A sɩsalɩ ‑Lagɔɔ Zuzu ‑yɔ yoyo ‑zuzu 'wʋ
4
Na bhelia ‑zɔnʋ,
‑wa ‑ka gba nɩɩ,
wa ka ‑Lagɔɔ Zuzu 'wʋ,
‑a 'na zʋlʋ wa 'dɛ weee dlɩ ‑gʋ ‑nɩ.
Yoyogbʋʋ ‑falɩpanya duun mneni da weee la.
We 'dɛɛ 'gbʋ a yla wa 'dɛ weee la,
'ɩn ‑wa ‑ka ‑Lagɔɔ Zuzu 'wʋ ‑ka,
a 'ka we 'jiyibheli.
2 Sa a 'kaa ‑Lagɔɔ Zuzu yibheli,
mʋ nɩ:
‑wa weee gbaa nɩɩ,
‑Zezu Klisɩ ka yɩcɛ 'wʋ yili,
wa ka ‑Lagɔɔ Zuzu 'wʋ.
3 ‑Wa wee'e gba 'saa,
wa 'nɩ ‑Lagɔɔ Zuzu 'wʋ ‑ka.
Zuzu ‑we mɩa wa 'wʋ,
Klisɩɩ tʋnyɩmɛɛ ‑nʋ ‑wa.
A ka 'nʋ nɩɩ,
yia we yia,
'ɩn ‑slɛɛn,
we mɩ dʋdʋ ‑gʋ.
4 Cɩɩn,
amɩa na 'ylaaslɩ,
a mɩ ‑Lagɔɔ ‑nʋ nya.
A ka yoyogbʋʋ ‑falɩpanya lu.
‑We ka gbʋ ‑wa,
Zuzu ‑ɔ mɩa aɩn 'wʋ,
ɔ ‑zi ‑we pɩlɩa dʋdʋgʋ ‑nyɩma 'wlulaa ‑nʋ.
5 Wamɩa mɩ dʋdʋgʋ ‑nyɩma nya,
'ɩn wa gbaa dʋdʋgʋ ‑nyɩmaa gbʋgba sɔlʋ.
We 'dɛɛ 'gbʋ dʋdʋgʋ ‑nyɩma pʋlʋa wa yukwli.
6 Nɩɩ,
‑amɩa mɩa,
‑a mɩ ‑Lagɔɔ ‑nʋ nya.
Nyɩmɛ ‑ɔ ‑yia ‑Lagɔ,
mɔ pʋlʋa ‑aɩn yukwli.
'Ɩn ‑mɔmɔ 'nɩa ‑Lagɔɔ ‑nʋ nya ‑mɩ,
‑mɔɔ salɩa ‑aɩn yukwli ‑gʋla.
Wee gbʋ nɩ ‑gʋ ‑a sɩsalɩa gbʋzɔnʋ ‑Zuzu ‑yɔ yoyo ‑zuzu 'wʋ.
‑Lagɔ mɩ zɛkalɩe nya
7 Na bhelia ‑zɔnʋ,
‑a kɩkalɩ zɛ,
‑we ka gbʋ ‑wa,
zɛkalɩe mɩa,
‑Lagɔɔ ‑gbɛ we bhʋa.
‑Wa weee ‑ka zɛkalɩdlɩ ‑ka,
‑Lagɔɔ 'yua wa ‑mɩa,
'ɩn wa ‑yi ‑Lagɔ.
8 ‑Wa 'nɩ zɛkalɩdlɩ ‑ka,
wa 'nɩ ‑Lagɔ ‑yi,
‑we ka gbʋ ‑wa,
‑Lagɔ mɩ zɛkalɩe nya.
9 Sa ‑Lagɔ ‑slolua ‑aɩn nɩɩ,
ɔ ‑kalɩ ‑amɩaa zɛ,
mʋ nɩ:
ɔ ka ɔ 'Yu yabhlogbɔɔ tie dʋdʋ ‑gʋ ‑a 'ka 'yliyɔgagɩe 'yɩ ‑mɔɔɔ gbɛgbɛɩn.
10 Zɛkalɩe mɩa,
we 'nɩ nɩɩ,
‑amɩa ‑kalɩ ‑Lagɔɔ zɛ.
Nɩɩ,
‑Lagɔ ‑kalɩa ‑amɩaa zɛ,
'ɩn ɔ yia ɔ 'Yu tie,
‑mɔɔ 'ka ‑mɔɔ 'dɛ wla 'slaka nya,
'ɩn ‑Lagɔ 'ka ‑amɩaa gbʋnyii 'wʋtɩ.
11 Na bhelia ‑zɔnʋ,
‑Lagɔ ‑ka 'sa ‑amɩaa zɛkalɩ nɩ,
we mɩ nɩɩ,
‑a kɩkalɩ zɛ.
12 Nɩɩ,
nyɩmɛ yabhlogbɔɔ 'nɩ ‑slɔ ‑Lagɔ 'yɩ.
‑A ‑ka zɛkɩkalɩ,
‑zugba ‑Lagɔ mɩ ‑aɩn 'wʋ,
'ɩn ɔ zɛkalɩe ka gba ‑aɩn 'wʋ.
13 Sa ‑a yibhelia we 'ji nɩɩ,
‑a mɩ ‑Lagɔ 'wʋ,
'ɩn ‑Lagɔ mɩ ‑aɩn 'wʋ,
mʋ nɩ:
ɔ ka ‑aɩn ɔ Zuzu 'nyɛ.
14 'Ɩn ‑a ka ‑Lagɔɔ 'Yu 'yɩ.
Dide ‑Lagɔ ka ɔ 'Yu tie ‑mɔɔ 'ka dʋdʋgʋ ‑nyɩma gbʋ 'wʋsa.
Nɩɩ,
‑amɩa ka we da 'yɩ,
'ɩn we gbʋdayɩwɛlɩ ‑a mɩa da gbada.
15 Nyɩmɛ ‑ka gba nɩɩ,
‑Zezu mɩ ‑Lagɔɔ 'Yu nya,
‑Lagɔ mɩ ‑mɔɔ 'wʋ,
'ɩn ‑mɔɔ mɩ ‑Lagɔ 'wʋ.
16 'Ɩn sa ‑Lagɔ ‑kalɩa ‑amɩaa zɛ,
‑a ‑yi ‑mʋʋ,
'ɩn ‑amɩaa dlɩ mɩ we ‑gʋ.
‑Lagɔ mɩ zɛkalɩe nya.
‑Ɔ ‑ka zɛkalɩdlɩ ‑ka,
ɔ mɩ ‑Lagɔ 'wʋ,
'ɩn ‑Lagɔ mɩ ɔ 'wʋ.
17 ‑We slolua nɩɩ,
‑Lagɔɔ zɛkalɩe ka gba ‑aɩn 'wʋ,
mʋ nɩ:
‑Lagɔɔ gbʋwʋbhu zlɩ,
dlɩ ‑a yia 'tɛmanɩa ɔ 'yu,
‑we ka gbʋ ‑wa,
sa ‑Zezuu Klisɩ mɩa,
'sa ‑amɩa mɩa dʋdʋ nɩ ‑gʋ.
18 Nyɩmɛ ‑ka zɛkalɩdlɩ ‑ka,
ɔ'ɔ nʋ nyanɔ.
Nɩɩ,
zɛkalɩdlɩ ‑we gbaa,
mʋ vua nyanɔdlɩ.
Nyɩmɛ ‑ka nyanɔdlɩ ‑ka,
we 'wlʋ sa nɩɩ,
‑Lagɔ dɩlɩ ɔ gbʋ.
We ‑ka 'sa ‑mɩ,
‑ɔ nʋa nyanɔ,
‑mɔɔ zɛkalɩe 'nɩ gba.
19 ‑Amɩa mɩa,
‑a ka zɛkalɩdlɩ.
‑We ka gbʋ ‑wa,
‑Lagɔ ‑kalɩa ‑amɩaa zɛ tɩa.
20 Nyɩmɛ ‑ka gba nɩɩ,
ɔ ‑kalɩ ‑Lagɔɔ zɛ,
'ɩn ɔ ‑ka ɔ bheli 'wʋnyɛ,
yokanyɔ ‑mɔɔ ‑mɩa.
Gbʋzɔnʋ ‑wa,
nyɩmɛ 'nɩ ɔ bheli ‑ɔ ɔ yɩa ‑yɔɔ zɛkalɩ,
ɔ 'nɩ mneni ɔ 'ka ‑Lagɔ ‑ɔ ɔ'ɔ 'yɩa ‑yɔɔ zɛkalɩ.
21 Nɩɩ,
tite ‑we ‑Lagɔ 'nyɛa ‑aɩn,
mʋ nɩ:
nyɩmɛ ‑ɔ ‑ka ‑Lagɔɔ zɛkalɩ,
we mɩ nɩɩ,
ɔ ‑kalɩ ɔ bhelii zɛ.