‑Lagɔnyɩmaa 'ŋwnɩ ‑yɔ wa 'lowliaa ladɩ sɔ
3
'Ŋwnɩ,
amɩa zʋ 'ya amɩaa 'lowlia 'nʋŋwɛ.
'Ɩn wa tɔlʋa ‑wa'a ŋwnua ‑Lagɔgbʋ ‑yɔ,
amɩaa nɔnɔbhʋ ‑zɔnʋʋ 'gbʋ,
wa 'nɩ wa ‑yla ‑Lagɔgbʋ gbaoo,
wa 'ka ‑Zezuu gbʋ ‑yɔŋwnu.
2 'Ɩn wa 'ka amɩaa nɔnɔbhʋ mɩa ‑mɔwlʋda ‑yɔ nyɩmɛɛ 'nʋŋwɛzʋzʋe ‑yɔyɩ,
'ɩn we 'ka wa dlɩ kwɛzɩ.
3 Amɩaa 'ylinanɔ 'na ‑zɛlɩ ku ‑yɔɔ 'ylinanɔ ‑nɩ,
‑we ‑wa 'nyii ‑yɔmnazɩe,
‑can kpelie,
we ‑yɔ ‑bana ‑zɔnʋʋ 'wʋplaplɩe.
4 Nɩɩ,
amɩaa 'ylinanɔ ‑zɛ kuzɔɔ 'ylinanɔ ‑we mɩa dibhe 'wʋ,
we'e 'bhʋa la.
‑We ‑wa dlɩ ‑zɔnʋ ‑yɔ dlɩ ‑dlɔɔ,
mʋ 'ylia ‑Lagɔ 'yliya 'wʋ.
5 Zlɩmɛ ‑Lagɔŋwnɩ ‑wa dɩa ‑Lagɔ dlɩ 'wʋ,
'sa wa namanɩa wa 'dɛ 'yli sa.
Wa 'lowlia wa zʋa 'nʋŋwɛ.
6 'Sa Sala zʋa Ablaamʋ 'nʋŋwɛ,
'ɩn ɔ yia ɔ la:
«Na ‑kanyɔ»,
'ɩn ‑slɛɛn a ka ɔ 'ŋwnɩyua ‑zɛ,
a ‑ka gbʋzɔnʋ lɛnʋda ‑mɩ,
‑zugba a'a nʋ nyanɔ gbʋ yabhlogbɔɔ kwɛɛ.
7 Amɩa 'ŋwnɩɩ 'lowlia 'ya,
a yibheli amɩaa 'ŋwnɩ kpa sa,
a ‑yɔ wa 'sɔɔ lɛnʋgbʋ weee 'wʋ.
A yibheli we 'ji nɩɩ,
wa 'nɩ latɛ aɩn 'bhisa.
A zʋbha wa,
‑we ka gbʋ ‑wa,
'yliyɔgagɩe ‑we 'nɩa bhloluda ‑ka,
‑we ‑Lagɔ wlaa,
'yɩa wa yia we aɩn 'bhisa 'ya.
A ‑ka 'sa nʋ,
‑lu yabhlogbɔɔ 'na 'ka amɩaa ‑Lagɔbhubhoe wɛlɩ 'yoo ‑kʋlʋ.
A 'yɩ dlɩ ‑bhlo
8 Nɩɩ,
‑slɛɛn,
a 'dɛ weee 'yɩ dlɩ ‑bhlo.
A kɩkalɩ zɛ ‑Lagɔbhelia 'bhisa.
A ‑ka nyazɩdlɩ,
'ɩn ‑ɔ ‑ka ‑mɩ,
ɔ tɩ ɔ 'dɛ 'wʋ 'kienyi ɔ ‑libheyi 'yu.
9 A 'na 'palɩ gbʋnyuu 'bɩgʋ gbʋnyuu ‑nɩ,
a 'na 'palɩ vɛlɩe 'bɩgʋ vɛlɩe ‑nɩ.
Nɩɩ,
a 'palɩ we 'bɩgʋ 'nyulaŋwna wɛlɩ nya.
We 'gbʋ,
‑Lagɔ yia aɩn la,
ɔ 'ka aɩn 'nyulaŋwna.
10 ‑Lagɔsɛbhɛ nɛɛ:
«Nyɩmɛ ‑ɔ ‑ka gba ɔ 'ka 'pipee ‑zɔnʋ 'yɩ,
'ɩn ɔ 'ka 'mʋna 'wʋ ‑mɩ 'ylɩ weee nya,
gbʋnyuu 'na 'tlalɩ ɔ ŋwɛɛ ‑nɩ,
'ɩn ɔ 'na 'tʋbhʋlʋ yo ‑nɩ.
11 Ɔ palɩ gbʋnyuu lɛnʋe ‑blɩgʋ,
ɔ nʋ gbʋzɔnʋ lɛ.
'Ɩn ɔ ‑talɩ 'wʋtʋtʋe ‑dlɔɔɔ da sɔ 'sɔ nya.
12 Nɩɩ,
nyɩma ‑wa mɩa tɩklɩɩ,
Jejitapɛɛ 'yli mɩ wa ‑yɔ,
'ɩn ɔ pʋlʋa wa ‑Lagɔbhubhoe wɛlɩ yukwli.
'Ɩn ɔ sɔlʋa gbʋnyuu ‑lɛnʋnya ‑yɔ 'wʋ.»
A mnazɩ la, ‑we ka 'gbʋ, amɩaa dlɩ 'tɛa 'wʋ, a 'ka we gba
13 A ‑ka gbʋzɔnʋ lɛnʋda ‑mɩ dlɩ weee nya,
nyɔɔ 'ka aɩn ‑yla gbʋnyuu lɛnʋa?
14 We ‑ka nɩɩ,
gbʋzɔnʋʋ lɛnʋee 'gbʋ a mɩ sɩada,
'mʋna mɩ amɩaa ‑nʋ nya.
«A 'na nʋnʋ nyanɔ nyɩma kwɛɛ ‑nɩ,
'ɩn amɩaa dlɩ 'na sumanɩ ‑nɩ.»
15 Nɩɩ,
a 'ylimanɩ Klisɩ ‑mɔ dibhe 'wʋ,
amɩaa ‑Kanyɔ nya.
'Ɩn a mnazɩ la 'kɔmʋʋ,
‑we ‑gʋ amɩaa dlɩ 'tɛa 'wʋ,
nyɔɔo nyɔɔ ‑ka aɩn layɩbha,
a 'ka we 'ji gba ɔ ‑yla.
16 'Ɩn a nʋ we lɛ dlɩ ‑dlɔɔ ‑yɔ nyɩmɛɛ 'nʋŋwɛzʋzʋe nya.
Amɩaa 'wlukʋʋn ‑dlɔɔ ‑mɩ tɩklɩɩ,
'ɩn ‑wa dɩa aɩn gbʋ 'wlu,
'ɩn ‑wa gbaa amɩaa nɔnɔbhʋ Klisɩ 'wʋʋ daa gbʋnyuu,
'ɩn zʋ 'ka wa 'bha.
17 We ‑ka ‑Lagɔɔ dʋmagbʋ,
nɩɩ,
a ‑ka gbʋzɔnʋ lɛnʋda ‑mɩ,
a sɩa,
‑mʋʋ nanɩ 'yli,
we ‑zi a 'ka sɩa gbʋnyuu lɛnʋe nya.
Sa Klisɩ sɩa amɩaa 'gbʋ
18 Nɩɩ,
Klisɩɩ 'dɛbhie ‑gbolu tlɩlɩ 'wʋ ‑zakpa ‑bhlogbɔɔ,
gbʋnyuuu 'gbʋ.
Mɔ ‑wa gbʋzɔnʋʋ lɛnʋnyɔ,
mɔ tlɩa 'nyiicɩaan 'gbʋ,
'ɩn ɔ 'ka aɩn ‑Lagɔɔ ‑gbɛ kwa.
Wa ka ɔ nyɩmɛ ku 'bha,
'ɩn ‑Lagɔ yia ɔ 'wʋbhu tlɩtlɩe lʋ Zuzu 'Pʋpa nya.
19 Ɔɔ Zuzu nya ɔ mnɩa gbʋ gbaa zuzunya mɩa ‑kaslʋ 'wʋ ‑yla.
20 Nyɩma ‑wa 'nɩa zlɩmɛ ‑Lagɔɔ wɛlɩ 'nʋŋwɛ zʋ,
da ‑Lagɔ mɩa wʋda dlɩtie nya,
bhla ‑we nya Nowee bhlaa batoo 'wʋ,
wa zuzu ‑wa.
We bhla,
nyɩma ya 'sɔ ‑lɛ ‑wa ‑gblaa wee batoo 'wʋ,
wa gbeta,
ma 'pʋa 'nyu ‑gʋ.
21 Wee 'nyu ‑mɩnɩ,
batizee batizee ‑we saa ‑zɛɛn da aɩn gbʋ 'wʋ,
we 'wʋwlʋ ‑wa.
Wee batizee batizee 'nɩ pʋɩn ku ‑yɔsasɩe 'nyu nya.
Nɩɩ,
mʋ slolua ‑Lagɔ 'bɩ ‑a yia nɔa 'wlukʋʋn ‑dlɔɔ nya.
‑Zezu Klisɩ ka 'wʋsɔ tlɩtlɩe lʋʋ 'gbʋ,
wee batizee batizee puea aɩn.
22 ‑Zezu Klisɩ mnɩa yalɩ,
ɔ ‑dɩ ‑Lagɔɔ lilisɔlʋ la.
‑Mɔ ɔ pɩlɩa 'anzɩ ‑yɔ senya,
we ‑yɔ yalɩɩ 'tɩtɛ weee 'wlu la.