ nyɩma 'bhada ‑bhlokpadɛ,
wa mɩ ylisi lɛnʋda,
'ɩn wa ‑yɔ nyɩma weee dɩa ‑budu 'wʋ,
'ɩn tɔlʋa ylia 'wie.