Gbʋslolue tɩklɩɩ
2
Nɩɩ,
‑mɩ,
‑we ‑yɔ ‑slolue tɩklɩɩ 'sɔ mɩa ‑bhlo,
‑ɩn ‑slolu we.
2 ‑Ɩn gba nyɩma kpasɩ ‑yla nɩɩ,
wa ‑mɩ 'cɛ.
Wa ‑mɩ 'nʋŋwɛzʋ sa,
wa yibheli wa 'dɛ,
'ɩn wa ‑mɩ gege wa dlɩzʋzʋe klaa,
zɛkalɩe klaa,
we ‑yɔ wa dlɩtie 'wʋ.
3 'Sa ‑bhlokpadɛ,
gba 'ŋwnɩ kpasɩ ‑yla nɩɩ,
wa tɩlɩ wa 'dɛ ‑Lagɔ.
Wa 'na ‑zɛlɩ nyɩmaa 'ŋnɩ ‑nyumɔnya ‑yɔ nʋʋ galɩ ‑nɩ.
Wa ‑mɩ 'ŋwnɩɩ 'dɩzʋnya ‑zɔnʋ nya.
4 We ‑ka 'sa ‑mɩ,
'ɩn wa slolua 'ŋwnɩ ‑dɔgbʋ ‑maa 'lowlia ‑yɔ ‑maa 'yuaa zɛkalɩe.
5 'Ɩn wa slolua ‑maa ‑maaa 'dɛɛ yibhelie ‑yɔ ‑maaa 'lowlii 'dɛbhlo ‑yla ‑mɩmɩe,
we ‑yɔ ‑glɩgbɔkaŋwnɩ ‑zɔnʋ ‑wa zʋa wa 'lowlia 'nʋŋwɛ.
Nɩɩ,
‑mʋʋ yi 'wlʋ nɩɩ,
nyɩmɛ yabhlo gba gbʋ 'nyuu ‑Lagɔwɛlɩɩ daa.
6 'Sa ‑bhlokpadɛ,
gba nyimesia ‑yla nɩɩ,
wa yibheli wa 'dɛ.
7 ‑Mɩ,
‑na 'dɛ,
‑ɩn ‑mɩ sɔ weee lʋ ladɩdɩe ‑zɔnʋʋ 'ylislolunyɔ nya.
‑Ɩn ‑ka ‑sloluda ‑mɩ,
‑ɩn nʋ we lɛ sazɔnʋ sa,
‑ɩn 'na kpʋkplalɩ ‑nɩ.
8 Nɩɩ,
‑ɩn gba wɛlɩ tɩklɩɩ ‑we zɔ wa 'nɩa mneni wa 'ka 'ŋwuŋwe.
We ‑ka 'sa ‑mɩ nɩ,
'ɩn ‑na kpɛlɩkpɛlɩnya zɛa zʋʋ nɩma,
gbʋ 'nyuu yabhlogbɔɔ ‑we wa 'kaa gba ‑amɩaa daa,
we 'nɩ ‑mɩɩ 'gbʋ.
9 We mɩ nɩɩ,
galɩ pɩlɩ wa ‑cɩan zɔla gbʋ weee 'wʋ,
'ɩn wa ‑tʋ ‑maa dʋmagbʋ lɛnʋda.
Wa 'na kpɛlɩ ‑maa ŋwɛ ‑yɔ ‑nɩ,
10 'ɩn wa 'na ylili ‑maa ‑lu yabhlogbɔɔ ‑nɩ.
Nɩɩ,
‑we wa 'kaa lɛnʋ,
mʋ ‑wa nɩɩ,
wa ‑slolu 'ylɩ weee nya nɩɩ,
wa mɩ galɩ ‑zɔnʋ nya wa ‑cɩan ‑yla.
We ‑ka 'sa ‑mɩ nɩ,
gbʋslolue ‑we gbaa ‑amɩaa Gbʋwʋsanyɔ ‑Lagɔɔ gbʋ,
'ɩn wa nyɛa we 'ŋnɩ sɔ weee lʋ.
11 Nɩɩ,
‑Lagɔ ka ɔ 'nanɩdlɩ zlɩ 'klʋ wleli.
Mʋ 'wʋ nyɩma weee gbʋwʋbhʋbhʋe bhʋa.
12 'Ɩn nɔnɔbhʋ ‑we ‑yɔ ‑Lagɔ 'sɔ'ɔ gbaa ‑yɔ dʋdʋgʋ ‑nyɩmaa dlɩwʋnynili,
sa ‑a 'kaa we 'bɩbhʋ,
mʋ slolua we ‑aɩn.
'Ɩn ‑amɩaa nɔnɔbhʋ 'ka ‑mɩ 'cɛ dʋdʋ nɩ ‑gʋ,
we 'ka ‑mɩ tɩklɩɩ ‑Lagɔ 'nʋŋwɛzʋ sa.
13 Nɩɩ,
'mʋna ‑ylɩ ‑we ‑a dɩa dlɩ 'wʋ,
'sa ‑a 'kaa we wʋ.
‑Zezu Klisɩ ‑ɔ ‑wa ‑amɩaa ‑Lagɔ 'kadʋ,
we ‑yɔ ‑amɩaa Gbʋwʋsanyɔ,
we zlɩ ɔ 'ŋnɩmnɩe 'kaa bhlewlʋ.
14 Ɔɔ ‑Zezu ka ɔ 'dɛ wla ‑amɩaa 'gbʋ,
ɔ 'ka ‑aɩn 'wʋzɩtɩ gbʋnyuu weee kwɛɛ,
'ɩn ɔ 'ka ‑aɩn ‑mɔwlʋlʋ ‑a 'ka nyɩma ‑wa mɩa ɔ 'dɛbhlogbɔɔɔ ‑nʋ nya ‑zɛ,
'ɩn ‑a 'ka ‑gʋladoluda ‑mɩ ‑lu ‑zɔnʋ lɛnʋda.
15 Nɩɩ,
‑we ‑ɩn 'kaa ‑slolu 'tɩtɛ nya,
‑zugba ‑na pa ‑na yukwlipʋlʋnya 'kʋayli,
we ‑yɔ ‑na sʋbha wa lɛnʋgbʋ 'nyii wa 'klʋ,
mʋ mɩa dɛ.
Nyɩmɛ yabhlogbɔɔ 'na tlili ‑mɩ 'yli la ‑nɩ.